Miexi ’l Quddiem Lejn ir-​Rebħa Finali!

“Ħares! żiemel abjad; u dak bil-​qegħda fuqu kellu qaws; u ngħatatlu kuruna, u hu mar ’il quddiem jikkonkwista u biex iwettaq għalkollox il-​konkwista tiegħu.”—RIVELAZZJONI 6:​2, NW.

1. Liema ġrajjiet, li kellhom jiġru fil-​futur, ra Ġwanni fil-​viżjoni?

B’ISPIRAZZJONI minn Alla, l-​appostlu Ġwanni setaʼ jara x’kien se jiġri madwar 1,800 sena bil-​quddiem u jiddeskrivi meta Kristu ngħata t-​tron bħala Sultan. Ġwanni kellu bżonn il-​fidi biex jemmen dak li ra fil-​viżjoni. Aħna llum għandna evidenza ċara li Kristu ngħata t-​tron fl-​1914, preċiż bħalma kien imbassar. Bl-​għajnejn tagħna tal-​fidi, aħna qed naraw lil Ġesù Kristu sejjer “’il quddiem jikkonkwista u biex iwettaq għalkollox il-​konkwista tiegħu.”

2. Ix-​Xitan kif irreaġixxa għat-​twelid tas-​Saltna, u dan taʼ liema ħaġa hu evidenza?

² Mat-​twelid tas-​Saltna, Satana tkeċċa ’l barra mis-​sema, u dan ġagħlu jħarrax iktar il-​ġlieda tiegħu u jimtela iktar bir-​rabja, imma kollu taʼ xejn għax xorta mhux se jkollu ċans jirbaħ. (Apokalissi 12:​7-12) Minħabba r-​rabja tiegħu, il-​kundizzjonijiet tad-​dinja bdew isiru iktar kritiċi. Is-​soċjetà umana tidher li qed titkisser. Għax-​Xhieda taʼ Jehovah din hija evidenza ċara li s-​Sultan tagħhom miexi ’l quddiem “biex iwettaq għalkollox il-​konkwista tiegħu.”

Soċjetà tad-​Dinja l-​Ġdida Qed Tiġi Fformata

3, 4. (a) Liema bidliet fl-​organizzazzjoni saru fil-​kongregazzjoni Kristjana mit-​twelid tas-​Saltna ’l hawn, u għala kien hemm bżonnhom? (b) Skond ma kien imbassar minn Isaija, x’ġid għamlu dawn il-​bidliet?

³ Ladarba seħħ it-​twelid tas-​Saltna, kien wasal iż-​żmien biex il-​kongregazzjoni Kristjana, li issa ngħatat il-​ħajja mill-​ġdid u kellha iktar responsabbiltajiet tas-​Saltna, tinġieb iktar fi qbil maʼ kif kienet titmexxa l-​kongregazzjoni Kristjana taʼ l-​ewwel seklu. B’hekk, fil-​ħarġiet taʼ l-​1 u l-​15 taʼ Ġunju, 1938, The Watchtower eżamina kif kellha taħdem l-​organizzazzjoni Kristjana. Iktar tard, fil-​ħarġa tal-​15 taʼ Diċembru, 1971, ngħatat iktar spjegazzjoni ċara dwar il-​Ġemgħa li Tiggverna taʼ żmienna fl-​artiklu “A Governing Body as Different From a Legal Corporation” (Ġemgħa li Tiggverna li Hi Differenti minn Korporazzjoni Legali). Fl-​1972 inħatru ġemgħat t’anzjani biex jipprovdu għajnuna u direzzjoni għall-​kongregazzjonijiet lokali.

⁴ L-​indokrar xieraq li reġaʼ beda jsir saħħaħ ferm lill-​kongregazzjoni Kristjana. Dan kien dovut ukoll għall-​arranġamenti li l-​Ġemgħa li Tiggverna għamlet biex tagħti istruzzjonijiet lill-​anzjani dwar id-​dmirijiet tagħhom, inkluż taħriġ fi kwistjonijiet ġudizzjarji. L-​iżviluppi li saru pass pass fl-​organizzazzjoni t’Alla fuq l-​art u r-​riżultati tajbin li nkisbu kienu mbassrin f’Isaija 60:17: “Minflok il-​bronż, nġiblek id-​deheb; flok il-​ħadid, il-​fidda; flok l-​injam, il-​bronż; flok il-​ġebel, il-​ħadid. U nagħmel is-​Sliem [“l-​indokraturi,” NW] tiegħek, u l-​Ġustizzja [“dawk li jagħtuk ix-​xogħol,” NW].” Dawn il-​bidliet pożittivi kienu xiehda tal-​barka u l-​approvazzjoni t’Alla fuq dawk li kienu qed jappoġġaw is-​Saltna tiegħu fil-​beraħ u b’żelu kbir.

5. (a) Satana kif irreaġixxa meta ra l-​barka li Jehovah xeħet fuq in-​nies Tiegħu? (b) Fi qbil maʼ Filippin 1:​7, NW, ix-​Xhieda taʼ Jehovah kif irreaġixxew għar-​rabja taʼ Satana?

⁵ L-​attenzjoni u l-​gwida li Alla b’imħabba ta lin-​nies tiegħu wara t-​twelid tas-​Saltna ma naqsux li jiġu nnotati minn Satana. Per eżempju, fl-​1931, il-​membri taʼ dan il-​grupp żgħir taʼ Kristjani ddikjaraw pubblikament li huma ma kinux biss Studenti tal-​Bibbja. Fi qbil maʼ Isaija 43:​10, huma kienu Xhieda taʼ Jehovah! Jekk hux b’kumbinazzjoni jew le, ix-​Xitan qanqal mewġa taʼ persekuzzjoni, li qatt ma kien hawn bħalha, mal-​globu kollu. Saħansitra f’pajjiżi li normalment huma magħrufin għal-​libertà reliġjuża, bħall-​Istati Uniti, il-​Kanada, u l-​Ġermanja, ix-​Xhieda ġew imġagħlin, darba wara l-​oħra, jiġġieldu battalji legali biex ikunu jistgħu jgawdu l-​libertà tal-​qima. Sa l-​1988, il-​Qorti Suprema taʼ l-​Istati Uniti kienet eżaminat 71 każ li kienu jinvolvu lix-​Xhieda taʼ Jehovah, u żewġ terzi minnhom inqatgħu favur tagħhom. Illum, madwar id-​dinja, għadhom qed isiru battalji legali biex, bħalma sar fl-​ewwel seklu, il-​Kristjani ‘jiddefendu u jistabbilixxu legalment l-​aħbar tajba.’—Filippin 1:​7, NW.

6. Irnexxielhom il-​projbizzjonijiet u r-​restrizzjonijiet iwaqqfu lin-​nies taʼ Jehovah milli jkomplu jimxu ’l quddiem? Agħti eżempju.

⁶ Matul is-​snin tletin, fil-​perijodu li wassal għall-​bidu tat-​Tieni Gwerra Dinjija, gvernijiet dittatorjali għamlu projbizzjonijiet u restrizzjonijiet fuq ix-​xogħol tax-​Xhieda taʼ Jehovah fil-​Ġermanja, Spanja, u l-​Ġappun, biex insemmu biss tlieta minnhom. Imma fis-​sena 2000, f’dawn it-​tliet pajjiżi biss kien hemm kważi 500,000 xhud attiv fix-​xandir tas-​Saltna t’Alla. Dan kien kważi għaxar darbiet iktar min-​numru taʼ Xhieda li kien hawn fid-​dinja kollha fl-​1936! Jidher ċar li l-​projbizzjonijiet u r-​restrizzjonijiet ma jistgħux iwaqqfu lin-​nies taʼ Jehovah milli jkomplu jimxu ’l quddiem taħt il-​Mexxej rebbieħ tagħhom, Ġesù Kristu.

7. Liema ġrajja li tispikka seħħet fl-​1958, u x’bidla drammatika seħħet minn dakinhar ’il quddiem?

⁷ X’turija kienet taʼ dan il-​mixi ’l quddiem meta, fl-​1958, il-​Belt taʼ New York rat l-​akbar konvenzjoni li qatt kellhom ix-​Xhieda taʼ Jehovah, Divine Will International Assembly (Assemblea Internazzjonali Rieda Divina), li għaliha attendew numru rekord taʼ 253,922 ruħ. Sa l-​1970 ix-​xogħol tagħhom kien infetaħ fit-​tliet pajjiżi li ssemmew qabel, ħlief f’dik li qabel kienet magħrufa bħala l-​Ġermanja tal-​Lvant. Imma x-​Xhieda kienu għadhom taħt projbizzjoni fl-​Unjoni Sovjetika, li kienet immensa, u fil-​ġnus alleati tagħha skond il-​Patt taʼ Varsavja. Illum, f’dawn in-​nazzjonijiet li qabel kienu Komunisti, hemm iktar minn nofs miljun Xhud attiv.

8. X’kien ir-​riżultat tal-​barka taʼ Jehovah fuq in-​nies tiegħu, u The Watchtower taʼ l-​1950 x’qal dwar dan?

⁸ Ix-​Xhieda taʼ Jehovah ġew imberkin b’żjieda għaliex komplew ‘ifittxu l-​ewwel is-​Saltna u l-​ġustizzja taʼ Alla.’ (Mattew 6:33) Il-​profezija taʼ Isaija diġà twettqet letteralment: “L-​iżgħar fostkom isir tribù u l-​iċken isir ġens qawwi. Jien il-​Mulej, li nfittex nagħmel dan kollu f’waqtu.” (Isaija 60:22) U dan mhux kollox. F’dawn l-​aħħar għaxar snin biss, in-​numru taʼ dawk li jitkellmu m’oħrajn favur it-​tmexxija tas-​Saltna żdied b’iktar minn 1,750,000 ruħ. Dawn minn jeddhom saru parti minn grupp taʼ nies li dwarhom il-​Watchtower taʼ l-​1950 għamel din l-​osservazzjoni: “Alla issa qed iħejji soċjetà tad-​dinja l-​ġdida. . . . Dan il-​grupp li se jkun il-​qalba tad-​dinja l-​ġdida se jgħaddi minn Armageddon, . . . l-​ewwel li se jkun preżenti fuq l-​‘art il-​ġdida’ . . . , organizzat b’mod teokratiku billi hu midħla sew tal-​proċeduri organizzazzjonali.” L-​artiklu kkonkluda: “Mela, ejja lkoll flimkien nimxu ’l quddiem b’pass determinat, bħala soċjetà tad-​dinja l-​ġdida!”

9. L-​affarijiet li tgħallmu x-​Xhieda taʼ Jehovah matul is-​snin kif kienu taʼ benefiċċju għalihom?

⁹ Sadanittant, din is-​soċjetà tad-​dinja l-​ġdida li qegħda dejjem tikber kisbet l-​esperjenza u l-​effiċjenza meħtieġa li tant huma imprezzabbli llum u li forsi saħansitra għad ikunu taʼ siwi fix-​xogħol taʼ tiġdid wara Armageddon. Per eżempju, ix-​Xhieda tgħallmu jorganizzaw konvenzjonijiet kbar ħafna, iwasslu fil-​pront l-​għajnuna f’każi t’emerġenza, u jibnu bini fi ftit żmien. Din l-​attività kienet il-​kaġun li ħafna bdew iħarsu lejn ix-​Xhieda taʼ Jehovah b’ammirazzjoni u rispett.

Jinbidlu Opinjonijiet Żbaljati

10, 11. Uri kif inbidlu opinjonijiet żbaljati dwar ix-​Xhieda taʼ Jehovah.

¹⁰ Minkejja dan, għad hemm nies li jakkużaw lix-​Xhieda taʼ Jehovah li huma kontra s-​soċjetà umana. Dan hu l-​iktar minħabba li x-​Xhieda jieħdu l-​waqfa tagħhom ibbażata fuq il-​Bibbja dwar kwistjonijiet bħalma huma t-​trasfużjonijiet tad-​demm, in-​newtralità, it-​tipjip, u l-​morali. Imma n-​nies iktar ma jmorru iktar qed jammettu li dak li jgħidu x-​Xhieda taʼ min jagħti kasu. Per eżempju, tabiba fil-​Polonja ċemplet l-​uffiċċju taʼ l-​amministrazzjoni tax-​Xhieda taʼ Jehovah u qaltilhom li hi u l-​kollegi tagħha fl-​isptar damu sigħat sħaħ jiddibattu dwar is-​suġġett tat-​trasfużjonijiet tad-​demm. Id-​diskussjoni bdiet minħabba artiklu li deher dak in-​nhar fil-​gazzetta Pollakka Dziennik Zachodni. “Jien personalment jiddispjaċini meta nara li fil-​qasam mediku qed jingħata d-​demm għal kull ħaġa taʼ xejn,” ammettiet din it-​tabiba. “Jeħtieġ li l-​affarijiet jinbidlu, u ħadt gost li xi ħadd qajjem dan is-​suġġett. Jien nixtieq iktar informazzjoni.”

¹¹ Waqt konferenza li nżammet is-​sena l-​oħra, awtoritajiet mediċi mill-​Kanada, l-​Ewropa, l-​Iżrael, u l-​Istati Uniti ddiskutew materjal li kien maħsub biex jgħin lit-​tobba jikkuraw pazjenti mingħajr l-​użu tad-​demm. F’din il-​laqgħa li saret fl-​Isvizzera ħareġ il-​punt li, kontra taʼ dak li jaħsbu l-​maġġuranza tan-​nies, ir-​rata taʼ mwiet f’pazjenti li ngħataw trasfużjonijiet tad-​demm hi fil-​fatt iktar għolja minn dik taʼ pazjenti li ma ngħatawx demm. Pazjenti li kienu Xhieda ġeneralment setgħu joħorġu mill-​isptar qabel dawk li jkunu ngħataw id-​demm, u b’hekk ħafna drabi l-​kura kienet tkun tiswa inqas.

12. Agħti eżempju taʼ kif nies prominenti faħħru l-​waqfa li ħadu x-​Xhieda taʼ Jehovah f’dik li hi newtralità politika.

¹² Saru wkoll ħafna kummenti pożittivi dwar il-​waqfa newtrali li ħadu x-​Xhieda taʼ Jehovah qabel u matul it-​Tieni Gwerra Dinjija meta ssaportew b’kuraġġ kbir l-​attakk brutali tan-​Nazi. Il-​vidjo Jehovah’s Witnesses Stand Firm Against Nazi Assault (Ix-Xhieda taʼ Jehovah Jieqfu Sodi Kontra l-​Attakki tan-​Nazi), li pproduċew ix-​Xhieda taʼ Jehovah, intwera bix-​xieraq għall-​ewwel darba fil-​kamp tal-​konċentrament taʼ Ravensbrück, fil-​Ġermanja nhar is-​6 taʼ Novembru, 1996 fejn kiseb ħafna kummenti favorevoli. Saret preżentazzjoni simili fil-​kamp tal-​konċentrament magħruf taʼ Bergen-Belsen fit-​18 t’April, 1998. Fil-​ftuħ taʼ din il-​preżentazzjoni Dr. Wolfgang Scheel, id-​direttur taċ-​Ċentru għall-​Edukazzjoni Politika fin-​naħa t’isfel tas-​Sassonja, ammetta: “Waħda mill-​veritajiet imbarazzanti taʼ l-​istorja hi li x-​Xhieda taʼ Jehovah rrifjutaw is-​Soċjaliżmu Nazzjonali b’determinazzjoni ferm akbar minn dik tal-​knejjes Kristjani. . . . Naħsbu x’naħsbu dwar it-​tagħlim u ż-​żelu reliġjuż tax-​Xhieda taʼ Jehovah, irridu nammettu li s-​sodizza li wrew matul ir-​reġim tan-​Nazi jixirqilha kull rispett.”

13, 14. (a) Liema osservazzjoni f’lokha għan-​nom tal-​Kristjani tal-​bidu saret minn xi ħadd li lanqas biss kont tistennieha minnu? (b) Agħti eżempji taʼ kummenti favorevoli li saru għan-​nom tan-​nies t’Alla fi żmienna.

¹³ Il-​fatt li nies prominenti jew il-​qrati joħorġu xi stqarrija favur ix-​Xhieda taʼ Jehovah fi kwistjonijiet taʼ kontroversja jistaʼ jwassal biex in-​nies ma jibqgħux preġudikati kontrihom u jibdew iħarsu lejhom b’mod iktar pożittiv. Dan taʼ spiss jiftaħ it-​triq biex ikunu jistgħu jkellmu lil nies li qabel qatt ma kienu lesti li jisimgħuhom. Għalhekk, ix-​Xhieda taʼ Jehovah tgħidx kemm jieħdu gost bihom azzjonijiet bħal dawn u verament japprezzawhom. Dan ifakkarna dwar dak li ġara fl-​ewwel seklu f’Ġerusalemm. Meta s-​Sinedriju, il-​qorti għolja Lhudija, ried jeħles mill-​Kristjani minħabba l-​ippridkar żeluż tagħhom, Gamaljel, “mgħallem fil-​Liġi u miġjub mill-​poplu kollu,” wissiehom u qal: “Rġiel taʼ Iżrael, iftħu għajnejkom x’sejrin tagħmlu lil dawn in-​nies. . . . Ħallukom minn dawn in-​nies u itilquhom. Għax dan il-​ħsieb jew ħidma tagħhom, jekk hi ġejja mill-​bnedmin, għad tisfaʼ fix-​xejn; iżda jekk hi ġejja minn Alla, ma jseħħilkomx teqirduhom. Araw li ma ssibux ruħkom li qegħdin teħduha kontra Alla!”—Atti 5:​33-39.

¹⁴ Bħal Gamaljel, xi nies prominenti dan l-​aħħar tkellmu favur li x-​Xhieda taʼ Jehovah jkollhom il-​libertà reliġjuża. Per eżempju, dak li qabel kien iċ-​chairman taʼ l-​Akkademja Internazzjonali għal-​Libertà tar-​Reliġjon u t-​Twemmin qal: “Id-​drittijiet reliġjużi taʼ reliġjon m’għandhomx jiġu miċħudin sempliċement għaliex is-​soċjetà tqis il-​konvinzjonijiet taʼ din ir-​reliġjon bħala inaċċettabbli jew mhux konvenzjonali.” U professur taʼ l-​istudju xjentifiku dwar ir-​reliġjon fl-​università taʼ Leipzig qajjem mistoqsija f’waqtha rigward il-​kummissjoni li nħatret mill-​gvern Ġermaniż biex tinvestiga l-​hekk imsejħa setet reliġjużi. Dan staqsa: “Għala għandhom jiġu investigati biss ir-​reliġjonijiet iż-​żgħar u mhux ukoll iż-​żewġ knejjes il-​kbar [il-Knisja Kattolika Rumana u l-​Knisja Luterana]?” Ir-​risposta nistgħu faċilment insibuha fil-​kliem taʼ wieħed li qabel kien uffiċjal Ġermaniż, li kiteb: “M’hemm ebda dubju li wara l-​kwinti kien hemm il-​fanatiċi tal-​knisja li ddettaw liema deċiżjoni politika kellha tieħu l-​kummissjoni tal-​gvern.”

Lejn Min Għandna Nduru għas-​Serħan?

15, 16. (a) L-azzjoni li ħa Gamaljel għala kienet effettiva sa ċertu punt biss? (b) Tlieta min-​nies importanti oħra kif kienu limitati f’dak li setgħu jagħmlu għal Ġesù?

¹⁵ Dak li qal Gamaljel sempliċement jenfasizza l-​fatt li xogħol li jkollu l-​appoġġ t’Alla ma jistax ikun li jfalli. Il-​Kristjani tal-​bidu żgur li bbenefikaw mill-​kliem li hu qal lis-​Sinedriju, però ma nsewx li anki l-​kliem taʼ Ġesù, li s-​segwaċi tiegħu kellhom jiġu persegwitati, kien minnu. L-​azzjoni taʼ Gamaljel ġabet fix-​xejn il-​ħsieb tal-​mexxejja reliġjużi biex joqtluhom, imma dan ma waqqafx il-​persekuzzjoni għalkollox għax naqraw: “Mbagħad qagħdu fuq il-​parir tiegħu. Sejjħu lill-​appostli quddiemhom, u, wara li tawhom is-​swat, ordnawlhom li ma jitkellmux fuq l-​isem taʼ Ġesù; mbagħad telquhom.”—Atti 5:​39, 40 [5:​40, NW].

¹⁶ Meta Ġesù kien għaddej ġuri, Ponzju Pilatu, billi ma sab ebda ħtija fih, ipprova jeħilsu. Imma ma rnexxilux. (Ġwann 18:​38, 39; 19:​4, 6, 12-16) Anki ż-​żewġ membri tas-​Sinedriju, Nikodemu u Ġużeppi t’Arimatija, li kienu favur Ġesù, kienu limitati f’dak li setgħu jagħmlu biex ma jħallux il-​qorti tieħu azzjoni kontra Ġesù. (Luqa 23:​50-52; Ġwann 7:​45-52; 19:​38-40) Ikun xi jkun il-​motiv tagħhom, xi nies jistgħu jiddefendu lix-​Xhieda taʼ Jehovah u jiksbulhom xi ftit tas-​serħan, imma dan jistaʼ jkun biss limitat. Id-​dinja se tkompli tobgħodhom lis-​segwaċi veri taʼ Kristu preċiż bħalma kienet tobgħod lilu. Jehovah biss jistaʼ jagħti serħan komplet.—Atti 2:24.

17. Liema ħarsa realistika għandhom ix-​Xhieda taʼ Jehovah, imma għala ma jħalluhiex tiddgħajjef id-​determinazzjoni tagħhom li jkomplu jippridkaw l-​aħbar tajba?

¹⁷ Ix-​Xhieda taʼ Jehovah huma realistiċi, u jistennew li jibqaʼ jkollhom il-​persekuzzjoni. L-​oppożizzjoni se tispiċċa biss meta s-​sistema taʼ Satana tkun inqerdet għalkollox. Madankollu, din il-​persekuzzjoni, għalkemm m’hijiex pjaċevoli, m’hijiex se żżomm lix-​Xhieda milli jwettqu l-​inkarigu tagħhom li jippridkaw dwar is-​Saltna. Kif tistaʼ, la għandhom l-​appoġġ t’Alla? Huma jistrieħu fuq il-​Mexxej kuraġġuż tagħhom, Ġesù Kristu, bħala l-​eżempju xieraq għalihom.—Atti 5:​17-21, 27-32.

18. Liema diffikultà għad hemm għan-​nies taʼ Jehovah, imma liema riżultat huma konvinti li se jkollhom?

¹⁸ Sa mill-​bidunett, ir-​reliġjon vera ffaċċjat oppożizzjoni ħarxa. Dalwaqt, se tkun il-​mira t’attakk spjetat minn Gog, li hu Satana fil-​kundizzjoni baxxa tiegħu mindu tkeċċa mis-​sema. Imma r-​reliġjon vera se tibqaʼ ħajja. (Eżekjel 38:​14-16) “Is-​slaten tad-​dinja kollha,” taħt il-​gwida taʼ Satana, se “jagħmlu gwerra lill-​Ħaruf, u l-​Ħaruf joħroġ rebbieħ fuqhom, għax hu Sid is-​sidien u Sultan is-​slaten.” (Apokalissi 16:14; 17:14) Iva, is-​Sultan tagħna miexi ’l quddiem lejn ir-​rebħa finali u dalwaqt se “jwettaq għalkollox il-​konkwista tiegħu.” Xi privileġġ li ninsabu mexjin flimkien miegħu, billi nafu li fi ftit żmien ieħor ħadd ma se jerġaʼ jikkontradixxi lill-​adoraturi taʼ Jehovah meta dawn jgħidu: “Alla hu magħna”!—Rumani 8:31; Filippin 1:​27, 28.

Tistaʼ Tispjega?

• Jehovah x’għamel biex isaħħaħ lill-​kongregazzjoni Kristjana mit-​twelid tas-​Saltna ’l hawn?

• Satana x’għamel biex jipprova jwaqqaf lil Kristu milli jwettaq għalkollox il-​konkwista tiegħu, u b’liema riżultati?

• Kif għandna nħossuna dwar xi azzjoni favorevoli min-​naħa taʼ dawk li m’humiex Xhieda?

• Satana x’se jagħmel dalwaqt, u x’se jkun ir-​riżultat?

[Stampa f’paġna 18]

Il-​konvenzjonijiet huma turija taʼ kemm qed jimxu ’l quddiem in-​nies taʼ Jehovah

[Stampi f’paġna 20]

In-​newtralità tax-​Xhieda matul it-​Tieni Gwerra Dinjija għadha ġġib tifħir lil Jehovah