Mistoqsijiet mill-​Qarrejja

Kif setaʼ Sansun imiss l-​iġsma mejtin li jkun qatel u jibqaʼ Nażir?

F’Iżrael tal-​qedem, individwu setaʼ minn jeddu jagħmel wegħda u jsir Nażir għal ċertu perijodu taʼ żmien.a Waħda mir-​restrizzjonijiet li kienet tinżamm fuq xi ħadd li jagħmel il-​wegħda kienet titlob: “Ma jersaq lejn ebda mejjet, sakemm ikun ikkonsagrat lill-​Mulej. Ma jitniġġisx la f’mewt missieru, la f’mewt ommu, la f’mewt ħuh jew oħtu.” Iżda xi ngħidu “jekk xi ħadd jaqaʼ mejjet ħdejh, u jmiss miegħu”? Il-​fatt li jmiss maʼ xi ħadd mejjet b’mod aċċidentali kien se jniġġes is-​servizz tiegħu taʼ Nażir. Għalhekk, intqal: “Iż-​żmien taʼ qabel ma jgħoddx.” Kien se jkollu jgħaddi minn ċerimonja taʼ purifikazzjoni u jerġaʼ jibda ż-​żmien tan-​Nażir.—Numri 6:​6-12.

Però, Sansun kien Nażir f’sens differenti. Qabel ma twieled Sansun, l-​anġlu taʼ Ġeħova qal lil ommu: “Ara, int se titqal u tiled iben, u l-​mus ma jgħaddix minn fuq rasu, għax it-​tifel ikun nażir ikkonsagrat lil Alla sa minn ġuf ommu, u hu jibda jeħles lil Iżrael minn id il-​Filistin.” (Mħallfin 13:5) Sansun ma għamel ebda wegħda biex ikun Nażir. Hu kien Nażir maħtur minn Alla, u kellu jibqaʼ hekk tul ħajtu kollha. Ir-​restrizzjoni biex ma jmissx ġisem mejjet ma setgħetx tapplika f’dan il-​każ. Jekk kienet tapplika u aċċidentalment imiss ġisem mejjet, kif setaʼ jerġaʼ jibda mill-​bidu s-​servizz taʼ Nażir li kien ilu tul ħajtu kollha u li beda mit-​twelid tiegħu? Mela jidher ċar li l-​ħtiġijiet għal Nażir li jaqdi tul ħajtu kollha kienu differenti f’ċerti modi minn dawk taʼ min jaqdi bħala Nażir volontarju.

Ikkunsidra l-​kmandamenti taʼ Ġeħova għat-​tliet Nażirin mit-​twelid li jissemmew fil-​Bibbja—Sansun, Samwel, u Ġwanni l-​Battista. Kif innotajna qabel, kien meħtieġ minn Sansun li hu ma jaqtax xagħru. Dwar binha—Samwel—li kien għadu jrid jitnissel, Anna għamlet il-​wegħda: “[Nagħtih] lill-​Mulej il-​jiem kollha taʼ ħajtu, u minn fuq rasu ma jgħaddix il-​mus.” (1 Samwel 1:11) Fil-​każ taʼ Ġwanni l-​Għammied, l-​anġlu taʼ Ġeħova qal: “M’għandu jixrob ebda nbid u xorb qawwi.” (Luqa 1:15) Iktar minn hekk, “Ġwanni kellu lbiesu mix-​xagħar tal-​ġemel u ħżiem tal-​ġild madwar ġenbejh; u kien jiekol ġradijiet u għasel salvaġġ.” (Mattew 3:4) L-​ebda wieħed minn dawn it-​tliet individwi ma ġie kmandat biex ma jersaqx lejn ġisem mejjet.

Għalkemm kien Nażir, Sansun kien fost l-​imħallfin li Ġeħova ħatar biex jeħles lill-​Iżraelin minn id dawk li riedu jaħtfuhom. (Mħallfin 2:16) U meta kien qed iwettaq l-​inkarigu tiegħu, hu ġie f’kuntatt maʼ l-​iġsma mejtin. Darba minnhom, Sansun qatel 30 Filisti u neżżagħhom. Iktar tard, hu mar iħarbat l-​għedewwa, “tahom xebgħa saqajn fuq wirkhom u għamel ħerba minnhom.” Hu ħa wkoll xedaq tari taʼ ħmar u qatel elf raġel bih. (Mħallfin 14:19; 15:​8, 15) Sansun għamel dan kollu bil-​favur u l-​appoġġ taʼ Ġeħova. L-​Iskrittura tirreferi għalih bħala raġel taʼ fidi eżemplari.—Ebrej 11:32; 12:1.

L-​istqarrija li Sansun tertaq iljun “bħalma wieħed itertaq gidi,” tissuġġerixxi li t-​tertiq tal-​gidjien kien prattika komuni fi żmienu?

M’hemm ebda evidenza li fi żmien l-Imħallfin taʼ Iżrael kienet xi ħaġa komuni għan-​nies li jtertqu l-​gidjien. Imħallfin 14:6 jgħid: “L-​ispirtu tal-​Mulej ħakem lil Sansun u dan tertqu [lill-ferħ taʼ ljun] bħalma wieħed itertaq gidi; ma kellu xejn f’idu.” Dan il-​kumment probabbilment hu tixbiha.

Il-kelma ‘jtertaq’ jistaʼ jkollha żewġ tifsiriet. Sansun setaʼ jew itertaq ix-​xedaq taʼ l-​iljun jew inkella jtertqu biċċiet b’xi mod jew ieħor. Jekk l-​ewwel każ huwa minnu, huwa possibbli li bniedem jagħmel l-​istess ħaġa lil gidi. F’dan il-​każ, il-​parallel juri li għal Sansun li jegħleb iljun kien faċli daqslikieku l-​iljun kien sempliċi gidi. Madankollu, xi ngħidu jekk Sansun qatel l-​iljun billi tertqu biċċiet? Dan il-​kumment ma jistaʼ jittieħed bħala xejn iktar minn tixbiha. Il-​punt tat-​tixbiha hu li l-​ispirtu taʼ Ġeħova saħħaħ lil Sansun biex iwettaq din il-​biċċa xogħol li kienet tirrikjedi saħħa fiżika straordinarja. Hu x’inhu l-​każ, it-​tixbiha li niksbu minn Imħallfin 14:6 turi li bl-​għajnuna taʼ Ġeħova, iljun b’saħħtu ma kienx iktar feroċi għal Sansun minn kemm kien ikun gidi għal bniedem taʼ saħħa normali.

[Nota taʼ taħt]