‘Doni Fi Bnedmin’ Biex Jieħdu Ħsieb in-​Nagħaġ taʼ Jehovah

‘Telaʼ fl-​għoli, jassar l-​ilsiera; ta doni fi bnedmin.’—EFESIN 4:8.

1. Oħt Kristjana kif esprimiet ruħha dwar l-​anzjani fil-​kongregazzjoni tagħha?

“GRAZZI talli tant ħadtu ħsiebna. It-​tbissim tagħkom, l-​għożża tagħkom, u t-​tħassib tagħkom tant huma ġenwini. Intom dejjem lesti biex tisimgħuna u taqsmu magħna kliem minn fuq il-​Bibbja li tant iġagħluna nħossuna aħjar. Jien nitlob li qatt ma nonqos milli nuri apprezzament.” Hekk kitbet waħda oħt Kristjana lill-​anzjani fil-​kongregazzjoni tagħha. Jidher ċar li l-​imħabba li ntweriet minn rgħajja Kristjani li jimpurtahom kienet messitilha qalbha.—1 Pietru 5:2, 3.

2, 3. (a) Skond Isaija 32:1, 2, anzjani li jagħdru kif jieħdu ħsiebhom in-​nagħaġ taʼ Jehovah? (b) Anzjan meta jistaʼ jiġi kkunsidrat bħala don?

² L-​anzjani huma provvediment mingħand Jehovah biex jieħdu ħsieb in-​nagħaġ tiegħu. (Luqa 12:32; Ġwann 10:16) In-​nagħaġ taʼ Jehovah huma għeżież għalih​—fil-​fatt, tant huma għeżież li xtrahom bid-​demm prezzjuż taʼ Ġesù. Mela, mhux taʼ b’xejn li Jehovah jieħu gost meta l-​anzjani jittrattaw lill-​merħla b’tenerezza. (Atti 20:28, 29) Innota d-​deskrizzjoni profetika taʼ dawn l-​anzjani jew “prinċpijiet”: “Kull wieħed ikun bħal ilqugħ għar-​riħ, u kenn fit-​tempesta, bħal swieqi taʼ l-​ilma f’art niexfa, bħal dell taʼ blata kbira fuq art imħeddla.” (Isaija 32:1, 2) Iva, huma għandhom jipproteġu, jirrifreskaw, u jfarrġu lin-​nagħaġ tiegħu. L-​anzjani li jirgħu lill-​merħla b’mogħdrija jkunu b’hekk qed jistinkaw biex iwettqu dak li Alla jistenna minnhom.

³ Anzjani bħal dawn jiġu rreferuti fil-​Bibbja bħala ‘doni fi bnedmin.’ (Efesin 4:8) Meta taħseb dwar xi don, jew rigal, tiġik f’moħħok xi ħaġa li xi ħadd jaqlaʼ, u li tkun utli jew iġġib ferħ lil min jirċiviha. Anzjan jistaʼ jiġi kkunsidrat bħala don meta juża l-​abbiltajiet tiegħu biex jipprovdi l-​għajnuna meħtieġa u jikkontribwixxi għall-​ferħ tal-​merħla. Dan kif jistaʼ jagħmlu? It-​tweġiba, li tinsab fil-​kliem taʼ Pawlu f’Efesin 4:7-16, turi kemm hu kbir it-​tħassib bl-​imħabba li Jehovah għandu għan-​nagħaġ tiegħu.

‘Doni fi Bnedmin’​—Minfejn?

4. Bi twettiq taʼ Salm 68:19 [Salm 68:18, NW], Jehovah b’liema mod ‘telaʼ fl-​għoli,’ u min kienu d-​‘doni fi bnedmin’?

⁴ Meta Pawlu uża l-​espressjoni ‘doni fi bnedmin,’ hu kien qed jikkwota lis-​Sultan David, li kien qal dan dwar Jehovah: “Int tlajt fl-​għoli, bl-​ilsiera warajk, bnedmin int ħadt b’għotjiet tiegħek.” (Salm 68:19 [Salm 68:18, NW]) Wara li l-​Iżraeliti kienu ilhom fl-​Art Imwegħda għal xi snin, Jehovah b’mod figurattiv ‘telaʼ’ fuq il-​Muntanja Sijon u għamel lil Ġerusalemm il-​kapitali tas-​Saltna taʼ Iżrael b’David bħala s-​sultan tagħha. Imma min kienu ‘l-​bnedmin b’għotjiet tiegħek’? Kienu rġiel meħudin fil-​jasar matul il-​konkwista tal-​pajjiż. Xi wħud minn dawn l-​ilsiera iktar tard ngħataw lil-​Leviti biex jgħinu fix-​xogħol tat-​tabernaklu.—Esdra 8:20.

5. (a) Pawlu kif indika li Salm 68:19 [Salm 68:18, NW] kellu twettiq fil-​kongregazzjoni Kristjana? (b) Ġesù b’liema mod ‘telaʼ fl-​għoli’?

⁵ Fl-​ittra tiegħu lill-​Efesin, Pawlu jindika li kliem is-​salmista għandu twettiq akbar fil-​kongregazzjoni Kristjana. Billi fi kliemu fisser il-​kliem taʼ Salm 68:19 [Salm 68:18, NW], Pawlu kiteb: “Lil kull wieħed minna Alla tana l-​grazzja skond il-​qjies tad-​don taʼ Kristu. Hu għalhekk li tgħid l-​Iskrittura: ‘Telaʼ fil-​għoli, jassar l-​ilsiera, ta don [fi] . . . bnedmin.’” (Efesin 4:7, 8) Pawlu hawnhekk japplika dan is-​salm għal Ġesù bħala r-​rappreżentant t’Alla. Ġesù ‘rebaħ id-​dinja’ bil-​korsa leali tiegħu. (Ġwann 16:33) Hu ttrijonfa fuq il-​mewt u fuq Satana għar-​raġuni li Alla rxoxtah mill-​imwiet. (Atti 2:24; Lhud 2:14) Fis-​sena 33 E.K., Ġesù rxoxtat telaʼ “fuq is-​smewwiet kollha”​—iktar fl-​għoli mill-​ħlejjaq tas-​sema l-​oħrajn kollha. (Efesin 4:9, 10; Filippin 2:9-11) Bħala konkwistatur, Ġesù ħa “lsiera” mill-​għadu. Dan kif?

6. Minn Pentekoste tas-​sena 33 E.K., Ġesù rxoxtat kif beda jġorr dak kollu li jistaʼ mid-​dar taʼ Satana, u x’għamel bihom l-​“ilsiera”?

⁶ Meta kien fuq l-​art, Ġesù wera l-​qawwa tiegħu fuq Satana billi ħeles lil dawk li kienu miżmumin fil-​jasar mid-​demonji. Kien bħallikieku Ġesù invada d-​dar taʼ Satana, rabtu, u ħadlu l-​affarijiet tiegħu. (Mattew 12:22-29) Immaġina, wara li ġie rxoxtat u fdat b’‘kull setgħa fis-​sema u fl-​art,’ Ġesù kemm setaʼ jieħu affarijiet taħt idejh! (Mattew 28:18) Minn Pentekoste tas-​sena 33 E.K., Ġesù li kien telaʼ s-​sema beda, bħala r-​rappreżentant t’Alla, iġorr kulma setaʼ mid-​dar taʼ Satana billi ‘beda jieħu fil-​jasar ilsiera’​—irġiel li kienu ilhom fil-​jasar tad-​dnub u l-​mewt u taħt il-​kontroll taʼ Satana. Dawn l-​“ilsiera” minn jeddhom saru “lsiera taʼ Kristu, li jagħmlu r-​rieda taʼ Alla minn qalbhom.” (Efesin 6:6) Ġesù, fil-​fatt, ħatafhom minn taħt il-​kontroll taʼ Satana u, għan-​nom taʼ Jehovah, tahom lill-​kongregazzjoni bħala ‘doni fi bnedmin.’ Immaġina Satana x’dagħdigħa inutli kellu hekk kif dawn ġew maħtufin minn taħt imnieħru!

7. (a) Dawn id-​‘doni fi bnedmin’ f’liema kapaċitajiet jaqdu fil-​kongregazzjoni? (b) Jehovah liema opportunità ta lil kull raġel li jaqdi bħala anzjan?

⁷ Nistgħu nsibu dawn id-​‘doni fi bnedmin’ fil-​kongregazzjoni llum? Dażgur li nsibu! Dawn insibuhom jaqdu bħala anzjani, jaħdmu iebes bħala ‘evanġelisti, rgħajja, u għalliema’ fl-​iktar mis-​87,000 kongregazzjoni tal-​poplu t’Alla madwar id-​dinja. (Efesin 4:11) Satana kieku jixtieq ferm li dawn jaħqru lill-​merħla. Imma Alla permezz taʼ Kristu mhux għalhekk tahom lill-​kongregazzjoni. Pjuttost, Jehovah pprovda lil dawn l-​irġiel għall-​ġid tal-​kongregazzjoni, u dawn iridu jagħtu kont lilu għan-​nagħaġ li huma fdati f’idejhom. (Lhud 13:17) Jekk int taqdi bħala anzjan, Jehovah tak opportunità taʼ l-​għaġeb biex turi kemm int għotja, jew barka, għal ħutek. Tistaʼ tagħmel dan billi twettaq erbaʼ responsabbiltajiet importanti.

Meta Jkun hemm Bżonn “Aġġustament mill-​Ġdid”

8. Kultant b’liema modi lkoll kemm aħna jkollna bżonn niġu aġġustati mill-​ġdid?

⁸ L-​ewwel, id-​‘doni fi bnedmin’ huma pprovduti “għat-​trawwim tal-​qaddisin,” jgħid Pawlu. (Efesin 4:12, Saydon) In-​nom Grieg hawnhekk mogħti “trawwim,” jew “aġġustament mill-​ġdid” (NW), jirreferi għal li wieħed ipoġġi xi ħaġa “f’linja xierqa.” Bħala bnedmin imperfetti, ilkoll kemm aħna jkollna bżonn niġu aġġustati minn żmien għal żmien​—li jkollna l-​ħsibijiet, l-​attitudnijiet, jew il-​kondotta tagħna miġjubin “f’linja xierqa” mal-​ħsieb u r-​rieda t’Alla. Jehovah b’imħabba pprovdielna ‘doni fi rġiel’ biex jgħinna nagħmlu l-​aġġustamenti meħtieġa. Huma kif jagħmluh dan?

9. Anzjan kif jistaʼ jgħin lil nagħġa li żbaljat biex terġaʼ taġġusta ruħha?

⁹ Xi kultant, anzjan jistaʼ jiġi mitlub jgħin lil xi nagħġa li tkun żbaljat, u li forsi ‘tinqabad f’xi ħtija.’ Anzjan kif jistaʼ jgħin? ‘Widdbuha [‘Aġġustawha,’ NW] bi spirtu taʼ ħlewwa,’ jgħid Galatin 6:1. Għaldaqstant, meta anzjan joffri parir, mhux se jikser lil dak li jkun żbalja billi juża kliem aħrax. Il-​parir għandu jinkuraġġixxi, mhux ‘ibeżżaʼ,’ lil dak li jirċivih. (2 Korintin 10:9; qabbel Ġob 33:7.) L-​individwu għandu mnejn diġà jħossu jistħi, għalhekk ragħaj li jħobb se jevita li jkompli jġagħlu jħossu agħar milli jkun. Meta l-​parir, saħansitra b’ċanfira soda, ikun b’mod ċar motivat u mogħti bl-​imħabba, x’aktarx li dan jerġaʼ jaġġusta l-​ħsieb u l-​kondotta taʼ dak li jkun żbalja, u b’hekk jirrestawrah.—2 Timotju 4:2.

10. X’inhu involut f’li xi ħadd jiġi aġġustat mill-​ġdid?

¹⁰ Meta Jehovah pprovda ‘doni fi bnedmin’ biex inkunu nistgħu niġu mrawmin, jew aġġustati mill-​ġdid, kellu f’moħħu li l-​anzjani jkunu rifreskanti spiritwalment u jixirqilhom li jiġu imitati mill-​poplu tiegħu. (1 Korintin 16:17, 18; Filippin 3:17) Li wieħed jaġġusta lil xi ħadd ma jinvolvix biss li jikkoreġi lil dak li jkun qabad korsa ħażina imma wkoll li jgħin lil dawk leali jibqgħu fil-​korsa t-​tajba.a Illum b’daqs dawn problemi li jġagħluna naqtgħu qalbna, ħafna għandhom bżonn l-​inkuraġġiment biex jibqgħu sodi. Xi wħud għandhom mnejn ikollhom bżonn għajnuna tenera biex iġibu l-​ħsieb tagħhom f’linja maʼ dak t’Alla. Per eżempju, xi Kristjani leali jissieltu maʼ sentimenti profondi għax iħossuhom inadegwati jew indenji. Dawn l-​“erwieħ dipressi” għandhom mnejn iħossu li Jehovah qatt ma jistaʼ jħobbhom u li saħansitra l-​aqwa sforzi tagħhom biex jaqdu lil Alla ma jistgħu qatt ikunu aċċettabbli għalih. (1 Tessalonikin 5:14, NW) Imma dan il-​mod taʼ ħsieb m’huwiex f’linja maʼ kif Alla jħossu verament dwar l-​adoraturi tiegħu.

11. L-​anzjani x’jistgħu jagħmlu biex jgħinu lil dawk li qed jissieltu maʼ sentimenti għax iħossuhom indenji?

¹¹ Anzjani, x’tistgħu tagħmlu biex tgħinu lil dawn l-​uħud? Bil-​qalb tajba kollha aqsmu magħhom provi Skritturali li Jehovah jimpurtah minn kull qaddej tiegħu u assigurawhom li dawn it-​testi Bibliċi japplikaw għalihom personalment. (Luqa 12:6, 7, 24) Għinuhom jaraw li Jehovah ‘ġibidhom lejh’ biex jaqduh, mela żgur li bilfors jara kemm huma taʼ valur. (Ġwann 6:44) Assigurawhom li m’humiex waħedhom​—ħafna qaddejja leali taʼ Jehovah kellhom sentimenti bħal tagħhom. Il-​profeta Elija darba tant kien dipress li xtaq imut. (1 Slaten 19:1-4) Xi Kristjani midlukin fl-​ewwel seklu ħassewhom ‘imċanfrin’ mill-​kuxjenzi tagħhom stess. (1 Ġwann 3:20) Hemm faraġ f’li tkun taf li dawn l-​uħud leali fi żminijiet Bibliċi kienu ‘bnedmin bħalna.’ (Ġakbu 5:17) Tistgħu wkoll tirrevedu artikli inkuraġġanti fit-​Torri taʼ l-​Għassa u Stenbaħ! maʼ dawk li qed jaqtgħu qalbhom. L-​isforzi tagħkom kollhom imħabba biex tirrestawraw il-​fiduċja taʼ wħud bħal dawn m’humiex se jibqgħu bla ma jiġu nnotati minn Alla li ta lilkom bħala ‘doni fi bnedmin.’—Lhud 6:10.

‘Jibnu’ lill-​Merħla

12. X’inhu indikat bl-​espressjoni ‘li jinbena l-​Ġisem taʼ Kristu,’ u x’inhu l-​qofol taʼ li jibnu lill-​merħla?

¹² It-​tieni, id-​‘doni fi bnedmin’ huma mogħtijin bl-​intenzjoni ‘li jinbena l-​Ġisem taʼ Kristu.’ (Efesin 4:12) Pawlu hawnhekk jagħmel paragun. ‘Li jinbena’ jfakkarna f’kostruzzjoni, u l-​“Ġisem taʼ Kristu” jirreferi għan-​nies​—il-​membri tal-​kongregazzjoni Kristjana. (1 Korintin 12:27; Efesin 5:23, 29, 30) L-​anzjani għandhom bżonn jgħinu lil ħuthom jissaħħu spiritwalment. L-​objettiv tagħhom hu ‘li jibnu u mhux iġarrfu’ lill-​merħla. (2 Korintin 10:8) Il-​qofol biex tinbena l-​merħla hu l-​imħabba, għax ‘l-​imħabba tibni.’—1 Korintin 8:1.

13. X’ifisser li wieħed juri empatija, u għala huwa importanti li l-​anzjani juru l-​empatija?

¹³ Aspett wieħed taʼ l-​imħabba li jgħin lill-​anzjani jibnu l-​merħla hu l-​empatija. Li turi empatija jfisser li tħoss għal oħrajn​—taħseb u tħoss bħalhom, u tikkunsidra l-​limitazzjonijiet tagħhom. (1 Pietru 3:8) Għala huwa importanti li l-​anzjani jkollhom l-​empatija? Fuq kollox għaliex Jehovah​—dak li jagħti dawn id-​‘doni fi bnedmin’—​hu Alla li juri empatija. Meta l-​qaddejja tiegħu jkunu qed ibatu jew muġugħin, hu jħoss għalihom. (Eżodu 3:7; Isaija 63:9) Hu juri konsiderazzjoni għal-​limitazzjonijiet tagħhom. (Salm 103:14) Allura, l-​anzjani kif jistgħu juru l-​empatija?

14. L-​anzjani b’liema modi jistgħu juru l-​empatija lejn oħrajn?

¹⁴ Meta xi ħadd skuraġġit imur għandhom, huma jagħtu widen, billi jirrikonoxxu s-​sentimenti taʼ dak li jkun. Jipprovaw jifhmu l-​isfond, il-​personalità, u ċ-​ċirkustanzi taʼ ħuthom. Imbagħad meta l-​anzjani jagħtu għajnuna Skritturali li tibni, in-​nagħaġ se jsibuha faċli li jaċċettawha għaliex tkun ġejja mingħand rgħajja li verament jifhmuhom u jimpurtahom minnhom. (Proverbji 16:23) L-​empatija tqanqal ukoll lill-​anzjani biex jikkunsidraw il-​limitazzjonijiet t’oħrajn u s-​sentimenti li jistgħu jirriżultaw minn dawn il-​limitazzjonijiet. Per eżempju, xi Kristjani kuxjenzjużi għandhom mnejn iħossuhom ħatjin minħabba li ma jistgħux jagħmlu iktar f’li jaqdu lil Alla, forsi minħabba età kbira jew nuqqas taʼ saħħa. Mill-​banda l-​oħra, xi wħud jistaʼ jkollhom bżonn taʼ inkuraġġiment biex itejbu l-​ministeru tagħhom. (Lhud 5:12; 6:1) L-​empatija se tqanqal lill-​anzjani biex isibu ‘kliem sabiħ’ li jibni lil oħrajn. (Koħèlet 12:10) Meta n-​nagħaġ taʼ Jehovah jiġu mibnijin u motivati, l-​imħabba tagħhom għal Alla se tqanqalhom biex jagħmlu dak kollu li jistgħu biex jaqduh!

Irġiel li Jippromwovu l-​Unità

15. Xi tfisser l-​espressjoni “ħaġa waħda fil-​fidi”?

¹⁵ It-​tielet, id-​‘doni fi bnedmin’ huma pprovduti sabiex “aħna lkoll naslu biex insiru ħaġa waħda fil-​fidi u fl-​għarfien taʼ l-​Iben taʼ Alla.” (Efesin 4:13) Il-​frażi “ħaġa waħda fil-​fidi” tfisser unità, mhux biss taʼ twemmin imma wkoll taʼ dawk li jemmnu. Mela, din hija raġuni oħra għala Alla tana ‘doni fi bnedmin’​—biex jippromwovi l-​unità fost il-​poplu tiegħu. Dan kif jagħmluh?

16. Għala huwa importanti li l-​anzjani jżommu l-​unità bejniethom?

¹⁶ L-​ewwel ħaġa, huma jridu jżommu l-​unità bejniethom. Jekk ir-​rgħajja huma maqsumin, in-​nagħaġ jistgħu jiġu ttraskurati. Ħin prezzjuż li jistaʼ jintuża f’li jirgħu lill-​merħla jistaʼ jinħela f’laqgħat twal u dibattiti bla bżonn fuq kwistjonijiet li m’humiex importanti. (1 Timotju 2:8) L-​anzjani mhux bilfors jaqblu awtomatikament fuq kull ħaġa li jiddiskutu, għax huma rġiel li għandhom personalitajiet li jistgħu jvarjaw mhux ħażin. L-​unità ma teskludix il-​fatt li dawn ikollhom opinjonijiet differenti jew saħansitra li jesprimuhom b’mod ibbilanċjat waqt diskussjoni b’moħħ miftuħ. L-​anzjani jippreservaw l-​unità tagħhom billi jagħtu widen bir-​rispett kollu lil xulxin mingħajr preġudizzju. U sakemm ma jmorru kontra ebda prinċipju tal-​Bibbja, kull wieħed għandu jkun lest iċedi għal u jappoġġa d-​deċiżjoni finali tal-​ġemgħa taʼ l-​anzjani. Jekk juru spirtu li lest li jċedi jkunu qed juru li huma ggwidati mill-​“għerf li ġej mis-​sema,” li hu “paċifiku, raġunevoli.”—Ġakbu 3:17, 18, NW.

17. L-​anzjani kif jistgħu jgħinu biex tiġi ppreservata l-​unità fil-​kongregazzjoni?

¹⁷ L-​anzjani jkunu attenti wkoll biex jippromwovu l-​unità fil-​kongregazzjoni. Meta influwenzi li jifirdu​—bħal tqasqis li jweġġaʼ, tendenza li tattribwixxi motivi ħżiena lil oħrajn, jew spirtu argumentattiv—​jheddu l-​paċi, huma mill-​ewwel joffru parir t’għajnuna. (Filippin 2:2, 3) Per eżempju, l-​anzjani għandhom mnejn jindunaw b’individwi li jħobbu jikkritikaw iżżejjed jew li għandhom it-​tendenza li jħobbu jindaħlu fejn ma jesagħhomx, u b’hekk jilħqu salib ħaddieħor. (1 Timotju 5:13; 1 Pietru 4:15) L-​anzjani jipprovaw jgħinu lil dawn jindunaw li din il-​korsa hija kuntrarja għal dak li ġejna mgħallmin minn Alla u li kull wieħed minna jrid ‘jerfaʼ t-​tagħbija tiegħu.’ (Galatin 6:5, 7; 1 Tessalonikin 4:9-12) Billi jużaw l-​Iskrittura, huma jispjegaw li Jehovah jħalli ħafna affarijiet biex nagħmluhom skond il-​kuxjenza individwali tagħna, u ħadd minna m’għandu jiġġudika lil oħrajn fi kwistjonijiet bħal dawn. (Mattew 7:1, 2; Ġakbu 4:10-12) Biex naqdu flimkien f’unità, irid ikun hemm atmosfera taʼ fiduċja u rispett fil-​kongregazzjoni. Billi joffru pariri Skritturali meta jkunu meħtieġa, dawn id-​‘doni fi bnedmin’ jgħinuna nippreservaw il-​paċi u l-​unità tagħna.—Rumani 14:19.

Jipproteġu lill-​Merħla

18, 19. (a) Id-​‘doni fi bnedmin’ minn min jipproteġuna? (b) In-​nagħaġ minn liema periklu ieħor jeħtieġ li jiġu protetti, u l-​anzjani kif jaġixxu biex jipproteġu lin-​nagħaġ?

¹⁸ Ir-​rabaʼ, Jehovah jipprovdi d-​‘doni fi bnedmin’ biex jipproteġina milli nkunu influwenzati “minn kull riħ taʼ tagħlim bil-​qerq tal-​bnedmin u bl-​ingann tagħhom biex iwasslu lil ħaddieħor fl-​iżball.” (Efesin 4:14) Il-​kelma oriġinali għal “ingann” jingħad li tfisser “tqarraq fid-​dadi” jew “tkun tas-​sengħa f’li titfaʼ d-​dadi.” Ma jfakkarniex dan dwar kemm jaġixxu b’makakkerija l-​apostati? Billi jużaw argumenti makakki, huma jimmanipulaw l-​Iskrittura f’attentat biex jiġbdu lill-​veri Kristjani ’l bogħod mill-​fidi tagħhom. L-​anzjani jridu joqogħdu għassa għal “ilpup qalila” bħal dawn!—Atti 20:29, 30.

¹⁹ In-​nagħaġ taʼ Jehovah jeħtieġ li jiġu protetti minn perikli oħrajn ukoll. Ir-​ragħaj tal-​qedem, David, ipproteġa bla biżaʼ lill-​merħla taʼ missieru mill-​predaturi. (1 Samwel 17:34-36) Illum, ukoll, jistaʼ jkun hemm xi okkażjonijiet fejn ir-​rgħajja Kristjani kkonċernati jkollhom juru kuraġġ sabiex jipproteġu lill-​merħla minn xi wħud li għandhom mnejn jittrattaw ħażin jew jaħqru lin-​nagħaġ taʼ Jehovah, partikolarment lil dawk l-​iktar vulnerabbli. L-​anzjani jridu jkunu ħfief biex iwarrbu lil dawk li minn jeddhom jidinbu u jużaw il-​makakkerija, il-​qerq, u jikkonfoffaw sabiex iwettqu l-​ħażen.b—1 Korintin 5:9-13; qabbel Salm 101:7.

20. Għala nistgħu nħossuna fis-​sigurtà minħabba l-​mod kif jieħdu ħsiebna dawn id-​‘doni fi bnedmin’?

²⁰ Kemm aħna grati għad-​‘doni fi bnedmin’! Nistgħu nħossuna fis-​sigurtà minħabba l-​mod kif jieħdu ħsiebna bl-​imħabba, għax jaġġustawna mill-​ġdid b’mod teneru, jibnuna bl-​imħabba, dejjem lesti li jippreservaw l-​unità tagħna, u jipproteġuna b’mod kuraġġuż. Imma dawn id-​‘doni fi rġiel’ kif għandhom iqisuh l-​irwol tagħhom fil-​kongregazzjoni? U kif nistgħu nuru li napprezzawhom? Dawn il-​mistoqsijiet se jiġu diskussi fl-​artiklu li jmiss.

[Noti taʼ taħt]

Tiftakar Int?

◻ Min huma d-​‘doni fi bnedmin,’ u Alla għala tahom lill-​kongregazzjoni permezz taʼ Kristu?

◻ L-​anzjani kif iwettqu r-​responsabbiltà tagħhom f’li jaġġustaw mill-​ġdid lill-​merħla?

◻ L-​anzjani x’jistgħu jagħmlu biex jibnu lil sħabhom fit-​twemmin?

◻ L-​anzjani kif jistgħu jippreservaw l-​unità fil-​kongregazzjoni?

[Stampa f’paġna 10]

L-​empatija tgħin lill-​anzjani jinkuraġġixxu lil dawk li qed jaqtgħu qalbhom

[Stampa f’paġna 10]

L-​unità fost l-​anzjani tippromwovi l-​unità fil-​kongregazzjoni