Il-​Prinċipji Divini Jistgħu Jkunu taʼ Benefiċċju Għalik

BLA dubju taf li l-​annimali huma maħluqin biex jimxu bl-​istint. Ħafna magni huma disinjati biex jintużaw skond l-​istruzzjonijiet. Imma huwa fatt li l-​bnedmin ġew maħluqin biex jiġu gwidati minn prinċipji. Kif nistgħu nkunu ċerti dwar dan? Sewwa, ara x’ħabbar Jehovah, l-​Oriġinatur taʼ kull prinċipju tajjeb, meta għamel l-​ewwel bnedmin: “Ħa nagħmlu l-​bniedem fuq is-​sura u x-​xbieha tagħna.” Il-​Ħallieq hu spirtu; m’għandu ebda ġisem fiżiku bħalna, għalhekk aħna fix-​“xbieha” tiegħu fis-​sens li nistgħu nirriflettu l-​personalità tiegħu, filwaqt li nuru ftit mill-​kwalitajiet mill-​aqwa tiegħu. Il-​bnedmin kapaċi jfasslu ħajjithom skond il-​prinċipji, jiġifieri, skond dak li jaħsbu li hu s-​sett taʼ regoli dwar x’inhu sewwa għalihom. Jehovah ġiegħel li ħafna minn dawn il-​prinċipji jitniżżlu fil-​Kelma tiegħu.—Ġenesi 1:26; Ġwann 4:24; 17:17.

‘Imma l-​Bibbja fiha mijiet taʼ prinċipji,’ xi ħadd forsi jgħid. ‘Kif jistaʼ jkun tkun tafhom kollha?’ Veru. Iżda ikkunsidra dan il-​fatt: Filwaqt li l-​prinċipji divini kollha huma taʼ benefiċċju, xi wħud minnhom jispikkaw iktar minn oħrajn. Dan nistgħu narawh minn Mattew 22:​37-39, fejn Ġesù wera li fost il-​kmandamenti u l-​prinċipji relatati mal-​Liġi Mosajka, xi wħud kienu iktar importanti minn oħrajn.

Liema minn dawn il-​prinċipji huma l-​iktar importanti? L-​iktar prinċipji li jispikkaw fil-​Bibbja huma dawk li għandhom effett dirett fuq ir-​relazzjoni tagħna maʼ Jehovah. Jekk ngħożżu dawn il-​prinċipji, il-​Ħallieq se jsir il-​qawwa prinċipali li tinfluwenza l-​boxxla morali tagħna. Barra minn hekk, hemm il-​prinċipji li jeffettwaw ir-​relazzjoni tagħna maʼ nies oħra. Jekk napplikawhom, dawn se jgħinuna biex ma niġux effettwati la mill-​attitudni magħrufa bħala “l-​ewwel jien” u lanqas b’xi mod ieħor.

Ejja nibdew b’waħda mill-​iktar veritajiet importanti li nsibu fil-​Bibbja. X’inhi din il-​verità, u kif teffettwana?

‘L-​Iktar Għoli fuq l-​Art Kollha’

L-​Iskrittura Mqaddsa tagħmilha ċara li Jehovah hu l-​Ħallieq Grandjuż tagħna, Alla li Jistaʼ Kollox. Ħadd qatt ma jistaʼ jkun daqsu jew jiħodlu postu. Din hija verità fundamentali li nsibuha fil-​Bibbja.—Ġenesi 17:​1, Saydon; Koħèlet 12:1.

Wieħed mill-​kittieba tal-​ktieb tas-​Salmi nnota dan dwar Jehovah: “Int waħdek l-​Għoli fuq l-​art kollha.” Is-​Sultan David tal-​qedem qal: “Tiegħek is-​saltna, Mulej, int kap fuq kulħadd.” U l-​profeta magħruf Ġeremija ġie mqanqal biex jikteb: “Ħadd m’hu bħalek, Mulej, int kbir, u kbir ismek f’qawwitu!”—Salm 83:19 [83:​18, NW]; 1 Kronaki 29:11; Ġeremija 10:6.

Kif għandna napplikaw dawn il-​veritajiet dwar Alla fil-​ħajja tagħna taʼ kuljum?

M’hemm ebda dubju min tassew għandu jkun l-​iktar wieħed importanti f’ħajjitna—il-​Ħallieq u d-​Donatur tal-​Ħajja. Ma jkunx xieraq, mela, li nirreżistu kwalunkwe tendenza biex niġbdu l-​attenzjoni lejna stess—tendenza li tistaʼ tkun iktar qawwija f’xi wħud milli f’oħrajn? Prinċipju għaqli li jiggwidana hu li ‘nagħmlu kollox għall-​glorja taʼ Alla.’ (1 Korintin 10:31) Il-​profeta Danjel ħallielna eżempju mill-​aħjar f’dan.

Il-kitbiet storiċi jgħidulna li s-​Sultan Nabukodonosor taʼ Babilonja darba kien inkwetat minħabba ħolma li kellu u ried ikun jaf it-​tifsira tagħha akkost taʼ kollox. Filwaqt li kulħadd baqaʼ mħawwad, Danjel kellu l-​ħila jfisser dik il-​ħolma lis-​sultan sa l-​iċken dettall. Min ħadu l-​kredtu għal dan? Danjel? Le, hu ta l-​glorja lil “Alla fis-​sema li jikxef il-​misteri.” Danjel kompla: “Dan il-​misteru kien irrivelat lili, mhux għax jien għandi xi għerf aktar minn kull ħaddieħor.” Danjel kien bniedem li kellu prinċipji tajbin. Mhux taʼ b’xejn li fil-​ktieb taʼ Danjel, hu jiġi deskritt tliet darbiet bħala “għażiż” f’għajnejn Alla.—Danjel 2:​28, 30; 9:23; 10:​11, 19.

Int se tibbenefika jekk timita lil Danjel. Biex issegwi l-​eżempju tiegħu, il-​fattur deċiżiv hu l-​motiv. Min għandu jieħu l-​glorja għal dak li tagħmel? Hi x’inhi s-​sitwazzjoni tiegħek, int għandek l-​abbiltà li taġixxi fi qbil maʼ dan il-​prinċipju tal-​Bibbja li hu tant importanti—Jehovah hu l-​Mulej Sovran. Jekk tagħmel hekk int se tkun “għażiż” f’għajnejh.

Ejja issa nikkunsidraw żewġ prinċipji bażiċi li jistgħu jiggwidawna fir-​relazzjonijiet tagħna maʼ bnedmin oħrajn. Minħabba l-​enfasi kbira li hawn biex kulħadd iġib lilu nnifsu l-​ewwel, dan l-​aspett tal-​ħajja hu speċjalment taʼ sfida.

“Kunu Umli”

Dawk li dejjem jiġbdu lejhom rari jkollhom sodisfazzjon fil-​ħajja. Il-​biċċa l-​kbira dejjem iridu ħajja aħjar, u jriduha dak il-​ħin stess. Għalihom, il-​modestja hija dgħjufija. Il-​paċenzja ma teżistix għalihom però jistennewha mingħand oħrajn. Ikunu lesti li jagħmlu minn kollox basta jimxu ’l quddiem. Taħseb li tistaʼ taġixxi b’mod differenti milli jagħmlu huma?

Il-qaddejja t’Alla jħabbtu wiċċhom maʼ din l-​attitudni kuljum, imma m’għandhomx iħalluha teffettwahom. Kristjani maturi jaċċettaw il-​prinċipju li “mhux dak li jiftaħar bih innifsu jkun jingħoġob [jew “approvat,” NW], imma dak li jfaħħru l-​Mulej.”—2 Korintin 10:18.

Il-prinċipju li nsibu f’Filippin 2:​3, 4 jistaʼ jgħinna ħafna. Din l-​iskrittura tinkuraġġina biex ma ‘nagħmlu xejn b’pika taʼ partit, anqas għall-​ftaħir fieragħ; imma nkunu umli u kull wieħed minna jqis lill-​ieħor aħjar minnu.’ B’hekk, ma nkunux qed ‘infittxu dak li jaqblilna, imma dak li jaqbel lil ħaddieħor.’

Xi ħadd li kellu attitudni xierqa dwaru nnifsu u li kellu opinjoni realistika tiegħu nnifsu kien Gidgħon, wieħed mill-​imħallfin Lhud tal-​qedem. Dan ma kienx jippretendi li jsir xi mexxej f’Iżrael. Anzi, meta ntgħażel biex ikollu dik il-​pożizzjoni, Gidgħon stqarr li ma kienx denju. “Il-​familja tiegħi hi l-​inqas waħda fit-​tribù taʼ Manassi, u jien iż-​żgħir f’dar missieri.”—Mħallfin 6:​12-16.

Iktar minn hekk, wara li Jehovah ta r-​rebħa lil Gidgħon, l-​irġiel taʼ Efrajm qabdu jitlewmu miegħu. Gidgħon kif irreaġixxa? Beda hu jara lil kulħadd dubbien minħabba r-​rebħa li kellu? Le. Hu skansa l-​inkwiet billi wieġeb bil-​kalma. “X’għamilt jien ħdejkom?” Gidgħon wera l-​umiltà.—Mħallfin 8:​1-3.

Veru, il-​ġrajjiet li jinvolvu lil Gidgħon seħħew żmien twil ilu. Però, xorta waħda se nibbenefikaw jekk nikkunsidraw dan ir-​rakkont. Nistgħu naraw li Gidgħon kellu attitudni differenti mhux ħażin minn dik li hija komuni llum, u l-​fatt li baqaʼ dejjem juri l-​istess attitudni swielu taʼ ġid.

L-attitudni popolari li kulħadd jiġbed lejh tistaʼ b’mod żbaljat iġġagħalna naħsbu li aħna xi ħaġa. Il-​prinċipji tal-​Bibbja jgħinuna nbiddlu din l-​attitudni u jgħallmuna nqisu dak li aħna tassew f’konnessjoni mal-​Ħallieq u m’oħrajn.

Meta aħna nagħtu kas il-​prinċipji tal-​Bibbja, inkunu qed nevitaw li ninġarru mal-​kurrent. Ma nibqgħux inħallu s-​sentimenti jew il-​personalitajiet tagħna jikkontrollawna. Iktar ma nitgħallmu dwar prinċipji taʼ tjieba, iktar insiru nafu l-​Oriġinatur tagħhom. Iva, jekk noqogħdu b’sebaʼ għajnejn għall-​prinċipji divini meta naqraw il-​Bibbja ma jiddispjaċiniex.—Ara l-​kaxxa.

Jehovah għamel lill-​bniedem ogħla mill-​annimali li jimxu primarjament bl-​istint. Jekk irridu nagħmlu r-​rieda t’Alla jeħtieġ li napplikaw il-​prinċipji divini. B’hekk, inkunu nistgħu nħallu l-​boxxla morali tagħna taħdem tajjeb, u din se tidderiġina għal ġos-​sistema l-​ġdida t’Alla. Il-​Bibbja tagħtina raġuni għala għandna nistennew li dalwaqt se tiġi sistema ġdida mad-​dinja kollha li fiha “tgħammar il-​ġustizzja.”—2 Pietru 3:13.

[Kaxxa/Stampa f’paġna 6]

Xi Prinċipji fil-​Bibbja li Huma t’Għajnuna

Fil-​Familja:

“Ħadd ma għandu jqis qjiesu biss, iżda qjies ħaddieħor.”—1 Korintin 10:24.

“L-​imħabba . .  ma tfittixx dak li hu tagħha.”—1 Korintin 13:​4, 5.

“Kull wieħed minnkom, għandu jħobb lil martu bħalu nnifsu.”—Efesin 5:33.

“Intom, nisa miżżewwġa, obdu lil żwieġkom.”—Kolossin 3:18.

“Ismaʼ minn missierek li tak il-​ħajja, u tmaqdarx ’l ommok meta tixjieħ.”—Proverbji 23:22.

Fl-​iskola, fuq ix-​xogħol, jew fin-​negozju:

“Miżien qarrieq jistkerrhu l-​Mulej . . . Il-​ħażin jikseb ħlas qarrieqi.”—Qwiel 11:​1, 18, Saydon.

“Iqis il-​ħalliel li ma jisraqx aktar, imma jaħdem bl-​onestà b’idejh.”—Efesin 4:28.

“Jekk xi ħadd ma jridx jaħdem, dan anqas ma għandu jiekol.”—2 Tessalonikin 3:10.

“Kull ma tagħmlu, agħmluh minn qalbkom bħallikieku lill-​Mulej.”—Kolossin 3:23.

“Aħna . . . rridu nġibu ruħna sewwa f’kollox.”—Lhud 13:18.

L-​attitudni lejn il-​ġid materjali:

“Min jgħaġġel biex jistagħna ma jibqax bla ħtija.”—Qwiel 28:​20, Saydon.

“Min iħobb il-​flus ma jixbax bil-​flus.”—Koħèlet 5:9 [5:​10, NW].

Opinjoni realistika tagħna nfusna:

“Hu ġieħ li n-​nies ifittxu ġieħhom stess”?—Proverbji 25:​27, Karm Żammit.

“Ħa jfaħħrek ħaddieħor, iżda mhux fommok.”—Proverbji 27:2.

“Jiena ngħidilkom . . . tippretendux li intom xi ħaġa aktar milli intom kif għandu jkun!”—Rumani 12:3.

“Jekk xi ħadd jaħseb li hu xi ħaġa meta ma hu xejn, ikun iqarraq bih innifsu.”—Galatin 6:3.

[Stampa f’paġna 5]

Danjel ta l-​kredtu xieraq lil Alla

[Stampa f’paġna 7]

Meta nittrattaw lil oħrajn fi qbil mal-​prinċipji divini nkunu qed nikkontribwixxu għal relazzjonijiet pjaċevoli u għall-​hena

[Sors tal-​Istampa f’paġna 7]

U.S. Fish & Wildlife Service, Washington, D.C./Robert Bridges