Qiegħed Int Tfittex lil Jehovah bis-​Serjetà?

RAĠEL Kristjan xtaq ħafna jaqsam l-​aħbar tajba mill-​Bibbja m’oħrajn li kienu dejjem jivvjaġġaw bil-​ferrovija miegħu. (Mark 13:10) Madankollu, il-​biżaʼ żammu lura milli jitkellem. Qataʼ qalbu? Le, talab bil-​ħerqa u ħadem fuq li jitgħallem kif jibda konversazzjoni. Alla Jehovah wieġeb it-​talba taʼ dan ir-​raġel u tah is-​saħħa li kellu bżonn biex jagħti xiehda.

Dan it-​tip taʼ ħerqa huwa vitali meta nfittxu lil Jehovah u l-​barka tiegħu. L-​appostlu Pawlu qal: “Għax kull min jersaq lejn Alla jeħtieġlu jemmen li Alla jeżisti u li hu jagħti l-​ħlas xieraq lil dawk li jfittxuh [“bis-​serjetà,” NW].” (Lhud 11:6) M’huwiex biżżejjed li sempliċement infittxu lil Jehovah. Il-​verb Grieg tradott “jfittxuh bis-​serjetà” huwa fil-​forma li timplika intensità u sforz konċentrat. Dan jinvolvi l-​qalb, il-​moħħ, ir-​ruħ, u s-​saħħa kollha taʼ dak li jkun. Jekk aħna qed infittxu lil Jehovah bis-​serjetà, m’aħniex se naġixxu b’mod indifferenti, bla ħeġġa, jew bl-​għażż. Minflok, għandna nfittxuh b’ħeġġa ġenwina.—Atti 15:17.

Uħud li Fittxew lil Jehovah bis-​Serjetà

L-​Iskrittura fiha ħafna eżempji taʼ dawk li għamlu sforzi kbar biex ifittxu lil Jehovah. Wieħed minn dawn l-​individwi kien Ġakobb, li baqaʼ jissara b’ħiltu kollha sakemm sebaħ maʼ l-​anġlu t’Alla li kien immaterjalizzat. B’hekk, Ġakobb ngħata l-​isem Iżrael (Issara m’Alla) għaliex hu ‘ssara,’ jew ippersista, ippersevera, tħabat, m’Alla. L-​anġlu bierku taʼ l-​isforz ħerqan tiegħu.—Ġenesi 32:​25-31, (32:​24-30, NW).

Imbagħad kien hemm il-​mara mill-​Galilija, li isimha mhux magħruf. Din sofriet għal 12-il sena bit-​tnixxija tad-​demm, li kkaġunatilha ‘ħafna tbatija.’ Fil-​kundizzjoni tagħha, ma setgħetx tmiss maʼ persuni oħra. Madankollu, hi rabbiet il-​kuraġġ biex toħroġ tiltaqaʼ maʼ Ġesù. Hi baqgħet tgħid bejnha u bejn ruħha: “Jekk immiss imqar il-​mantar tiegħu nkun imfejjqa.” Immaġina ftit lil dik il-​mara tagħmel sforz kbir biex tgħaddi minn qalb il-​‘kotra kbira miexja wara [Ġesù], kulħadd iross fuqu.’ Malli messet il-​mantar tiegħu, hi ħasset li t-​“tnixxija tad-​demm waqfitilha”​—il-​marda kronika tagħha kienet fieqet! Meta Ġesù staqsiha, “Min missli l-​mantar?” hi bdiet tirtogħod bil-​biżaʼ. Imma Ġesù qalilha bil-​ħlewwa: “Binti . .  il-​fidi tiegħek fejjqitek; mur bis-​sliem, u kun imfejjqa mill-​marda tiegħek.” L-​isforzi tagħha ġew premjati.—Mark 5:​24-34; Levitiku 15:​25-27.

F’okkażjoni oħra, mara Kangħanija talbet bil-​ħerqa lil Ġesù biex ifejqilha lil bintha. Ġesù wieġeb li ma kienx sewwa li tieħu l-​ikel tat-​tfal u tagħtih lil ġriewi. Hu ried ifisser li ma setax jieħu ħsieb dawk li ma kinux Iżraelin u jinjora lil dawk il-​Lhud li jixirqilhom. Il-​mara fehmet il-​punt tat-​tixbiha imma minkejja dan talbitu: ‘Hekk hu, Mulej, iżda l-​ġriewi wkoll jieklu l-​frak li jaqaʼ minn fuq il-​mejda taʼ sidienhom!’ Il-​fidi kbira u s-​sinċerità tagħha qanqlu lil Ġesù biex jgħidilha: “Mara, il-​fidi tiegħek kbira! Ħa jsirlek kif tixtieq.”—Mattew 15:​22-28.

X’kien isir minnhom dawn l-​individwi kieku ma ppersistewx fl-​isforzi tagħhom? Kienu huma se jirċievu l-​barkiet kieku qatgħu qalbhom maʼ l-​ewwel ostaklu li ltaqgħu miegħu, jew meta Ġesù għall-​ewwel irrifjuta li jwettaq dak li riedu? Le! Dawn l-​eżempji juru ċar il-​punt li Ġesù għallem, jiġifieri li l-​persistenza kuraġġuża hija xierqa, saħansitra essenzjali, fit-​tfittxija għal Jehovah.—Luqa 11:​5-13.

Skond ir-​Rieda Tiegħu

Fir-​rakkonti li diġà ssemmew dwar dawk li rċivew fejqan mirakoluż, kienet is-​serjetà l-​unika ħtieġa sabiex jiġu mfejqin? Le, it-​talb tagħhom kellu jkun fi qbil mar-​rieda t’Alla. Ġesù ngħata qawwiet mirakolużi biex jipprovdi evidenza li tispikka li hu kien l-​iben t’Alla, il-​Messija mwiegħed. (Ġwanni 6:14; 9:33; Atti 2:22) Iżjed minn hekk, il-​mirakli li Ġesù wettaq taw stampa bil-​quddiem tal-​barkiet grandjużi għall-​art li Jehovah se jġib fuq l-​umanità waqt is-​Saltna t’elf sena taʼ Kristu.—Apokalissi 21:4; 22:2.

M’għadhiex iktar ir-​rieda t’Alla li dawk li jipprattikaw ir-​reliġjon vera jkollhom qawwiet mirakolużi, bħalma huma l-​abbiltajiet li jfejqu u jitkellmu bl-​ilsna. (1 Korintin 13:​8, 13) Ir-​rieda tiegħu għal żmienna tinkludi li niddikjaraw l-​aħbar tajba tas-​Saltna mad-​dinja kollha sabiex ‘il-​bnedmin kollha jaslu biex jagħrfu l-​verità.’ (1 Timotju 2:4; Mattew 24:14; 28:​19, 20) Il-​qaddejja t’Alla jistgħu bix-​xieraq jistennew li Jehovah jismaʼ u japprova t-​talb ħerqan tagħhom jekk huma jagħmlu sforzi sinċieri fi qbil mar-​rieda tiegħu.

Xi wħud forsi jaħsbu, ‘Għala għandna nitħabtu meta eventwalment l-​iskop t’Alla xorta se jitwettaq?’ Waqt li huwa minnu li Jehovah se jwettaq l-​iskop tiegħu jkunu xi jkunu l-​isforzi tal-​bnedmin, hu jieħu gost li jkun hemm individwi li qed jwettqu r-​rieda tiegħu. Jehovah jistaʼ jitqabbel maʼ raġel li qed jibni dar. Il-​bennej għandu kopja tal-​pjanta sħiħa għall-​proġett, imma hu jagħżel il-​materjali għall-​bini minn dawk disponibbli lokalment. Bl-​istess mod, Jehovah għandu proġett li jrid iwettqu llum u hu ferħan li juża lill-​qaddejja tiegħu, li joffru lilhom infushom minn rajhom.—Salm 110:​3, KŻ; 1 Korintin 9:​16, 17.

Ikkunsidra l-​esperjenza taż-​żagħżugħ Toshio. Meta daħal l-​iskola sekondarja, hu xtaq jagħti xiehda lil kulmin setaʼ fit-​territorju uniku tiegħu. Dejjem kien ikollu l-​Bibbja għal-​lest u għamel sforz kuxjenzjuż biex ikun Kristjan eżemplari. Lejn tmiem l-​ewwel sena skolastika tiegħu, ġietu opportunità biex jagħti taħdita fil-​klassi. Toshio talab lil Jehovah għall-​għajnuna u feraħ mhux ftit meta ra t-​tfal tal-​klassi kollha attenti ferm għat-​taħdita tiegħu intitolata “Il-​Mira li Nagħmel ix-​Xogħol taʼ Pijunier il-​Karriera Tiegħi.” Hu spjega li xtaq ikun ministru full-time tax-​Xhieda taʼ Jehovah. Wieħed mill-​istudenti aċċetta li jistudja l-​Bibbja miegħu u wasal għall-​magħmudija. L-​isforzi serji taʼ Toshio fi qbil mat-​talb tiegħu ġew premjati bil-​kbir.

Int Kemm Qed Tiħodha bis-​Serjetà?

Int tistaʼ turi b’diversi modi li qed tfittex lil Jehovah u l-​barkiet tiegħu bis-​serjetà. L-​ewwel, hemm xi affarijiet bażiċi li tistaʼ tagħmel, per eżempju li tipprepara tajjeb għal-​laqgħat. Permezz taʼ kummenti preparati sew, taħditiet li jimmotivaw lil oħrajn, u turijiet effettivi, int turi l-​intensità li biha qed tfittex lil Jehovah. Tistaʼ wkoll turi kemm qed tieħu kollox bis-​serjetà billi ttejjeb il-​kwalità tal-​ministeru tiegħek. Għala ma tipprovax tkun iktar dħuli meta titkellem maʼ l-​inkwilin u tuża introduzzjonijiet effettivi li huma addattati għat-​territorju tiegħek? (Kolossin 3:23) Kristjan li jistinka b’qalbu kollha għandu mnejn ikun jistaʼ jaċċetta inkarigi fil-​kongregazzjoni, forsi biex jaqdi bħala qaddej ministerjali jew anzjan. (1 Timotju 3:​1, 2, 12, 13) Jekk tagħmel lilek innifsek disponibbli, int tistaʼ tgawdi l-​ferħ li jiġi meta wieħed jagħti. Forsi tistaʼ tapplika biex taqdi f’xi proġett taʼ kostruzzjoni taʼ xi fergħa jew f’uffiċċju tal-​fergħa tax-​Xhieda taʼ Jehovah. Jekk int ħu kwalifikat u m’intix miżżewweġ, forsi tixtieq tattendi l-​Iskola tat-​Taħriġ Ministerjali, li tħarreġ lil irġiel spiritwali biex ikunu rgħajja tajbin. Jekk int miżżewweġ, forsi s-​servizz missjunarju jistaʼ jkun mod tajjeb kif turi x-​xewqa sinċiera tiegħek li taqdi lil Jehovah iktar. Possibbiltà oħra tistaʼ tkun li tmur tgħix fejn hemm bżonn taʼ iktar proklamaturi tas-​Saltna.—1 Korintin 16:9.

L-iktar ħaġa importanti hi l-​ispirtu li bih int twettaq l-​inkarigu tiegħek. Tkun xi tkun ir-​responsabbiltà li tingħata, stinka bis-​serjetà, b’mod vigoruż, u b’‘qalb safja.’ (Atti 2:46; Rumani 12:8) Tagħmel tajjeb jekk tqis kull inkarigu bħala opportunità biex turi kemm int ħerqan li ġġib tifħir lil Jehovah. Itlob kontinwament għall-​għajnuna taʼ Jehovah u agħmel l-​aħjar li tistaʼ. Imbagħad int se tirċievi premju kbir.

Sforzi Sinċieri Jiġu Premjati

Tiftakar ir-​raġel Kristjan li talab biex jegħleb il-​biżaʼ tiegħu sabiex ikun jistaʼ jippriedka lil dawk li dejjem kienu jivvjaġġaw bil-​ferrovija miegħu? Jehovah bierek ix-​xewqa sinċiera tiegħu. Il-​ħu ħadem fuq li jkun iktar dħuli meta javviċina lin-​nies, billi jipprepara suġġetti differenti fuqiex jibda l-​konversazzjonijiet. Hu setaʼ juża l-​Bibbja b’mod effettiv biex jagħti xiehda lil wieħed raġel li kien konċernat dwar ir-​relazzjonijiet stressanti taʼ bejn il-​bnedmin. Wara diversi żjajjar lura fuq il-​ferrovija hu beda studju tal-​Bibbja fid-​dar. Jehovah tassew bierku taʼ l-​isforzi sinċieri tiegħu!

Int jistaʼ jkollok riżultati simili jekk tkompli tfittex lil Jehovah bis-​serjetà. Jekk tippersevera bl-​umiltà u tagħmel l-​attività teokratika li int involut fiha b’qalbek kollha, Jehovah se jużak fi qbil maʼ l-​iskopijiet tiegħu u jferraʼ barkiet kbar fuqek.

[Stampa f’paġna 26]

X’kien isir minn din il-​mara kieku hi ma baqgħetx tippersisti?

[Stampa f’paġna 27]

Int tippersisti meta titlob lil Jehovah għall-​barka tiegħu?

[Stampi f’paġna 28]

Kif tistaʼ turi li int qed tfittex lil Jehovah bis-​serjetà?