Min Hu Jehovah?

JEHOVAH qal lil wieħed mill-​adoraturi leali tiegħu: “Ebda bniedem ma jarani u jibqaʼ ħaj.” (Eżodu 33:20) “Alla huwa spirtu,” u l-​bnedmin ma jistgħux jarawh bil-​għajnejn fiżiċi tagħhom. (Ġwann 4:24) Daqs kemm ikun diżastruż għal għajnejna li nħarsu direttament lejn ix-​xemx f’nofsinhar, daqshekk ieħor ikun taʼ ħsara għalina li naraw lis-​Sors tremend taʼ enerġija li ħalaq mhux biss ix-​xemx brillanti tagħna imma wkoll ix-​xmux bla għadd l-​oħrajn li hemm fl-​univers.

B’ferħ, m’għandniex għalfejn naraw lil Alla biex niskopru dwaru. Il-​Bibbja tidentifika l-​Wieħed li ppreparalna dak il-​pakkett meraviljuż, l-​art, kif ukoll tirrevela l-​personalità tiegħu. Allura jkun vallapena li nfittxu fil-​Bibbja biex niskopru dwar il-​Missier li tana l-​ħajja u pprovdielna dar pjaċevoli fejn nistgħu ngawdu dik il-​ħajja.

Is-​Sinjifikat taʼ Ismu

L-​ismijiet kollha għandhom tifsira, allavolja llum ħafna għandhom mnejn li m’humiex konxji tagħhom. Per eżempju, l-​isem Ingliż komuni David ġej minn kelma Ebrajka li tfisser “Maħbub.” Isem il-​Ħallieq, Jehovah, ukoll għandu tifsir. X’inhu? Fl-​Ebrajk, il-​lingwa oriġinali tal-​Bibbja, l-​isem divin huwa miktub b’erbaʼ ittri, YHWH, u jidher kważi 7,000 darba fil-​parti Ebrajka tal-​Bibbja. L-​isem divin huwa mifhum li jfisser “Hu Jikkaġuna li Jsir.” Dan jimplika li Jehovah bil-​għerf jikkaġuna lilu nnifsu li jsir kulma jkollu bżonn sabiex iwettaq l-​iskopijiet tiegħu. Hu Ħallieq, Imħallef, Salvatur, Sostenitur tal-​Ħajja, u għalhekk jistaʼ jwettaq il-​wegħdi tiegħu. Iktar minn hekk, fl-​Ebrajk l-​isem Jehovah qiegħed fil-​forma tal-​verb li tindika azzjoni fil-​proċess taʼ twettiq. Iva, Jehovah għadu jikkaġuna lilu nnifsu li jsir dak li jwettaq l-​iskopijiet tiegħu. Hu Alla ħaj!

Il-​Kwalitajiet Predominanti taʼ Jehovah

Il-​Bibbja tiddeskrivi l-​Ħallieq bħala “Alla li jagħder u jħenn; tqil biex jagħdab u kbir fit-​tjieba u l-​fedeltà. Iħares it-​tjieba [“qalb tajba bl-​imħabba,” NW] għal elf ġenerazzjoni u jaħfer il-​ħażen, id-​dnub u l-​ħtija.” (Eżodu 34:6, 7) L-​espressjoni “qalb tajba bl-​imħabba” hija t-​traduzzjoni taʼ kelma Ebrajka li tfisser ħafna. Din timplika qalb tajba li bl-​imħabba tintrabat maʼ oġġett sakemm l-​iskop għal dak l-​oġġett jiġi rrealizzat. Tistaʼ wkoll tiġi tradotta “mħabba leali.” Il-​qalb tajba taʼ Jehovah tintrabat b’imħabba mal-​ħlejjaq tiegħu u twettaq l-​iskop meraviljuż tiegħu. Ma tgħożżhiex imħabba bħal din mingħand il-​Wieħed li tak il-​ħajja?

Jehovah bil-​mod biex jirrabja u ħafif biex jaħfrilna l-​iżbalji. Li tkun qrib taʼ persuna bħal din iqanqallek qalbek. Madankollu, dan ma jfissirx li hu jagħlaq għajnejh għal għemil ħażin. Hu ddikjara: “Jien hu l-​Mulej, li nħobb id-​dritt, u nobgħod il-​ħella u l-​qerq.” (Isaija 61:8) Bħala Alla taʼ ġustizzja, hu mhux se jittollera għal dejjem nies midinbin li jisfidawh b’mod sfaċċat u li jippersistu fi ħżunithom. B’hekk, nistgħu nkunu żguri li fil-​ħin stabbilit tiegħu, Jehovah se jikkorreġi l-​inġustizzji taʼ din id-​dinja. M’huwiex se jagħti dahru lil min hu batut.

M’huwiex faċli li żżomm bilanċ perfett bejn l-​imħabba u l-​ġustizzja. Jekk int ġenitur, issibha iebsa biex tiddeċiedi meta, kif, u sa liema punt tikkorreġi lit-​tfal tiegħek meta ma jġibux ruħhom sew? Biex tibbilanċja l-​ġustizzja mal-​mogħdrija bl-​imħabba jirrikjedi għerf kbir. Jehovah juri dik il-​kwalità bl-​abbundanza meta jittratta mal-​bnedmin. (Rumani 11:33-36) Tabilħaqq, l-​għerf tal-​Ħallieq jistaʼ jidher kullimkien, per eżempju fl-​għeġubijiet tal-​ħolqien li aħna mdawrin bihom.—Salm 104:24; Proverbji 3:19.

Madankollu, l-​għerf biss mhux biżżejjed. Biex iwettaq ir-​rieda tiegħu, il-​Ħallieq irid ikollu wkoll il-​qawwa, u l-​Bibbja tirrevela li hu qawwi ferm: “Erfgħu għajnejkom ’il fuq u araw: min ħalaqhom dawn il-​ħlejjaq kollha? Imexxi u jgħodd l-​eżerċti tiegħu, u jsejjħilhom b’isimhom wieħed wieħed. Bis-​saħħa taʼ qawwietu, bil-​qawwa taʼ setgħetu, ħadd minnhom ma jonqos.” (Isaija 40:26) Bis-​“saħħa taʼ qawwietu,” Jehovah jġiegħel l-​affarijiet isiru. Ma tattirakx lejh kwalità bħal din?

Alla tal-​Ġnus Kollha

‘Imma m’huwiex Jehovah dak Alla tat-​“Testment il-​Qadim,” dak Alla taʼ Iżrael tal-​qedem?’ għandek mnejn tistaqsi. Huwa minnu li Jehovah rrivela lilu nnifsu lill-​Iżraeliti. Xorta waħda, peress li ħalaq lill-​ewwel koppja umana, Jehovah hu dak Alla “li minnu tieħu isimha kull familja . . . fl-​art.” (Efesin 3:15) Jekk int temmen li huwa xieraq li tirrispetta l-​antenati tiegħek, ma jkunx xieraq li tagħti ġieħ lill-​Wieħed li ta l-​ħajja lill-​ewwel raġel, l-​antenat komuni tagħna, li huwa l-​għerq tal-​ġeneoloġiji kollha li jeżistu fuq l-​art illum?

Il-Ħallieq taʼ l-​umanità m’huwiex moħħu magħluq. Veru, għal xi żmien kellu relazzjoni speċjali mal-​ġens taʼ Iżrael. Imma saħansitra dak iż-​żmien, hu fetaħ dirgħajh għal kull min kien isejjaħ ismu. Sultan għaref taʼ Iżrael qal f’talba lil Jehovah: “U l-​barrani . . . , li m’hux mill-​poplu tiegħek taʼ Iżrael, . . . u jiġi minn art imbiegħda minħabba f’ismek . . . , isimgħu mis-​sema . . . u agħmel kull ma jitolbok il-​barrani, biex ikunu jafu b’ismek il-​ġnus kollha taʼ l-​art.” (1 Slaten 8:41-43) Sal-​ġurnata tal-​lum, nies mill-​ġnus kollha jistgħu jsiru jafu lil Jehovah u jkollhom relazzjoni sinjifikanti miegħu. Imma dak kif jeffettwak lilek?

Benefiċċji għax Tkun Taf lil Jehovah

Biex immorru lura lejn it-​tixbieha fl-​artiklu taʼ qabel, kieku tirċievi pakkett imgeżwer sabiħ, int naturalment tkun trid tiskopri l-​għotja għala ngħatat. Kif għandek tużaha u tieħu ħsiebha? B’mod simili, aħna rridu nkunu nafu x’kellu f’moħħu Alla meta ħejja l-​art għalina. Il-​Bibbja tgħid li hu “ma ħalaqhiex għall-​baħħ,” imma “sawwarha biex jgħammru fiha,” jiġifieri, il-​bnedmin.—Isaija 45:18.

Il-biċċa l-​kbira tal-​bnedmin, iżda, ma ħadux ħsieb l-​għotja tal-​Ħallieq. Qegħdin ftit ftit jirrovinaw l-​art, b’dispjaċir kbir għal Jehovah. Madankollu, fi qbil maʼ dak li jfisser ismu, Jehovah hu ddeterminat li jwettaq l-​iskop oriġinali tiegħu għall-​bniedem u għall-​art. (Salm 115:16; Apokalissi 11:18) Hu se jsewwi l-​art u jagħtiha bħala wirt lil dawk li jridu jgħixu bħala l-​ulied ubbidjenti tiegħu.—Mattew 5:5.

L-aħħar ktieb tal-​Bibbja jiddeskrivi kif se jkunu l-​affarijiet meta dan iseħħ: “Din hi l-​għamara taʼ Alla mal-​bnedmin; u hu jgħammar magħhom, u huma jkunu l-​poplu tiegħu . . . Hu jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.” (Apokalissi 21:3, 4) Imbagħad ħadd m’hu se jxerred dmugħ taʼ niket jew jagħmel vistu minħabba t-​telfa taʼ xi ħadd maħbub. Ħadd m’hu se jgħajjat b’disprament għall-​għajnuna jew ibati l-​uġigħ taʼ mard qerriedi. Saħansitra ‘l-​Mewt se tinqered.’ (1 Korintin 15:26; Isaija 25:8; 33:24) Dan jiddeskrivi t-​tip taʼ ħajja li Jehovah oriġinalment riedna ngawdu meta ħalaq lill-​ewwel antenati tagħna.

Tabilħaqq, int jistaʼ jkollok previżjoni taʼ dawn il-​kundizzjonijiet bħal taʼ ġenna issa fost l-​adoraturi taʼ Jehovah. Hu jgħidilhom: “Jien hu l-​Mulej, Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi.” (Isaija 48:17) Jehovah hu Missier taʼ qalb tajba li jgħallimna, bħala wliedu, l-​aħjar mod kif ngħixu. Il-​linji taʼ gwida tiegħu għall-​bnedmin jipprovdu, mhux restrizzjonijiet bla bżonn, imma protezzjoni taʼ mħabba. Li nsegwuhom se jirriżulta f’ħelsien veru u ferħ, sewwa sew kif hemm miktub: “Għax il-​Mulej huwa l-​Ispirtu; u fejn hemm l-​Ispirtu tal-​Mulej hemm il-​ħelsien.” (2 Korintin 3:17) Billi jsegwu l-​linji taʼ gwida mniżżlin fil-​Bibbja, dawk li jaċċettaw il-​ħakma tiegħu qegħdin issa jesperjenzaw paċi tal-​moħħ li xi darba se jinfirex mad-​dinja kollha taʼ bnedmin.—Filippin 4:7.

X’Missier benevolenti hu Jehovah! Lest li titgħallem iktar dwar il-​Wieħed li qiegħed wara l-​għeġubijiet tal-​ħolqien? Għal dawk li jridu, il-​benefiċċji huma imprezzabbli saħansitra issa. U fil-​ġejjieni l-​benefiċċji se jkunu eterni.

[Stampa f’paġna 5]

L-​isem divin miktub bl-​erbaʼ ittri Ebrajċi jistaʼ jidher fuq il-​ħitan taʼ ħafna knejjes antiki