Dinja Sħiħa Ġiet Meqruda!
Ħares lejn id-dinja taʼ madwarek, bil-bliet
tagħha, bil-kultura tagħha, bil-kisbiet
xjentifiċi tagħha, bil-popolazzjoni taʼ biljuni li
fiha. Huwa faċli li timpressjona ruħek b’kemm
tidher li hi stabbli, hux tassew? Taħseb int li din id-dinja għad xi darba tgħib għalkollox?
Dan forsi diffiċli biex timmaġinah. Madankollu,
kont taf li skond sors taʼ min joqgħod fuqu, darba kien hemm dinja li kienet teżisti qabel din u li ġiet meqruda għalkollox?
M’AĦNIEX nitkellmu dwar xi dinja taʼ tribujiet primittivi. Id-dinja li għabet kienet ċivilizzata; kellha bliet, kisbiet artistiċi, u għarfien xjentifiku. Madankollu, il-Bibbja tgħidilna li ħabta u sabta, fis-17-il jum tat-tieni xahar, 352 sena qabel ma twieled il-patrijarka Abraham, għamel dilluvju li għarraq lid-dinja kollha.a
Huwa korrett dan ir-rakkont? Ġrat tassew ħaġa bħal din? Kien hemm tassew dinja antika qabel din taʼ issa li ffjorixxiet u li mbagħad ġiet meqruda? Jekk dan veru, għala ntemmet? X’mar ħażin? U hemm xi lezzjoni li nistgħu nitgħallmu mill-qerda tagħha?
Ġiet Meqruda Tassew Dinja Antika?
Katastrofi straordinarja bħal din, jekk ġrat tassew, qatt ma kienet se tintesa għalkollox. Għalhekk, f’ħafna nazzjonijiet insibu tfakkiriet dwar din il-qerda. Per eżempju, ikkunsidra d-data preċiża li nsibu miktuba fl-Iskrittura. It-tieni xahar tal-kalendarju antik kien jibda minn dak li aħna issa nsejħulu nofs Ottubru u jispiċċa f’nofs Novembru. Mela s-17-il jum jikkorrispondi bejn wieħed u ieħor maʼ l-ewwel taʼ Novembru. Allura, forsi mhux b’kumbinazzjoni li f’ħafna pajjiżi festi għall-mejtin jiġu ċelebrati f’dak iż-żmien tas-sena.
Għad hemm evidenzi oħrajn tad-Dilluvju fit-tradizzjonijiet tal-bnedmin. Kważi kull poplu antik għandu leġġenda li l-antenati tiegħu għaddew minn dilluvju globali. Il-Pigmej taʼ l-Afrika, iċ-Ċelti taʼ l-Ewropa, l-Inka taʼ l-Amerika t’Isfel—kollha għandhom leġġendi simili, bħalma għandhom il-popli taʼ l-Alaska, partijiet mill-Amerika taʼ Fuq, l-Awstralja, iċ-Ċina, l-Indja, il-Litwanja, il-Messiku, il-Mikronesja, u n-New Zealand, biex insemmu biss ftit.
M’għandniex xi ngħidu, maż-żmien il-leġġendi ġew imżejnin, imma kollha jinkludu diversi dettalji li jindikaw li r-rakkonti għandhom l-istess sors: Alla rrabja minħabba l-ħażen tal-bnedmin. Ġab dilluvju kbir. Il-bnedmin in ġenerali ġew meqrudin. Madankollu, ftit twajbin baqgħu ħajjin. Dawn bnew bastiment li fih salvaw xi nies u annimali. Wara xi żmien, intbagħtu xi għasafar biex ifittxu art niexfa. Fl-aħħarnett, il-bastiment strieħ fuq muntanja. Malli żbarkaw, dawk li salvaw offrew sagrifiċċju.
Dan x’juri? Ix-xebh ma jistax ikun b’kumbinazzjoni. L-evidenza kollha taʼ dawn il-leġġendi taqbel max-xiehda antika tal-Bibbja li l-bnedmin kollha huma dixxendenti taʼ dawk li baqgħu ħajjin f’dilluvju li qered dinja taʼ bnedmin. Għalhekk, aħna m’għandniex bżonn nistrieħu fuq leġġendi jew ħrejjef biex inkunu nafu x’ġara. Għandna l-kitba mħarsa bir-reqqa fl-Iskrittura Ebrajka tal-Bibbja.—Ġenesi, kapitli 6-8.
Il-Bibbja fiha rakkont imnebbaħ taʼ l-istorja li jiħodna lura saż-żerniq tal-ħajja. Madankollu, l-evidenza turi li din hi iktar minn sempliċi storja. Il-profezija infallibbli u l-għerf profond li fiha juru li l-Bibbja hija l-komunikazzjoni t’Alla mal-bnedmin bħalma ssostni li hi. Kuntrarju għall-ħrejjef, ir-rakkonti storiċi tal-Bibbja jinkludu ismijiet u dati kif ukoll dettalji ġenealoġiċi u ġeografiċi. Tagħtina stampa taʼ kif kienet il-ħajja qabel id-Dilluvju u tirrivela għala dinja sħiħa ntemmet ħabta u sabta.
X’mar ħażin f’dik is-soċjetà taʼ qabel id-Dilluvju? L-artiklu li jmiss se jikkunsidra din il-mistoqsija li hija importanti għal dawk li forsi għandhom dubju dwar kemm fih sigurtà l-futur taċ-ċivilizzazzjoni preżenti tagħna.
[Nota taʼ Taħt]
[Tabella f’paġna 4]
(Għall-formazzjoni sħiħa tat-test, ara pubblikazzjoni)
Leġġendi tad-Dilluvju minn Madwar id-Dinja
Pajjiż Punti Simili 1 2 3 4 5 6 7 8 9 10
Country Correspondencies 1 2 3 4 5 6 7 8 9 10
Il-Greċja 7 ◆ ◆ ◆ ◆ ◆ ◆ ◆
Ruma 6 ◆ ◆ ◆ ◆ ◆ ◆
Il-Litwanja 6 ◆ ◆ ◆ ◆ ◆ ◆
L-Assirja 9 ◆ ◆ ◆ ◆ ◆ ◆ ◆ ◆ ◆
It-Tanzanija 7 ◆ ◆ ◆ ◆ ◆ ◆ ◆
L-Indja – Indu 6 ◆ ◆ ◆ ◆ ◆ ◆
New Zealand - Maori 5 ◆ ◆ ◆ ◆ ◆
Il-Mikronesja 7 ◆ ◆ ◆ ◆ ◆ ◆ ◆
Washington Amerika – Yakima 7 ◆ ◆ ◆ ◆ ◆ ◆ ◆
Mississippi Amerika – Choctaw 7 ◆ ◆ ◆ ◆ ◆ ◆ ◆
Il-Messiku – Michoacan 5 ◆ ◆ ◆ ◆ ◆
L-Amerika t’Isfel – Quechua 4 ◆ ◆ ◆ ◆
Il-Bolivja – Chiriguano 5 ◆ ◆ ◆ ◆ ◆
Il-Guyana – Arawak 6 ◆ ◆ ◆ ◆ ◆ ◆
1: Alla rrabjat minħabba l-ħażen
2: Qerda b’dilluvju
3: Ordnat minn Alla
4: Mogħtija twissija divina
5: Ftit mill-bnedmin jibqgħu ħajjin
6: Salvati f’bastiment
7: Salvati l-annimali
8: Għasfur jew ħlejqa oħra mibgħuta barra
9: Fl-aħħar jistrieħ fuq muntanja
10: Sagrifiċċju offrut