Fejn Tinsab is-​Sigurtà Tiegħek?

Ġewwa raħal żgħir fl-​Afrika tal-​Punent, iż-​żagħżugħ Josué qed ixejjer lill-​familja tiegħu u lil ħbiebu qabel ma jitlaq.a Imbagħad, hu jerħilha lejn belt kbira biex ifittex sigurtà finanzjarja. Madankollu, ftit wara li jasal, it-​tama tiegħu bdiet tonqos hekk kif jirrealizza li l-​belt m’hijiex post fejn wieħed jistaʼ jsir għani faċilment.

FILWAQT li jistinka biex jaddatta ruħu għall-​ħajja tal-​belt, Josué jibqaʼ diżappuntat għall-​aħħar. Il-​belt xejn ma kienet kif immaġinaha hu. Sadanittant, Josué huwa mxennaq biex jirritorna għand il-​familja tiegħu u ħbiebu f’dak ir-​raħal umli li kien telaq minnu. Imma jibżaʼ li xi wħud mir-​raħal se jwaqqgħuh għaċ-​ċajt. ‘Tgħidx kemm se jgħajruni fallut,’ hu jinkwieta, ‘għax ma kellix suċċess fil-​belt.’

L-iktar ħaġa li qed tkiddu hi li l-​ġenituri tiegħu jistgħu jħossuhom diżappuntati. Huma qed jistrieħu fuqu għall-​għajnuna finanzjarja. Waqt li jipprova jissielet biex jegħleb din it-​tagħbija emozzjonali, Josué jaħdem sigħat twal f’xogħol li jġagħlu jħossu inferjuri u lanqas biss jaqlaʼ farka minn dak li kien ħolom li se jaqlaʼ. Iħossu għajjien mejjet minħabba l-​ħafna xogħol li qed jagħmel. U l-​ħin li jibqagħlu għall-​attivitajiet Kristjani, li jgħożżhom ferm, qed jonqos maʼ kull ġimgħa li tgħaddi. Il-​fatt li jinsab ’il bogħod mill-​imħabba tal-​familja u minn ħbiebu tant qed iġagħluh iħossu mdejjaq u waħdu. Hu jsib li l-​belt ma tagħtux dik is-​sigurtà li tant kien jixtieq.

Għalkemm l-​ismijiet u l-​pajjiżi jvarjaw, l-​esperjenza taʼ dwejjaq taʼ Josué hija waħda li tirrepeti ruħha taʼ spiss. Ma jfissirx li Josué kien qed ikun egoist għax kellu x-​xewqa li jmur xi mkien ieħor—hu kien sempliċement qed ifittex is-​sigurtà. Hu sinċerament ħass li l-​opportunitajiet li setaʼ jkollu fil-​belt kienu aħjar minn dawk li kellu fir-​raħal żgħir tiegħu. M’għandniex xi ngħidu, xi drabi wieħed jistaʼ jtejjeb il-​qagħda tiegħu b’mod materjali, imma dan ma jfissirx sigurtà vera. Żgur li din ma fissritx hekk fil-​każ taʼ Josué, u x’aktarx li lanqas tfisser hekk għall-​biċċa l-​kbira taʼ dawk li jipprovaw jagħmlu l-​istess ħaġa. Dan iġagħalna nistaqsu, ‘X’inhi s-​sigurtà?’

Is-​sigurtà ma tfissirx l-​istess għal kulħadd. Ċertu dizzjunarju jgħid li s-​sigurtà hija “ħelsien mill-​periklu” jew “ħelsien mill-​biżaʼ jew l-​ansjetà.” Il-​biċċa l-​kbira tan-​nies jirrealizzaw li “ħelsien mill-​periklu” totali ma jeżistix illum. Huma jinsabu sodisfatti sakemm iħossuhom fis-​sigurtà, minkejja li madwarhom jistaʼ jkun hemm sitwazzjonijiet li huma taʼ theddida.

Xi ngħidu dwarek? Fejn tistaʼ ddur għas-​sigurtà? Tinsab din f’xi belt iktar milli f’xi raħal, bħalma ħaseb Josué? Jew fil-​flus, minkejja mnejn u kif tistaʼ tiksibhom? Tistaʼ tinsab f’xi pożizzjoni għolja li tistaʼ tikseb? Minkejja dak li temmen dwar mnejn tistaʼ tiġi s-​sigurtà tiegħek, kemm tistaʼ ddum din is-​sigurtà sew għalik u sew għall-​familja tiegħek?

Ejja nikkunsidraw tliet modi li fihom ħafna individwi jfittxu s-​sigurtà—il-​post fejn jgħixu; il-​flus; jew il-​pożizzjoni. Imbagħad se neżaminaw fejn tinsab is-​sigurtà dejjiema u ġenwina.

[Nota taʼ taħt]