Ibqaʼ Miexi b’Mod Progressiv f’Rutina Magħmula bl-​Ordni

¹ L-​appostlu Pawlu kellu affezzjoni speċjali għall-​kongregazzjoni li kellu sehem biex jifformaha f’Filippi. Hu kien grat għall-​proviżjonijiet materjali tagħhom li taw mill-​qalb u tkellem dwarhom bħala li huma t’eżempju tajjeb.​—2 Kor. 8:​1-6.

² L-​ittra taʼ Pawlu lill-​Filippin kienet imqanqla minn imħabba kbira. Il-​ktieb Insight, it-​2 Volum, paġna 631, jgħid: “Fl-​ittra hu jinkuraġġixxi lill-​kongregazzjoni taʼ Filippi biex tkompli fit-​triq tagħha​—billi tikseb iktar dixxerniment u taqbad qabda soda mal-​Kelma tal-​ħajja, ikollha fidi iktar soda, u tama fir-​rigal li ġej.” Huma wieġbu minn qalbhom, u saħħew ir-​rabta taʼ mħabba bejnhom u bejn l-​appostlu. Il-​kliem taʼ Pawlu għandu tifsir speċjali għalina llum, jagħtina raġuni tajba biex nirriflettu bir-​reqqa fuq il-​parir tiegħu, partikolarment dak li qal f’​Filippin 3:​15-17.

³ Attitudni Mentali Matura Hija Essenzjali: F’​Filippin 3:​15, Pawlu kiteb bħala raġel bi snin t’esperjenza. Hu għaraf l-​avanz spiritwali tal-​Filippin billi indirizzahom bħala Kristjani maturi b’attitudni mentali xierqa. Sakemm l-​attitudni mentali tagħhom irriflettiet l-​umiltà u l-​apprezzament li wera Ġesù, huma kienu se jkomplu jkunu ‘bla ħtija u innoċenti, tfal t’Alla bla difett u b’qabda soda mal-​kelma tal-​ħajja.’ (Flp. 2:​15, 16) Meta naqraw il-​kliem taʼ Pawlu, għandna nħossuna li hu qed ikellem lilna. B’hekk, għandna xewqa kbira li jkollna l-​istess attitudni mentali li kellu Ġesù u nuru apprezzament umli għall-​privileġġi tagħna. Aħna nkomplu nitolbu lil Ġeħova u nistaqsuh għall-​għajnuna tiegħu f’dan u fi kwistjonijiet oħra.​—Flp. 4:​6, 7.

⁴ Bħalma jindika Filippin 3:​16, ilkoll kemm aħna għandna nistinkaw biex nagħmlu progress. Il-​kelma “progress” tfisser li “nimxu ’l quddiem, nagħmlu avanz.” Nies progressivi huma “interessati f’ideat, sejbiet, jew opportunitajiet ġodda.” Pawlu ried li l-​Filippin jifhmu li l-​Kristjanità qatt ma hi inattiva u dawk li jgħidu li huma Kristjani jridu jibqgħu mexjin ’il quddiem. L-​ispirtu taʼ progress tagħhom jistgħu juruh billi minn jeddhom jeżaminaw lilhom infushom, jagħrfu n-​nuqqasijiet tagħhom, u jistinkaw għal opportunitajiet biex jagħmlu iktar jew biex itejbu l-​kwalità taʼ dak li diġà qed jagħmlu. Illum l-​organizzazzjoni taʼ Ġeħova fuq l-​art tibqaʼ miexja ’l quddiem b’mod progressiv, dejjem tkabbar l-​attività tagħha u l-​fehma tagħha tal-​Kelma t’Alla. Kull wieħed minna għandu jżomm mal-​pass tagħha billi jieħu vantaġġ mill-​proviżjonijiet kollha u jieħu sehem bis-​sħiħ fix-​xogħol tagħha.

⁵ Il-​Progress Jirrikjedi Rutina Magħmula bl-​Ordni: Pawlu kompla billi ħeġġeġ lil ħutu biex jibqgħu “mexjin bl-​ordni b’din l-​istess rutina.” (Flp. 3:16) Il-​fatt li nimxu bl-​ordni jirrikjedi li nqiegħdu lil nies jew affarijiet fil-​post xieraq tagħhom u li naġixxu bl-​għaqal. Il-​Kristjani f’Filippi żammew posthom, billi baqgħu qrib l-​organizzazzjoni taʼ Ġeħova u taʼ xulxin. Ħajjithom kienet gwidata mil-​liġi taʼ l-​imħabba. (Ġw. 15:17; Flp. 2:​1, 2) Pawlu ħeġġiġhom biex ‘iġibu ruħhom kif jixraq lill-​aħbar tajba.’ (Flp. 1:27) Il-​bżonn li nibqgħu f’ordni u li nġibu ruħna kif jixraq hu daqstant importanti għall-​Kristjani llum.

⁶ Rutina hi meta tagħmel xi ħaġa li hi proċedura stabbilita. B’hekk hi marbuta mill-​qrib maʼ mod tradizzjonali taʼ kif tagħmel l-​affarijiet. Il-​fatt li jkollna rutina jistaʼ jkun taʼ vantaġġ għalina għaliex m’għandniex għalfejn nieqfu u naħsbuha meta nkunu se nieħdu xi deċiżjoni dwar x’pass imissna nagħmlu​—diġà stabbilejna rutina fissa li nsegwuha bħala drawwa.

⁷ Rutina teokratika bl-​ordni tikkonsisti fi drawwiet li huma bnin, taʼ benefiċċju, u li jogħġbu ’l Alla​—bl-​objettiv li nibnu lilna nfusna spiritwalment, ngħinu lil oħrajn, u jekk inhu possibbli, nagħmlu iktar fis-​servizz taʼ Ġeħova. Biex nilħqu dawn il-​miri b’suċċess jirrikjedi li nistabbilixxu u nżommu rutina li tinkludi studju persunali, attendenza regulari għal-​laqgħat, u parteċipazzjoni fix-​xogħol taʼ l-​ippridkar.

⁸ Affarijiet Essenzjali f’Rutina Magħmula bl-​Ordni: Bżonn wieħed hu “għarfien eżatt u dixxerniment sħiħ.” (Flp. 1:9) L-​istudju persunali jsaħħaħ il-​fidi u l-​apprezzament tagħna għall-​verità, u jimmotivana għal xogħlijiet mill-​aħjar. Madankollu, xi wħud sabuha diffiċli li jkunu konsistenti fid-​drawwiet taʼ l-​istudju tagħhom. Waħda mir-​raġunijiet għal dan hi nuqqas taʼ ħin.

⁹ Il-​benefiċċji li jiġu mill-​qari tal-​Bibbja kuljum ma jistgħux jiġu enfasizzati biżżejjed. L-​istruzzjoni tagħha “tiswa” għalkollox. (2 Tim. 3:​16, 17) Kif nistgħu nsibu l-​ħin għall-​istudju tal-​Bibbja fir-​rutina tagħna taʼ kuljum? Xi wħud sabu li jistgħu jqumu ftit minuti qabel kull fil-​għodu meta moħħhom ikun għadu frisk. Oħrajn isibuha aħjar meta jaqraw għal ftit minuti qabel ma jorqdu fil-​għaxija. Nisa li jkunu d-​dar matul il-​ġurnata forsi jkunu jistgħu jħallu ftit ħin wara nofsinhar qabel ma l-​oħrajn jiġu mix-​xogħol jew mill-​iskola. Flimkien maʼ qari tal-​Bibbja regulari, xi wħud inkludew il-​qari tal-​ktieb Proclaimers fir-​rutina tagħhom taʼ kull ġimgħa.

¹⁰ Meta nistabbilixxu drawwiet ġodda, hemm il-​possibbiltà li dawn se jtellfu d-​drawwiet li kellna qabel. Fil-​passat forsi konna mdorrijin inħallu attivitajiet li ma kinux essenzjali jiħdulna mill-​ħin. Forsi ma jkunx faċli li nbiddlu d-​drawwiet tagħna. Ħadd m’hu se jgħidilna kif għandna nistudjaw; u ma niġux mitlubin nagħtu kont taʼ x’nagħmlu f’dan ir-​rigward. Il-​konsistenza tad-​drawwiet taʼ l-​istudju tagħna tiddependi l-​iktar mill-​apprezzament tagħna taʼ “dak li hu iktar importanti” u kemm aħna lesti nużaw “il-​ħin bl-​aħjar mod” biex nibbenefikaw minnu.​—Flp. 1:10; Efes. 5:16.

¹¹ Il-​laqgħat Kristjani għandhom irwol vitali fil-​progress spiritwali tagħna billi jipprovdu istruzzjoni u inkuraġġiment neċessarju. Għalhekk, l-​attendenza għal-​laqgħat hija parti essenzjali oħra mir-​rutina tagħna magħmula bl-​ordni. Pawlu enfasizza l-​importanza taʼ dan. M’hix għażla skond il-​preferenza tagħna.​—Ebr. 10:​24, 25.

¹² Kif nistgħu nuru l-​ordni meta nippjanaw l-​iskeda t’attività tagħna taʼ kull ġimgħa? Xi wħud jirranġaw ħinijiet speċifiċi biex jagħmlu affarijiet persunali u mbagħad jipprovaw ideffsu l-​laqgħat meta jkunu jistgħu, imma għandu jkun bil-​kontra. Il-​laqgħat tagħna taʼ kull ġimgħa għandhom jingħataw prijorità, u għandna nippjanaw attivitajiet oħra madwarhom.

¹³ Attendenza regulari għal-​laqgħat tirrikjedi ppjanar tajjeb u kooperazzjoni mill-​familja. Matul il-​ġimgħa l-​maġġuranza minna għandna skeda t’attività mimlija li spiss tħallina bi ftit ħin. Dan ifisser li, jekk inhu possibbli, l-​ikla taʼ fil-​għaxija għandha tkun kmieni biżżejjed sabiex il-​familja jkollha ħin biżżejjed biex tiekol, tlesti, u tasal qabel ma tibda l-​laqgħa. Sabiex isir dan, il-​membri tal-​familja għandhom jikkooperaw b’modi differenti.

¹⁴ Is-​servizz taʼ l-​għalqa regulari hu vitali jekk irridu nkomplu mexjin b’mod progressiv f’rutina magħmula bl-​ordni. Ilkoll kemm aħna nirrikonoxxu biċ-​ċar ir-​responsabbiltà kbira li għandna biex nippridkaw il-​messaġġ tas-​Saltna. Dan hu dak li jagħmilna Xhieda taʼ Ġeħova. (Is. 43:10) Ladarba hu l-​iktar xogħol urġenti u taʼ benefiċċju li qed isir illum, m’hemm ebda mod li nistgħu nħarsu lejh bħala parti sekondarja tar-​rutina tagħna. Pawlu qal: “Ħa noffru dejjem sagrifiċċju taʼ tifħir lil Alla, jiġifieri, il-​frott tax-​xofftejn li jistqarru ismu pubblikament.”​—Ebr. 13:15.

¹⁵ Meta nippjanaw l-​attività tagħna taʼ kull ġimgħa, għandna nwarrbu ħinijiet speċifiċi għas-​servizz taʼ l-​għalqa. X’aktarx li l-​kongregazzjoni għandha laqgħat tas-​servizz diversi drabi matul il-​ġimgħa, u b’hekk kemm tagħżel liema tistaʼ tappoġġa int. Ikun tajjeb li tistinka biex tieħu sehem f’kull aspett tas-​servizz, bħax-​xogħol minn dar għal dar bir-​rivisti u letteratura oħra, żjajjar lura, u studji tal-​Bibbja. Nistgħu anki nippjanaw bil-​quddiem biex nagħtu xiehda informali billi nġorru letteratura u nkunu attenti għal opportunitajiet biex nibdew konversazzjonijiet. Ladarba ġeneralment noħorġu m’oħrajn, għandna bżonn nistaqsu dwar l-​iskeda tagħhom sabiex inkunu nistgħu nagħmlu arranġamenti li jkunu konvenjenti għal kulħadd.

¹⁶ Għandna nżommu r-​rutina tagħna taʼ l-​ippridkar minkejja l-​indifferenza fit-​territorju. Aħna diġà nafu li ftit biss se jwieġbu b’mod favorevoli. (Mt. 13:15; 24:9) Eżekjel ġie inkarigat biex jippriedka lin-​nies li kienu ‘ribellużi, insolenti, u qalbhom iebsa.’ Ġeħova wiegħed li se jgħin lil Eżekjel billi jagħmillu ‘rasu iebsa daqs tagħhom,’ jiġifieri, bħal “djamant, aktar iebsa miż-​żnied.” (Eżek. 2:​3, 4; 3:​7-9) Għalhekk, rutina regulari għas-​servizz tirrikjedi perseveranza.

¹⁷ Eżempji Tajbin biex Nimitaw: Il-​maġġuranza minna mmorru aħjar fis-​servizz taʼ l-​għalqa meta jkun hemm xi ħadd li jieħu t-​tmexxija. Pawlu u sħabu ħallew eżempju tajjeb, u hu ħeġġeġ lil oħrajn biex jimitawh. (Flp. 3:17) Ir-​rutina tiegħu inkludiet l-​elementi kollha li kien hemm bżonn biex iżomm lilu nnifsu b’saħħtu spiritwalment.

¹⁹ Illum ukoll aħna mberkin b’eżempji tajbin. F’​Ebrej 13:​7, Pawlu ħeġġeġ: “Ftakru f’dawk li qed imexxu fostkom . . . u imitaw il-​fidi tagħhom, waqt li tosservaw bir-​reqqa r-​riżultat tal-​kondotta tagħhom.” M’għandniex xi ngħidu, Kristu hu x-​Xempju tagħna, imma nistgħu nimitaw il-​fidi li juru dawk li qed imexxu fostna. Bħal Pawlu, l-​anzjani għandhom ikunu konxji tal-​bżonn li jkunu t’eżempju tajjeb għal oħrajn. Filwaqt li ċ-​ċirkustanzi persunali tagħhom jistgħu jvarjaw, kull wieħed għandu jkun kapaċi juri li qed iżomm rutina magħmula bl-​ordni billi jżomm l-​interessi tas-​Saltna l-​ewwel. Anki b’obbligazzjonijiet sekulari u tal-​familja, l-​anzjani għandhom ikollhom drawwiet tajbin stabbiliti taʼ studju persunali, attendenza għal-​laqgħat, u jieħdu t-​tmexxija fis-​servizz taʼ l-​għalqa. Jekk l-​anzjani juru li huma qed ‘jippresiedu fuq dawk taʼ darhom bl-​aħjar mod,’ dawk kollha fil-​kongregazzjoni se jiġu inkuraġġiti biex jibqgħu mexjin b’rutina magħmula bl-​ordni.​—1 Tim. 3:​4, 5.

¹⁹ Miri għas-​Sena taʼ Servizz il-​Ġdida: Il-​bidu taʼ sena taʼ servizz ġdida huwa żmien mill-​aqwa biex nirriflettu fuq ir-​rutina persunali tagħna. Jekk nirrivedu l-​attività tagħna tas-​sena l-​oħra din x’turi? Żammejna, jew saħansitra tejjibna, il-​livell t’attività tagħna? Forsi għamilna l-​istudju persunali iktar bir-​reqqa. Forsi attendejna l-​laqgħat b’mod iktar regulari jew forsi żidna fis-​servizz taʼ l-​għalqa billi bdejna naqdu bħala pijunieri awżiljarji. Forsi nistgħu nippontaw lejn atti speċifiċi taʼ meta wrejna l-​qalb tajba maʼ xi ħadd fil-​kongregazzjoni jew fil-​familja. Jekk iva, nistgħu nifirħu li mxejna b’mod li jogħġob lil Alla, u għandna raġunijiet tajbin biex ‘inkomplu nagħmlu dan iktar bis-​sħiħ.’​—1 Tess. 4:1.

²⁰ Xi ngħidu jekk ir-​rutina tagħna kienet daqsxejn inkonsistenti jew mhux regulari? Kif ġejna effettwati spiritwalment? Ġie, għal xi raġuni, imfixkel il-​progress tagħna? Biex nagħmlu progress l-​ewwel irridu nitolbu lil Ġeħova għall-​għajnuna. (Flp. 4:​6, 13) Iddiskuti l-​bżonnijiet tiegħek mal-​kumplament tal-​familja billi tistaqsi għall-​għajnuna tagħhom biex tirranġa ċerti aspetti mir-​rutina tiegħek. Jekk għandek xi problemi, staqsi lill-​anzjani għall-​għajnuna. Jekk nagħmlu sforz mill-​qalb biex inwieġbu għad-​direzzjoni taʼ Ġeħova, nistgħu nkunu ċerti li se nevitaw li ‘nkunu inattivi jew bla frott.’​—2 Pt. 1:​5-8.

²¹ Il-​fatt li nimxu f’rutina magħmula bl-​ordni jistaʼ jwassalna għal barkiet li juruna li l-​isforzi tagħna ma kinux għalxejn. Hekk kif tkunu determinati li timxu b’mod progressiv f’rutina magħmula bl-​ordni, “titnikkrux f’xogħolkom. Kunu mħeġġin bl-​ispirtu. Tjassru għal Ġeħova.” (Rum. 12:11)​—Għal iktar dettalji dwar dan is-​suġġett, ara The Watchtower taʼ l-​1 taʼ Mejju, 1988, paġni 13-17. (km-E 8/94)