Il-​Mirakli—Veru Jseħħu?

GĦAJNEJN ir-​raġel mill-​ewwel marru fuq stiker imwaħħla maʼ karozza li kienet għaddejja. Fuqha kien hemm miktub “Il-​Mirakli Jsiru​—Staqsi lill-​Anġli.” Għalkemm hu nnifsu kien bniedem reliġjuż, ma kienx ċert x’kien ifisser dan il-​kliem. Kien ifisser dan li s-​sewwieq kien jemmen fil-​mirakli? Jew pjuttost kienet xi ċajta li turi li la kien jemmen fil-​mirakli u lanqas fl-​anġli?

L-awtur Ġermaniż Manfred Barthel għamel dan il-​kumment li għandek mnejn issibu interessanti: “Il-​kelma miraklu mill-​ewwel tifred il-​qarrejja f’żewġ kategoriji opposti.” Dawk li jemmnu fil-​mirakli huma konvinti li dawn iseħħu u forsi jseħħu spiss.a Per eżempju, huwa rapportat li fil-​Greċja matul dawn l-​aħħar ftit snin, in-​nies li jemmnu fil-​mirakli sostnew li dawn iseħħu madwar darba kull xahar. Minħabba f’hekk, ċertu isqof taʼ Knisja Ortodossa Griega wissa: “Min jemmen [fil-mirakli] għandu l-​ħabta li jqis lil Alla, lil Marija, u lill-​qaddisin bħala persuni b’karatteristiċi umani. Min jemmen m’għandux jesaġera f’dawn il-​kwistjonijiet.”

F’pajjiżi oħrajn, it-​twemmin fil-​mirakli m’huwiex daqshekk komuni. Skond stħarriġ t’Allensbach pubblikat fil-​Ġermanja fl-​2002, 71 fil-​mija miċ-​ċittadini hemmhekk jaħsbu li l-​mirakli mhux veru jiġru. Madankollu, fost dawk li jemmnu fil-​mirakli​—inqas minn terz miċ-​ċittadini​—hemm tliet nisa li jsostnu li rċivew messaġġ mill-​Verġni Marija. Ftit xhur wara li ntqal li dehritilhom Marija​—flimkien maʼ xi anġli u ħamiema—il-​gazzetta Ġermaniża Westfalenpost irrapportat: “S’issa madwar 50,000 pellegrin, nies li qed ifittxu l-​fejqan, kif ukoll dawk kurjużi wrew interess kbir fil-​viżjonijiet li raw dawn in-​nisa.” Xi 10,000 oħra kienu mistennijin jinġabru fir-​raħal biex jaraw iktar dehriet. Jingħad li dehriet simili tal-​Verġni Marija seħħew f’Lourdes, Franza, fl-​1858, u f’Fátima, il-​Portugall, fl-​1917.

Xi Ngħidu għal Reliġjonijiet Mhux Kristjani?

It-​twemmin fil-​mirakli jeżisti kważi fir-​reliġjonijiet kollha. The Encyclopedia of Religion tispjega li l-​fundaturi tal-​Buddiżmu, il-​Kristjanità, u l-​Islam kellhom opinjonijiet differenti dwar il-​mirakli, imma din tikkummenta: “L-​istorja taʼ dawn ir-​reliġjonijiet turi bla ebda dubju li l-​mirakli u l-​istejjer tal-​mirakli ilhom jagħmlu parti integrali mill-​ħajja reliġjuża tal-​bniedem.” Dan ix-​xogħol taʼ referenza jgħid li “l-​Budda nnifsu xi drabi kien jagħmel il-​mirakli.” Iktar tard, meta “l-​Buddiżmu ttieħed lejn iċ-​Ċina, il-​missjunarji tiegħu spiss kienu jużaw il-​qawwiet mirakolużi tagħhom.”

Wara li tirreferi għal diversi mirakli li jingħad li seħħew, din l-​enċiklopedija tikkonkludi: “Wieħed jistaʼ ma jkunx lest li jaċċetta dawn ir-​rapporti kollha taʼ mirakli li ntqalu minn kittieba reliġjużi, imma bla dubju dawn inħolqu bl-​intenzjoni tajba li jigglorifikaw lill-​Budda, li kien kapaċi jagħti lis-​segwaċi ferventi tiegħu qawwa mirakoluża bħal din.” L-​istess enċiklopedija tgħid dwar l-​Islam: “Il-​biċċa l-​kbira mill-​komunità Islamika qatt ma waqfet tistenna l-​mirakli. Fit-​tradizzjonijiet (hadīths) jintqal li Moħammed għamel il-​mirakli fil-​pubbliku f’diversi okkażjonijiet. . . . Anki wara mewthom, il-​qaddisin jingħad li jagħmlu l-​mirakli ħdejn l-​oqbra tagħhom għan-​nom taʼ dawk li jemmnu, u n-​nies b’devozzjoni jitolbuhom jidħlu għalihom.”

Xi Ngħidu għall-​Mirakli fil-​Kristjanità?

Ħafna minn dawk li aċċettaw il-​Kristjanità ma jaqblux bejniethom. Xi wħud jemmnu fir-​rapporti Bibliċi dwar il-​mirakli mwettqin minn Ġesù Kristu jew mill-​qaddejja t’Alla qabel l-​era Kristjana. Madankollu, ħafna jaqblu mar-​Riformista Protestant Luteru. The Encyclopedia of Religion tgħid dwaru: “Kemm Luteru u kemm Kalvinu kitbu li l-​era tal-​mirakli kienet għaddiet u li n-​nies m’għandhomx jistennew li jseħħu iktar.” Xogħol taʼ referenza jgħid li l-​Knisja Kattolika baqgħet temmen fil-​mirakli mingħajr ma pprovat tispjega kif dawn isiru. Madankollu, “il-​komunità Protestanta akkademika bdiet temmen li l-​Kristjanità fil-​biċċa l-​kbira kienet kwistjoni taʼ moralità u li la Alla u lanqas id-​dinja spiritwali ma kellha kuntatt jew kienet tinfluwenza bil-​kbir il-​ħajja umana reali.”

Oħrajn li jgħidu li huma Kristjani, inkluż xi qassisin, m’humiex konvinti li l-​mirakli msemmijin fil-​Bibbja ġraw veru. Ejja nieħdu, per eżempju, ir-​rakkont taʼ l-​għollieq jaqbad imniżżel fil-​Bibbja f’Eżodu 3:​1-5. Il-​ktieb What the Bible Really Says jispjega li għadd taʼ teoloġi Ġermaniżi ma jiħduhx bħala rakkont letterali taʼ miraklu. Minflok, huma jinterpretawh bħala “simbolu tat-​taqbida li Mosè kellu ġo fih kontra r-​rimors u t-​tingiż tal-​kuxjenza.” Il-​ktieb iżid: “Il-​fjammi jistgħu wkoll jiġu mifhumin li kienu fjuri li nfetħu f’daqqa fid-​dija tal-​preżenza divina.”

Għandu mnejn li din l-​ispjegazzjoni ma tantx tikkonvinċik. Allura, x’għandek temmen? Huwa realistiku li temmen li xi darba seħħew il-​mirakli? U xi ngħidu dwar il-​mirakli fi żmienna? Ladarba lill-​anġli ma nistgħux nistaqsuhom, lil min nistgħu nistaqsu?

Il-​Ħarsa tal-​Bibbja

Ħadd ma jistaʼ jiċħad li l-​Bibbja tirrapporta li fl-​imgħoddi Alla interviena biex jagħmel affarijiet li l-​bniedem ma jistaʼ jagħmilhom qatt. Naqraw dwaru: “Int ħriġt il-​poplu tiegħek Iżrael mill-​art taʼ l-​Eġittu b’sinjali u għeġubijiet, u b’id qawwija u bi driegħek merfugħ, u b’biżaʼ kbir.” (Ġeremija 32:21, korsiv tagħna.) Immaġina, l-​iktar ġens qawwi taʼ dak iż-​żmien jiġi umiljat permezz t’għaxar kastigi mibgħutin minn Alla, fosthom il-​mewt taʼ l-​ewwel imwieled. Mirakli tassew!​—Eżodu, kapitli 7 sa 14.

Sekli wara, l-​erbaʼ kittieba taʼ l-​Evanġelji ddeskrivew xi 35 miraklu mwettqin minn Ġesù. Fil-​fatt, kliemhom jindika li hu għamel saħansitra iktar atti sopranaturali milli tniżżlu bil-​miktub. Dawn ir-​rapporti ġraw tassew jew le?b​—Mattew 9:​35; Luqa 9:​11.

Jekk il-​Bibbja tassew hi dak li tgħid li hi​—il-​Kelma t’Alla taʼ verità​—mela għandek raġuni soda biex temmen fil-​mirakli li titkellem dwarhom. Il-​Bibbja hija ċara meta tirrapporta l-​mirakli li seħħew fl-​imgħoddi​—fejqan u rxoxt mirakoluż, u ħwejjeġ simili—però daqstant ieħor hija ċara meta tispjega li mirakli bħal dawn m’għadhomx isiru. (Ara l-​kaxxa “Għala Ċerti Mirakli M’Għadhomx Isiru,” f’paġna 4.) Allura, ifisser dan li anki dawk li jemmnu fil-​Bibbja jemmnu li l-​mirakli taʼ żmienna m’humiex fatti li ġraw veru? Ejja nħallu l-​artiku li jmiss iweġibna.

[Noti taʼ taħt]

[kaxxa f’paġna 4]

GĦALA ĊERTI MIRAKLI M’GĦADHOMX ISIRU

Fil-​Bibbja jissemmew diversi tipi taʼ mirakli. (Eżodu 7:​19-​21; 1 Slaten 17:​1-7; 18:​22-​38; 2 Slaten 5:​1-​14; Mattew 8:​24-​27; Luqa 17:​11-​19; Ġwanni 2:​1-​11; 9:​1-7) Ħafna minn dawn il-​mirakli twettqu biex jidentifikaw lil Ġesù bħala l-​Messija u wrew li hu kellu l-​appoġġ t’Alla. L-​ewwel segwaċi taʼ Ġesù użaw għotjiet mirakolużi, bħal li jitkellmu bl-​ilsna u jifhmu l-​kliem imnebbaħ. (Atti 2:​5-12; 1 Korintin 12:​28-31) Dawn l-​għotjiet mirakolużi kienu utli għall-​kongregazzjoni Kristjana meta kienet għadha kemm ġiet ifformata. Dan kif?

Raġuni waħda hi li ftit li xejn kien hemm kopji taʼ l-​Iskrittura. Ġeneralment, in-​nies għonja biss kien ikollhom xi tip taʼ skrolli jew kotba. Fil-​pajjiżi pagani, in-​nies ma kellhomx għarfien dwar il-​Bibbja jew l-​Awtur tagħha, Ġeħova. It-​tagħlim Kristjan kellu jitwassal bil-​fomm. L-​għotjiet mirakolużi servew biex juru li Alla kien qed juża lill-​kongregazzjoni Kristjana.

Imma Pawlu spjega li dawn l-​għotjiet kellhom jispiċċaw meta ma kienx se jkun hemm iktar bżonnhom. “Jekk hemm l-​għotjiet taʼ l-​ipprofetizzar, dawn se jinġiebu fix-​xejn; jekk hemm l-​ilsna, dawn se jieqfu; jekk hemm l-​għarfien, dan se jinġieb fix-​xejn. Għax l-​għarfien li għandna hu limitat u l-​ipprofetizzar tagħna hu limitat; imma meta jasal dak li hu sħiħ, dak li hu limitat jinġieb fix-​xejn.”​—1 Korintin 13:​8-​10.

Illum, in-​nies jistgħu jiksbu Bibbja, kif ukoll ifittxu f’pubblikazzjonijiet li jservu taʼ werrej għaliha u enċiklopediji. Iktar minn sitt miljun Kristjan imħarreġ qed jgħinu lil oħrajn jiksbu għarfien dwar Alla bbażat fuq il-​Bibbja. Għalhekk, m’għadx hemm bżonn il-​mirakli biex juru li Ġesù Kristu huwa l-​Ħellies maħtur minn Alla jew biex jipprovdu evidenza li Ġeħova qed jappoġġa lill-​qaddejja tiegħu.