Ibqaʼ Agħmel Progress Spiritwali!

Il-​jum tal-​magħmudija tagħna huwa jum li għandna nibqgħu dejjem ngħożżuh u niftakruh. Wara kollox, huwa l-​jum li fih niddikjaraw pubblikament li għamilna dedikazzjoni biex naqdu lil Alla.

GĦAL ħafna individwi jirrikjedi sforz kbir ferm biex jilħqu dan il-​punt​—jaqtgħu drawwiet ħżiena antiki ħafna, jinqatgħu minn sħubija li mhix edifikanti, ibiddlu stili taʼ ħsieb u mġiba b’għeruq fondi.

Minkejja dan, fil-​waqt li l-​magħmudija hija ġrajja taʼ ferħ u sinjifikanti fil-​ħajja taʼ Kristjan, din hija biss il-​bidu. L-​appost­lu Pawlu qal lill-​Kristjani mgħammdin fil-​Ġudea: “Ħallina mill-​ewwel elementi tat-​tagħlim taʼ Kristu, u nimxu ’l quddiem lejn dak li hu aktar perfett.” (Lhud 6:1) Iva, il-​Kristjani kollha għandhom bżonn ‘jaslu biex isiru ħaġa waħda fil-​fidi u fl-​għarfien taʼ l-​Iben t’Alla; isiru raġel magħmul, fl-​aħjar taʼ żmienu. U hekk isseħħ il-​milja taʼ Kristu.’ (Efesin 4:13) Billi nipprogressaw sal-​punt tal-​maturità biss nistgħu verament ‘nissaħħu fil-​fidi.’—Kolossin 2:7.

Matul dawn l-​aħħar snin, mijiet t’eluf t’adoraturi ddedikati ġodda daħlu fil-​kongregazzjoni Kristjana. Forsi int wieħed minnhom. Bħal ħutek taʼ l-​ewwel seklu, int ma tridx li tibqaʼ tarbija spiritwalment. Trid tikber, tavanza! Imma kif? U x’inhuma xi modi li bihom tistaʼ tagħmel progress bħal dan?

Progress Permezz taʼ Studju Persunali

Pawlu qal lill-​Kristjani ġo Filippi: “Dan huwa dak li nkompli nitlob, li l-​imħabba tagħkom tistaʼ toktor iktar u iktar b’għarfien eżatt u dixxerniment sħiħ.” (Filippin 1:9, NW) Huwa kruċjali għall-​progress spiritwali tiegħek li tikber fl-​“għarfien eżatt.” Il-​proċess biex ‘nieħdu għarfien dwar Alla Jehovah u Ġesù Kristu’ huwa wieħed li jibqaʼ għaddej, mhux oġġett li jieqaf wara l-​magħmudija.—Ġwann 17:3.

Waħda oħt Kristjana li se nsejħulha Al­exandra, dan irrealizzatu għaxar snin wara li tgħammdet fl-​età taʼ 16-il sena. Hi trabbiet fil-​verità u dejjem kienet regulari f’li tattendi għal-​laqgħat Kristjani u f’li tieħu sehem fix-​xogħol taʼ l-​ippridkar. Hi tikteb: “F’dawn l-​aħħar ftit xhur, irrealizzajt li kien hemm xi ħaġa ħażina ferm. Iddeċidejt li nħares ħarsa sewwa u bl-​onestà kollha lejja nnifsi, x’inħoss għall-​verità, u għalfejn għadni fil-​verità.” X’sabet? Hi tkompli: “Sibt li r-​raġunijiet li għalihom kont fil-​verità kienu qed jiddisturbawni. Ftakart li hekk kif kont qed nikber, il-​laqgħat u s-​servizz taʼ l-​għalqa kienu qed jiġu enfasizzati. Ħassejt li d-​drawwiet taʼ l-​istudju persunali u tat-​talb kienu b’xi mod se jsibu posthom awtomatikament. Imma hekk kif flejt is-​sitwazzjoni tiegħi, irrealizzajt li ma ġara xejn minn dan.”

L-appostlu Pawlu jħeġġeġ: “Wasalna fejn wasalna fil-​progress tagħna, ejjew inkomplu mexjin bl-​ordni b’din l-​istess rutina.” (Filippin 3:16, NW) Rutina tistaʼ tqabbad il-​pass taʼ mixi ’l quddiem. Qabel il-​magħmudija tiegħek, bla dubju kellek rutina taʼ studju tal-​Bibbja kull ġimgħa m’għalliem ikkwalifikat tajjeb. Hekk kif l-​apprezzament tiegħek kiber, f’din ir-​rutina inkludejt il-​preparazzjoni bil-​quddiem għal kull lezzjoni tal-​ġimgħa, billi tfittex l-​iskritturi ċċitati fil-​Bibbja, eċċetra. Issa li mgħammed, komplejt int ‘timxi f’dik l-​istess rutina’?

Jekk le, jistaʼ jkun li għandek bżonn teżamina l-​prijoritajiet tiegħek mill-​ġdid, billi ‘tagħraf tagħżel l-​aħjar.’ (Filippin 1:10) Fil-​ħajjiet mgħaġġlin tagħna, hemm bżonn tal-​kontroll fuqna nfusna biex inwarrbu l-​ħin għall-​qari u l-​istudju persunali tal-​Bibbja. Imma l-​benefiċċji jagħtuna raġuni siewja biex nagħmlu dan l-​isforz. Erġaʼ ikkunsidra l-​esperjenza t’Alexandra. “Ikolli ngħid li ili neżisti fil-​verità għal dawn l-​aħħar 20 sena jew xi ħaġa hekk billi sempliċement immur għal-​laqgħat u nieħu sehem fil-​ministeru taʼ l-​għalqa,” tammetti hi. Madankollu, hi tkompli, “Wasalt għall-​konklużjoni li għalkemm dawn l-​affarijiet huma importanti, waħedhom ma jistgħux isostnuni meta jibdew jinqalgħu d-​diffikultajiet. Dan kollu ġara għaliex id-​drawwiet tiegħi taʼ studju persunali tistaʼ tgħid ma jeżistux, u t-​talb tiegħi huwa rari u superfiċjali. Issa nirrealizza li rrid nerġaʼ nirranġa l-​ħsieb tiegħi u nibda programm sinjifikanti taʼ studju sabiex inkun nistaʼ nsir naf tassew lil Jehovah u nsir inħobbu u napp­rezza dak li tana Ibnu.”

Jekk għandek bżonn l-​għajnuna biex tistabbilixxi rutina taʼ studju persunali, l-​anzjani u Kristjani maturi oħrajn fil-​kongregazz­joni tiegħek għandhom il-​pjaċir li jgħinuk. Iktar minn hekk, artikli li dehru fil-​ħarġiet taʼ l-​1 taʼ Mejju, 1995; tal-​15 taʼ Novembru, 1993; u tal-​15 t’Awissu, 1986, taʼ It-​Torri taʼ l-​Għassa għandhom għadd taʼ suġġerimenti li jistgħu jgħinuk.

Il-​Bżonn li Tersaq Qrib lejn Alla

Aspett ieħor li trid tistinka biex tipprogressa fih huwa r-​relazzjoni tiegħek m’Alla. F’ċerti każi għandu mnejn ikun hemm bżonn kbir ferm f’dan ir-​rigward. Ikkunsidra lil Anthony, li tgħammed taʼ età żgħira. “Fil-​familja tagħna jien kont l-​ewwel wieħed mit-​tfal li tgħammidt,” jirrakkonta hu. “Wara l-​magħmudija tiegħi, ommi għannqitni waħda u sew. Qatt ma kont rajtha daqshekk ferħana. Tant kien hemm ferħ, u veru ħassejtni b’saħħti.” Madankollu, kien hemm aspett ieħor f’din l-​istorja. “Għal ftit taʼ żmien ġmielu, ma kienx hemm żgħażagħ mgħammdin fil-​kongregazzjoni tagħna,” ikompli Anthony. “Allura ħassejtni kburi ħafna bija nnifsi. Ħassejtni kburi wkoll bil-​kummenti u t-​taħditiet tiegħi fil-​laqgħat. Għalija kien sar iktar importanti li naqlaʼ t-​tifħir u l-​approvazzjoni min-​nies milli li nġib tifħir lil Jehovah. Verament ma kellix relazzjoni mill-​qrib miegħu.”

Bħal Anthony, xi wħud għandhom mnejn għamlu dedikazzjoni iktar minħabba x-​xewqa li jogħġbu lil ħaddieħor milli minħabba x-​xewqa li jogħġbu lil Jehovah. Minkejja dan, Alla jistenna li wħud bħal dawn jgħixu fi qbil mal-​wegħda tagħhom li jaqduh. (Qabbel Koħèlet 5:3 [Koħèlet 5:4, NW].) Iżda, mingħajr affezzjoni persunali lejn Alla, taʼ spiss ikun diffiċli għalihom li jagħmlu hekk. Anthony jiftakar: “Il-​ferħ qawwi li kelli fil-​magħmudija tiegħi kien għomru qasir. Lanqas laħqet għaddiet sena li ma waqajtx fi dnub serju u kelli niġi mwiddeb mill-​anzjani fil-​kongregazz­joni. Kondotta ħażina rripetuta wasslet biex niġi maqtugħ mis-​sħubija mill-​kongregazzjoni. Sitt snin wara d-​dedikazzjoni tiegħi lil Jehovah, ġejt arrestat u mitfugħ il-​ħabs minħabba qtil.”

L-​Iżviluppar taʼ Relazzjoni Intima maʼ Jehovah

Hi x’inhi s-​sitwazzjoni tiegħek, il-​Kristjani kollha jistgħu jwieġbu għall-​istedina tal-​Bibbja: “Ersqu lejn Alla, u hu jersaq lejkom.” (Ġakbu 4:8) Bla dubju int kont ersaqt lejn Alla sa ċertu punt meta bdejt tistudja l-​Bibbja. Tgħallimt li Alla m’huwiex xi alla ast­ratt meqjum fil-​Kristjaneżmu, imma persuna li għandu isem, Jehovah. Tgħallimt ukoll li għandu kwalitajiet li jiġbduk, li hu “Alla li jagħder u jħenn; tqil biex jagħdab u kbir fit-​tjieba.”—Eżodu 34:6.

Madankollu, biex tgħix fi qbil mad-​dedikazzjoni tiegħek li taqdi lil Alla, trid tersaq saħansitra eqreb lejh! Kif? Is-​salmista talab: “Triqatek, Mulej, għarrafni, il-​mogħdijiet tiegħek għallimni.” (Salm 25:4) Studju persunali tal-​Bibbja u tal-​pubblikazzjonijiet tas-​Soċjetà jistgħu jgħinuk issir iktar midħla taʼ Jehovah. Huwa importanti wkoll li tieħu sehem regolarment f’talb mill-​fond taʼ qalbek. “Iftħu qalbkom quddiemu,” iħeġġeġ is-​salmista. (Salm 62:9 [Salm 62:8, NW]) Hekk kif tesperjenza li t-​talb tiegħek jiġi mwieġeb, se tħoss l-​interess persunali t’Alla fik. Dan se jgħinek tħossok eqreb lejh.

Il-provi u l-​problemi jippreżentaw ukoll opportunità oħra biex tersaq qrib lejn Alla. Tistaʼ tiffaċċja sfidi u testijiet tal-​fidi, bħalma huma l-​mard, il-​pressjonijiet fl-​iskola u fuq il-​post tax-​xogħol, jew tbatija ekonomika. Jistaʼ jkun ukoll li r-​rutina teokratika normali taʼ li tieħu sehem fil-​ministeru, tattendi għal-​laqgħat, jew tistudja l-​Bibbja maʼ wliedek hija diffiċli għalik. Tiffaċċjax dawn il-​problemi waħdek! Issupplika lil Alla għall-​għajnuna, billi titolbu għall-​gwida u d-​direzzjoni tiegħu. (Proverbji 3:5, 6) Itolbu bil-​ħniena għall-​ispirtu qaddis tiegħu! (Luqa 11:13) Hekk kif tesperjenza l-​għajnuna kollha mħabba t’Alla, se tersaq saħansitra eqreb lejh. Bħalma poġġieha s-​salmista David, “ippruvaw u taraw kemm hu tajjeb il-​Mulej; hieni l-​bniedem li jistkenn fih.”—Salm 34:9 [Salm 34:8, NW].

Xi ngħidu għal Anthony? “Bdejt naħseb dwar iż-​żmien meta kelli ħafna miri spiritwali ċċentrati fuq li nagħmel ir-​rieda taʼ Jehovah,” jiftakar hu. “Dan kien t’uġigħ. Imma matul l-​uġigħ u d-​diżappunt kollu, ftakart fl-​imħabba taʼ Jehovah. Ħadli ftit taż-​żmien sakemm kont kapaċi nitlob lil Jehovah, imma hekk għamilt, u ftaħt qalbi miegħu, billi tlabtu l-​maħfra. Bdejt ukoll naqra l-​Bibbja u stagħġibt b’kemm kont insejt u b’kemm kont naf ftit tassew dwar Jehovah.” Għalkemm Anthony għad irid jiskonta l-​kundanna tiegħu fil-​ħabs għad-​delitt li għamel, hu jirċievi l-​għajnuna mix-​Xhieda lokali u issa qed jirkupra spiritwalment ftit ftit. Bi gratitudni, Anthony jgħid: “Bis-​saħħa taʼ Jehovah u taʼ l-​organizzazzjoni tiegħu, irnexxieli nqaċċat il-​personalità l-​qadima, u qed nistinka biex kuljum nilbes il-​ġdida. Issa, ir-​relazzjoni tiegħi maʼ Jehovah hija l-​iktar importanti għalija.”

Progress Spiritwali fil-​Ministeru Tiegħek

Ġesù Kristu kkmanda lis-​segwaċi tiegħu biex ikunu predikaturi taʼ “l-​Evanġelju tas-​Saltna.” (Mattew 24:14) Bħala pubblikatur taʼ l-​aħbar tajba relattivament ġdid, l-​esperjenza tiegħek fil-​ministeru għandha mnejn tkun limitata. Kif, mela, tistaʼ tagħmel progress sabiex ‘taqdi sewwa l-​ministeru tiegħek’?—2 Timotju 4:5.

Mod wieħed huwa billi tiżviluppa attitudni pożittiva. Tgħallem qis ix-​xogħol taʼ l-​ippridkar bħala “teżor,” privileġġ. (2 Korintin 4:7) Huwa opportunità biex nuru l-​imħabba, il-​lealtà, u l-​integrità tagħna lejn Jehovah. Jippermettilna wkoll nuru tħassib fil-​proxxmu tagħna. Jistaʼ jkun sors taʼ hena ġenwin li bla ebda egoiżmu nagħtu minna nfusna f’dan ir-​rigward.—Atti 20:35.

Ġesù nnifsu kellu ħarsa pożittiva lejn ix-​xogħol taʼ l-​ippridkar. Kien bħal “ikel” għalih li jaqsam il-​veritajiet Bibliċi maʼ ħaddieħor. (Ġwann 4:34) Għalhekk, il-​motivazzjoni tiegħu biex jgħin lil oħrajn tistaʼ tinġabar fil-​kelma, “Irrid.” (Mattew 8:3) Ġesù kien jagħder lin-​nies, speċjalment lil dawk li kienu “mdejjqa u mitluqa” minħabba d-​dinja taʼ Satana. (Mattew 9:35, 36) ‘Trid’ int bl-​istess mod tgħin lil dawk li qegħdin fid-​dlam spiritwali u li għandhom bżonn it-​tidwil mill-​Kelma t’Alla? Mela int se tħossok imġiegħel li twieġeb għall-​kmand taʼ Ġesù: “Morru, mela, agħmlu dixxipli mill-​ġnus kollha.” (Mattew 28:19) Tabilħaqq, se tiġi mqanqal biex ikollok l-​iktar sehem sħiħ possibbli skond kemm jippermettulek saħħtek u ċ-​ċirkustanzi tiegħek.

Fattur ieħor għall-​progress huwa li tieħu sehem regolarment fil-​ministeru​—kull ġimgħa jekk inhu possibbli. Jekk tagħmel hekk, it-​twerwir u l-​biżaʼ li jistgħu jfixklu lil xi ħadd li jippriedka darba kultant, se jonq­su. Il-​parteċipazzjoni regulari fis-​servizz taʼ l-​għalqa se tibbenefikak b’modi oħrajn ukoll. Din se tkabbar l-​apprezzament tiegħek għall-​verità, tkabbarlek l-​imħabba tiegħek għal Jehovah u għall-​proxxmu, u tgħinek tibqaʼ ffokat fuq it-​tama tas-​Saltna.

Iżda, xi ngħidu jekk is-​sitwazzjoni preżenti tiegħek tillimitalek ħafna l-​parteċipazzjoni tiegħek fix-​xogħol taʼ l-​ippridkar? Jekk jidher ċar li ma jistgħux isiru aġġustamenti, imbagħad ħu l-​faraġ f’li tkun taf li Alla jieħu gost b’dak kollu li tistaʼ tagħmel, sakemm int qed taqdi b’ruħek kollha fis-​servizz tiegħek. (Mattew 13:23) Forsi tistaʼ tipprogressa b’modi oħrajn, bħal li ttejjeb l-​abbiltajiet taʼ l-​ippridkar tiegħek. Fil-​kongregazzjoni, l-​Iskola tal-​Ministeru Teokratiku u l-​Laqgħa tas-​Servizz jipprovdu ħafna taħriġ mill-​aħjar f’dan ir-​rigward. Naturalment, iktar ma nkunu kompetenti fil-​ministeru tagħna, iktar se nieħdu gost u se naraw riżultati.

Mela jidher ċar, li progress spiritwali m’għandux jieqaf dakinhar li wieħed jitgħammed. L-​appostlu Pawlu kiteb rigward it-​tama tiegħu li jikseb ħajja immortali fis-​smewwiet: “Ħuti, ma jidhirlix li dan ġa lħaqtu; imma ħaġa waħda ngħid: waqt li ninsa ’l taʼ warajja kollu, jiena nagħmel ħilti kollha biex nilħaq dak li hemm quddiemi; niġri ’l quddiem lejn it-​tmiem, biex nikseb il-​premju li għalih Alla qed isejjħilna hemm fuq fi Kristu Ġesù. Aħna li aħna perfetti, ħa nkunu taʼ din il-​fehma. Jekk taħsbu xorta oħra, jagħtikom id-​dawl Alla.”—Filippin 3:13-15.

Iva, il-​Kristjani kollha, kemm jekk it-​tama tagħhom hija l-​immortalità fis-​smewwiet jew ħajja taʼ dejjem f’Ġenna fuq l-​art, dawn iridu ‘jilħqu dak li hemm quddiemhom’​—jiġġebb­du, bħallikieku, biex jiksbu l-​ħajja li qed jimmiraw għaliha! Il-​magħmudija tiegħek kienet bidu mill-​aħjar, imma hija biss il-​bidu. Komp­li stinka biex tagħmel progress spiritwali. Permezz tal-​laqgħat u studju persunali, ‘kun raġel magħmul fi ħsibijietek.’ (1 Korintin 14:20) Kun kapaċi ‘tifhem . . . x’inhu l-​wisaʼ u t-​tul, l-​għoli u l-​fond’ tal-​verità. (Efesin 3:18) Il-​progress li tagħmel mhux se jgħinek biss biex iżżomm il-​ferħ u l-​hena issa, imma wkoll biex takkwista post fiż-​żgur fid-​dinja l-​ġdida t’Alla, fejn taħt il-​ħakma tas-​Saltna tas-​sema tiegħu, int se tkun tistaʼ tipp­rogressa għall-​eternità!

[Stampa f’paġna 29]

Jirrikjedi dixxiplina biex issib il-​ħin għall-​istudju persunali

[Stampa f’paġna 31]

Attitudni pożittiva tistaʼ tgħinna nsibu l-​ferħ fil-​ministeru