Ħelsien Glorjuż fil-​Qrib Għal Ulied Alla

“Il-​ħolqien jinsab taħt il-​frugħa . . . bit-​tama li l-​ħlejjaq huma wkoll għad ikunu meħlusa mill-​jasar tat-​taħsir u jiksbu l-​ħelsien tal-​glorja taʼ wlied Alla.”—RUMANI 8:20, 21.

1. Is-​sagrifiċċju taʼ Ġesù kif kien irrappreżentat f’Jum l-​Espjazzjoni?

JEHOVAH ta l-​Iben uniġenitu tiegħu bħala sagrifiċċju taʼ rahan li fetaħ it-​triq għall-​ħajja fis-​sema għal 144,000 bniedem u għal prospetti taʼ ħajja eterna fuq l-​art għall-​bqija taʼ l-​umanità. (1 Ġwann 2:1, 2) Bħalma nnotajna fl-​artiklu taʼ qabel, is-​sagrifiċċju taʼ Ġesù għall-​Kristjani mnisslin bl-​ispirtu kien irrappreżentat meta l-​qassis il-​kbir taʼ Iżrael kien jissagrifika barri bħala offerta tad-​dnub għalih innifsu, għan-​nies taʼ daru, u għat-​tribù taʼ Levi f’Jum l-​Espjazzjoni annwali. Fl-​istess jum, kien jissagrifika bodbod bħala offerta tad-​dnub għall-​Iżraeliti l-​oħrajn kollha, saħansitra bħalma s-​sagrifiċċju taʼ Ġesù se jkun taʼ benefiċċju għall-​umanità inġenerali. Bodbod ħaj ġarr simbolikament id-​dnubiet kollettivi tal-​poplu taʼ matul is-​sena li tkun għaddiet, billi jisparixxi bihom fix-​xagħri.a—Levitiku 16:7-15, 20-22, 26.

2, 3. Xi tfisser l-​istqarrija taʼ Pawlu li nsibu f’Rumani 8:20, 21?

² Wara li l-​appostlu Pawlu fisser il-​fatturi prinċipali tat-​tama tal-​bnedmin li kellhom isiru “wlied Alla” fis-​sema, hu qal: “Il-​ħlejjaq kollha qegħdin jistennew ħerqana r-​rivelazzjoni taʼ wlied Alla; għax il-​ħolqien jinsab taħt il-​frugħa​—mhux minn rajh, imma minħabba Alla li xeħtu taħtha​—bit-​tama li l-​ħlejjaq huma wkoll għad ikunu meħlusa mill-​jasar tat-​taħsir u jiksbu l-​ħelsien tal-​glorja taʼ wlied Alla.” (Rumani 8:14, 17, 19-21) Xi tfisser din l-​istqarrija?

³ Meta Adam, l-​ewwel missier tagħna, ġie maħluq bħala bniedem perfett, hu kien “bin [jew, wild] Alla.” (Luqa 3:38) Peress li dineb, hu ġie taħt il-​“jasar tat-​taħsir” u b’hekk għadda dan l-​istat għal fuq ir-​razza umana. (Rumani 5:12) Alla ppermetta li l-​bnedmin jitwieldu ffaċċjati mill-​“frugħa” minħabba l-​imperfezzjoni li wirtu, imma ppreżenta tama permezz tan-​“nisel,” Ġesù Kristu. (Ġenesi 3:15; 22:18; Galatin 3:16) Apokalissi 21:1-4 jindika ż-​żmien meta ‘l-​mewt, il-​biki, l-​għajat, u t-​tbatija ma jkunux iżjed.’ Ladarba din hija wegħda lill-​“bnedmin,” nistgħu b’hekk inkunu żguri li soċjetà ġdida taʼ bnedmin fuq l-​art li tkun tgħix taħt il-​ħakma tas-​Saltna se ġġarrab restawr tal-​moħħ u tal-​ġisem għal saħħa totali u ħajja taʼ dejjem bħala “wlied Alla” fuq l-​art. Matul ir-​Renju t’Elf Sena taʼ Kristu, bnedmin ubbidjenti “għad ikunu meħlusa mill-​jasar tat-​taħsir.” Wara li jkunu wrew il-​lealtà lejn Jehovah matul test finali, huma se jinħelsu għal dejjem mid-​dnub u l-​mewt li wirtu. (Apokalissi 20:7-10) Dawk fuq l-​art imbagħad se “jiksbu l-​ħelsien tal-​glorja taʼ wlied Alla.”

Qed Jgħidu “Ejja!”

4. X’ifisser li ‘tieħu b’xejn l-​ilma tal-​ħajja’?

⁴ X’tama meraviljuża hija mqiegħda quddiem il-​bnedmin! Mhux taʼ b’xejn li Kristjani mnisslin bl-​ispirtu li għadhom fuq l-​art qegħdin b’żelu jieħdu l-​inizjattiva f’li jgħidu lil oħrajn dwarha! Bħala wħud li se jsiru parti mill-​“għarusa” tal-​Ħaruf igglorifikat, Ġesù Kristu, il-​fdal midlukin huma involuti fit-​twettiq taʼ dan il-​kliem profetiku: “L-​Ispirtu u l-​Għarusa jgħidu: ‘Ejja!’ Min jismaʼ, ħa jgħid: ‘Ejja!’ U min hu bil-​għatx, ħa jiġi, ħa jieħu b’xejn min irid l-​ilma tal-​Ħajja.” (Apokalissi 21:2, 9; 22:1, 2, 17) Le, il-​benefiċċji tas-​sagrifiċċju bħala rahan taʼ Ġesù m’humiex limitati għall-​144,000 li huma midlukin. L-​ispirtu t’Alla jibqaʼ jaħdem permezz tal-​fdal tal-​klassi taʼ l-​għarusa fuq l-​art f’li jgħid “Ejja!” Kulmin jismaʼ u jħossu bil-​għatx għat-​tjieba mistieden jgħid “Ejja,” billi japprofitta ruħu mill-​provvediment abbundanti taʼ Jehovah għas-​salvazzjoni.

5. Ix-​Xhieda taʼ Jehovah huma ferħanin li għandhom lil min fosthom?

⁵ Ix-​Xhieda taʼ Jehovah għandhom fidi fil-​provvediment t’Alla għall-​ħajja permezz taʼ Ġesù Kristu. (Atti 4:12) Huma ferħanin li għandhom f’nofshom uħud taʼ qalb onesta li jixtiequ jitgħallmu dwar l-​iskopijiet t’Alla u jagħmlu r-​rieda tiegħu. Is-​Swali tas-​Saltna tagħhom miftuħin għal kulmin jixtieq ‘jiġi u jieħu l-​ilma tal-​ħajja b’xejn’ f’dan iż-​“żmien taʼ l-​aħħar.”—Danjel 12:4.

Bidliet mal-​Mogħdija taż-​Żmien

6. L-​ispirtu t’Alla kif opera fuq il-​qaddejja taʼ Jehovah matul diversi perijodi taʼ żmien?

⁶ Alla għandu żmien speċifiku biex iwettaq l-​iskopijiet tiegħu, u dan jeffettwa l-​mod kif jittratta mal-​bnedmin. (Koħèlet 3:1; Atti 1:7) Għalkemm l-​ispirtu t’Alla ġie fuq il-​qaddejja tiegħu taʼ qabel l-​era Kristjana, huma ma kinux imnisslin bħala l-​ulied spiritwali tiegħu. B’seħħ minn Ġesù, madankollu, kien wasal iż-​żmien li Jehovah juża l-​ispirtu qaddis ħalli jnissel irġiel u nisa dedikati għal wirt fis-​sema. U xi ngħidu għal żmienna? L-​istess spirtu qed jopera fuq in-​“nagħaġ oħra” taʼ Ġesù, imma dan m’huwiex iqajjem fihom it-​tama u x-​xewqa għall-​ħajja fis-​sema. (Ġwann 10:16) Bil-​ħajja taʼ dejjem fuq l-​art magħmula ġenna bħala t-​tama tagħhom mogħtija minn Alla, huma jappoġġjaw bil-​ferħ lill-​fdal midlukin f’li jagħtu xiehda matul dan il-​perijodu taʼ bidla mid-​dinja l-​qadima għad-​dinja l-​ġdida taʼ tjieba t’Alla.—2 Pietru 3:5-13.

7. L-​Istudenti tal-​Bibbja f’liema xogħol taʼ ħsad kienu involuti, imma x’kienu jafu dwar il-​ġenna?

⁷ Alla beda ‘jwassal lil ħafna wlied għall-​glorja’ bit-​tferrigħ taʼ spirtu qaddis f’Pentekoste tas-​sena 33 E.K., u milli jidher hu stabbilixxa żmien biex “Iżrael [spiritwali] taʼ Alla” jkun komplut u jilħaq l-​għadd taʼ 144,000. (Lhud 2:10; Galatin 6:16; Apokalissi 7:1-8) B’seħħ mill-​1879, xogħol taʼ ħsad li kien jinvolvi Kristjani midlukin kien taʼ spiss jissemma f’din ir-​rivista. Imma l-​Istudenti tal-​Bibbja (li llum jissejħu Xhieda taʼ Jehovah) kienu jafu wkoll li l-​Iskrittura testendi t-​tama taʼ ħajja eterna fuq l-​art magħmula ġenna. Per eżempju, il-​ħarġa tal-​Watch Tower taʼ Lulju, 1883, qalet: “Meta Ġesù jkun stabbilixxa s-​saltna tiegħu, irrestrinġa l-​ħażen, eċċ., din l-​art issir ġenna, . . . u dawk kollha li qegħdin fl-​oqbra se jiġu fiha. U billi jsiru ubbidjenti lejn il-​liġijiet tagħha jistgħu jgħixu fiha għal dejjem.” Mal-​mogħdija taż-​żmien, il-​ħsad taʼ wħud midlukin naqas, u bil-​mod il-​mod individwi li ma kellhomx it-​tama għas-​sema ġew miġburin fl-​organizzazzjoni taʼ Jehovah. Sadattant, Alla ta lill-​qaddejja midlukin tiegħu, Kristjani mwelldin mill-​ġdid, dehen notevoli.—Danjel 12:3; Filippin 2:15; Apokalissi 14:15, 16.

8. Il-​fehma dwar it-​tama għall-​art kif żviluppat kmieni fis-​snin tletin?

⁸ B’mod partikulari mill-​1931 ’l hawn dawk bit-​tama għall-​art bdew jassoċjaw mal-​kongregazzjoni Kristjana. F’dik is-​sena, Jehovah dawwal lill-​fdal taʼ Kristjani mnisslin bl-​ispirtu biex jaraw li Eżekjel kapitlu 9 jirreferi għal din il-​klassi taʼ l-​art, li qegħdin jiġu mmarkati għal sopravivenza għal ġod-​dinja ġdida t’Alla. Fl-​1932 ġie kkonfermat li dawn l-​uħud bħal nagħaġ fi żmienna kienu ffigurati bil-​quddiem minn Ġonadab (Ġeħonadab), l-​imsieħeb taʼ Ġeħu. (2 Slaten 10:15-17) Fl-​1934 intgħamel ċar li “dawk l-​uħud bħal Ġonadab” għandhom “jikkonsagraw,” jew jiddedikaw, lilhom infushom lil Alla. Fl-​1935 il-​“kotra l-​kbira,” jew il-​“folla l-​kbira”​—li qabel kien maħsub li kienu klassi spiritwali sekondarja li kellhom ikunu ‘sħab’ taʼ l-​għarusa taʼ Kristu fis-​sema—​ġiet identifikata bħala nagħaġ oħrajn b’tama għall-​art. (Apokalissi 7:4-15; 21:2, 9; Salm 45:15, 16 [Salm 45:14, 15, NW]) U speċjalment mill-​1935 ’l hawn uħud midlukin taw spinta lit-​tfittxija għal nies retti li jixxennqu biex jgħixu għal dejjem fuq l-​art magħmula ġenna.

9. Wara l-​1935, xi Kristjani għala ma baqgħux jieħdu mill-​emblemi fl-​Ikla taʼ fil-​Għaxija tal-​Mulej?

⁹ Wara l-​1935 xi Kristjani li kienu jieħdu mill-​ħobż u mill-​inbid fl-​Ikla taʼ fil-​Għaxija tal-​Mulej ma baqgħux jagħmlu dan. Għala? Għax irrealizzaw li t-​tama tagħhom kienet għall-​art u mhux għas-​sema. Waħda mara li tgħammdet fl-​1930 qalet: “Għalkemm [li tieħu mill-​emblemi] kien meqjus bħala dak li suppost kellu jsir, speċjalment minn ministri full-time żelużi, jien qatt ma kont konvinta li kelli tama għas-​sema. Imbagħad, fl-​1935, ġie ċċarat għalina li kienet qed tiġi miġbura folla kbira bit-​tama li tgħix għal dejjem fuq l-​art. Ħafna minna fraħna meta fhimna li konna parti minn dik il-​folla kbira, u ma bqajniex nieħdu mill-​emblemi.” Saħansitra l-​pubblikazzjonijiet Kristjani nbidlu fil-​kontenut tagħhom. Fil-​waqt li dawk tas-​snin taʼ qabel kienu mfasslin primarjament għas-​segwaċi taʼ Ġesù mnisslin bl-​ispirtu, mill-​1935 ’il quddiem The Watchtower u letteratura oħra taʼ ‘l-​irsir leali’ pprovdew ikel spiritwali addattat għall-​ħtiġijiet kemm tal-​midlukin u kemm taʼ sħabhom b’tama għall-​art.—Mattew 24:45-47.

10. Wieħed midluk mhux leali kif jistaʼ jiġi sostitwit?

¹⁰ Nagħtu kas li wieħed midluk ma jibqax leali. Ikun hemm sostitut? Pawlu indika dan fid-​diskussjoni tiegħu dwar is-​siġra taż-​żebbuġ simbolika. (Rumani 11:11-32) Jekk ikun hemm il-​ħtieġa li wieħed imnissel bl-​ispirtu jiġi sostitwit, x’aktarx li Alla se jagħti s-​sejħa tas-​sema lil xi ħadd li l-​fidi tiegħu kienet eżemplari fl-​għoti taʼ servizz sagru lejh għal ħafna snin.—Qabbel Luqa 22:28, 29; 1 Pietru 1:6, 7.

Ħafna Raġunijiet għal Gratitudni

11. Hi x’inhi n-​natura tat-​tama tagħna, Ġakbu 1:17 dwar liema ħaġa jiżgurana?

¹¹ Ikun fejn ikun li aħna naqdu lil Jehovah bil-​fedeltà, hu se jissodisfa l-​bżonnijiet u x-​xewqat retti tagħna. (Salm 145:16; Luqa 1:67-74) Kemm jekk għandna tama ġenwina għas-​sema u kemm jekk il-​prospetti tagħna huma għall-​art, għandna ħafna raġunijiet sodi biex inkunu grati lejn Alla. Hu dejjem jaġixxi fl-​aħjar interess taʼ dawk li jħobbuh. Id-​dixxiplu Ġakbu qal li “kull ħaġa tajba li tingħata u kull don perfett jiġi mis-​sema, jinżel mingħand il-​Missier, l-​għajn tad-​dawl,” Alla Jehovah. (Ġakbu 1:17) Ejjew ninnotaw xi ftit minn dawn l-​għotjiet u l-​barkiet.

12. Għala nistgħu ngħidu li Jehovah ta tama meraviljuża lil kull wieħed mill-​qaddejja leali tiegħu?

¹² Jehovah ta lil kull wieħed mill-​qaddejja tiegħu tama taʼ l-​għaġeb. Lil xi wħud sejħilhom għall-​ħajja fis-​sema. Lix-​xhieda tiegħu taʼ qabel il-​Kristjanità, Jehovah tahom it-​tama splendida taʼ rxoxt għall-​ħajja taʼ dejjem fuq l-​art. Per eżempju, Abraham kellu fidi fl-​irxoxt u stenna l-​“belt mibnija fis-​sod”​—is-​Saltna tas-​sema li taħtha se jiġi rxoxtat għall-​ħajja fuq l-​art. (Lhud 11:10, 17-19) Għal darb’oħra, f’dan iż-​żmien tat-​tmiem, Alla qed jagħti t-​tama taʼ ħajja taʼ dejjem fuq l-​art magħmula ġenna lil miljuni taʼ nies. (Luqa 23:43; Ġwann 17:3) Ċertament, kulmin ngħata tama grandjuża bħal din minn Jehovah għandu jkun grat ħafna għal dan.

13. L-​ispirtu qaddis t’Alla kif opera fuq il-​poplu tiegħu?

¹³ Jehovah jagħti l-​ispirtu qaddis tiegħu bħala rigal lill-​poplu tiegħu. Kristjani li jingħataw tama għas-​sema jiġu midlukin bl-​ispirtu qaddis. (1 Ġwann 2:20; 5:1-4, 18) Iżda, qaddejja t’Alla li għandhom prospetti għall-​art għandhom l-​għajnuna u l-​gwida taʼ l-​ispirtu. Fost dawn kien hemm Mosè, li kellu l-​ispirtu taʼ Jehovah, bħalma kellhom ukoll is-​70 raġel maħturin biex jgħinuh. (Numri 11:24, 25) Taħt l-​influwenza taʼ l-​ispirtu qaddis, Besalel qeda bħala espert fl-​artiġjanat f’konnessjoni mat-​tabernaklu taʼ Iżrael. (Eżodu 31:1-11) L-​ispirtu t’Alla ġie fuq Gidjon, Ġefta, Sansun, David, Elija, Eliżew, u oħrajn. Għalkemm dawn l-​individwi tal-​qedem qatt ma se jinġiebu għall-​glorja tas-​sema, huma kienu ggwidati u megħjunin bl-​ispirtu qaddis, bħalma huma n-​nagħaġ oħrajn taʼ Ġesù llum. Għalhekk, mela, li nippossiedu l-​ispirtu t’Alla ma jfissirx neċessarjament li għandna s-​sejħa għas-​sema. Madankollu, l-​ispirtu taʼ Jehovah jipprovdi gwida, jgħinna nippridkaw u nwettqu inkarigi oħrajn mogħtijin minn Alla, jagħtina qawwa iktar min-​normal, u jipproduċi fina l-​frott tiegħu taʼ mħabba, ferħ, paċi, sabar fit-​tul, qalb tajba, tjubija, fidi, ħlewwa, u rażna. (Ġwann 16:13; Atti 1:8; 2 Korintin 4:7-10; Galatin 5:22, 23) M’għandniex aħna nkunu grati għal dan ir-​rigal ġeneruż mingħand Alla?

14. Kif nibbenefikaw mill-​għotjiet t’Alla taʼ l-​għarfien u l-​għerf?

¹⁴ L-​għarfien u l-​għerf huma għotjiet mingħand Alla li għalihom għandna nkunu grati, kemm jekk it-​tama tagħna hija għas-​sema u kemm jekk għall-​art. Għarfien eżatt dwar Jehovah jgħinna ‘nagħrfu nagħżlu l-​aħjar’ u ‘ngħixu sewwa kif jixraq lil Jehovah u nogħġbuh f’kollox.’ (Filippin 1:9-11; Kolossin 1:9, 10) Għerf divin iservi taʼ protezzjoni u taʼ gwida fil-​ħajja. (Proverbji 4:5-7; Koħèlet 7:12) L-​għarfien u l-​għerf veri huma bbażati fuq il-​Kelma t’Alla, u l-​ftit midlukin li baqaʼ huma attirati b’mod speċjali lejn dak li hija tgħid dwar it-​tama tagħhom tas-​sema. Madankollu, imħabba għall-​Kelma t’Alla u fehma tajba tagħha ma jifformawx il-​mod kif Alla jindika li ġejna msejħin għall-​ħajja fis-​sema. Irġiel bħal Mosè u Danjel saħansitra kitbu porzjonijiet mill-​Bibbja, imma huma se jiġu rxoxtati għall-​ħajja fuq l-​art. Kemm jekk it-​tama tagħna hija għas-​sema u kemm jekk għall-​art, ilkoll kemm aħna nirċievu ikel spiritwali permezz taʼ “l-​irsir leali u diskret” li hu approvat minn Jehovah. (Mattew 24:45-47, NW) Kemm aħna grati lkoll għall-​għarfien li ksibna b’dan il-​mod!

15. X’inhu wieħed mill-​akbar rigali t’Alla, u kif tħares lejh?

¹⁵ Wieħed mill-​akbar rigali t’Alla huwa s-​sagrifiċċju bħala rahan taʼ Ġesù, li huwa taʼ benefiċċju għalina kemm jekk għandna prospett għas-​sema u kemm jekk it-​tama tagħna hija għall-​art. Alla tant ħabb lid-​dinja taʼ bnedmin “li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.” (Ġwann 3:16) U l-​imħabba taʼ Ġesù qanqlitu “biex jagħti ħajtu b’fidwa għall-​kotra.” (Mattew 20:28) Bħalma spjega l-​appostlu Ġwanni, Ġesù Kristu “jħallas għal dnubietna [dawk tal-​midlukin], [u] mhux għal tagħna biss, iżda wkoll għal dawk tad-​dinja kollha.” (1 Ġwann 2:1, 2) Għalhekk, ilkoll kemm aħna għandna nkunu ferm grati għal dan il-​provvediment taʼ mħabba li jagħti salvazzjoni għall-​ħajja taʼ dejjem.b

Se Tkun Preżenti Int?

16. Liema ġrajja notevoli se tiġi kkommemorata wara nżul ix-​xemx nhar il-​11 t’April, 1998, u min għandu jkun preżenti?

¹⁶ Gratitudni għar-​rahan provdut minn Alla permezz taʼ Ibnu għandha tqanqalna biex inkunu preżenti fis-​Swali tas-​Saltna jew postijiet oħrajn fejn ix-​Xhieda taʼ Jehovah se jinġabru flimkien wara nżul ix-​xemx nhar il-​11 t’April, 1998, biex jikkommemoraw il-​mewt taʼ Kristu. Meta waqqaf din l-​osservanza maʼ l-​appostli leali tiegħu fl-​aħħar lejl taʼ ħajtu fuq l-​art, Ġesù qal: “Agħmlu dan b’tifkira tiegħi.” (Luqa 22:19, 20; Mattew 26:26-30) Il-​ftit midlukin li baqaʼ se jieħdu mill-​ħobż bla ħmira, li jirrappreżenta l-​ġisem uman bla dnub taʼ Ġesù, u l-​inbid aħmar pur, li jissinjifika demmu mxerred f’sagrifiċċju. Kristjani mnisslin bl-​ispirtu biss għandhom jieħdu mill-​emblemi għaliex huma biss qegħdin fil-​patt il-​ġdid u fil-​patt tas-​Saltna u għandhom ix-​xiehda li ma tistax tiġi rrifjutata taʼ l-​ispirtu qaddis t’Alla li huma għandhom it-​tama għas-​sema. Miljuni oħrajn se jkunu preżenti bħala osservaturi li juru rispett u li huma grati għall-​imħabba murija minn Alla u minn Kristu f’konnessjoni mas-​sagrifiċċju taʼ Ġesù li jagħmel possibbli l-​ħajja taʼ dejjem.—Rumani 6:23.

17. X’għandna niftakru rigward id-​dlik bl-​ispirtu?

¹⁷ Twemmin reliġjuż taʼ qabel, emozzjonijiet qawwija li jqumu minħabba l-​mewt taʼ xi ħadd maħbub, tbatijiet li huma issa assoċjati mal-​ħajja fuq l-​art, jew l-​impressjoni li wieħed ikun irċieva xi barka speċjali mingħand Jehovah jistgħu jwasslu lil xi wħud biex jassumu b’mod żbaljat li għandhom is-​sejħa tas-​sema. Imma lkoll kemm aħna għandna niftakru li l-​Iskrittura ma tikkmandaniex nieħdu mill-​emblemi tal-​Mafkar biex nuru l-​gratitudni tagħna għas-​sagrifiċċju bħala rahan taʼ Kristu. Jerga’, id-​dlik bl-​ispirtu ma jiddependix fuq “x’wieħed irid jew kemm jitħabat” iżda jiddependi minn Alla, Dak li nissel lil Ġesù bħala Iben spiritwali u li jwassal 144,000 ulied oħrajn biss għall-​glorja.—Rumani 9:16; Isaija 64:8.

18. Il-​maġġorparti minn dawk li jaqdu lil Jehovah llum, liema barkiet hemm jistennewhom?

¹⁸ Ħajja taʼ dejjem fuq l-​art magħmula ġenna hija t-​tama li Jehovah jagħti lill-​maġġorparti tal-​bnedmin li jaqduh f’dawn l-​aħħar jiem. (2 Timotju 3:1-5) Dalwaqt, huma se jgawdu din il-​ġenna meraviljuża. F’dak iż-​żmien prinċpijiet se jamministraw proċeduri fuq l-​art taħt il-​ħakma tas-​sema. (Salm 45:17 [Salm 45:16, NW]) Se jkunu jeżistu kundizzjonijiet taʼ paċi hekk kif l-​abitanti taʼ l-​art jikkonformaw mal-​liġijiet t’Alla u jitgħallmu iżjed dwar il-​mogħdijiet taʼ Jehovah. (Isaija 9:5, 6 [Isaija 9:6, 7, NW]; Apokalissi 20:12) Se jkun hemm ħafna xogħol x’isir biex jinbnew djar u tiġi kkultivata d-​dinja. (Isaija 65:17-25) U aħseb ftit dwar il-​ferħ taʼ familji li jerġgħu jingħaqdu flimkien hekk kif il-​mejtin jerġgħu jieħdu l-​ħajja! (Ġwann 5:28, 29) Wara test finali, il-​ħażen kollu jkun spiċċa. (Apokalissi 20:7-10) Imbagħad wara dan għal dejjem, l-​art se tkun mimlija bi bnedmin perfetti li jkunu “meħlusa mill-​jasar tat-​taħsir u jiksbu l-​ħelsien tal-​glorja taʼ wlied Alla.”

[Noti taʼ taħt]

Kif Twieġeb?

◻ X’ifisser li ‘tieħu l-​ilma tal-​ħajja b’xejn’?

◻ Kemm jekk it-​tama tagħna hija għas-​sema u kemm jekk għall-​art, x’raġunijiet għandna biex inkunu grati lejn Alla?

◻ Liema osservanza annwali għandna nattendu lkoll?

◻ Il-​futur x’għandu maħżun għall-​biċċa l-​kbira mill-​poplu taʼ Jehovah?

[Stampa f’paġna 18]

Miljuni taʼ nies bdew ‘jieħdu l-​ilma tal-​ħajja b’xejn.’ Int qiegħed magħhom?