Nitgħallmu t-​Triq li Tisboq taʼ l-​Imħabba

Il-​Kosovo, il-​Libanu, u l-​Irlanda. Dawn huma ismijiet li f’dawn l-​aħħar snin dehru bosta drabi fl-​aħbarijiet. Lin-​nies iġibulhom f’moħħhom xeni taʼ ċarċir taʼ demm, attakki bil-​bombi, u qtil. M’għandniex xi ngħidu, il-​konflitti vjolenti kaġunati minn differenzi reliġjużi, razzjali, etniċi u oħrajn m’humiex affarijiet ġodda. Fil-​fatt, il-​paġni taʼ l-​istorja huma mimlijin bihom, u dawn ġabu magħhom sofferenzi inkredibbli għall-​umanità.

MINĦABBA l-​fatt li matul l-​istorja dejjem kien hemm xi gwerra, ħafna waslu għall-​konklużjoni li l-​gwerer ma jistgħux jiġu skansati u li huwa naturali li l-​bnedmin jobogħdu lil xulxin. Madankollu, opinjonijiet bħal dawn huma kompletament il-​kontra tat-​tagħlim tal-​Kelma t’Alla, il-​Bibbja. L-​Iskrittura tiddikjara b’mod ċar: “Dak li ma jħobbx ma għarafx lil Alla, għax Alla hu mħabba.” (1 Ġwann 4:8) Jidher ċar li l-​Ħallieq irid li l-​bnedmin iħobbu lil xulxin.

Il-Bibbja turi wkoll li l-​bniedem inħalaq fuq ix-​xbieha t’Alla. (Ġenesi 1:26, 27) Dan ifisser li l-​umanità hija mżejna bil-​kapaċità li tirrifletti l-​kwalitajiet t’Alla, li l-​iktar waħda li tispikka minnhom kollha hi l-​imħabba. Allura jekk dan huwa minnu, il-​bnedmin għala fallew tant bil-​kbir f’li juru mħabba lejn xulxin matul l-​istorja? Għal darb’oħra, il-​Bibbja tfehemna. Huwa minħabba li Adam u Eva, l-​ewwel koppja umana, irribellaw kontra Alla u waqgħu fid-​dnub. B’riżultat taʼ dan, in-​nisel kollu tagħhom wiret id-​dnub u l-​imperfezzjoni. Rumani 3:23 jispjega: “Il-​bnedmin kollha dinbu u ċċaħħdu mill-​glorja taʼ Alla.” L-​abbiltà li nħobbu mogħtija minn Alla hija mħassra mid-​dnub u l-​imperfezzjoni li writna. Ifisser dan li l-​bnedmin m’humiex iżjed kapaċi jħobbu lil xulxin? X’tama hemm li qatt se ngawdu relazzjoni paċifika u kollha mħabba maʼ bnedmin sħabna?

Irridu Nitgħallmu Nħobbu lil Alla

Alla Jehovah jaf li minkejja dan kollu, l-​umanità xorta għadha kapaċi turi mħabba. Huwa minħabba f’hekk li hu jitlob lil kulmin irid jogħġbu biex juri mħabba bl-​aħjar mod li jistaʼ. Din il-​ħtieġa għamilha ċara l-​Iben t’Alla, Ġesù Kristu, meta ġie mistoqsi jsemmi l-​akbar kmandament fil-​Liġi li ngħatat lil Iżrael. Hu qal: “‘Ħobb lill-​Mulej, Alla tiegħek, b’qalbek kollha, b’ruħek kollha, u b’moħħok kollu.’ Dan hu l-​kmandament il-​kbir u l-​ewwel wieħed.” Imbagħad żied: “It-​tieni jixbhu: ‘Ħobb lil għajrek bħalek innifsek.’ Dawn iż-​żewġ kmandamenti huma l-​qofol tal-​Liġi kollha u tal-​Profeti.”—Mattew 22:37-40.

Madankollu, ħafna nies iħossu li huwa diffiċli ħafna li jħobbu lil xi ħadd li ma jistgħux jarawh, u aħna l-​bnedmin ma nistgħux naraw lil Alla Jehovah għaliex hu spirtu. (Ġwann 4:24) Xorta waħda, dak li jagħmel Alla jeffettwana kuljum, peress li aħna lkoll niddependu mill-​bosta affarijiet tajbin li hu ħalaq għall-​ġid tagħna. L-​appostlu Pawlu ġibed l-​attenzjoni lejn dan il-​fatt meta qal: “[Alla] ma naqasx li jagħti xhieda fuqu nnifsu bil-​ġid li jagħmlilkom, meta jagħtikom ix-​xita mis-​sema u l-​frott fi żmienu, u hekk ixebbagħkom bl-​ikel u jimlielkom qalbkom bl-​hena.”—Atti 14:17.

Avolja b’xi mod jew ieħor kulħadd jibbenefika mill-​provvedimenti tal-​Ħallieq, meta nqisu l-​affarijiet, ftit huma grati lejh jew jitqanqlu biex jirringrazzjawh. B’hekk, irridu nirrevedu l-​affarijiet tajbin kollha li Alla għamel għalina u nimmeditaw fuq il-​kwalitajiet meraviljużi li jidhru ċar f’kulma jagħmel. Jekk nagħmlu dan inkunu nistgħu nifhmu l-​għerf u l-​qawwa taʼ l-​għaġeb li għandu l-​Ħallieq Grandjuż tagħna. (Isaija 45:18) Fuq kollox, dan għandu jgħinna naraw kemm hu Alla taʼ mħabba, billi mhux biss tana l-​ħajja, imma wkoll għamilhielna possibbli li ngawdu l-​ħafna pjaċiri tal-​ħajja.

Per eżempju, aħseb ftit dwar il-​varjetà li ma tispiċċa qatt taʼ fjuri sbieħ li Alla ħalaq fuq l-​art. Kemm hi xi ħaġa meraviljuża għalina li hu żejjinna bl-​abbiltà li naraw u li nieħdu ħafna gost b’dawn l-​affarijiet mimlijin ġmiel! Bl-​istess mod, Alla pprovda kull xorta taʼ ikel sustanzjuż għan-​nutriment tagħna. Kemm kien qalbu tajba li ħalaq ukoll fina s-​sens tat-​togħma sabiex inkunu nistgħu nieħdu pjaċir nieklu! M’humiex dawn provi qawwijin li Alla tassew iħobbna u li għandu f’moħħu l-​aħjar interessi tagħna?—Salm 145:16, 17; Isaija 42:5, 8.

Minbarra li jurina min hu permezz tal-​“ktieb tan-​natura,” il-​Ħallieq, permezz tal-​Kelma tiegħu, il-​Bibbja, jurina x’tip t’Alla hu. Dan peress li fil-​Bibbja hemm imniżżlin ħafna mill-​affarijiet li Alla Jehovah għamel b’imħabba fil-​passat u l-​għadd taʼ barkiet li jwiegħed li jferraʼ fuq l-​umanità fil-​futur qarib. (Ġenesi 22:17, 18; Eżodu 3:17; Salm 72:6-16; Apokalissi 21:4, 5) Fuq kollox, il-​Bibbja turina liema hi l-​akbar espressjoni taʼ l-​imħabba t’Alla lejn l-​umanità​—li ta lill-​iben uniġenitu tiegħu biex ikun il-​Feddej tagħna ħalli aħna nkunu nistgħu ninħelsu mill-​jasar tad-​dnub u l-​mewt. (Rumani 5:8) Tabilħaqq, iktar ma nitgħallmu dwar il-​Ħallieq tagħna kollu mħabba, iktar se nitqanqlu biex inħobbuh minn qalbna.

Nitgħallmu Nħobbu lil Sħabna l-​Bnedmin

Bħalma enfasizza Ġesù, flimkien maʼ li nħobbu lil Alla b’qalbna kollha, b’ruħna kollha, u b’moħħna kollu, għandna nħobbu lil għajrna bħalna nfusna. Fil-​fatt, l-​imħabba t’Alla tobbligana nħobbu lil sħabna l-​bnedmin. L-​appostlu Ġwanni spjega: “Għeżież, jekk Alla ħabbna daqshekk, aħna wkoll għandna nħobbu lil xulxin.” Hu kompla jenfasizza: “Jekk xi ħadd jgħid: ‘Jiena nħobb ’l Alla’, u jobgħod lil ħuh, dan ikun giddieb. Għax min ma jħobbx lil ħuh li jara, kif jistaʼ jħobb lil Alla li hu qatt ma rah? Dan hu l-​kmandament li tana hu: li min iħobb ’l Alla, iħobb ukoll lil ħuh.”—1 Ġwann 4:11, 20, 21.

Illum qegħdin ngħixu f’dinja fejn il-​biċċa l-​kbira tan-​nies juru attitudni taʼ ‘jien l-​ewwel.’ Huma “jingħataw għall-​imħabba tagħhom infushom,” eżatt bħalma bassret il-​Bibbja. (2 Timotju 3:2) Għalhekk, jekk irridu nitgħallmu t-​triq li tisboq taʼ l-​imħabba, għandna nagħmlu sforz kbir biex inġeddu fehmietna u nixbhu lill-​Ħallieq tagħna kollu mħabba, minflok ma nsegwu l-​modi egoistiċi tal-​biċċa l-​kbira tan-​nies. (Rumani 12:2; Efesin 5:1) Alla saħansitra hu “tajjeb maʼ l-​ingrati u l-​ħżiena,” u “jtallaʼ x-​xemx tiegħu sew fuq il-​ħżiena u sew fuq it-​tajbin, u jniżżel ix-​xita sew fuq min hu tajjeb u sew fuq min m’huwiex.” Peress li Missierna tas-​sema jagħtina dan l-​eżempju eċċellenti, għandna nistinkaw biex inkunu qalbna tajba maʼ kulħadd u ngħinu lil kulħadd. Billi nagħmlu hekk, se nuru li aħna ‘wlied Missierna kollu mħabba li hu fis-​smewwiet.’—Luqa 6:35; Mattew 5:45.

Xi drabi dawn l-​atti taʼ mħabba jirriżultaw f’li aħna ngħinu lin-​nies isiru adoraturi tal-​veru Alla. Ftit tas-​snin ilu, mara tad-​dar li hija waħda mix-​Xhieda taʼ Jehovah pprovat taqsam il-​messaġġ tal-​Bibbja mal-​ġâra tagħha, imma din irrifjutatha bil-​qawwi. Madankollu, it-​tweġiba ma qatgħatilhiex qalbha. Minflok, hi kompliet turi qalb tajba u pprovat tgħin lil ġâra. Darba minnhom għenitha ġġorr f’dar differenti. Darb’oħra ftehmet biex xi ħadd iwassal lill-​ġâra sa l-​ajruport ħalli tiltaqaʼ maʼ qrabatha. Iktar tard, il-​ġâra aċċettat studju tal-​Bibbja u maż-​żmien saret Kristjana żeluża minkejja persekuzzjoni ħarxa minn żewġha. Iva, dawk l-​espressjonijiet taʼ mħabba qegħdu l-​pedament għal barkiet dejjiema.

Jekk inkunu onesti se nammettu li Alla jħobbna mhux għax għandna għadd taʼ kwalitajiet ammirevoli. Għall-​kuntrarju, hu jħobbna avolja nagħmlu ħafna żbalji u għandna ħafna nuqqasijiet. Minħabba f’hekk, bl-​istess mod għandna nitgħallmu nħobbu lil sħabna l-​bnedmin minkejja d-​diversi difetti tagħhom. Jekk inħarrġu lilna nfusna biex nagħrfu u napprezzaw il-​kwalitajiet tajbin taʼ l-​oħrajn minflok ma nfittxulhom l-​iżbalji, se nsibuha iktar faċli biex inħobbuhom. Dak li nħossu għalihom jistaʼ jkun iktar minn imħabba kontrollata minn prinċipju u jibda jinkludi affezzjoni tenera u għożża li teżisti bejn ħbieb tal-​qalb.

Ħallu l-​Imħabba Tagħkom Tikber

L-​imħabba u l-​ħbiberija għandhom bżonn jiġu kultivati, u fost l-​ingredjenti essenzjali għal dan, hemm is-​sinċerità u l-​onestà. Xi wħud jipprovaw jaħbu n-​nuqqasijiet tagħhom sabiex jagħtu impressjoni favorevoli lin-​nies li jridu jitħabbu magħhom. Madankollu, jekk naġixxu hekk se jiġina l-​kontra, għax l-​oħrajn fl-​aħħar jiskopru l-​fatti u jiddiżgustaw ruħhom b’diżonestà bħal din. Għalhekk, m’għandniex għalfejn nibżgħu nħallu lil ħaddieħor ikun jafna eżatt kif aħna​—anki jekk għandna nuqqasijiet li qed nistinkaw biex negħlbuhom. Dan jistaʼ jgħinna nistabbilixxu ħbiberija magħhom.

Per eżempju, Xhud anzjana fil-​kongregazzjoni fil-​Lvant Imbiegħed ma tantx kellha edukazzjoni. Madankollu, lill-​oħrajn hi qatt ma tipprova taħbilhom dan il-​fatt. Per eżempju, hi tammetti bis-​sinċerità kollha, li m’hijiex kapaċi turi lil ħaddieħor kif jistabbilixxi mill-​profeziji u l-​istorja tal-​Bibbja li Żminijiet il-​Ġentili ntemmu fl-​1914.a Madankollu, hi tant tagħti eżempju tajjeb fiż-​żelu għall-​ministeru, kif ukoll fl-​imħabba u l-​ġenerożità lejn l-​aħwa, li jirreferu għaliha b’affezzjoni bħala l-​ġawhra tal-​kongregazzjoni.

F’xi kulturi, ma tantx titqies bħala ħaġa sabiħa li turi l-​affezzjoni bil-​miftuħ; in-​nies jitgħallmu juru formalità b’mod pulit meta jittrattaw m’oħrajn. Filwaqt li dejjem hu tajjeb li nkunu edukati u nuru konsiderazzjoni, m’għandniex inħallu l-​pulitizza tagħna tifga jew ma tħalliniex nesprimu dak li nħossu għal ħaddieħor. Jehovah ma staħax jistqarr l-​affezzjoni tiegħu għall-​poplu magħżul tiegħu, Iżrael tal-​qedem, għax qalilhom: “Bi mħabba taʼ dejjem ħabbejtek.” (Ġeremija 31:3) Bl-​istess mod, l-​appostlu Pawlu qal lil kredenti sħabu f’Tessalonika: “Aħna għożżejniekom hekk li ridna naqsmu magħkom mhux biss l-​Evanġelju taʼ Alla imma wkoll ħajjitna stess, daqskemm ħabbejniekom.” (1 Tessalonikin 2:8) Mela hekk kif nistinkaw biex nikkultivaw affezzjoni ġenwina għal bnedmin sħabna, li nesprimu b’mod naturali sentimenti bħal dawn jaqbel iktar mat-​tagħlim tal-​Bibbja milli li nrażżnuhom.

Jinħtieġ Sforz Kontinwu

Il-​proċess taʼ li nitgħallmu nħossu għal oħrajn u nuruhom imħabba huwa wieħed kontinwu. Dan jirrikjedi sforz kbir min-​naħa tagħna għax irridu naħdmu iebes biex negħlbu l-​imperfezzjonijiet tagħna stess kif ukoll biex nirreżistu l-​influwenza qawwija taʼ din id-​dinja bla mħabba. Madankollu, dan taʼ min jagħmlu minħabba l-​barkiet abbundanti li jġib.—Mattew 24:12.

Anki f’din id-​dinja tant imperfetta, nistgħu ngawdu relazzjonijiet aħjar maʼ bnedmin sħabna. Ir-​riżultat ikun ħafna ferħ, paċi, u sodisfazzjon għalina u għal ħaddieħor. Billi nagħmlu dan l-​isforz, nistgħu nuru li tixirqilna t-​tama meraviljuża taʼ ħajja taʼ dejjem fid-​dinja l-​ġdida t’Alla. Fuq kollox, billi nitgħallmu t-​triq li tisboq taʼ l-​imħabba, nistgħu niksbu l-​approvazzjoni u l-​barkiet tal-​Ħallieq tagħna kollu mħabba, kemm issa kif ukoll għall-​eternità!

[Nota taʼ taħt]

[Stampi f’paġna 10]

L-​imħabba Kristjana tistaʼ tintwera b’atti taʼ qalb tajba

[Sors taʼ l-​Istampa f’paġna 8]

UN PHOTO 186226/M. Grafman