Proklamaturi tas-Saltna Jirrapportaw
“Fis-Suq Kuljum”
L-APPOSTLU Pawlu kien juża kull opportunità biex ixerred il-messaġġ tas-Saltna. Biex isib lil dawk li kien jistħoqqilhom, hu ddisputa “fis-sinagogi mal-Lhud . . . u fis-suq kuljum maʼ dawk li kienu jiltaqgħu miegħu.”—Atti 17:17, KŻ.
Żelu bħal dak kien u għadu l-marka t’adoraturi veri taʼ Jehovah mill-ewwel seklu E.K. ’l hawn. (Mattew 28:19, 20) Illum, ix-Xhieda taʼ Jehovah wkoll jużaw diversi metodi hekk kif jgħinu b’mod żeluż lil dawk taʼ qalb onesta biex ikollhom għarfien eżatt tal-verità. (1 Timotju 2:3, 4) L-esperjenza li jmiss mill-Awstralja turi dan.
Ħamest ijiem fil-ġimgħa, Sid u Harold jieħdu ħsieb darba kull wieħed l-ixkafef bil-letteratura tal-Bibbja qrib stazzjon tal-ferrovija f’Sydney. Ilhom jaqsmu l-aħbar tajba tas-Saltna t’Alla b’dan il-mod għal madwar ħames snin issa. Sid, li għandu 95 sena, jispjega: “Meta lħaqt is-87 sena, ma bqajtx iktar kapaċi nsuq karozza. Dak iddiżappuntani għax kont nieħu pjaċir fl-attività t’għoti taʼ xiehda fil-pubbliku. Darba waħda waqt li kont viċin post popolari għat-turisti msejjaħ Echo Point f’Katoomba, rajt artist li kien qed ibigħ pitturi taʼ pajsaġġi. Studjajt il-pitturi u ħsibt bejni u bejn ruħi, ‘Jien għandi stampi aħjar minn dawk fil-basket tiegħi—u li jiswew ħafna inqas flus!’ Għalhekk, iddeċidejt li narma xkafef għal-letteratura, inpoġġihom f’post fejn jgħaddu ħafna turisti, u noffri lil dawk li jkunu għaddejjin il-letteratura sabiħa tal-Bibbja li jqassmu x-Xhieda taʼ Jehovah.
“Erbaʼ snin ilu, bdejt narma f’Sydney, u Harold ngħaqad miegħi. Darba kull wieħed nieħdu ħsieb l-ixkafef u naħdmu mal-kongregazzjonijiet lokali tagħna.” Harold, li issa għandu 83 sena, jgħid: “Mit-Tnejn sal-Ġimgħa ftit nies ikunu d-dar. Għalhekk, li naqsmu l-messaġġ tas-Saltna b’dan il-mod iressaqna fejn hemm in-nies. Naturalment, niksbu riżultati aħjar. L-għadd taʼ letteratura li nħallu man-nies tassew jispikka għal dan il-pajjiż.”
“Għalkemm qgħadna f’erbaʼ jew ħames postijiet differenti matul is-snin,” jgħid Sid, “in-nies malajr isiru jafu min aħna u l-post fejn inkunu. Xi nies jiġu fuqna għal-letteratura. Oħrajn ikunu jridu t-tweġibiet għall-mistoqsijiet li jkollhom. U xi wħud sempliċement ikunu jridu jitkellmu għal ftit minuti. B’dan il-mod iż-żjajjar lura tiegħi jiġu għandi,” jitbissem hu.
“Ħafna nies huma verament interessati fil-Bibbja,” iżid Harold. “F’xahar wieħed erbaʼ persuni bdew jistudjaw il-Bibbja max-Xhieda grazzi għal-letteratura li rċevew mingħandna u għall-mistoqsijiet li konna kapaċi nweġbulhom minn fuq il-Bibbja. Esperjenzi bħal dawn jinkuraġġuna ħafna.”
Bħal Sid u Harold—u bħall-appostlu Pawlu—ix-Xhieda taʼ Jehovah kullimkien jużaw kull mezz possibbli biex ixerrdu l-messaġġ vitali tagħhom. B’hekk, l-“Evanġelju tas-Saltna” jibqaʼ jixxandar “fid-dinja kollha.”—Mattew 24:14.