Uħud Imdaħħlin fiż-​Żmien—Membri Prezzjużi tal-​Fratellanza Kristjana Tagħna

“[Dawk] imħawwlin f’dar il-​Mulej, iħaddru . . . Sa fi xjuħithom il-​frott jagħmlu.”—SALM 92:14, 15 (92:13, 14, NW).

1. Ħafna nies kif iqisuhom lill-​uħud imdaħħlin fiż-​żmien?

JEHOVAH iħobb lill-​qaddejja leali kollha tiegħu, inkluż dawk imdaħħlin fiż-​żmien. Madankollu, skond kalkolu nazzjonali li sar, kull sena kważi nofs miljun persuna anzjana fl-​Istati Uniti jsofru minn xi forma t’abbuż jew nuqqas t’attenzjoni. Rapporti simili minn madwar id-​dinja jindikaw li l-​abbuż tan-​nies anzjani huwa problema globali. Organizzazzjoni waħda tirreferi għall-​kaġun bażiku taʼ din il-​problema bħala “l-​attitudni komuni li għandhom ħafna nies . . . li persuni avanzati fl-​età m’għadhomx utli, m’humiex produttivi u jiddependu żżejjed minn ħaddieħor.”

2. (a) Jehovah kif iqishom lill-​qaddejja leali tiegħu mdaħħlin fiż-​żmien? (b) Liema deskrizzjoni li tqawwilna qalbna nsibu f’Salm 92:13-16?

² Alla Jehovah jgħożż lill-​qaddejja leali tiegħu li huma mdaħħlin fiż-​żmien. Hu jiffoka fuq “il-​bniedem taʼ ġewwa”—il-​qagħda spiritwali tagħna—u mhux fuq il-​limitazzjonijiet fiżiċi tagħna. (2 Korintin 4:16) Fil-​Kelma tiegħu, il-​Bibbja, insibu din l-​assiguranza li tqawwilna qalbna: “Il-​bniedem ġust bħall-​palma jħaddar, bħal ċedru tal-​Libanu jikber. Mħawwlin f’dar il-​Mulej, iħaddru fil-​btieħi tat-​tempju taʼ Alla tagħna. Sa fi xjuħithom il-​frott jagħmlu, kollha ħajja u ħdura, biex ixandru li ġust hu l-​Mulej.” (Salm 92:13-16 [92:12-15, NW]) Meta nikkunsidraw dawn il-​versi naraw kemm uħud imdaħħlin fiż-​żmien jistgħu jagħtu kontribut imprezzabbli għall-​fratellanza Kristjana.

‘Jagħmlu l-​Frott sa fi Xjuħithom’

3. (a) L-​uħud ġusti għala huma mxebbhin maʼ siġar tal-​palm? (b) Uħud avanzati fl-​età kif jistgħu ‘jagħmlu l-​frott sa fi xjuħithom’?

³ Is-​salmista jxebbah lin-​nies ġusti maʼ siġar tal-​palm ‘imħawlin fil-​btieħi tat-​tempju taʼ Alla tagħna.’ Huma jibqgħu ‘jagħmlu l-​frott sa fi xjuħithom.’ Ma taqbilx li dan hu ħsieb inkuraġġanti? Is-​siġar grazzjużi u dritti tal-​palm kienu dehra komuni fil-​btieħi taʼ pajjiżi Bibliċi. Minbarra li s-​siġar tal-​palm isebbħu l-​ambjent, kienu wkoll imprezzabbli minħabba li jipproduċu frott bl-​abbundanza, u xi siġar minnhom ikomplu jagħmlu dan għal iktar minn mitt sena.a Jekk tibqaʼ mħawwel fis-​sod fil-​qima vera, int ukoll tistaʼ tibqaʼ tagħmel “frott taʼ kull opra tajba.”—Kolossin 1:10.

4, 5. (a) Il-​Kristjani liema frott importanti jeħtieġ li jipproduċu? (b) Agħti eżempji Skritturali taʼ wħud imdaħħlin fiż-​żmien li pproduċew ‘il-​frott tax-​xofftejn.’

⁴ Jehovah jistenna li l-​Kristjani jipproduċu ‘l-​frott tax-​xofftejn’—kliem taʼ tifħir dwaru u dwar l-​iskopijiet tiegħu. (Lhud 13:15, Saydon) Japplika dan għalik bħala individwu mdaħħal fiż-​żmien? Dażgur li japplika.

⁵ Il-​Bibbja fiha eżempji taʼ wħud imdaħħlin fiż-​żmien li taw xiehda bla biżaʼ dwar l-​isem u l-​iskopijiet taʼ Jehovah. Mosè kien diġà qabeż is-​“sebgħin sena” meta Jehovah inkarigah bħala l-​profeta u r-​rappreżentant tiegħu. (Salm 90:10; Eżodu 4:10-17) L-​età avanzata ma waqqfitx lill-​profeta Danjel milli jagħti xiehda bla biżaʼ dwar is-​sovranità taʼ Jehovah. X’aktarx li Danjel kien qabeż sew id-​90 sena meta Beltassar bagħat għalih biex jinterpreta l-​kitba misterjuża fuq il-​ħajt. (Danjel, kapitlu 5) U xi ngħidu għall-​appostlu xwejjaħ Ġwanni? Lejn it-​tmiem tal-​karriera twila tiegħu, hu sab ruħu priġunier fuq il-​gżira taʼ Patmos “minħabba l-​kelma taʼ Alla u x-​xhieda taʼ Ġesù.” (Apokalissi 1:9) X’aktarx li int tistaʼ tiftakar f’ħafna karattri Bibliċi oħrajn li pproduċew ‘il-​frott tax-​xofftejn’ meta kienu kibru fl-​età.—1 Samwel 8:1, 10; 12:2; 1 Slaten 14:4, 5; Luqa 1:7, 67-79; 2:22-32.

6. Jehovah kif uża “x-​xjuħ” biex jipprofetizzaw f’dawn l-​aħħar jiem?

⁶ Filwaqt li kkwota lil Ġoel, il-​profeta Ebrew, l-​appostlu Pietru ddikjara: “‘Jiġri fl-​aħħar jiem,’ jgħid Alla, ‘li jiena nsawwab mill-​Ispirtu tiegħi fuq kull bniedem [inkluż “ix-​xjuħ”], . . . u jħabbru.’” (Atti 2:17, 18; Ġoel 3:1 [2:28, NW]) Fi qbil maʼ dan, f’dawn l-​aħħar jiem, Jehovah uża membri mdaħħlin fiż-​żmien mill-​klassi tal-​midlukin u tan-​“nagħaġ oħra” biex jiddikjaraw l-​iskopijiet tiegħu. (Ġwanni 10:16) Xi wħud minn dawn ilhom għexur taʼ snin jipproduċu lealment il-​frott tas-​Saltna.

7. Uri kif uħud imdaħħlin fiż-​żmien ikomplu jipproduċu frott tas-​Saltna minkejja limitazzjonijiet fiżiċi.

⁷ Ejja nieħdu lil Sonia, li saret pubblikatriċi full-time tas-​Saltna fl-​1941. Minkejja ġlieda kontinwa minħabba marda kronika, hi kienet tikkonduċi regolarment studji tal-​Bibbja f’darha. “L-​ippridkar taʼ l-​aħbar tajba huwa parti minn ħajti,” spjegat Sonia. “Fil-​fatt, dan sar ħajti. Ma rridx nirtira.” Ftit taż-​żmien ilu, Sonia u Olive, oħtha, qasmu l-​messaġġ taʼ tama mill-​Bibbja maʼ Janet, pazjenta b’marda fatali li ltaqgħu magħha fil-​kju taʼ l-​isptar. Omm Janet, Kattolika devota, tant baqgħet impressjonata bl-​interess li wrew f’bintha illi aċċettat l-​offerta taʼ studju tal-​Bibbja fid-​dar u issa qed tagħmel progress ġmielu. Tistaʼ int taħtaf opportunitajiet simili biex tipproduċi l-​frott tas-​Saltna?

8. Ix-​xwejjaħ Kaleb kif wera l-​fiduċja tiegħu f’Jehovah, u l-​Kristjani mdaħħlin fiż-​żmien kif jistgħu jimitaw l-​eżempju tiegħu?

⁸ Billi jkomplu jippersistu bil-​kuraġġ fix-​xogħol taʼ l-​ippridkar tas-​Saltna minkejja l-​limitazzjonijiet li jiġu bix-​xjuħija, Kristjani mdaħħlin fiż-​żmien qed jimxu fuq leżempju taʼ Kaleb, Iżraeli leali li akkumpanja lil Mosè fid-​deżert għal erbgħin sena. Kaleb kellu 79 sena meta qasam ix-​Xmara Ġordan għal ġo l-​Art Imwiegħda. Wara li kien ilu sitt snin jaqdi bħala suldat fl-​armata rebbieħa taʼ Iżrael, hu setaʼ kkuntenta b’li kien għamel u rtira. Imma le, hu talab li jingħata l-​inkarigu diffiċli taʼ li jmur jirbaħ il-​“bliet kbar u mdawwra bis-​swar” fir-​reġjun muntanjuż tal-​Lhudija, post abitat mill-​Għanakin, irġiel taʼ daqs mhux tas-​soltu. Bl-​għajnuna taʼ Jehovah, Kaleb irnexxielu ‘jkeċċihom bħalma wiegħdu l-​Mulej.’ (Ġożwè 14:9-14; 15:13, 14) Ibqaʼ ċert li Jehovah ikun miegħek, l-​istess bħalma kien maʼ Kaleb, hekk kif tkompli tipproduċi l-​frott tas-​Saltna fi xjuħitek. U jekk tibqaʼ leali, hu se jħallik tidħol fid-​dinja l-​ġdida li wegħedna.—Isaija 40:29-31; 2 Pietru 3:13.

Se Jibqgħu “Kollhom Ħajja u Ħdura”

9, 10. Il-​Kristjani mdaħħlin fiż-​żmien kif jibqgħu jissaħħu fil-​fidi u jżommu l-​ħeġġa spiritwali tagħhom? (Ara l-​kaxxa f’paġna 13.)

⁹ Meta semma l-​frott li huma kapaċi jipproduċu l-​qaddejja xjuħ taʼ Jehovah, is-​salmista kanta: “Il-​bniedem ġust bħall-​palma jħaddar, bħal ċedru tal-​Libanu jikber. Sa fi xjuħithom il-​frott jagħmlu, kollha ħajja u ħdura.”—Salm 92:13, 15 (92:12, 14, NW).

¹⁰ Kif tistaʼ tibqaʼ mimli ħeġġa spiritwali minkejja l-​età avanzata? Is-​sigriet tas-​sbuħija dejjiema tas-​siġra tal-​palm huwa l-​ilma ġieri li ma jaqtaʼ qatt. Bl-​istess mod, int tistaʼ ssostni lilek innifsek bl-​ilmijiet tal-​verità Biblika billi tistudja l-​Kelma t’Alla u tassoċja maʼ l-​organizzazzjoni tiegħu. (Salm 1:1-3; Ġeremija 17:7, 8) Is-​saħħa spiritwali tiegħek tagħmlek utli u prezzjuż għal sħabek fit-​twemmin. Ikkunsidra kif dan kien minnu fil-​każ tal-​Qassis il-​Kbir xwejjaħ Ġeħojada.

11, 12. (a) Ġeħojada liema rwol vitali kellu fl-​istorja tas-​saltna taʼ Ġuda? (b) Ġeħojada kif uża l-​influwenza tiegħu biex jappoġġa l-​qima vera?

¹¹ Ġeħojada x’aktarx li kellu iktar minn mitt sena meta r-​Reġina ambizzjuża Għatalija ħadet il-​kontroll taʼ Ġuda billi qatlet lin-​neputijiet tagħha stess. X’setaʼ jagħmel ix-​xwejjaħ Ġeħojada? Għal sitt snin hu u martu ħbew fit-​tempju lil Ġowas, l-​uniku eredi rjali li kien baqaʼ ħaj. Imbagħad, b’mod drammatiku, Ġeħojada pproklama sultan lil Ġowas li kellu sebaʼ snin u ordna l-​qtil taʼ Għatalija.—2 Kronaki 22:10-12; 23:1-3, 15, 21.

¹² Bħala l-​kustodju tas-​sultan, Ġeħojada uża l-​influwenza tiegħu biex jappoġġa l-​qima vera. Hu għamel “patt bejnu u bejn il-​poplu kollu, u bejn is-​sultan, li jkunu l-​poplu tal-​Mulej.” Maʼ l-​ordni taʼ Ġeħojada, in-​nies ġarrfu t-​tempju taʼ l-​alla falz Bagħal u neħħew l-​artali, ix-​xbihat, u l-​qassis tiegħu. Kien ukoll taħt il-​gwida taʼ Ġeħojada li Ġowas irrestawra l-​qadi fit-​tempju u wettaq xogħol taʼ tiswija tant meħtieġ fuq it-​tempju. “[Ġowas] għamel is-​sewwa f’għajnejn il-​Mulej iż-​żmien kollu li kien imexxih Ġeħojada, il-​qassis.” (2 Kronaki 23:11, 16-19; 24:11-14; 2Slaten 12:3 [12:2, NW]) Meta miet fl-​età taʼ 130 sena, Ġeħojada ngħata l-​unur speċjali ħafna li jindifen mas-​slaten għax hu kien “għamel is-​sewwa f’Iżrael maʼ Alla u t-​tempju tiegħu.”—2 Kronaki 24:15, 16.

13. Il-​Kristjani mdaħħlin fiż-​żmien kif jistgħu ‘jagħmlu s-​sewwa maʼ Alla u t-​tempju tiegħu’?

¹³ Jistaʼ jkun li s-​saħħa batuta jew ċirkustanzi oħrajn jillimitawk f’dak li tistaʼ tagħmel biex tappoġġa l-​qima vera. Anki jekk dan hu minnu, xorta tistaʼ ‘tagħmel is-​sewwa maʼ Alla u t-​tempju tiegħu.’ Tistaʼ turi ż-​żelu għat-​tempju spiritwali taʼ Jehovah billi tattendi u tipparteċipa fil-​laqgħat tal-​kongregazzjoni u billi tieħu sehem fil-​ministeru taʼ l-​għalqa kulmeta tistaʼ. Int tistaʼ ssaħħaħ il-​fratellanza Kristjana billi taċċetta minn qalbek il-​pariri tal-​Bibbja u tappoġġa lealment lill-​“ilsir leali u diskret.” (Mattew 24:45-47, NW) Tistaʼ wkoll tħajjar lil sħabek fit-​twemmin “għall-​imħabba u għall-​għemil tajjeb.” (Lhud 10:24, 25; Filemon 8, 9) U int se tkun barka għal ħaddieħor jekk taġixxi fi qbil mal-​parir taʼ l-​appostlu Pawlu: “Li x-​xjuħ ikunu rżina, għaqlin, serji, meqjusa, sħaħ [“vigorużi,” An American Translation] fil-​fidi, fl-​imħabba u fis-​sabar. L-​istess in-​nisa xjuħ: għandhom iġibu ruħhom kif jixraq lil nisa qaddisa; ma jqassux fuq ħaddieħor, anqas ikunu lsiera taʼ l-​inbid; għandhom jgħallmu t-​tajjeb.”—Titu 2:2-4.

14. X’jistgħu jagħmlu l-​Kristjani li ilhom ħafna żmien jaqdu bħala indokraturi biex jappoġġaw il-​qima vera?

¹⁴ Ilek taqdi bħala anzjan fil-​kongregazzjoni għal bosta snin? “Uża mingħajr egoiżmu l-​għerf li ksibt matul is-​snin,” huwa l-​parir taʼ wieħed li ilu ħafna żmien jaqdi bħala anzjan fil-​kongregazzjoni. “Iddelega r-​responsabbiltà, u aqsam l-​esperjenza tiegħek m’oħrajn li jixtiequ jitgħallmu . . . Ara x’potenzjal għandu ħaddieħor. Żviluppah u ikkultivah. Ħejji għall-​futur.” (Dewteronomju 3:27, 28) L-​interess ġenwin tiegħek fix-​xogħol tas-​Saltna li dejjem jikber se jirriżulta f’ħafna barkiet għal oħrajn ġewwa l-​fratellanza Kristjana tagħna.

‘Xandar li Jehovah Hu Ġust’

15. Il-​Kristjani mdaħħlin fiż-​żmien kif ‘ixandru li Jehovah hu ġust’?

¹⁵ Il-​qaddejja t’Alla mdaħħlin fiż-​żmien iwettqu bil-​ferħ ir-​responsabbiltà tagħhom li ‘jxandru li Jehovah hu ġust.’ Jekk int Kristjan imdaħħal fiż-​żmien, il-​kliem u l-​aġir tiegħek jistgħu juru lil ħaddieħor li Jehovah ‘hu l-​blata tiegħek, u ebda qerq ma jinsab fih.’ (Salm 92:16 [92:15, NW]) Is-​siġra tal-​palm tagħti xiehda siekta dwar il-​kwalitajiet supremi tal-​Ħallieq tagħha. Imma Jehovah tak il-​privileġġ li tagħti xiehda dwaru lil dawk li issa qed iħaddnu l-​qima vera. (Dewteronomju 32:7; Salm 71:17, 18; Ġoel 1:2, 3) Dan għala huwa importanti?

16. Liema eżempju Bibliku juri l-​importanza taʼ li ‘nxandru li Jehovah hu ġust’?

¹⁶ Meta l-​mexxej Iżraeli Ġożwè kien “xiħ u mdaħħal fiż-​żmien,” hu “sejjaħ lil Iżrael kollu, lix-​xjuħ tiegħu, u ’l-kapijiet u lill-​imħallfin u ’l-uffiċjali tiegħu,” u fakkarhom fl-​atti ġusti t’Alla. Hu qal: “Ebda waħda mill-​wegħdiet taʼ ġid li għamlilkom il-​Mulej, Alla tagħkom, ma naqset. Kollha seħħulkom.” (Ġożwè 23:1, 2, 14) Għal xi żmien, dan il-​kliem saħħaħ ir-​rieda tan-​nies biex jibqgħu leali. Madankollu, wara l-​mewt taʼ Ġożwè, “telgħet ġenerazzjoni oħra . . . li ma kinitx taf il-​Mulej u anqas x’għamel il-​Mulej għal Iżrael. U wlied Iżrael għamlu l-​ħażin f’għajnejn il-​Mulej u servew l-​allat Bagħalim.”—Mħallfin 2:8-11.

17. Jehovah kif mexa mal-​poplu tiegħu fi żmienna?

¹⁷ L-​integrità tal-​kongregazzjoni Kristjana fi żmienna ma tiddependix fuq ix-​xiehda bil-​fomm tal-​qaddejja t’Alla mdaħħlin fiż-​żmien. Madankollu, il-​fidi tagħna f’Jehovah u fil-​wegħdi tiegħu tissaħħaħ meta nisimgħu b’widnejna rakkonti taʼ l-​“opri kbar” li hu għamel għall-​poplu tiegħu f’dawn l-​aħħar jiem. (Mħallfin 2:7; 2 Pietru 1:16-19) Jekk ilek tassoċja maʼ l-​organizzazzjoni taʼ Jehovah għal ħafna snin, x’aktarx li tiftakar iż-​żmien meta kien hemm ftit proklamaturi tas-​Saltna fil-​pajjiż tiegħek jew meta kien hemm ħafna oppożizzjoni ħarxa kontra x-​xogħol taʼ l-​ippridkar. Maż-​żmien, rajt lil Jehovah ineħħi ċerti ostakli u jkabbar l-​għadd taʼ pubblikaturi tas-​Saltna. (Isaija 54:17; 60:22) Innotajt kif ġew iċċarati veritajiet Bibliċi u rajt b’għajnejk kif l-​organizzazzjoni t’Alla fuq l-​art kompliet tirfina b’mod progressiv. (Proverbji 4:18; Isaija 60:17) Tipprova int tibni lil oħrajn billi taqsam magħhom l-​esperjenza tiegħek dwar l-​atti ġusti taʼ Jehovah? X’effett pożittiv u qawwi jistaʼ jkollu dan fuq il-​fratellanza Kristjana!

18. (a) Spjega x’effett fit-​tul ikun hemm meta ‘nxandru li Jehovah hu ġust.’ (b) Int kif esperjenzajt personalment il-​ġustizzja taʼ Jehovah?

¹⁸ Xi ngħidu dwar kemm-il darba Jehovah ħa ħsiebek bl-​imħabba u pprovdielek gwida fil-​ħajja persunali tiegħek? (Salm 37:25; Mattew 6:33; 1 Pietru 5:7) Oħt anzjana jisimha Martha kienet tinkuraġġixxi lil oħrajn billi tgħidilhom: “Jiġri x’jiġri, tabbandunah qatt lil Jehovah. Hu jieħu ħsiebek.” Dan il-​parir kellu effett profond fuq Tolmina, waħda mill-​istudenti tal-​Bibbja li kellha Martha u li tgħammdet fil-​bidu tas-​snin 60. “Meta miet żewġi,” tiftakar Tolmina, “ħassejtni skuraġġita ħafna, imma dak il-​kliem għamilni determinata biex ma nitlifx laqgħa waħda. U Jehovah verament saħħaħni biex nibqaʼ għaddejja.” Matul is-​snin, Tolmina tat dan l-​istess parir lil ħafna mill-​istudenti tagħha tal-​Bibbja. Tabilħaqq, billi toffri inkuraġġiment u titkellem dwar l-​atti ġusti taʼ Jehovah, int tistaʼ tagħmel ħafna biex tibni l-​fidi taʼ sħabek fit-​twemmin.

Jehovah Jgħożż lil Uħud Leali Mdaħħlin fiż-​Żmien

19, 20. (a) Jehovah kif iħares lejn l-​attivitajiet tal-​qaddejja tiegħu mdaħħlin fiż-​żmien? (b) X’se nikkunsidraw fl-​artiklu li jmiss?

¹⁹ Id-​dinja taʼ llum, mimlija b’nuqqas taʼ gratitudni, ftit għandha żmien għan-​nies anzjani. (2 Timotju 3:1, 2) Meta n-​nies jiftakru fix-​xjuħ, ġeneralment isemmu xi rnexxielhom jagħmlu fl-​antik—x’kienu qabel, u mhux x’inhuma issa. B’kuntrast, il-​Bibbja tgħid: “Għax Alla m’hux se jkun hekk inġust li jinsa dak li intom għamiltu u l-​imħabba li wrejtu lejn ismu meta qdejtu u għadkom taqdu lill-​qaddisin.” (Lhud 6:10) M’għandniex xi ngħidu, Alla Jehovah jiftakar fix-​xogħol leali tiegħek tal-​passat. Imma hu jqisek prezzjuż ukoll għal dak li qed tkompli tagħmel fis-​servizz tiegħu. Iva, hu jqis lil uħud leali mdaħħlin fiż-​żmien bħala Kristjani produttivi, vigorużi, u f’saħħithom spiritwalment—xiehda ħajja tal-​qawwa tiegħu.—Filippin 4:13.

²⁰ Tħares int lejn il-​membri mdaħħlin fiż-​żmien tal-​fratellanza Kristjana tagħna bħalma jħares lejhom Jehovah? Jekk iva, se titqanqal biex turihom kemm tħobbhom. (1 Ġwanni 3:18) L-​artiklu li jmiss se jikkunsidra xi modi prattiċi kif nistgħu nuru din l-​imħabba billi nieħdu ħsieb il-​bżonnijiet tagħhom.

[Nota taʼ taħt]

X’Inhuma t-​Tweġibiet Tiegħek?

• L-​uħud imdaħħlin fiż-​żmien kif ‘jagħmlu l-​frott’?

• Il-​vitalità spiritwali tal-​Kristjani mdaħħlin fiż-​żmien għala hija kontribut prezzjuż?

• L-​uħud imdaħħlin fiż-​żmien kif jistgħu ‘jxandru li Jehovah hu ġust’?

• Jehovah għala jgħożż lill-​qaddejja tiegħu li ilhom jaqduh għal ħafna żmien?

[Kaxxa f’paġna 13]

Kif Baqgħu Jżommu Sħaħ fil-​Fidi

X’għen lil uħud li ilhom Kristjani għal ħafna żmien biex jibqgħu jżommu sħaħ fil-​fidi u mimlijin ħeġġa spiritwali? Ara x’qalu xi wħud minnhom:

“Huwa importanti ħafna li naqraw skritturi li jiffokaw fuq ir-​relazzjoni tagħna maʼ Jehovah. Ħafna drabi, fil-​għaxija noqgħod naqra Salm 23 u 91.”—Olive, mgħammda fl-​1930.

“Jien nagħmel ċert li nkun preżenti għal kull taħdita tal-​magħmudija u nagħti widen sew, daqslikieku kienet il-​magħmudija tiegħi. Il-​fatt li nżomm id-​dedikazzjoni friska f’moħħi kien pass importanti biex nibqaʼ leali.”—Harry, mgħammed fl-​1946.

“It-​talb kuljum huwa vitali—li dejjem nitolbu għall-​għajnuna, il-​protezzjoni, u l-​barka taʼ Jehovah, u ‘naħsbu fih f’kulma nagħmlu.’” (Proverbji 3:5, 6)-Antônio, mgħammed fl-​1951.

“Meta nismaʼ esperjenzi taʼ wħud li għadhom jaqdu lealment lil Jehovah wara daqstant snin, insaħħaħ id-​determinazzjoni tiegħi biex nibqaʼ leali lejh.”—Joan, mgħammda fl-​1954.

“Huwa importanti li ma nitkabbrux iżżejjed. Kulma għandna huwa grazzi għall-​qalb tajba mhix mistħoqqa t’Alla. B’dan f’moħħna, inkunu nistgħu nħarsu fid-​direzzjoni t-​tajba għall-​ikel spiritwali meħtieġ biex nissaportu sa l-​aħħar.”—Arlene, mgħammda fl-​1954.

[Stampa f’paġna 11]

L-​uħud imdaħħlin fiż-​żmien jipproduċu frott tas-​Saltna imprezzabbli

[Stampa f’paġna 14]

Is-​saħħa spiritwali tan-​nies anzjani hija kontribut prezzjuż