Min Hemm Wara Dan Kollu?

BILLI qaċċat il-​ħaxix u l-​friegħi tas-​siġar sabiex ikun jistaʼ jgħaddi minn ġo nofs il-​ġungla fil-​Kambodja, Henri Mouhot, esploratur Franċiż tas-​seklu 19, wasal ħdejn foss wiesaʼ li kien idur maʼ tempju. Kważi kilometru lil hemm minn fejn kien wieqaf, il-​ħames torrijiet tat-​tempju kienu jogħlew iktar minn 60 metru ’l fuq fl-​ajru. Kien Angkor Wat, l-​akbar monument reliġjuż fuq l-​art. Kien ilu diġà sebaʼ sekli jirreżisti l-​elementi meta Mouhot skoprieh.

Mad-daqqa t’għajn Mouhot setaʼ jgħid li l-​istrutturi li kienu miksijin bil-​ħażiż kienu x-​xogħol taʼ jdejn umani. “Imwaqqaf minn xi Michelangelo tal-​qedem, huwa ferm iktar grandjuż minn kwalunkwe ħaġa li ħallewlna l-​Greċja u Ruma,” kiteb. Minkejja li kienu ilhom abbandunati għal sekli sħaħ, ma kellu ebda dubju li wara dawn l-​istrutturi manjifiċi, kien hemm disinjatur.

Taʼ interess, ktieb taʼ għerf miktub sekli ilu uża raġunar simili biex jispjega għala d-​dinja taʼ madwarna bilfors hija l-​prodott taʼ Disinjatur. Bilfors li ġiet maħluqa. L-​appostlu Pawlu kiteb: “Għax kull dar jibniha xi ħadd, imma Alla jibni kollox hu.” (Lhud 3:4) Xi wħud għandhom mnejn ma jaqblux maʼ din l-​analoġija, billi jgħidu: ‘Il-​mod kif tiffunzjona n-​natura huwa differenti minn dak li hu magħmul mill-​bniedem.’ Madankollu, mhux ix-​xjenzati kollha jaqblu maʼ din l-​oġġezzjoni. Wara li qabel mal-​fatt li “sistemi bijokimiċi m’humiex oġġetti inanimati,” Michael Behe, professur assoċjat tal-​bijokimika fl-​Università taʼ Lehigh, isaqsi: “Jistgħu sistemi bijokimiċi ħajjin ikunu ddisinjati b’mod intelliġenti?” Hu jissokta juri li x-​xjenzati issa qed jiddisinjaw bidliet bażiċi f’organiżmi ħajjin permezz taʼ metodi bħalma hija l-​inġinerija ġenetika. B’mod ċar, kemm affarijiet inanimati u kemm animati jistgħu jiġu ddisinjati u prodotti bl-​inġinerija! Billi jħaffer fil-​fond fid-​dinja mikroskopika taċ-​ċelloli ħajjin, Behe jiddiskuti s-​sistemi komplessi b’mod taʼ l-​għaġeb, magħmulin minn komponenti li jiddependu minn xulxin biex jiffunzjonaw. Il-​konklużjoni tiegħu? “Ir-​riżultat taʼ dawn l-​isforzi akkumulati biex tiġi investigata ċ-​ċellola​—biex tiġi investigata l-​ħajja fil-​livell molekulari—​huwa għajta qawwija, ċara, u penetranti taʼ ‘disinn!’”

Kosmologi u fiżiki bl-​istess mod taw ħarsa fil-​fond lejn id-​dinja u l-​univers u ħarġu b’xi fatti sorprendenti. Per eżempju, huma issa jafu illi kieku kien hemm saħansitra bidla infiniteżimali fil-​valur taʼ kwalunkwe wieħed min-​numri kostanti universali, l-​univers kien ikun bla ħajja.a Il-​kosmologu Brandon Carter sejjaħ dawn il-​fatti koinċidenzi sorprendenti. Imma kieku tiltaqaʼ maʼ serje taʼ koinċidenzi misterjużi, u konnessi flimkien, ma tibdiex taʼ l-​inqas tissuspetta li hemm xi ħadd warajhom?

Tabilħaqq, hemm Disinjatur wara dawn is-​sistemi komplessi kollha u “koinċidenzi” intonati b’mod preċiż. Min hu? “Li tidentifika d-​disinjatur b’metodi xjentifiċi jistaʼ jkun estremament diffiċli,” jammetti l-​Professur Behe, u jħalli l-​mistoqsija biex jipprovaw iweġbuha l-​“filosofija u t-​teoloġija.” Int personalment tistaʼ tħoss li l-​mistoqsija hija irrelevanti għalik. Madankollu, kieku tirċievi pakkett imgeżwer sabiħ mimli eżatt b’dak li għandek bżonn, ma tkunx trid taf min bagħatulek?

Aħna rċevejna, biex ngħidu hekk, pakkett bħal dan​—pakkett mimli b’għotjiet meraviljużi li jagħmluha possibbli għalina li ngħixu u ngawdu l-​ħajja. Dak il-​pakkett huwa l-​art, bis-​sistemi rimarkevoli kollha li għandha biex iżżomm il-​ħajja. M’għandniex inkunu rridu niskopru min tana dawn l-​għotjiet?

B’ferħ, Dak li bagħat il-​pakkett waħħal nota miegħu. In-​“nota” hija dak il-​ktieb antik taʼ għerf li ġie kkwotat qabel​—il-​Bibbja. Fil-​kliem tal-​ftuħ tagħha, il-​Bibbja twieġeb b’sempliċità u ċarezza rimarkevoli l-​mistoqsija dwar min tana dan il-​pakkett: “Fil-​bidu Alla ħalaq is-​sema u l-​art.”—Ġenesi 1:1.

Fin-“nota” tiegħu l-​Ħallieq jidentifika lilu nnifsu b’ismu: “Dan jgħid Alla, il-​Mulej [“Jehovah,” New World Translation], li ħalaq . . . is-​smewwiet, u l-​medda taʼ l-​art bil-​frott u l-​ħdura tagħha, li jagħti l-​ħajja lill-​poplu li hemm fiha.” (Isaija 42:5) Iva, Jehovah huwa l-​isem taʼ dak Alla li ddisinja l-​univers u għamel l-​irġiel u n-​nisa fuq l-​art. Imma min hu Jehovah? X’tip taʼ Alla hu? U għala għandhom il-​popli kollha taʼ l-​art jagħtuh widen?

[Nota taʼ taħt]

[Stampa f’paġna 3]

Angkor Wat inbena mill-​bnedmin

[Stampa f’paġna 4]

Meta tirċievi għotja, ma tkunx trid taf min bagħathielek?