Kemm Hi Prezzjuża Ħajtek?

FILWAQT li matul l-​ewwel gwerra dinjija kienu qed jiġu sagrifikati eluf taʼ ħajjiet fl-​Ewropa, fl-​Antartika kienu qed isiru sforzi straordinarji biex jiġu salvati l-​ħajjiet. L-​esploratur Anglo-Irlandiż Ernest Shackleton u sħabu kellhom katastrofi meta l-​vapur tagħhom Endurance tkisser maʼ mases taʼ silġ f’wiċċ il-​baħar u għereq. Shackleton irnexxielu jwassal lin-​nies tiegħu f’post fejn setgħu jkunu fis-​sigurtà​—sa ċertu punt​—u dan kien fuq il-​Gżira t’Elephant fin-​nofsinhar taʼ l-​Oċean Atlantiku. Imma xorta waħda kienu għadhom fil-​periklu.

Shackleton irrealizza li l-​unika tama li kellhom biex isalvaw kienet li jibagħtu lil xi ħadd jitlob għall-​għajnuna fil-​gżira taʼ South Georgia, fejn kien hemm bażi tal-​vapuri li joħorġu għall-​kaċċa tal-​balieni. Din kienet xi 1,100 kilometru ’l bogħod, u kulma kellu Shackleton kienet dgħajsa tas-​salvataġġ taʼ xi 6.7 metri tul li kien salva mill-​Endurance. Il-​prospetti tagħhom xejn ma kienu jidhru sbieħ.

Madankollu, fl-​10 taʼ Mejju, 1916, wara 17-il ġurnata taʼ taqtigħ il-​qalb, Shackleton u grupp żgħir mill-​ekwipaġġ tiegħu waslu South Georgia, imma minħabba l-​kundizzjonijiet mill-​agħar tal-​baħar kellhom jinżlu fuq in-​naħa l-​oħra tal-​gżira. Sabiex jaslu fid-​destinazzjoni tagħhom, huma kellhom jimxu 30 kilometru minn fuq muntanji miksijin bis-​silġ li ma kinux imniżżlin fuq il-​mapep. Minkejja d-​diffikultajiet kollha​—f’temp estremament kiesaħ u mingħajr tagħmir addattat biex jitilgħu mal-​muntanji—Shackleton u sħabu waslu fid-​destinazzjoni tagħhom, u b’hekk fl-​aħħar hu rnexxielu jsalva lin-​nies tiegħu li kienu baqgħu fuq il-​gżira. Shackleton għala stinka u għamel tant sforzi kbar? “Il-​mira tiegħu,” kiteb il-​bijografu Roland Huntford, kienet “li jsalva l-​ħajja taʼ kull wieħed min-​nies tiegħu.”

“Ħadd Minnhom Ma Jonqos”

X’għen lin-​nies taʼ Shackleton biex ma jiddisprawx hekk kif tgeddsu flimkien u qagħdu jistennew fuq dik li kienet sempliċi “biċċa art li ma tistax tintlaħaq, imħarbta u kollha silġ, u li kien fiha biss 30 kilometru minn tarf sa tarf”? Il-​fiduċja li kellhom li dak li kien qed imexxihom kien se jżomm kelmtu u jsalvahom.

L-umanità llum tixbah ħafna lil dawn l-​irġiel maqbudin fuq il-​Gżira t’Elephant. Ħafna nies jgħixu f’kundizzjonijiet ħżiena ferm u jridu jaħdmu iebes ħafna sempliċement għas-​sopravivenza tagħhom. Madankollu, huma jistgħu jkollhom fiduċja sħiħa li Alla se “jifdi l-​magħkus” mill-​moħqrija u n-​niket. (Ġob 36:​15) Ibqaʼ ċert li Alla jqis il-​ħajja taʼ kulħadd bħala prezzjuża. “Sejjaħli f’jum id-​dwejjaq,” jgħid Alla Ġeħova, il-​Ħallieq, u “jien neħilsek.”​—Salm 50:15.

Issibha diffiċli biex temmen li l-​Ħallieq iqis lilek personalment​—sempliċi individwu wieħed fost il-​biljuni fuq l-​art​—prezzjuż għalih? Mela innota x’kiteb il-​profeta Isaija dwar il-​biljuni taʼ kwiekeb li hemm fil-​biljuni taʼ galassji fl-​univers vast taʼ madwarna. Naqraw: “Erfgħu għajnejkom ’il fuq u araw: min ħalaqhom dawn il-​ħlejjaq kollha? Imexxi u jgħodd l-​eżerċti tiegħu, u jsejjħilhom b’isimhom wieħed wieħed. Bis-​saħħa taʼ qawwietu, bil-​qawwa taʼ setgħetu, ħadd minnhom ma jonqos.”​—Korsiv tagħna; Isaija 40:26.

Tistaʼ tifhem xi jfisser dan? Il-​galassja tagħna, it-​Triq tal-​Ħalib​—li s-​sistema solari tagħna hi biss parti minnha​—għandha minn taʼ l-​inqas 100 biljun kewkba. U kemm hemm iktar galassji? Ħadd ma jaf fiż-​żgur, imma xi wħud jgħidu 125 biljun. Min jaf x’numru taʼ l-​għaġeb hemm taʼ kwiekeb! Iżda, il-​Bibbja tgħidilna li l-​Ħallieq taʼ l-​univers jaf kull kewkba b’isimha.

“Saħansitra x-​Xagħar taʼ Raskom Kollu Hu Magħdud”

‘Imma,’ jistgħu joġġezzjonaw xi wħud, ‘il-​fatt li sempliċement tkun taf l-​ismijiet taʼ biljuni taʼ kwiekeb​—jew taʼ biljuni taʼ nies​—mhux bilfors ikun ifisser li jimpurtak minnhom individwalment.’ Kompjuter li jkollu biżżejjed memorja jistaʼ jirreġistra l-​ismijiet taʼ biljuni taʼ nies. Madankollu, ħadd m’hu se jaħseb li l-​kompjuter jimpurtah minn xi ħadd minnhom. Madankollu, il-​Bibbja turi li Alla Ġeħova mhux biss jaf l-​ismijiet taʼ biljuni taʼ nies imma hu wkoll jimpurtah minnhom bħala individwi. “[Itfgħu] l-​ansjetà kollha tagħkom fuqu,” kiteb l-​appostlu Pietru, “għax hu jimpurtah minnkom.”​—1 Pietru 5:7.

Ġesù Kristu qal: “Ma jinbigħux żewġ għasafar tal-​bejt għal munita taʼ valur żgħir? Iżda lanqas wieħed minnhom ma jaqaʼ fl-​art mingħajr ma jkun jaf Missierkom. Għax saħansitra x-​xagħar taʼ raskom kollu hu magħdud. Għalhekk tibżgħux: intom tiswew iktar minn ħafna għasafar tal-​bejt.” (Mattew 10:​29-​31) Innota li Ġesù ma qalx li Alla sempliċement hu konxju taʼ dak li jiġri mill-​għasafar tal-​bejt u mill-​bnedmin. Hu qal: “Intom tiswew iktar minn ħafna għasafar tal-​bejt.” Għala tiswa iktar int? Għax ġejt maħluq “fuq xbihat Alla”​—bil-​kapaċità li tikkultiva u turi kwalitajiet morali, intelletwali, u spiritwali li jirriflettu l-​kwalitajiet għoljin t’Alla.​—Ġenesi 1:​26, 27.

“Il-​Prodott t’Attività Intelliġenti”

Tiġix żvijat minn dak li jgħidu ċerti nies li jiċħdu l-​fatt li hemm Ħallieq. Skond kliemhom, int ġejt magħmul permezz taʼ forzi bla direzzjoni u bla sentimenti. Huma jsostnu li int mhux talli m’intix magħmul fuq “xbihat Alla,” talli m’intix differenti minn kwalunkwe annimal ieħor fuq din il-​pjaneta​—inkluż l-​għasafar tal-​bejt.

Jagħmillek sens li l-​ħajja bdiet teżisti hawnhekk sempliċement b’kumbinazzjoni, jew b’forza bla direzzjoni? Skond il-​bijologu molekulari Michael J. Behe, il-​fatt li l-​ħajja hi mmexxija minn “proċessi bijokimiċi li huma komplikati b’mod taʼ l-​għaġeb” jagħmel din l-​idea totalment bla sens. L-​evidenza tal-​bijokimika, jgħid hu, twassal għall-​konklużjoni li ma tistax taħrab minnha li “l-​ħajja fuq l-​art fl-​iktar livell fundamentali tagħha . . . hi l-​prodott t’attività intelliġenti.”​—Darwin’s Black Box​—The Biochemical Challenge to Evolution.

Il-Bibbja tgħidilna li l-​ħajja fuq l-​art fil-​livelli kollha tagħha hi l-​prodott t’attività intelliġenti. U tgħidilna li s-​Sors taʼ din l-​attività intelliġenti kollha hu Alla Ġeħova, il-​Ħallieq taʼ l-​univers.​—Salm 36:10 (36:​9, NW); Rivelazzjoni 4:​11.

Tħallix il-​fatt li aħna jkollna nissaportu f’dinja mimlija wġigħ u sofferenza jżommok milli temmen li hemm Ħallieq u Disinjatur taʼ l-​art u taʼ kull tip taʼ ħajja fiha. Żomm f’moħħok żewġ veritajiet fundamentali. Waħda hi li Alla ma ddisinjax din l-​imperfezzjoni kollha li hawn madwarna. L-​oħra hi li l-​Ħallieq tagħna għandu raġunijiet tajbin għala qed jippermettiha temporanjament. Bħalma spiss iddiskutiet din ir-​rivista, Alla Ġeħova ppermetta li jeżisti l-​ħażen għal żmien limitat biss sabiex jissetilja darba għal dejjem il-​kwistjonijiet morali li ġew imqajmin fiż-​żmien meta l-​bnedmin ċaħdu s-​sovranità tiegħu l-​ewwel darba.a​—Ġenesi 3:​1-7; Dewteronomju 32:​4, 5; Koħèlet 7:​29; 2 Pietru 3:​8, 9.

“Hu Jeħles lill-​Fqir li Jsejjaħlu”

M’għandniex xi ngħidu, minkejja li llum ħafna nies ikollhom jgħixu f’kundizzjonijiet miżerabbli, il-​ħajja xorta waħda hi rigal meraviljuż. U aħna nagħmlu dak kollu li nistgħu biex nibqgħu ħajjin. Il-​ħajja futura li qed iwegħedna Alla m’hijiex xi sempliċi ġlieda biex tibqaʼ ħaj f’kundizzjonijiet kiefra u taʼ wġigħ​—bħall-​ekwipaġġ taʼ Shackleton fuq il-​Gżira t’Elephant. L-​iskop t’Alla hu li jsalvana mill-​eżistenza tagħna t’issa kollha wġigħ u fiergħa sabiex naqbdu “qabda soda mal-​ħajja vera” skond l-​iskop oriġinali t’Alla għall-​ħolqien uman.​—1 Timotju 6:​19.

Alla se jagħmel dan kollu għax aħna lkoll prezzjużi f’għajnejh. Hu rranġa biex Ibnu, Ġesù Kristu, jipprovdi s-​sagrifiċċju taʼ fidwa li kien meħtieġ biex jeħlisna mid-​dnub, l-​imperfezzjoni, u l-​mewt li writna mingħand il-​ġenituri oriġinali tagħna, Adam u Eva. (Mattew 20:28) “Alla tant ħabb lid-​dinja,” qal Ġesù Kristu, “li ta l-​Iben uniġenitu tiegħu, biex kulmin jeżerċita l-​fidi fih . . . ikollu l-​ħajja taʼ dejjem.”​—Ġwanni 3:​16.

X’se jagħmel Alla għal dawk li ħajjithom bħalissa hi mgħakksa bl-​uġigħ u l-​moħqrija? Rigward Ibnu, il-​Kelma mnebbħa t’Alla tgħidilna: “Hu jeħles lill-​fqir li jsejjaħlu, u lill-​imsejken li m’għandux min jgħinu. Iħenn għad-​dgħajjef u għall-​fqajjar; il-​ħajja tal-​fqajrin isalva. Jeħlishom mill-​qerq u mill-​moħqrija.” Għala se jagħmel dan? Għax “demmhom [jew, ħajjithom] għażiż quddiem għajnejh.”—Korsiv tagħna; Salm 72:​12-​14.

Il-bniedem ilu sekli sħaħ jissielet taħt it-​tagħbija tad-​dnub u l-​imperfezzjoni, bħallikieku “jokrob” b’ħafna wġigħ u tbatija. Alla ppermetta dan għax kien jaf li setaʼ jirranġa kwalunkwe ħsara li setgħet tirriżulta. (Rumani 8:​18-​22) Issa, fi żmien tassew qasir, hu se ‘jġedded l-​affarijiet kollha’ permezz tal-​gvern tas-​Saltna tiegħu mmexxi minn Ibnu, Ġesù Kristu.​—Atti 3:​21; Mattew 6:​9, 10.

Dan jinkludi l-​irxoxt tan-​nies li batew u mietu fil-​passat. Dawn huma protetti fil-​memorja t’Alla. (Ġwanni 5:​28, 29; Atti 24:15) Fi ftit żmien ieħor huma se jirċievu l-​ħajja “bl-​abbundanza”​—ħajja taʼ dejjem perfetta fuq art magħmula ġenna ħielsa mill-​uġigħ u t-​tbatija. (Ġwanni 10:10; Rivelazzjoni 21:​3-5) Kulmin jgħix se jkun jistaʼ jgawdi l-​ħajja bis-​sħiħ u jikkultiva l-​kwalitajiet u l-​abbiltajiet meraviljużi li jiddistingwu lil dawk li nħolqu “fuq xbihat Alla.”

Se tkun hemm int biex tgawdi l-​ħajja li wiegħed Ġeħova? Id-​deċiżjoni f’idejk. Aħna nħeġġuk biex tieħu vantaġġ mill-​provvedimenti li għamel Alla biex iġib dawn il-​barkiet kollha. Il-​pubblikaturi taʼ din ir-​rivista se jkunu ferħanin li jgħinuk tagħmel dan.

[Nota taʼ taħt]

[Stampa f’paġna 4, 5]

Il-​membri taʼ l-​ekwipaġġ li nqabdu fuq il-​gżira kienu fiduċjużi li Shackleton kien se jżomm kelmtu u jsalvahom

[Sors]

© CORBIS

[Stampa f’paġna 6]

“Intom tiswew iktar minn ħafna għasafar tal-​bejt”