Ġenituri, x’Qed Jgħallem l-​Eżempju Tagħkom?

1. Jehovah liema tip taʼ istruzzjonijiet ipprovda għall-​ewwel koppja umana?

JEHOVAH hu l-​Oriġinatur taʼ l-​arranġament tal-​familja. Kull familja taf l-​eżistenza tagħha lilu għaliex hu stabbilixxa l-​ewwel familja u ta l-​qawwiet prokreattivi lill-​ewwel koppja umana. (Efesin 3:14, 15) Lil Adam u lil Eva pprovdielhom l-​istruzzjonijiet bażiċi dwar ir-​responsabbiltajiet tagħhom u ħallielhom ukoll opportunità biżżejjed biex jużaw l-​inizjattiva persunali biex iwettquhom. (Ġenesi 1:28-30; 2:6, 15-22) Wara li Adam u Eva dinbu, is-​sitwazzjonijiet li kellhom iħabbtu wiċċhom magħhom il-​familji saru iktar komplikati. Xorta waħda, Jehovah bl-​imħabba kollha pprovda linji taʼ gwida li kienu se jgħinu lill-​qaddejja tiegħu jkampaw maʼ sitwazzjonijiet bħal dawn.

2. (a) Jehovah b’liema mezz saħħaħ il-​pariri miktubin b’istruzzjoni orali? (b) Il-​ġenituri liema mistoqsija għandhom bżonn jistaqsu lilhom infushom?

² Bħala l-​Istruttur Grandjuż tagħna, Jehovah għamel ħafna iktar milli sempliċement ipprovdielna istruzzjonijiet bil-​miktub inkwantu għal dak li għandna nagħmlu u dak li għandna nevitaw. Fi żmien l-​imgħoddi hu ġabar l-​istruzzjoni miktuba flimkien maʼ l-​istruzzjoni orali permezz tal-​qassisin u l-​profeti u permezz tal-​kapijiet tal-​familja. Lil min qiegħed juża biex jipprovdi tagħlim orali bħal dan fi żmienna? L-​anzjani Kristjani u l-​ġenituri. Jekk int ġenitur, qiegħed int tagħti sehmek biex tistruwixxi lill-​familja tiegħek fil-​mogħdijiet taʼ Jehovah?—Proverbji 6:20-23.

3.Il-kapijiet tal-​familji x’jistgħu jitgħallmu minn Jehovah inkwantu għall-​mod effettiv taʼ tagħlim?

³ Istruzzjoni bħal din kif għandha tingħata ġewwa l-​familja? Jehovah jistabbilixxi l-​mudell. Hu jistqarr ċar u tond dak li hu tajjeb u dak li hu ħażin, u kemm-il darba jagħmel użu mir-​ripetizzjoni. (Eżodu 20:4, 5; Dewteronomju 4:23, 24; 5:8, 9; 6:14, 15; Ġożwè 24:19, 20) Hu juża mistoqsijiet li jġagħlu lil dak li jkun jaħseb. (Ġob 38:4, 8, 31) Permezz taʼ tixbihat u eżempji li ġraw vera, hu jqanqlilna l-​emozzjonijiet u jsawrilna qalbna. (Ġenesi 15:5; Danjel 3:1-23, 91-96 [Danjel 3:1-29, NW]) Ġenituri, meta tgħallmu lil uliedkom, tipprovaw timitawh dan il-​mudell?

4. X’nitgħallmu minn Jehovah dwar l-​amministrar tad-​dixxiplina, u d-​dixxiplina għala hija importanti?

⁴ Jehovah hu sod għal dak li huwa sewwa, imma jifhem l-​effetti taʼ l-​imperfezzjoni. Għalhekk, qabel ma jikkastiga, jgħallem u għal darba wara l-​oħra jagħti twissijiet u tfakkiriet lill-​bnedmin imperfetti. (Ġenesi 19:15, 16; Ġeremija 7:23-26) Meta jiddixxiplina, dan jagħmlu kemm hemm bżonn, u mhux b’mod eċċessiv. (Salm 103:10, 11; Isaija 28:26-29) Jekk lil uliedna nittrattawhom b’dan il-​mod, dan jixhed li nafuh lil Jehovah, u se jkun iktar faċli għalihom li jsiru jafuh huma wkoll.—Ġeremija 22:16; 1 Ġwann 4:8.

5. Il-​ġenituri x’jistgħu jitgħallmu minn Jehovah dwar il-​mod kif jagħtu widen?

⁵ X’meravilja! Jehovah jagħti widen bħala Missier tas-​sema kollu mħabba. Mhux sempliċement joħroġ l-​ordnijiet. Hu jinkuraġġina niftħu qalbna miegħu. (Salm 62:9 [Salm 62:8, NW]) U jekk is-​sentimenti li nesprimu m’humiex preċiż kif suppost, ma jċanfarniex b’leħen li taħsbu xi ragħda mis-​sema. Hu jgħallimna bil-​paċenzja kollha. Għalhekk, kemm hu f’waqtu l-​parir taʼ l-​appostlu Pawlu: “Kunu, mela, tixbhu lil Alla, bħala wlied maħbuba”! (Efesin 4:31–5:1) X’eżempju mill-​aħjar jistabbilixxi Jehovah għall-​ġenituri hekk kif huma jagħmlu ħilithom biex jistruwixxu lil uliedhom! Huwa eżempju li jmissilna qalbna u jġagħalna nkunu rridu nimxu fil-​mod taʼ ħajja tiegħu.

L-​Influwenza Eżerċitata Permezz taʼ l-​Eżempju

6. Il-​ġenituri kif jinfluwenzaw lil uliedhom bl-​attitudni u l-​eżempju tagħhom?

⁶ Barra mill-​istruzzjoni verbali, l-​eżempju għandu influwenza profonda fuq it-​tfal tagħna. Sew jekk il-​ġenituri jridu u sew jekk ma jridux, uliedhom lilhom se jimitaw. Għandu mnejn li l-​ġenituri jieħdu gost​—jew kultant jixxokkjaw ruħhom—​meta jisimgħu lil uliedhom jgħidu affarijiet li jkunu qaluhom huma stess. Meta kemm il-​kondotta u kemm l-​attitudni tal-​ġenituri jirriflettu apprezzament profond għall-​affarijiet spiritwali, dan jeżerċita influwenza pożittiva fuq it-​tfal.​—Proverbji 20:7.

7. Bħala ġenitur, Ġeftaħ taha liema eżempju lil bintu, u b’liema riżultat?

⁷ L-​effett li jkollu l-​eżempju taʼ ġenitur nistgħu narawh ċar fil-​Bibbja. Ġeftaħ, li kien użat minn Jehovah biex imexxi lil Iżrael għar-​rebħa fuq l-​Għammonin, kien ukoll missier. It-​tweġiba li kien ta lis-​sultan t’Għammon tindika li Ġeftaħ bilfors li kien spiss jaqra r-​rakkont storiku dwar kif Jehovah ttratta maʼ Iżrael. Setaʼ jikkwota dak ir-​rakkont storiku faċilment, u wera fidi soda f’Jehovah. M’hemmx dubju li l-​eżempju tiegħu għen lil bintu tiżviluppa l-​fidi u l-​ispirtu li tissagrifika lilha nfisha li wriet meta daħlet għall-​ħajja taʼ servizz bħala xebba dedikata lil Jehovah.—Mħallfin 11:14-27, 34-40; qabbel Ġożwè 1:8.

8. (a) Il-​ġenituri taʼ Samwel liema attitudni mill-​aħjar urew? (b) Samwel kif ibbenefika minnhom?

⁸ Samwel kien eżemplari bħala tifel u leali lejn Alla bħala profeta matul ħajtu kollha. Trid li t-​tfal tiegħek joħorġu bħalu? Analizza l-​eżempju li taw il-​ġenituri taʼ Samwel, Elkana u Anna. Għalkemm is-​sitwazzjoni ġewwa l-​familja tagħhom ma kinitx perfetta, huma kienu jitilgħu regolarment Silo għall-​qima, lejn il-​post fejn kien hemm it-​tabernaklu sagru. (1 Samwel 1:3-8, 21) Innota x’sentiment profond uriet Anna fit-​talba tagħha. (1 Samwel 1:9-13) Osserva kif ħassewhom it-​tnejn li huma dwar l-​importanza li jwettqu kwalunkwe wegħda magħmula lil Alla. (1 Samwel 1:22-28) L-​eżempju mill-​aħjar tagħhom bla dubju għen lil Samwel jiżviluppa l-​kwalitajiet li għamluh kapaċi jsegwi korsa tajba​—saħansitra meta dawk taʼ madwaru, li suppost kienu qed jaqdu lil Jehovah, ma wrew ebda rispett lejn il-​mogħdijiet t’Alla. Maż-​żmien, lil Samwel, Jehovah fdalu responsabbiltà bħala l-​profeta Tiegħu.​—1 Samwel 2:11, 12; 3:1-21.

9. (a) Liema influwenzi fid-​dar kellhom effett tajjeb fuq Timotju? (b) Timotju x’tip taʼ persuna sar?

⁹ Tixtieq li ibnek isir bħal Timotju, meta kien żagħżugħ issieħeb maʼ l-​appostlu Pawlu? Missier Timotju ma kienx taʼ l-​istess twemmin, imma ommu u nanntu tawh eżempju mill-​aħjar fl-​apprezzament lejn l-​affarijiet spiritwali. Dan bla dubju għen biex jitqiegħed pedament sod għall-​ħajja taʼ Timotju bħala Kristjan. Jintqalilna li ommu, Ewniki, u nanntu Lojd kellhom “fidi vera [“sinċiera,” Karm Żammit].” Ħajjithom bħala Kristjani ma kinitx xi reċta; huma għexu verament f’armonija maʼ dak li kienu jistqarru li jemmnu, u għallmu liż-​żagħżugħ Timotju jagħmel l-​istess. Timotju wera li hu kien taʼ min jafdah u li kien jimpurtah ġenwinament mill-​benesseri t’oħrajn.​—2 Timotju 1:5; Filippin 2:20-22.

10. (a) Liema eżempji barra mid-​dar jistgħu jeffettwaw lil uliedna? (b) Kif għandna nirreaġixxu meta dawn l-​influwenzi jeffettwaw id-​diskors jew l-​attitudni taʼ wliedna?

¹⁰ L-​eżempji li jeffettwaw lil uliedna m’humiex biss dawk li jaraw bejn l-​erbaʼ ħitan tad-​dar. Hemm it-​tfal li jmorru l-​iskola magħhom, l-​għalliema li xogħolhom hu li jsawru l-​imħuħ teneri tat-​tfal, in-​nies li jħossu li kulħadd għandu jaqbel mad-​drawwiet tribwali jew komunitarji li tant ilhom jeżistu, l-​istilel taʼ l-​isports li s-​suċċessi tagħhom tgħidx kemm huma mfaħħrin, u l-​uffiċjali pubbliċi li l-​kondotta tagħhom tiġi reklamata fl-​aħbarijiet. Miljuni taʼ tfal ġew esposti wkoll għall-​brutalità tal-​gwerra. Għandna għalfejn niskantaw jekk dawn l-​influwenzi jeffettwaw id-​diskors u l-​attitudni taʼ wliedna? Kif nirreaġixxu meta jiġri hekk? Se tissolva l-​problema b’xi ċanfira iebsa jew b’xi priedka serja? Minflok ma nkunu pronti biex nirreaġixxu għal dak li jgħidu jew jagħmlu t-​tfal tagħna, ma jkunx aħjar li nistaqsu lilna nfusna, ‘Hemm xi ħaġa fil-​mod kif Jehovah jittratta magħna li tistaʼ tgħinna jkollna dehen dwar kif nittrattaw din is-​sitwazzjoni?’​—Qabbel Rumani 2:4.

11. Meta l-​ġenituri jagħmlu xi żbalji, dan kif jistaʼ jeffettwa l-​attitudni taʼ wliedhom?

¹¹ M’għandniex xi ngħidu, ġenituri imperfetti mhux dejjem se jittrattaw is-​sitwazzjoni bl-​aħjar mod. Huma se jagħmlu l-​iżbalji. Meta t-​tfal jirrealizzaw dan, se jherrilhom dan ir-​rispett tagħhom lejn il-​ġenituri? Jistaʼ jkun, speċjalment jekk il-​ġenituri jipprovaw jgħattu l-​iżbalji tagħhom qisu qatt ma ġara xejn billi jenfasizzaw b’mod aħrax l-​awtorità tagħhom. Imma r-​riżultat jistaʼ jkun differenti ferm jekk il-​ġenituri bl-​umiltà kollha jammettu l-​iżbalji tagħhom liberament. F’dan, huma jistgħu jagħtu eżempju imprezzabbli lil uliedhom, li għandhom bżonn jitgħallmu jagħmlu l-​istess.—Ġakbu 4:6.

Dak li Jistaʼ Jgħallem l-​Eżempju Tagħna

12, 13. (a) It-​tfal x’għandhom bżonn jitgħallmu dwar l-​imħabba, u dan kif jistaʼ jiġi mgħallem bl-​iktar mod effettiv? (b) Għala hu importanti li t-​tfal jitgħallmu dwar l-​imħabba?

¹² Ħafna lezzjonijiet imprezzabbli jistgħu jiġu mgħallmin bl-​iktar mod effettiv meta tingħata istruzzjoni orali flimkien maʼ eżempju tajjeb. Ikkunsidra ftit minnhom.

¹³ Nesprimu mħabba mingħajr egoiżmu: Waħda mill-​iktar lezzjonijiet importanti li trid tissaħħaħ bl-​eżempju hija t-​tifsira taʼ l-​imħabba. “Aħna nħobbu, għax hu [Alla] ħabbna l-​ewwel.” (1 Ġwann 4:19) Hu s-​Sors u l-​eżempju suprem taʼ l-​imħabba. Din l-​imħabba bi prinċipju, a·gaʹpe, tissemma iktar minn 100 darba fil-​Bibbja. Hija kwalità li tidentifika lill-​Kristjani veri. (Ġwann 13:35) Imħabba bħal din għandha tintwera lejn Alla u Ġesù Kristu kif ukoll bejn il-​bnedmin​—saħansitra lejn bnedmin li ma tantx ikollna grazzja magħhom. (Mattew 5:44, 45; 1 Ġwann 5:3) Din l-​imħabba trid tkun fi qlubna u tkun evidenti f’ħajjitna qabel ma nkunu nistgħu ngħallmuha b’mod effettiv lil uliedna. L-​eżempju jkaxkar. Fil-​familja, it-​tfal għandhom bżonn jaraw u jesperjenzaw l-​imħabba u l-​kwalitajiet relatati magħha, bħal ngħidu aħna, l-​affezzjoni. Mingħajr dawn l-​affarijiet, l-​iżvilupp tat-​tfal jiġi mfixkel fiżikament, mentalment, u emozzjonalment. It-​tfal għandhom bżonn ukoll jaraw kif l-​imħabba u l-​affezzjoni qed jintwerew b’mod xieraq lejn sħabna l-​Kristjani barra mill-​familja.​—Rumani 12:10; 1 Pietru 3:8.

14. (a) It-​tfal kif jistgħu jiġu mgħallmin jagħmlu xogħol taʼ kwalità li jġibilhom sodisfazzjon? (b) Dan kif jistaʼ jsir fis-​sitwazzjoni tal-​familja tiegħek?

¹⁴ Nitgħallmu kif naħdmu: Ix-​xogħol huwa aspett fundamentali tal-​ħajja. Biex wieħed ikollu stima tiegħu nnifsu, hu jkollu bżonn jitgħallem kif jagħmel xogħol taʼ kwalità. (Koħèlet 2:24; 2 Tessalonikin 3:10) Jekk tifel jingħata xi biċċa xogħol li ma tantx kellu istruzzjonijiet dwar kif jagħmilha u wara jaqlaʼ xi għajta għax ma jkunx għamilha sew, x’aktarx li qatt m’hu se jitgħallem jagħmel xogħol tajjeb. Imma meta t-​tfal jitgħallmu billi attwalment jaħdmu flimkien mal-​ġenituri u jingħataw tifħir xieraq, huma x’aktarx li jitgħallmu iktar jagħmlu xogħol li jġib sodisfazzjon. Jekk l-​eżempju tal-​ġenituri jiġi akkumpanjat minn spjegazzjoni, it-​tfal għandhom mnejn ma jitgħallmux biss kif jagħmlu xi biċċa xogħol imma wkoll kif jegħlbu l-​problemi, kif jibqgħu sa ma jlestu l-​biċċa xogħol li jibdew, u kif jirraġunaw u jagħmlu deċiżjonijiet. F’dan l-​isfond huma jistgħu jiġu megħjunin japprezzaw li Jehovah wkoll qed jaħdem, li hu qed jagħmel xogħol tajjeb, u li Ġesù jimita lil Missieru. (Ġenesi 1:31; Proverbji 8:27-31; Ġwann 5:17) Jekk familja hija involuta fil-​biedja, jew għandha xi negozju, xi membri tal-​familja għandhom mnejn jaħdmu flimkien. Jew forsi l-​omm tistaʼ tgħallem lil binha jew bintha jsajru u jiżbarazzaw wara l-​ikel. Missier li xogħlu jkun ’il bogħod mid-​dar jistaʼ jippjana biex jaħdem fuq proġetti fid-​dar maʼ wliedu. Kemm hu taʼ benefiċċju li l-​ġenituri mhux biss ikollhom f’moħħhom li jitlesta x-​xogħol taʼ dak il-​ħin imma li jħejju lit-​tfal għal dak li toffri l-​ħajja!

15. B’liema modi jistgħu jingħataw lezzjonijiet dwar il-​fidi? Agħti eżempju.

¹⁵ Inżommu l-​fidi meta niffaċċjaw l-​avversità: Il-​fidi wkoll hija aspett vitali taʼ ħajjitna. Meta l-​fidi tiġi diskussa matul l-​istudju tal-​familja, it-​tfal jistgħu jitgħallmu jagħtu definizzjoni tagħha. Huma jistgħu wkoll isiru konxji taʼ evidenza li ġġiegħel il-​fidi tibda tikber f’qalbhom. Imma meta jaraw lill-​ġenituri tagħhom juru fidi li ma titħarrikx meta jkunu qed jiffaċċjaw provi ħorox, l-​effett jistaʼ jibqaʼ għal għomorhom. Studenta tal-​Bibbja fil-​Panama ġiet mhedda minn żewġha li se jkeċċiha minn darhom jekk ma kinitx se tieqaf taqdi lil Jehovah. Xorta waħda, din kienet timxi regolarment 16-il kilometru bl-​erbat itfal żgħar tagħha, u mbagħad kienet tirkeb tal-​linja għal 30 kilometru ieħor biex tasal fl-​eqreb Sala tas-​Saltna. Billi ġew inkuraġġiti mill-​eżempju tagħha, 20 membru tal-​familja tagħha ħaddnu t-​triq tal-​verità.

Nagħtu Eżempju fil-​Qari taʼ Kuljum tal-​Bibbja

16. Il-​qari taʼ kuljum tal-​Bibbja għala huwa rikkmandat?

¹⁶ Waħda mill-​iktar drawwiet imprezzabbli li familja tistaʼ tistabbilixxi​—drawwa li tibbenefika lill-​ġenituri u tkun eżempju biex it-​tfal jimitawh—​hija l-​qari regulari tal-​Bibbja. Jekk ikun possibbli, aqra ftit mill-​Bibbja kuljum. M’hijiex il-​kwantità li taqra li hi l-​iktar importanti. Bil-​wisq iktar sinjifikanti huma r-​regolarità u l-​mod kif dan isir. Għat-​tfal, il-​qari tal-​Bibbja jistaʼ jiġi ssupplimentat billi jisimgħu l-​awdjokasetts taʼ Il-​Ktieb Tiegħi taʼ Stejjer mill-​Bibbja jekk dawn huma disponibbli bil-​lingwa tagħkom. Il-​qari mill-​Kelma t’Alla kuljum jgħinna nżommu l-​ħsibijiet t’Alla fuq quddiemnett. U jekk dan il-​qari mill-​Bibbja jsir mhux biss individwalment imma bħala familja, dan jistaʼ jgħin lil familji sħaħ jimxu fil-​mogħdijiet taʼ Jehovah. Hija din id-​drawwa li ġiet inkuraġġita fid-​drama Familji​—Agħmlu l-​Qari tal-​Bibbja Kuljum il-​Mod taʼ Ħajja Tagħkom! li saret fil-​Konvenzjonijiet reċenti “Il-​Mod taʼ Ħajja t’Alla.”—Salm 1:1-3.

17. Il-​qari tal-​Bibbja bħala familja u li nitgħallmu l-​iskritturi prinċipali bl-​amment kif jgħinu f’li jiġi applikat il-​parir f’Efesin 6:4?

¹⁷ Il-​qari tal-​Bibbja bħala familja huwa fi qbil maʼ dak li kiteb l-​appostlu Pawlu fl-​ittra mnebbħa tiegħu lill-​Kristjani f’Efesu, jiġifieri: “U intom il-​missirijiet, iġġarrbuhomx iżżejjed lil uliedkom; iżda rabbuhom fid-​dixxiplina u t-​twiddib [“r-​regular mentali,” NW] tal-​Mulej.” (Efesin 6:4) Dan x’ifisser? It-​“twiddib” jew ir-​“regular mentali” letteralment ifissru “poġġi l-​moħħ fi”; għalhekk missirijiet Kristjani qed jiġu mħeġġin ipoġġu l-​moħħ t’Alla Jehovah f’uliedhom​—sabiex jgħinu lil uliedhom isiru jafu l-​ħsibijiet t’Alla. Huma jistaʼ jirnexxilhom jiksbu dan jekk lit-​tfal jinkuraġġuhom jitgħallmu l-​iskritturi prinċipali bl-​amment. L-​objettiv hu li l-​ħsibijiet taʼ Jehovah jiggwidaw il-​ħsieb t’uliedhom sabiex ix-​xewqat u l-​kondotta tagħhom jibdew jirriflettu dejjem iktar il-​livelli t’Alla sew jekk il-​ġenituri jkunu maʼ wliedhom u sew jekk le. Il-​Bibbja hija l-​pedament taʼ ħsieb bħal dan.​—Dewteronomju 6:6, 7.

18. Meta naqraw il-​Bibbja, x’jistaʼ jkollna bżonn sabiex (a) nifhmuha ċar? (b) nibbenefikaw mill-​pariri taʼ ġo fiha? (ċ) inwieġbu għal dak li tirrivela dwar l-​iskop taʼ Jehovah? (d) nibbenefikaw minn dak li tgħid dwar l-​attitudnijiet u l-​azzjonijiet tan-​nies?

¹⁸ M’għandniex xi ngħidu, jekk irridu li l-​Bibbja teffettwalna ħajjitna, jeħtieġ li nifhmu dak li tgħidilna. Għal xi wħud, dan jistaʼ jirrikjedi li jaqraw partijiet minnha iktar minn darba. Sabiex nieħdu s-​sens sħiħ taʼ ċerti espressjonijiet, għandu mnejn ikollna bżonn infittxu xi kliem fid-​dizzjunarju jew fl-​Insight on the Scriptures. Jekk l-​iskrittura jkun fiha xi parir jew kmandament, ħu l-​ħin biex titkellem dwar xi sitwazzjonijiet fi żmienna li tkun tapplika għalihom. Imbagħad forsi tistaqsi, ‘Jekk napplikaw dan il-​parir kif se jibbenefikana?’ (Isaija 48:17, 18) Jekk l-​iskrittura qed titkellem dwar xi aspett mill-​iskop taʼ Jehovah, staqsi, ‘Ħajjitna kif inhi effettwata minn dan?’ Forsi tkun qed taqra rakkont li jitkellem dwar l-​attitudnijiet u l-​azzjonijiet tan-​nies. Liema pressjonijiet fil-​ħajja kienu qed jesperjenzaw? Kif ittrattawhom? Kif nistgħu nibbenefikaw mill-​eżempju tagħhom? Dejjem warrab ħin biex tiddiskuti kif ir-​rakkont japplika f’ħajjitna llum.​—Rumani 15:4; 1 Korintin 10:11.

19. Billi nsiru nixbhu lil Alla, x’inkunu qed nipprovdulhom lit-​tfal tagħna?

¹⁹ X’mod mill-​aħjar biex nonqxu l-​ħsibijiet t’Alla f’moħħna u f’qalbna! B’hekk, se niġu verament megħjunin biex insiru ‘nixbhu lil Alla, bħala wlied maħbuba.’ (Efesin 5:1) U aħna nkunu qed nipprovdu eżempju li jistħoqq tassew li wliedna jimitawh.

Tiftakar Int?

◻ Il-​ġenituri kif jistgħu jibbenefikaw mill-​eżempju taʼ Jehovah?

◻ L-​istruzzjoni orali li tingħata lit-​tfal għala trid tkun akkumpanjata mill-​eżempju tajjeb tal-​ġenituri?

◻ X’inhuma xi lezzjonijiet li jiġu mgħallmin l-​aħjar permezz taʼ l-​eżempju tal-​ġenituri?

◻ Kif nistgħu nibbenefikaw bis-​sħiħ mill-​qari tal-​Bibbja bħala familja?

[Stampi f’paġna 10]

Ħafna jieħdu gost jagħmlu l-​qari tal-​Bibbja kuljum bħala familja