Il-Ħruq taʼ l-Inċens—Għandu Post fil-Qima Vera?
“L-ALLAT iħobbu l-fwejjaħ.” Dan kien qawl komuni fost l-Eġizzjani tal-qedem. Għalihom, il-ħruq taʼ l-inċens kien parti importanti fil-qima tagħhom. Minħabba li kienu jemmnu li l-allat kienu viċin, l-Eġizzjani kienu jaħarqu l-inċens kuljum fit-tempji tagħhom u fuq l-artali taʼ darhom u saħansitra waqt in-negozju. Ġnus oħrajn kellhom drawwiet simili.
X’inhu l-inċens? It-terminu jistaʼ jirreferi għad-duħħan jew għas-sustanza li tinħaraq. Huwa magħmul mir-raża u l-gomma aromatika li toħroġ mis-siġar, bħall-balzmu. Dawn jiġu mitħuna fi trab u spiss jitħalltu maʼ sustanzi bħal ħwawar, qxur tas-siġar, u fjuri ħalli jagħmlu ċertu fwieħa biex tintuża għal affarijiet speċifiċi.
Fi żminijiet tal-qedem, l-inċens tant kien oġġett mixtieq u għalhekk taʼ valur għoli li l-ingredjenti tiegħu saru oġġetti importanti fin-negozju. Gruppi taʼ negozjanti li kienu jaħdmu fuq rotot bil-karavani kienu jġorruhom minn artijiet imbiegħda. Forsi tiftakar li Ġużeppi, it-tifel iż-żgħir taʼ Ġakobb, ġie mibjugħ lil negozjanti Ismagħelin li kienu ġejjin “minn Gilgħad bl-iġmla tagħhom mgħobbija bid-dragnat, il-balzmu u l-lawdnu, sejrin iħottuhom l-Eġittu.” (Ġenesi 37:25) Id-domanda għall-inċens tant kibret li r-rotta taʼ dan in-negozju, li bla dubju nbdiet min-negozjanti taʼ l-inċens, tat bidu għall-ivvjaġġar bejn l-Asja u l-Ewropa.
Illum, l-inċens għadu jiġi offrut fiċ-ċerimonji u r-ritwali taʼ ħafna reliġjonijiet. Barra minn hekk, iktar u iktar nies qed jagħżlu li jaħarqu l-inċens fi djarhom sempliċement biex jieħdu pjaċir bir-riħa tfuħ tiegħu. Il-Kristjani kif għandhom iħarsu lejn il-ħruq taʼ l-inċens? Alla jaċċettah fil-qima lejh? Ejja neżaminaw x’tgħidilna l-Bibbja dwar dan.
“Ħaġa Kkonsagrata lill-Mulej”
Fost l-Iżraelin tal-qedem, il-ħruq taʼ l-inċens kien wieħed mill-iktar dmirijiet importanti tal-qassisin fit-tabernaklu. Is-Cyclopedia taʼ McClintock u Strong tgħid: “Tabilħaqq, il-Lhud tant kienu jqisu l-ħruq taʼ l-inċens bħala att taʼ qima jew offerta sagra li mkien ma naqraw li kienu jużawh għal xi ħaġa oħra.”
Alla Jehovah ordna li jiġu mħalltin erbaʼ ingredjenti flimkien u jinħarqu fuq it-tabernaklu: “Ħu daqs wieħed minn dawn il-ħwawar; stakti, bebbux ifuħ, galbanu, u inċens ifuħ. Agħmel minnhom inċens ifuħ, mħallat bil-melħ, taħlita bħal tal-fewwieħ, safja u qaddisa. Isħaq ftit minnu fi trab irqiq, u qiegħed ftit minnu quddiem ix-xhieda miktuba fit-tinda tal-laqgħa.” (Eżodu 30:34-36) Xi studjużi jissuġġerixxu li iktar tard il-Lhud rabbiniċi żiedu ingredjenti oħra biex jintużaw fit-tempju.
L-inċens li jiġi maħruq fit-tabernaklu kien sagru, jintuża biss fil-qima lil Alla. Jehovah ikkmanda: “Dan l-inċens li int tagħmel skond din it-taħlita, tagħmlux bħalu; għalikom tkun ħaġa kkonsagrata lill-Mulej. Min jagħmel bħalha biex jitfewwaħ biha, jinqataʼ minn niesu.” (Eżodu 30:37, 38) Il-qassisin kienu jaħarqu l-inċens darbtejn kuljum fuq artal imħejji apposta. (2 Kronaki 13:11) U f’Jum l-Espjazzjoni, il-qassis il-kbir kien jaħraq l-inċens fil-Post l-Iktar Qaddis.—Levitiku 16:12, 13.
Mhux l-offerti taʼ l-inċens kollha kienu aċċettati minn Alla. Hu kkastiga lil dawk li ma kinux qassisin imma li bi prużunzjoni offrewh daqslikieku kienu qassisin. (Numri 16:16-18, 35; 17:1-5 [16:35-40, NW]; 2 Kronaki 26:16-20) L-inċens offrut mill-ġens Lhudi kien t’offiża għal Jehovah meta fl-istess ħin kienu qed jieħdu sehem f’atti taʼ qima falza u jimlew idejhom bit-tixrid tad-demm. L-ipokrisija tagħhom wasslet biex Jehovah iddikjara: “Sirt nistkerrhu l-bħur [“l-inċens,” NW].” (Isaija 1:13, 15) L-Iżraelin tant saru traskurati fil-qima li ordnalhom jagħtu Jehovah li għalqu t-tempju u ħarqu l-inċens fuq artali oħrajn. (2 Kronaki 28:24, 25) Snin wara, l-inċens qaddis saħansitra ntuża fil-qima immorali t’allat foloz. Prattiċi bħal dawn kienu jqażżuh lil Jehovah.—Eżekjel 16:2, 17, 18.
L-Inċens u l-Kristjani tal-Bidu
Il-patt tal-Liġi, flimkien mad-dmir tal-qassisin li jaħarqu l-inċens, spiċċa meta Kristu stabbilixxa l-patt il-ġdid fis-sena 33 E.K. (Kolossin 2:14) M’hemm ebda kitba li turi li l-Kristjani tal-bidu kienu jaħarqu l-inċens għal skopijiet reliġjużi. Rigward dan, is-Cyclopedia taʼ McClintock u Strong tgħid: “Żgur li l-inċens ma kienx jintuża [mill-Kristjani tal-bidu]. Tabilħaqq, l-użu tiegħu kien jindika l-paganiżmu . . . Ftit frak taʼ l-inċens li kien jitfaʼ xi ħadd devot fuq artal pagan kien meqjus bħala att taʼ qima.”
Il-Kristjani tal-bidu rrifjutaw ukoll li jaħarqu l-inċens biex jagħrfu d-“divinità” taʼ l-imperatur Ruman, avolja dan setaʼ jiswielhom ħajjithom. (Luqa 4:8; 1 Korintin 10:14, 20) Mhux taʼ b’xejn li l-Kristjani tal-bidu ma kinux jieħdu sehem fin-negozju taʼ l-inċens meta naraw kif l-inċens kien jintuża fl-idolatrija f’dawk iż-żminijiet.
Il-Ħruq taʼ l-Inċens Illum
L-inċens kif qed jintuża llum? F’ħafna knejjes tal-Kristjaneżmu, l-inċens jiġi offrut f’ċerimonji u f’liturġiji. Fost l-Asjatiċi, ħafna familji jaħarqu l-inċens f’tempji jew quddiem artali li jkollhom ġod-djar biex jonoraw lill-allat tagħhom u jieħdu ħsieb il-mejtin. F’servizzi reliġjużi, l-inċens jintuża b’diversi modi biex jitneħħa xi tinġis, ifejjaq, jippurifika, u jipproteġi.
L-inċens dan l-aħħar reġaʼ sar popolari anki fost dawk li ma jappartjenux lil xi reliġjon. Xi wħud jaħarqu l-inċens meta jkunu qed jimmeditaw. Ktieb taʼ gwida jissuġġerixxi li jintuża l-inċens biex jintlaħqu “oqsma misterjużi” u jinkisbu “kwalitajiet speċjali” li jmorru ’l hinn mid-dinja fiżika. Biex jinstabu s-soluzzjonijiet għall-problemi tal-ħajja, dan jirrikkmanda wkoll ritwali li jinvolvu l-ħruq taʼ l-inċens u kuntatt maʼ “esseri sopranaturali.” Huma dawn il-prattiċi għall-Kristjani?
Jehovah jikkundanna għalkollox lil dawk li jipprovaw iħalltu prattiċi reliġjużi foloz mal-qima pura. L-appostlu Pawlu jikkwota l-profezija taʼ Isaija u japplikaha għall-Kristjani, iħeġġiġhom biex jibqgħu ħelsin mill-influwenza maħmuġa tar-reliġjon falza. Hu kiteb: “Oħorġu minn ġo nofshom, u nfirdu minnhom, jgħid il-Mulej; la tmissux l-imniġġes, u jien nilqagħkom.” (2 Korintin 6:17; Isaija 52:11) Il-Kristjani veri jieħdu ħsieb li jevitaw kwalunkwe ħaġa li hija konnessa mal-qima falza jew l-okkult.—Ġwann 4:24.
Ifisser il-fatt li l-inċens jintuża f’ċerimonji reliġjużi u fl-ispiritiżmu li kull tip taʼ ħruq taʼ l-inċens huwa ħażin? Mhux bilfors. Forsi individwu jkun irid jaħraq l-inċens f’daru bħala fwieħa sempliċement biex jieħu pjaċir bir-riħa tfuħ tiegħu. (Proverbji 27:9) Anki jekk dan ikun il-każ, meta jiddeċiedi jekk għandux jaħraq l-inċens, Kristjan għandu jikkunsidra ċerti fatturi. Dawk li jgħixu fejn toqgħod int se jassoċjaw l-użu taʼ l-inċens maʼ prattika reliġjuża falza? L-inċens jiġi spiss assoċjat maʼ ritwali spiritistiċi fil-komunità tiegħek? Jew is-soltu jintuża għal skopijiet mhux reliġjużi?
Jekk individwu jagħżel li jaħraq l-inċens, fid-deċiżjoni tiegħu għandu jikkunsidra kemm il-kuxjenza tiegħu u kemm kif iħossuhom oħrajn. (1 Korintin 10:29) Il-kliem taʼ l-appostlu Pawlu lir-Rumani japplika f’dan il-każ. Hu kiteb: “Ħalli nfittxu, mela, dak li jġib is-sliem u dak li jservi għall-edifikazzjoni taʼ xulxin. Tħallix li bl-ikel tiegħek titħassar l-opra taʼ Alla. Kollox safi, imma jagħmel ħażin il-bniedem li jiekol xi ħaġa li biha jiskandalizza lil ħaddieħor. It-tajjeb hu li la tiekol laħam u lanqas tixrob inbid u ma tagħmel xejn li jistaʼ jfixkel lil ħuk.”—Rumani 14:19-21.
Talb Imħejji “bħal Inċens”
L-offerta taʼ l-inċens fost l-Iżraelin kienet simbolu xieraq tat-talb li jiġi mismugħ minn Alla. B’hekk, is-salmista David kanta lil Jehovah: “Ikun it-talb tiegħi bħal inċens quddiemek.”—Salm 141:2.
L-Iżraelin leali ma qisux l-offerti taʼ l-inċens bħala ritwali bla skop. Huma qagħdu attenti ħafna li jippreparaw u jaħarqu l-inċens bil-mod kif ordnalhom Jehovah. Minflok ma jużaw inċens letterali, il-Kristjani llum joffru talb li jirrifletti apprezzament profond u rispett għal Missierna tas-sema. Bħall-inċens li jfuħ offrut mill-qassisin fit-tempju, il-kelma t’Alla tassigurana: “Il-Mulej . . . jitgħaxxaq bit-talba tat-tajbin.”—Proverbji 15:8.
[Stampi f’paġna 29]
L-inċens li kien jinħaraq fit-tabernaklu u t-tempju kien sagru
[Stampa f’paġna 30]
Huwa xieraq li l-Kristjani jaħarqu l-inċens biex jimmeditaw?