Il-​Fidi u l-​Futur Tiegħek

“Il-​fidi hija pedament tal-​ħwejjeġ li għandna nittamaw.”—LHUD 11:1.

1. Il-​biċċa l-​kbira tan-​nies liema tip taʼ futur iridu?

INT interessat fil-​futur? Il-​biċċa l-​kbira tan-​nies dan jinteressahom. Dak li jittamaw għalih hu futur taʼ paċi, ħelsien mill-​biżaʼ, kundizzjonijiet t’għajxien diċenti, xogħol produttiv u pjaċevoli, saħħa u ħajja twila. Bla dubju kull ġenerazzjoni fl-​istorja ridithom dawn l-​affarijiet. U llum, f’din id-​dinja li hija tant mimlija bl-​inkwiet, dawn il-​kundizzjonijiet huma mixtiqin iżjed minn qatt qabel.

2. Wieħed statista kif esprima ċerta ħarsa dwar il-​futur?

² Hekk kif l-​umanità tersaq lejn is-​seklu 21, hemm xi mod kif wieħed jistaʼ jiddetermina kif se jkun il-​futur? Mod wieħed kien espress iktar minn 200 sena ilu mill-​istatista Amerikan Patrick Henry. Dan qal: “Ma naf b’ebda mod ieħor kif wieħed jiġġudika l-​futur ħlief permezz tal-​passat.” Skond din il-​ħarsa, il-​futur tal-​familja umana jistaʼ jsir magħruf fil-​biċċa l-​kbira minn dak li l-​bniedem għamel fil-​passat. Ħafna jaqblu maʼ dik l-​idea.

Kif Kien il-​Passat?

3. Ir-​rekord taʼ l-​istorja x’jindika rigward prospetti għall-​futur?

³ Jekk il-​futur se jkun jirrifletti l-​passat, issib int li dan huwa inkuraġġanti? Sar il-​futur aħjar matul is-​sekli għall-​ġenerazzjonijiet taʼ qabel? Ma tantx. Minkejja t-​tamiet li kellhom in-​nies għal eluf taʼ snin u minkejja l-​progress materjali f’xi postijiet, l-​istorja kienet u għadha mimlija b’oppressjoni, kriminalità, vjolenza, gwerer, u faqar. Din id-​dinja ġarrbet gwaj wara l-​ieħor, ikkaġunati fil-​biċċa l-​kbira minn ħakma umana xejn sodisfaċenti. Il-​Bibbja tistqarr b’eżattezza: “Bniedem jaħkem fuq ieħor u jagħmillu l-​ħsara.”—Koħèlet 8:9.

4, 5. (a) In-​nies għala kienu mimlijin tama fil-​bidu tas-​seklu 20? (b) Xi ġralhom it-​tamiet tagħhom għall-​futur?

⁴ Il-​fatt hu li l-​istorja ħażina taʼ l-​umanità tibqaʼ tirrepeti lilha nfisha​—biss fuq skala dejjem akbar u iżjed taʼ ħsara. Dan is-​seklu 20 huwa prova taʼ dan. Tgħallmet l-​umanità mill-​iżbalji tal-​passat u evitathom? Ara, fil-​bidu taʼ dan is-​seklu, ħafna kienu jemmnu f’futur aħjar minħabba li kien hemm perijodu relattivament twil taʼ paċi u minħabba l-​avvanzi fl-​industrija, fix-​xjenza, u fl-​edukazzjoni. Fil-​bidu tas-​seklu 20, qal professur taʼ l-​università, il-​fehma kienet li l-​gwerra ma kinitx iżjed possibbli għaliex “in-​nies kienu wisq iċċivilizzati.” Wieħed li qabel kien prim ministru tal-​Gran Britannja qal dwar il-​ħarsa li n-​nies kellhom lura f’dak iż-​żmien: “Kollox kien se jsir aħjar u aħjar. Din kienet id-​dinja li twelidt fiha jien.” Imma mbagħad stqarr: “F’daqqa waħda, bla mistenni, għodwa waħda fl-​1914 kollox ġie fit-​tmiem.”

⁵ Minkejja l-​fidi f’futur aħjar li kienet prevalenti f’dak iż-​żmien, is-​seklu l-​ġdid bilkemm kien għadu beda li d-​dinja ma nbelgħetx mill-​agħar katastrofi li qatt ħoloq il-​bniedem​—l-​Ewwel Gwerra Dinjija. Bħala eżempju tan-​natura tagħha, ikkunsidra dak li seħħ fl-​1916 f’battalja waħda meta truppi Ingliżi attakkaw il-​front Ġermaniż ħdejn ix-​Xmara Somme fi Franza. Fi ftit sigħat biss, l-​Ingliżi sofrew telfa taʼ 20,000 ruħ, u ħafna nqatlu wkoll fuq in-​naħa tal-​Ġermaniżi. Erbaʼ snin taʼ tbiċċir ħadu l-​ħajja taʼ kważi għaxar miljun suldat u ħafna nies pajżana. Il-​popolazzjoni taʼ Franza naqset fl-​għadd għal xi żmien minħabba li mietu daqstant irġiel. L-​ekonomiji ġġarrfu, u dan wassal għad-​Dipressjoni l-​Kbira tas-​snin 30. Mhux taʼ b’xejn li xi wħud qalu li dak in-​nhar li bdiet l-​Ewwel Gwerra Dinjija kien il-​jum li fih id-​dinja ġġennet!

6. Tjiebet il-​ħajja wara l-​Ewwel Gwerra Dinjija?

⁶ Kien dan il-​futur ittamat minn dik il-​ġenerazzjoni? Le, ’il bogħod minn hekk. It-​tamiet tagħhom tfarrku f’biċċiet; u dan kollu ma wassal għal ebda ħaġa aħjar. Wieħed u għoxrin sena biss wara l-​Ewwel Gwerra Dinjija, jew fl-​1939, bdiet katastrofi ferm agħar ikkaġunata mill-​bniedem​—it-​Tieni Gwerra Dinjija. Din ħadet il-​ħajja taʼ xi 50 miljun​—irġiel, nisa, u tfal. Bumbardamenti qawwijin taħnu bliet sħaħ. Fl-​Ewwel Gwerra Dinjija, eluf taʼ suldati nqatlu f’battalja waħda fi ftit sigħat, fil-​waqt li fit-​Tieni Gwerra Dinjija, żewġ bombi atomiċi biss qatlu ’l fuq minn 100,000 ruħ fi ftit sekondi. Dak li ħafna jqisuh saħansitra ferm agħar kien il-​qtil sistematiku taʼ miljuni fil-​kampijiet taʼ konċentrament tan-​Nazi.

7. X’inhi r-​realtà taʼ dan is-​seklu kollu kemm hu?

⁷ Diversi sorsi jistqarru li jekk ninkludu l-​gwerer bejn il-​ġnus, il-​konflitti ċivili, u l-​imwiet ikkaġunati minn gvernijiet fuq iċ-​ċittadini tagħhom stess, dawk maqtulin f’dan is-​seklu jammontaw għal madwar 200 miljun. Sors wieħed saħansitra jagħti l-​figura taʼ 360 miljun. Immaġina l-​orrur taʼ dan kollu​—l-​uġigħ, id-​dmugħ, id-​diqa, u l-​ħajjiet irvinati! Maʼ dan, bejn wieħed u ieħor, madwar 40,000 ruħ, fil-​biċċa l-​kbira tfal, imutu kuljum minħabba raġunijiet marbutin mal-​faqar. Tliet darbiet iżjed minn dak l-​għadd jinqatlu kuljum bl-​aborti. Ukoll, madwar biljun ruħ huma fqar wisq biex jiksbu l-​ikel meħtieġ ħalli jagħmlu ġurnata xogħol normali. Dawn il-​kundizzjonijiet kollha huma evidenza taʼ dak li ġie mbassar fil-​profezija tal-​Bibbja li qegħdin ngħixu “fl-​aħħar jiem” taʼ din is-​sistema t’affarijiet mill-​agħar.—2 Timotju 3:1-5, 13, NW; Mattew 24:3-12; Luqa 21:10, 11; Apokalissi 6:3-8.

Ebda Soluzzjonijiet Umani

8. Il-​mexxejja umani għala ma jistgħux isolvu l-​problemi tad-​dinja?

⁸ Hekk kif dan is-​seklu 20 jersaq lejn it-​tmiem tiegħu, nistgħu nżidu l-​esperjenza tiegħu maʼ dik tas-​sekli li għaddew. U xi tgħid dik l-​istorja? Tgħidilna li l-​mexxejja umani qatt ma solvew il-​problemi ewlenin tad-​dinja, li m’humiex qegħdin isolvuhom issa, u li m’humiex se jsolvuhom fil-​futur. Sempliċement m’hijiex fl-​abbiltà tagħhom li jipprovdu t-​tip taʼ futur li rridu, ikollhom kemm ikollhom intenzjoni tajba. U xi wħud fl-​awtorità ma tantx għandhom intenzjoni tajba; dawn ifittxu l-​pożizzjoni u l-​poter għall-​għanijiet egoistiċi u materjali tagħhom stess u mhux għall-​ġid taʼ oħrajn.

9. Għala hemm raġuni biex niddubitaw li x-​xjenza għandha t-​tweġibiet għall-​problemi tal-​bniedem?

⁹ Għandha x-​xjenza t-​tweġibiet? Mhux jekk nikkunsidraw il-​passat. Ix-​xjentisti tal-​gvernijiet utilizzaw ammonti enormi taʼ flus, ħin, u sforz biex jiżviluppaw armi kimiċi, bijoloġiċi, u tipi oħrajn li huma distruttivi b’mod terribbli. Il-​ġnus, inklużi dawk li m’għandhomx minn fejn, jonfqu iktar minn 700 biljun dollaru [Lm269,000,000,000] f’armamenti kull sena! Ukoll, ‘il-​progress xjentifiku’ huwa responsabbli parzjalment għall-​kimiċi li kkontribwew għat-​tinġis taʼ l-​arja, l-​art, l-​ilma, u l-​ikel.

10. Għala lanqas saħansitra l-​edukazzjoni ma tiżgura futur aħjar?

¹⁰ Nistgħu aħna nittamaw li l-​istituzzjonijiet edukattivi tad-​dinja se jgħinu biex jinbena futur aħjar billi jgħallmu livelli morali għoljin, konsiderazzjoni lejn ħaddieħor, u mħabba għall-​proxxmu? Le. Minflok, huma jiffokaw fuq karrieri, fuq li wieħed jagħmel il-​flus. Huma joħolqu spirtu kompetittiv ferm, mhux wieħed kooperattiv; u lanqas l-​iskejjel ma jgħallmu l-​morali. Minflok, ħafna minnhom jagħlqu għajnejhom għal-​libertà sesswali, li pproduċiet żjieda enormi taʼ tqâla fost l-​adolexxenti u mard trasmess sesswalment.

11. Ir-​rekord taʼ intrapriżi tan-​negozju kif jitfaʼ dubju fuq il-​futur?

¹¹ Se jkunu l-​intrapriżi l-​kbar tan-​negozju tad-​dinja mmotivati f’daqqa waħda biex jieħdu ħsieb sewwa tal-​pjaneta tagħna u juru mħabba għal ħaddieħor billi jagħmlu prodotti li jkunu taʼ benefiċċju ġenwin u mhux sempliċement għall-​qligħ? Dan ma tantx hu probabbli. Se jieqfu huma jipproduċu programmi televiżivi mimlijin vjolenza u immoralità li jikkontribwixxu biex jikkorrompu l-​imħuħ tan-​nies, speċjalment taż-​żgħażagħ? Il-​passat reċenti ma tantx huwa inkuraġġanti għaliex, fil-​biċċa l-​kbira, it-​televiżjoni sar fossa taʼ immoralità u vjolenza.

12. X’inhi l-​kundizzjoni umana rigward il-​mard u l-​mewt?

¹² Barra minn hekk, ikunu kemm ikunu sinċieri t-​tobba, dawn qatt ma jistgħu jegħlbu l-​mard u l-​mewt. Per eżempju, fi tmiem l-​Ewwel Gwerra Dinjija, huma ma setgħux iżommu l-​influwenza Spanjola milli tinfirex; madwar id-​dinja, din ħadet il-​ħajja taʼ madwar 20 miljun ruħ. Illum, il-​mard tal-​qalb, il-​kanċer, u mard ieħor li jikkaġuna l-​mewt huma rampanti. Id-​dinja medika lanqas ma għelbet il-​pjaga moderna taʼ l-​AIDS. Għall-​kuntrarju, rapport tal-​Ġ.M. ppubblikat f’Novembru tal-​1997 ikkonkluda li r-​rata li biha qed jinfirex il-​virus taʼ l-​AIDS hija d-​doppju taʼ l-​estimi taʼ qabel. Diġà mietu miljuni b’din il-​marda. F’sena reċenti, tliet miljuni oħrajn ġew infettati.

Kif ix-​Xhieda taʼ Jehovah Jħarsu lejn il-​Futur

13, 14. (a) Ix-​Xhieda taʼ Jehovah kif iħarsu lejn il-​futur? (b) Il-​bnedmin għala ma jistgħux jipproduċu futur aħjar?

¹³ Madankollu, ix-​Xhieda taʼ Jehovah jemmnu li l-​umanità għandha futur mill-​isbaħ, l-​aqwa wieħed li jistaʼ jkollha! Imma ma jistennewx li dak il-​futur aħjar ġej permezz taʼ l-​isforzi umani. Minflok, huma jħarsu lejn il-​Ħallieq, Alla Jehovah. Hu jaf kif se jkun il-​futur, u dan se jkun wieħed meraviljuż! Jaf ukoll li l-​bnedmin ma jistgħux jipproduċu futur bħal dan. Ladarba Alla ħalaqhom, hu jaf il-​limitazzjonijiet tagħhom ferm iktar milli jafhom ħaddieħor. Fil-​Kelma tiegħu, hu jgħidilna ċar li ma ħalaqx lill-​bnedmin bl-​abbiltà li jiggvernaw b’suċċess mingħajr gwida divina. Il-​perijodu twil li fih Alla ppermetta li l-​bniedem jaħkem indipendenti minnu wera mingħajr ebda dubju dik l-​inabbiltà. Wieħed awtur irrikonoxxa: “Il-​moħħ tal-​bniedem ipprova jikkombina kull għamla taʼ sovranità possibbli, u kollu għalxejn.”

¹⁴ F’Ġeremija 10:23, naqraw il-​kliem tal-​profeta ispirat: “Jien naf, Mulej, triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.” Ukoll, Salm 146:3 jistqarr: “La tittamawx fil-​kbarat, għax il-​bniedem ma jsalvakomx.” Fil-​fatt, peress li aħna mwelldin imperfetti, kif juri Rumani 5:12, il-​Kelma t’Alla twissina biex lanqas ma nafdaw fina nfusna. Ġeremija 17:9 jgħid:“Qalb il-​bniedem kollha qerq u mħassra.” B’hekk, Proverbji 28:26 jiddikjara: “Min jafda fih innifsu hu iblah, imma min jimxi fit-​triq taʼ l-​għerf jimxi fis-​sod.”

15. Fejn nistgħu nsibu l-​għerf biex jiggwidana?

¹⁵ Fejn nistgħu nsibuh dan l-​għerf? “Il-​biżaʼ tal-​Mulej hu l-​bidu taʼ l-​għerf, u li tagħraf lill-​Qaddis hu d-​dehen.” (Proverbji 9:10) Jehovah biss għandu l-​għerf li jistaʼ jiggwidana biex ngħaddu minn dawn iż-​żminijiet tal-​biżaʼ. U tana aċċess għall-​għerf tiegħu permezz taʼ l-​Iskrittura Mqaddsa, li nebbaħ għall-​gwida tagħna.—Proverbji 2:1-9; 3:1-6; 2 Timotju 3:16, 17.

Il-​Futur tal-​Ħakma Umana

16. Min iddeterminah il-​futur?

¹⁶ Allura, il-​Kelma t’Alla x’tgħidilna dwar il-​futur? Tgħidilna li l-​futur ċertament m’huwiex se jirrifletti dak li l-​bnedmin għamlu fil-​passat. Mela l-​ħarsa taʼ Patrick Henry kienet żbaljata. Il-​futur taʼ din id-​dinja u tan-​nies li hawn fuqha se jiġi ddeterminat, mhux mill-​bnedmin, imma minn Alla Jehovah. Ir-​rieda tiegħu se tintgħamel fuq l-​art, mhux ir-​rieda taʼ xi bnedmin jew xi ġnus taʼ din id-​dinja. “Wieħed jistaʼ jfassal ħafna ħsibijiet, imma dak li jseħħ hu l-​ħsieb tal-​Mulej.”—Proverbji 19:21.

17, 18. X’inhi r-​rieda t’Alla għal żmienna?

¹⁷ X’inhi r-​rieda t’Alla għal żmienna? Hu għamlu l-​iskop tiegħu li jġib fit-​tmiem lil din is-​sistema t’affarijiet vjolenti u immorali. Ħakma magħmula minn Alla dalwaqt se tieħu post l-​irrenjar ħażin tal-​bnedmin li ilu sekli sħaħ. Il-​profezija li nsibu f’Danjel 2:44 tistqarr: “Fi żmien dawn is-​slaten [li jeżistu llum], Alla tas-​sema jqajjem saltna [fis-sema] li ma tinqered qatt, u li l-​ħakma tagħha ma tgħaddix għal poplu ieħor. Hija tfarrak u ttemm is-​saltniet l-​oħra kollha, waqt li hi tibqaʼ wieqfa għal dejjem.” Is-​Saltna se tneħħi wkoll l-​influwenza mill-​agħar taʼ Satana x-​Xitan, xi ħaġa li l-​bnedmin qatt ma jistgħu jagħmlu. Il-​ħakma tiegħu fuq din id-​dinja se tispiċċa darba għal dejjem.—Rumani 16:20; 2 Korintin 4:4; 1 Ġwann 5:19.

¹⁸ Innota li l-​gvern tas-​sema se jelimina kompletament kull għamla taʼ ħakma umana. L-​iggvernar taʼ din id-​dinja ma jitħalliex f’idejn in-​nies. Fis-​sema, dawk li jifformaw is-​Saltna t’Alla se jikkontrollaw l-​affarijiet kollha taʼ l-​art għall-​ġid taʼ l-​umanità. (Apokalissi 5:10; 20:4-6) Fuq l-​art, bnedmin leali se jikkooperaw mad-​direttivi tas-​Saltna t’Alla. Din hija l-​ħakma li Ġesù għallimna nitolbu għaliha meta qal: “Tiġi saltnatek, ikun li trid int, kif fis-​sema, hekkda fl-​art.”—Mattew 6:10.

19, 20. (a) Il-​Bibbja kif tiddeskrivih l-​arranġament tas-​Saltna? (b) X’se tagħmel il-​ħakma tagħha għall-​umanità?

¹⁹ Ix-​Xhieda taʼ Jehovah jpoġġu l-​fidi tagħhom fis-​Saltna t’Alla. Din hija s-​“smewwiet ġodda” li l-​appostlu Pietru kiteb dwarhom: “Aħna, skond il-​wegħda tiegħu, nistennew smewwiet ġodda u art ġdida, li fihom tgħammar il-​ġustizzja.” (2 Pietru 3:13) L-​“art ġdida” hija s-​soċjetà ġdida umana li se tkun iggvernata mis-​smewwiet ġodda, is-​Saltna t’Alla. Dan huwa l-​arranġament li Alla rrivela f’viżjoni lill-​appostlu Ġwanni, li kiteb: “Rajt sema ġdida u art ġdida, għax is-​sema taʼ qabel u l-​art taʼ qabel għabu . . . Hu [Alla] jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.”—Apokalissi 21:1, 4.

²⁰ Innota li l-​art ġdida se tkun waħda taʼ tjieba. L-​elementi kollha li m’humiex tajbin se jkunu tneħħew permezz taʼ att minn Alla, il-​battalja taʼ Armageddon. (Apokalissi 16:14, 16) Il-​profezija fi Proverbji 2:21, 22 tpoġġiha b’dan il-​mod: “It-​tajbin jgħammru fl-​art, u n-​nies sewwa joqogħdu fiha; imma l-​ħżiena mill-​art jitqaċċtu, u l-​qarrieqa jinqalgħu minnha.” U Salm 37:9 jwiegħed: “Il-​ħżiena jitqaċċtu ’l barra; min jittama fil-​Mulej jikseb l-​art.” Ma tixtieqx int tgħix f’dinja ġdida bħal din?

Qiegħed il-​Fidi Tiegħek fil-​Wegħdi taʼ Jehovah

21. Għala nistgħu nqiegħdu l-​fidi tagħna fil-​wegħdi taʼ Jehovah?

²¹ Nistgħu aħna nqiegħdu l-​fidi tagħna fil-​wegħdi taʼ Jehovah? Agħti widen għal dak li hu jistqarr permezz tal-​profeta tiegħu Isaija: “Ftakru fl-​ibgħad żminijiet, għax jien hu Alla, u ħadd ħliefi m’hemm. Jien Alla u m’hemm ħadd bħali. Sa mill-​bidu ngħarraf it-​tmiem, u sa minn qabel dak li ma seħħx, u ngħid: ‘Il-​ħsieb tiegħi għad iseħħ, u nagħmel kull ma rrid.’” L-​aħħar parti taʼ vers 11 tgħid: “Hekk tkellimt u hekk nagħmel; hekk iddeċidejt, u nagħmel hekk.” (Isaija 46:9-11) Iva, jistaʼ jkollna fidi f’Jehovah u fil-​wegħdi tiegħu daqs li kieku dawk il-​wegħdi diġà seħħew. Il-​Bibbja tesprimiha b’dan il-​mod: “Il-​fidi hija pedament [“l-​istennija assigurata,” NW] tal-​ħwejjeġ li għandna nittamaw, hija l-​prova tal-​ħwejjeġ li ma narawx.”—Lhud 11:1.

22. Għala nistgħu nkunu fiduċjużi li Jehovah se jwettaq il-​wegħdi tiegħu?

²² Nies umlin juru fidi bħal din għaliex jafu li Alla se jwettaq il-​wegħdi tiegħu. Per eżempju, f’Salm 37:29 naqraw: “Il-​ġusti jirtu l-​art, u jgħammru fiha għal dejjem.” Nistgħu nemmnuh dan? Iva, għaliex Lhud 6:18 jgħid: “Alla ma jigdibx.” Huwa Alla sid l-​art, sabiex ikun jistaʼ jagħtiha lin-​nies umlin? Apokalissi 4:11 jiddikjara: “Int ħlaqt il-​ħlejjaq kollha, u huma kienu u nħolqu bir-​rieda tiegħek.” B’hekk, Salm 24:1 jgħid: “Tal-​Mulej hi l-​art u kull ma fiha.” Jehovah ħalaq l-​art, hu sidha, u jagħtiha lil dawk li għandhom fidi fih. Biex jgħinna nibnu l-​fiduċja tagħna f’dan, l-​artiklu li jmiss se juri kif Jehovah żamm il-​wegħdi tiegħu man-​nies tiegħu fil-​passat kif ukoll fi żmienna u għala jistaʼ jkollna fiduċja assoluta li se jagħmel hekk fil-​futur.

Punti għal Reviżjoni

◻ Xi ġralhom it-​tamiet tan-​nies matul l-​istorja?

◻ Għala m’għandniex inħarsu lejn il-​bnedmin għal futur aħjar?

◻ X’inhi r-​rieda t’Alla rigward il-​futur?

◻ Għala aħna fiduċjużi li Alla se jwettaq il-​wegħdi tiegħu?

[Stampa f’paġna 10]

Il-​Bibbja tistqarr b’eżattezza: “Triq il-​bniedem m’hijiex f’idejh . . . [biex] jiddirieġi l-​passi tiegħu.”—Ġeremija 10:23

[Sors]

Bomba: ritratt tal-​U.S. National Archives; tfal imġewħin: WHO/OXFAM; refuġjati: RITRATT ĠM 186763/J. Isaac; Mussolini u Hitler: ritratt tal-​U.S. National Archives