Napprezzaw id-​‘Doni fi Bnedmin’

“Isimgħu minn dawk li qegħdin jaħdmu, f’nofskom . . . Għożżuhom [‘agħtuhom konsiderazzjoni,’ “NW”] u ħobbuhom kemm tifilħu minħabba fil-​ħidma tagħhom.”—1TESSALONIKIN 5:12, 13.

1. Skond Atti 20:35, liema qawwa għandu l-​għoti? Agħti eżempju.

“MIN JAGĦTI hu aktar hieni minn min jieħu.” (Atti 20:35) Tistaʼ tiftakar meta kienet l-​aħħar darba li esperjenzajt kemm huwa minnu dan il-​kliem taʼ Ġesù? Forsi kien xi rigal li tajt lil xi ħadd li tant tħobb. Kont għażiltu bl-​akbar reqqa, għax ridtu jkun xi ħaġa li tkun għal qalb dak li tant tgħożż. X’ħin rajt dik il-​ħarsa taʼ ferħ fuq wiċċu​—kemm ħassejtek imqanqal! Meta jkun imqanqal minn motiv tajjeb, l-​għoti huwa espressjoni taʼ mħabba, u meta xi ħadd jesprimi l-​imħabba, dan għandu l-​qawwa li jġibilna l-​ferħ.

2, 3. (a) Għala jistaʼ jingħad li ħadd m’hu iktar hieni minn Jehovah, u l-​provvediment taʼ ‘doni fi bnedmin’ kif jistaʼ jġiegħel lill-​qalb tithenna? (b) X’ma nkunux irridu nagħmlu biha għotja mingħand Alla?

² Allura, min jistaʼ jkun iktar hieni minn Jehovah, id-​Donatur taʼ “kull ħaġa tajba li tingħata”? (Ġakbu 1:17; 1 Timotju 1:11) Kull għotja li jagħti hija mqanqla mill-​imħabba. (1 Ġwann 4:8) Dak hu ċertament minnu dwar l-​għotja li Alla ta lill-​kongregazzjoni permezz taʼ Kristu​—id-​‘doni fi bnedmin.’ (Efesin 4:8) Il-​provvediment biex l-​anzjani jieħdu ħsieb il-​merħla huwa espressjoni taʼ l-​imħabba profonda li Alla għandu għall-​poplu tiegħu. Dawn l-​irġiel jintgħażlu bir-​reqqa​—iridu jilħqu kwalifiki Skritturali. (1 Timotju 3:1-7; Titu 1:5-9) Jafu li jridu “jittrattaw lill-​merħla b’tenerezza,” għax imbagħad in-​nagħaġ ikollhom għalfejn iħossuhom grati għal dawn ir-​rgħajja kollhom imħabba. (Atti 20:29, NW; Salm 100:3) Meta Jehovah jara li n-​nagħaġ tiegħu għandhom qalbhom mimlija bi gratitudni bħal din, bilfors li qalbu stess timtela bil-​ferħ!—Proverbji 27:11.

³ Ċertament li ma rridux innaqqsu mill-​valur taʼ l-​għotja mingħand Alla; lanqas ma nkunu rridu nuru nuqqas t’apprezzament għall-​għotjiet tiegħu. B’hekk iqumu żewġ mistoqsijiet: L-​anzjani kif għandhom iqisu l-​irwol tagħhom fil-​kongregazzjoni? U l-​bqija tal-​merħla kif jistgħu juru li japprezzawhom dawn id-​‘doni fi bnedmin’?

‘Aħna Ħaddiema Flimkien Magħkom’

4, 5. (a) Pawlu maʼ liema ħaġa jxebbahha l-​kongregazzjoni, u din għala hija tixbieha addattata? (b) It-​tixbieha taʼ Pawlu x’turina dwar il-​mod kif għandna nqisu u nittrattaw lil xulxin?

⁴ Lil dawn id-​‘doni fi bnedmin’ Jehovah fdalhom miżura t’awtorità fil-​kongregazzjoni. M’għandniex xi ngħidu, l-​anzjani ma jridux jużawha ħażin l-​awtorità tagħhom, imma jafu kemm hu faċli li dan jiġri lill-​bnedmin imperfetti. Allura, kif għandhom iqisu lilhom infushom f’relazzjoni mal-​bqija tal-​merħla? Ikkunsidra t-​tixbieha li uża l-​appostlu Pawlu. Wara li ddiskuta għala ġew ipprovduti d-​‘doni fi bnedmin’, Pawlu kiteb: “[Ejjew] fl-​imħabba nikbru f’kollox fih, f’dak li hu r-​Ras, Kristu. Fih il-​ġisem kollu jsib ir-​rabta u l-​għaqda tiegħu permezz taʼ l-​għekiesi kollha li jservuh skond il-​ħidma taʼ kull waħda minnhom, biex jikber fih innifsu u jinbena fl-​imħabba.” (Efesin 4:15, 16) Mela, Pawlu jxebbah il-​kongregazzjoni, inkluż l-​anzjani u membri oħrajn, maʼ ġisem taʼ bniedem. Din għala hija tixbieha addattata?

⁵ Ġisem taʼ bniedem hu magħmul minn ħafna membri differenti, imma ras waħda biss għandu. Madankollu, m’hemm xejn fil-​ġisem​—la muskolu, la nerv, la vina—​li m’humiex utli. Kull membru huwa imprezzabbli u jikkontribwixxi xi ħaġa għas-​saħħa u s-​sbuħija tal-​ġisem kollu. Bl-​istess mod, il-​kongregazzjoni hija magħmula minn ħafna membri differenti, imma kull membru​—sew jekk żagħżugħ u sew jekk xiħ, sew jekk b’saħħtu u sew jekk batut—​jistaʼ jikkontribwixxi xi ħaġa għas-​saħħa spiritwali u s-​sbuħija in ġenerali tal-​kongregazzjoni. (1 Korintin 12:14-26) Ħadd m’għandu għalfejn iħossu li tant hu insinjifikanti li bih u mingħajru xorta. Fl-​estrem l-​ieħor, ħadd m’għandu jħossu superjuri, għax aħna lkoll​—sew jekk rgħajja u sew jekk nagħaġ—​parti mill-​ġisem, u m’hemmx ħlief ras waħda, Kristu. Pawlu b’hekk jagħti stampa kordjali taʼ l-​imħabba, l-​interess, u r-​rispett li għandna jkollna lejn xulxin. Il-​fatt li jirrikonoxxu dan jgħin biex l-​anzjani jkollhom ħarsa bbilanċjata dwar l-​irwol tagħhom fil-​kongregazzjoni.

6. Għalkemm Pawlu kellu awtorità appostolika, kif wera spirtu umli?

⁶ Dawn id-​‘doni fi bnedmin’ ma jfittxux li jikkontrollaw il-​ħajjiet jew il-​fidi taʼ adoraturi sħabhom. Għalkemm Pawlu kellu awtorità appostolika, hu bl-​umiltà kollha qal lill-​Korintin: “Mhux għax irridu nġegħlukom temmnu iżda li naħdmu flimkien għall-​ferħ tagħkom, billi intom qegħdin iżżommu sħaħ fil-​fidi.” (2 Korintin 1:24) Pawlu ma xtaqx jikkontrolla l-​fidi taʼ ħutu u l-​mod kif kienu jgħixu. Tassew, ma ra ebda ħtieġa għal dan, għax hu esprima l-​fiduċja tiegħu li diġà kienu rġiel u nisa leali li kienu fl-​organizzazzjoni taʼ Jehovah minħabba li riedu jagħmlu dak li huwa xieraq. Għaldaqstant, waqt li kien qed jitkellem dwaru u dwar sieħbu Timotju, li kien jivvjaġġa miegħu, Pawlu kien, fil-​fatt, qed jgħid: ‘Dak hu xogħolna, li naħdmu miegħek biex naqdu lil Alla bil-​ferħ.’ (2 Korintin 1:1) Xi spirtu umli!

7. Anzjani umlin x’jirrealizzaw dwar l-​irwol tagħhom fil-​kongregazzjoni, u liema fiduċja għandhom fi sħabhom li jaħdmu flimkien magħhom?

⁷ Id-​‘doni fi bnedmin’ illum għandhom l-​istess biċċa xogħol. Huma ‘jaħdmu flimkien għall-​ferħ tagħna.’ Anzjani umlin jirrealizzaw li mhux kompitu tagħhom li jiddeċiedu kemm oħrajn huma kapaċi jagħmlu fis-​servizz t’Alla. Huma jafu li waqt li jistgħu jinkuraġġixxu lil oħrajn biex iżidu jew itejbu l-​ministeru tagħhom, is-​servizz lejn Alla għandu jiġi mqanqal mill-​qalb. (Qabbel it-2 Korintin 9:7.) Huma fiduċjużi li jekk dawk li jaħdmu flimkien magħhom għandhom il-​ferħ, huma se jagħmlu ħilithom kollha. B’hekk, ix-​xewqa taʼ qalbhom hi li jgħinu lil ħuthom ‘jaqdu bil-​ferħ lill-​Mulej.’—Salm 100:2.

Jgħinu lil Kulħadd Jaqdi bil-​Ferħ

8. X’inhuma xi modi li bihom l-​anzjani jistgħu jgħinu lil ħuthom jaqdu lil Jehovah bil-​ferħ?

⁸ Anzjani, kif tistgħu tgħinu lil ħutkom jaqdu bil-​ferħ? Tistgħu tinkuraġġuhom bl-​eżempju. (1 Pietru 5:3) Ħallu ż-​żelu u l-​ferħ tagħkom fil-​ministeru jidher, u oħrajn għandhom mnejn jagħmlu l-​qalb biex jimitaw l-​eżempju tagħkom. Faħħru lil oħrajn għall-​isforzi li qegħdin jagħmlu b’ruħhom kollha. (Efesin 4:29) Tifħir kordjali u ġenwin jgħin lil oħrajn iħossuhom utli u bżonnjużi. Dan jinkuraġġixxi lin-​nagħaġ biex ikunu jridu jagħmlu l-​almu tagħhom biex jaqdu lil Alla. Evitaw paraguni mhux favorevoli. (Galatin 6:4) Paraguni bħal dawn għandhom mnejn jiskuraġġixxu minflok ma jqanqlu lil oħrajn biex jitjiebu. Barra minn hekk, in-​nagħaġ taʼ Jehovah huma individwi​—b’ċirkustanzi u abbiltajiet differenti. Bħal Pawlu, esprimu fiduċja f’ħutkom. L-​imħabba ‘temmen kollox,’ u għalhekk nagħmlu tajjeb li nemmnu li ħutna jħobbuh lil Alla u jridu jogħġbuh. (1 Korintin 13:7) Meta ‘tistma lil oħrajn,’ tkun qed tgħinhom jesprimu ruħhom aħjar. (Rumani 12:10) Ibqaʼ ċert li meta n-​nagħaġ ikunu inkuraġġiti u rrifreskati, il-​biċċa l-​kbira minnhom jagħmlu ħilithom kollha biex jaqdu lil Alla, u huma se jsibu l-​ferħ f’dak is-​servizz.—Mattew 11:28-30.

9. Il-​mod kif l-​anzjani jqisu lil xulxin kif se jgħin lil kull anzjan jaqdi bil-​ferħ?

⁹ Meta umilment tqis lilek innifsek bħala ‘ħaddiem flimkien m’oħrajn’, dan se jgħin lilek taqdi bil-​ferħ u tapprezza d-​doni uniċi taʼ sħabek l-​anzjani. Kull anzjan għandu t-​talenti u l-​abbiltajiet tiegħu stess li jistaʼ jużahom għall-​ġid tal-​kongregazzjoni. (1 Pietru 4:10) Wieħed għandu mnejn ikollu d-​don li jgħallem. Ieħor jistaʼ jkun organizzatur effettiv. Jerġaʼ ieħor forsi jkun verament avviċinabbli minħabba li tant hu kordjali u jaf juri mogħdrija. Il-​fatt hu, l-​ebda anzjan m’għandu kull don fl-​istess grad. Għandu l-​fatt li anzjan ikollu xi don partikulari​—ngħidu aħna, id-​don tat-​tagħlim—​jagħmlu superjuri fuq oħrajn? Xejn affattu! (1 Korintin 4:7) Mill-​banda l-​oħra, m’hemmx għalfejn li xi ħadd jgħir għad-​don taʼ xi ħaddieħor jew iħossu inadegwat meta xi anzjan ieħor jaqlaʼ tifħir minħabba l-​abbiltà tiegħu. Ftakar, int innifsek għandek doni li Jehovah qed jara fik. U jistaʼ jgħinek tikkultiva dawn id-​doni u tużahom għall-​benefiċċju taʼ ħutek.—Filippin 4:13.

‘Kunu Ubbidjenti u Kunu Sottomessi’

10.Għala huwa dejjem xieraq li nesprimu apprezzament għal dawn id-​‘doni fi bnedmin’?

¹⁰ Meta nirċievu xi rigal, dejjem ikun xieraq li nesprimu apprezzament. “Roddu ħajr,” jgħid Kolossin 3:15. Allura, xi ngħidu dwar id-​‘doni fi bnedmin,’ ir-​rigal prezzjuż li tana Jehovah? M’għandniex xi ngħidu, l-​ewwelnett aħna ninsabu grati lejn Jehovah, id-​Donatur ġeneruż. Imma xi ngħidu għad-​‘doni fi bnedmin’ infushom? Kif nistgħu nuru li napprezzawhom?

11. (a) Kif nistgħu nuru l-​apprezzament tagħna għal dawn id-​‘doni fi bnedmin’? (b) X’inhu s-​sinjifikat taʼ l-​espressjonijiet “obduhom” u ‘kunu sottomessi’?

¹¹ Nistgħu nuru l-​apprezzament tagħna għad-​‘doni fi bnedmin’ billi nkunu ħfief biex nagħtu kas il-​pariri u d-​deċiżjonijiet ibbażati minn fuq il-​Bibbja li huma jagħtuna. Il-​Bibbja tagħtina l-​parir: “Oqogħdu [“Kunu sottomessi,” NW] għal dawk li jmexxukom, u obduhom, għax huma jgħassu fuqkom għall-​ġid tagħkom, bħala nies li għad iridu jagħtu kont tagħkom. Hekk huma jaqdu dan id-​dmir bil-​ferħ, u mhux bi swied il-​qalb; għax dan ma jkun jiswielkom taʼ ebda ġid.” (Lhud 13:17) Innota li ma rridux inkunu biss ‘ubbidjenti,’ imma nkunu wkoll “sottomessi” għal dawk li jieħdu t-​tmexxija. Il-​kelma Griega għal ‘inkunu sottomessi’ tfisser letteralment “ċedulhom.” Waqt li jikkummenta fuq l-​espressjonijiet “obduhom” u “oqogħdu għal,” l-​istudjuż tal-​Bibbja, R. C. H. Lenski jgħid: “Wieħed jobdi meta jaqbel maʼ dak li jgħidulu biex jagħmel, jiġi pperswadut kemm dan hu korrett u taʼ ġid għalih; wieħed iċedi . . . meta l-​opinjoni tiegħu hija kuntrarja.” Meta nifhmu u naqblu mad-​direzzjoni taʼ dawk li qed imexxu, l-​ubbidjenza għandha mnejn tkun spontanja. Imma xi ngħidu jekk ma nifhmux ir-​raġuni wara xi deċiżjoni partikulari?

12. Għala għandna nkunu sottomessi, jew noqogħdu għalihom, saħansitra meta ma nifhmux għalkollox ir-​raġuni wara xi deċiżjoni partikulari?

¹² Hawnhekk hu fejn ikollna bżonn nuru sottomissjoni, jew inċedulhom. Għala? L-​ewwelnett, jeħtieġ li jkollna fiduċja li dawn l-​irġiel ikkwalifikati spiritwalment għandhom interess ġenwin fina. Wara kollox, huma jafu tajjeb li jridu jagħtu kont lil Jehovah għan-​nagħaġ li huma fdati taħt il-​ħarsien tagħhom. (Ġakbu 3:1) Barra minn hekk, nagħmlu tajjeb jekk niftakru li nistgħu ma nkunux nafuhom kollha l-​fatti kunfidenzjali li jkunu wassluhom għal deċiżjoni informata.—Proverbji 18:13.

13. X’jistaʼ jgħinna nkunu sottomessi meta jkun hemm deċiżjonijiet ġudizzjali mill-​anzjani?

¹³ Xi ngħidu dwar li nkunu sottomessi meta jkun hemm deċiżjonijiet ġudizzjali? Ngħiduha kif inhi, dan jistaʼ ma jkunx faċli, speċjalment jekk issir xi deċiżjoni biex jinqataʼ mis-​sħubija xi individwu li nħobbuh​—xi ħadd taʼ ġewwa jew ħabib tal-​qalb. Hawnhekk għal darb’oħra, huwa aħjar li nbaxxu rasna għall-​ġudizzju li jkunu għamlu dawn id-​‘doni fi bnedmin.’ Huma qegħdin f’pożizzjoni li jkunu iktar oġġettivi milli nistgħu nkunu aħna, u għandhom mnejn jafu iktar dwar il-​fatti. Dawn l-​aħwa tgħidx kemm idumu jaħsbuha qabel ma jieħdu deċiżjonijiet bħal dawn; hija responsabbiltà tqila li wieħed ‘jiġġudika f’isem il-​Mulej.’ (2 Kronaki 19:6) Jagħmlu kull sforz biex juru ħniena, għax iżommu f’moħħhom kemm Alla hu lest li ‘jaħfer.’ (Salm 86:5) Imma jridu wkoll iżommu l-​kongregazzjoni nadifa, u l-​Bibbja tagħti istruzzjonijiet li huma jaqtgħu mis-​sħubija lil dawk li jagħmlu l-​ħażin u jibqgħu ma jindmux. (1 Korintin 5:11-13) F’ħafna każi, l-​individwu nnifsu li jkun għamel il-​ħażin jaċċetta din id-​deċiżjoni. Id-​dixxiplina għandha mnejn tkun dak li jkollu bżonn biex jiġi f’sensih. Jekk aħna, li tant inħobbuh, inbaxxu rasna għad-​deċiżjoni li tittieħed, b’dan il-​mod għandna mnejn inkunu qed ngħinuh biex jibbenefika mid-​dixxiplina.—Lhud 12:11.

‘Agħtuhom Konsiderazzjoni kemm Tifilħu’

14, 15. (a) Skond l-1 Tessalonikin 5:12, 13, l-​anzjani għala jixirqilhom il-​konsiderazzjoni tagħna? (b) Għala jistaʼ jingħad li l-​anzjani qegħdin ‘jaħdmu iebes f’nofsna’?

¹⁴ Nistgħu nuru wkoll l-​apprezzament tagħna għal dawn id-​‘doni fi bnedmin’ billi nagħtuhom konsiderazzjoni. Meta kiteb lill-​kongregazzjoni taʼ Tessalonika, Pawlu wissa lill-​membri tagħha: “Isimgħu minn dawk li qegħdin jaħdmu [“iebes,” NW] f’nofskom, u li l-​Mulej qegħedhom fuqkom biex iwissukom. Għożżuhom [‘agħtuhom konsiderazzjoni,’ NW] u ħobbuhom kemm tifilħu minħabba fil-​ħidma tagħhom.” (1 Tessalonikin 5:12, 13) ‘Jaħdmu iebes’​—kemm jiddeskrivih tajjeb dan lill-​anzjani devoti li jagħtu b’mod altruist mill-​ħin u l-​enerġija tagħhom minħabba fina! Ikkunsidra għal mument it-​tagħbija tqila li jġorru dawn l-​aħwa għeżież.

¹⁵ F’ħafna każi huma rġiel tal-​familja li għandhom impjieg sekulari sabiex imantnu lill-​familji tagħhom. (1 Timotju 5:8) Jekk l-​anzjan għandu t-​tfal, dawn iż-​żgħar għandhom bżonn il-​ħin u l-​attenzjoni taʼ missierhom. Għandu mnejn ikollu bżonn jgħinhom fl-​istudju taʼ l-​iskola, kif ukoll jagħmel skeda biex huma jkunu jistgħu jużaw l-​enerġija taż-​żgħożija f’rikreazzjoni bnina. (Koħèlet 3:1, 4) Fuq kollox, hu jieħu ħsieb il-​bżonnijiet spiritwali tal-​familja tiegħu, billi regolarment jikkonduċi studju tal-​Bibbja fil-​familja, jaħdem magħhom fil-​ministeru taʼ l-​għalqa, u jiħodhom għal-​laqgħat Kristjani. (Dewteronomju 6:4-7; Efesin 6:4) Ħalli ma ninsewx li minbarra r-​responsabbiltajiet bħal taʼ kulħadd, l-​anzjani għandhom dmirijiet oħra: li jippreparaw għal partijiet fil-​laqgħat, jagħmlu żjajjar pastorali, jieħdu ħsieb il-​benesseri spiritwali tal-​kongregazzjoni, u, meta jkun hemm bżonn, jittrattaw każi ġudizzjali. Xi wħud għandhom responsabbiltajiet miżjuda f’konnessjoni maʼ l-​assembleat tas-​circuit, il-​konvenzjonijiet distrettwali, il-​bini tas-​Swali tas-​Saltna, u l-​Kumitati taʼ Koordinazzjoni maʼ l-​Isptarijiet. Verament, dawn l-​aħwa qegħdin ‘jaħdmu iebes’!

16. Iddeskrivi xi modi li bihom nistgħu nuru konsiderazzjoni lejn l-​anzjani.

¹⁶ Kif nistgħu nuruhom konsiderazzjoni? Proverbju fil-​Bibbja jgħid: “Kelma f’waqtha, kemm hi sabiħa!” (Proverbji 15:23; 25:11) Għalhekk, kliem t’apprezzament sinċier u taʼ inkuraġġiment jistaʼ jurihom li x-​xogħol iebes li qed jagħmlu għalina m’huwiex qed jiġi injorat. Ukoll, għandna nkunu raġunevoli f’dak li nistennew minnhom. Minn banda, għandna nħossuna komdi li navviċinawhom għall-​għajnuna. Jistaʼ jkun hemm żmien meta ‘qalbna tkun mifnija’ u jkollna bżonn taʼ inkuraġġiment, gwida, jew pariri Skritturali mingħand dawk ikkwalifikati biex ‘jgħallmu’ l-​Kelma t’Alla. (Salm 55:5 [Salm 55:4, NW]; 1 Timotju 3:2) Fl-​istess ħin, għandna bżonn niftakru li anzjan għandu tant ħin biss li jistaʼ jiddedika għalina, għax hu ma jistax jittraskura l-​bżonnijiet tal-​familja tiegħu stess jew dawk t’oħrajn fil-​kongregazzjoni. Billi ‘nħossu’ għal dawn l-​aħwa li tant jaħdmu iebes, ma rridux ma nkunux raġunevoli dwar it-​talbiet tagħna għall-​għajnuna. (1 Pietru 3:8) Anzi, ejja nuru apprezzament għal kwalunkwe ħin u attenzjoni li b’mod raġunevoli jistgħu jagħtuna.—Filippin 4:5.

17, 18. Liema sagrifiċċji jsiru minn ħafna nisa li l-​irġiel tagħhom huma anzjani, u kif nistgħu nuru li aħna napprezzaw dak li qed jagħmlu dawn l-​aħwa nisa leali?

¹⁷ Xi ngħidu għan-​nisa taʼ l-​anzjani? Ma ħaqqhomx dawn il-​konsiderazzjoni tagħna? Wara kollox, dawn l-​irġiel tagħhom qed jaqsmuhom, mal-​kongregazzjoni. Dan taʼ spiss jitlob sagrifiċċji min-​naħa tagħhom. Xi kultant, l-​anzjani jridu jqattgħu l-​ħin taʼ fil-​għaxija jieħdu ħsieb kwistjonijiet kongregazzjonali, ħin li forsi setgħu jqattgħuh mal-​familji tagħhom. F’ħafna kongregazzjonijiet, nisa Kristjani leali qegħdin minn jeddhom jagħmlu dawn is-​sagrifiċċji sabiex żwieġhom ikunu jistgħu jieħdu ħsieb in-​nagħaġ taʼ Jehovah.—Qabbel it-2 Korintin 12:15.

¹⁸ Kif nistgħu nuru li napprezzaw dak li qed jagħmlu dawn l-​aħwa nisa Kristjani leali? Ċertament, billi ma nistennewx b’mod irraġunevoli iktar minn dak li żwieġhom jistgħu jagħtu. Imma ħalli wkoll ma ninsewx x’qawwa għandu kliem sempliċi t’apprezzament. Proverbji 16:24 jgħid: “Il-​kliem ħelu bħal xehda għasel, hu ħlewwa tar-​ruħ u saħħa tal-​ġisem.” Ikkunsidra din l-​esperjenza. Wara laqgħa Kristjana, koppja miżżewġa avviċinat anzjan u dawn staqsewh jekk setgħux ikellmuh dwar l-​adolexxent tagħhom. Waqt li din il-​koppja kienu qed jitkellmu maʼ l-​anzjan, il-​mara tiegħu qagħdet tistennieh bil-​paċenzja kollha. Wara, omm l-​adolexxent avviċinat lil mart l-​anzjan u qaltilha: “Irrid nirringrazzjak taʼ kemm ħin qattaʼ żewġek biex jgħin lill-​familja tiegħi.” Dan il-​kliem sempliċi u ħelu t’apprezzament verament messilha qalbha lil mart l-​anzjan.

19. (a) L-​anzjani, bħala grupp, liema objettivi qegħdin iwettqu fedelment? (b) X’għandna nkunu determinati li nagħmlu lkoll kemm aħna?

¹⁹ Il-​provvediment li l-​anzjani jieħdu ħsieb in-​nagħaġ hu wieħed mill-​‘affarijiet tajbin’ li tana Jehovah. (Ġakbu 1:17) Le, dawn l-​irġiel m’humiex perfetti; bħal kull wieħed minna, jagħmlu l-​iżbalji. (1 Slaten 8:46) Madankollu, bħala grupp, l-​anzjani fil-​kongregazzjonijiet taʼ madwar id-​dinja qegħdin iwettqu fedelment l-​objettivi li Jehovah kellu f’moħħu għalihom​—jiġifieri, li jaġġustaw mill-​ġdid, jibnu, iżommu f’unità, u jipproteġu lill-​merħla. Jalla kull anzjan ikun riżolut li jkompli jieħu ħsieb in-​nagħaġ taʼ Jehovah b’mod teneru, u b’hekk jagħti prova li hu rigal, jew barka, għal ħutu. U ħalli aħna lkoll inkunu determinati li nuru l-​apprezzament tagħna għal dawn id-​‘doni fi bnedmin’ billi nkunu ubbidjenti u sottomessi lejhom u billi nuruhom konsiderazzjoni għax-​xogħol iebes li jagħmlu. Kemm għandna għalfejn inkunu grati li Jehovah bl-​imħabba kollha pprovda rġiel li, fil-​fatt, jgħidu lin-​nagħaġ tiegħu: ‘Dak hu xogħolna, li ngħinukom taqdu lil Alla bil-​ferħ’!

Int kif Twieġeb?

◻ Il-​kongregazzjoni kif tistaʼ b’mod xieraq titqabbel maʼ ġisem?

◻ L-​anzjani kif jistgħu jgħinu lil ħuthom jaqdu lil Jehovah bil-​ferħ?

◻ Aħna għala m’għandniex inkunu biss ubbidjenti imma wkoll sottomessi lejn dawk li qed jieħdu t-​tmexxija?

◻ B’liema modi nistgħu aħna nuru konsiderazzjoni lejn l-​anzjani?

[Stampa f’paġna 16]

Anzjani, faħħru lil oħrajn għall-​isforzi li qegħdin jagħmlu b’ruħhom kollha

[Stampa f’paġna 17]

Bl-​eżempju żeluż tagħhom fil-​ministeru, l-​anzjani jistgħu jgħinu lill-​membri tal-​familja u oħrajn jaqdu bil-​ferħ

[Stampi f’paġna 18]

Aħna napprezzawhom lill-​anzjani tagħna li tant jaħdmu iebes!