Ferrħu Qalb il-​Ġenituri Tagħhom

“IBNI, jekk qalbek tħobb l-​għerf, lili wkoll tferraħli qalbi.” (Proverbji 23:15) Tabilħaqq, ġenituri Kristjani jithennew meta wliedhom jiksbu għerf divin. Nhar is-​Sibt, 10 taʼ Settembru, 2005, grupp internazzjonali taʼ 6,859 ruħ attendew għall-​gradwazzjoni tal-​119​-il klassi taʼ l-​Iskola taʼ Gilgħad (Watchtower Bible School of Gilead). Kulħadd ħass qalbu timtela bil-​ferħ, speċjalment il-​ġenituri tas-​56 gradwat.

David Walker, membru li ilu jaqdi mal-​familja Betel taʼ l-​Istati Uniti, fetaħ il-​programm b’talba mill-​qalb. Imbagħad iċ-​chairman, David Splane tal-​Ġemgħa li Tiggverna tax-​Xhieda taʼ Ġeħova, ta bidu għall-​programm tal-​gradwazzjoni billi qal ’il-missirijiet u ’l-ommijiet kollha: “Intom jixirqilkom tifħir mill-​qalb. Il-​kwalitajiet li kkultivajtu f’uliedkom immotivawhom biex jidħlu fis-​servizz missjunarju.” Dawk il-​ġenituri setgħu kienu ansjużi minħabba li wliedhom dalwaqt kienu se jitilqu ’l bogħod lejn l-​inkarigi tagħhom. Iżda Ħuna Splane assigurahom: “Tinkwetawx għal uliedkom. Ġeħova jistaʼ jieħu ħsiebhom ħafna iktar milli tistgħu intom.” Imbagħad qal: “Aħsbu fil-​ġid li wliedkom se jwettqu. Nies li għaddejjin minn xi tbatija se jiksbu faraġ veru għall-​ewwel darba f’ħajjithom.”

Mod Kif Tkomplu Tferrħu lil Oħrajn

Iċ-​chairman ippreżenta erbaʼ kelliema. L-​ewwel wieħed, Ralph Walls, tal-​Kumitat tal-​Fergħa fl-​Istati Uniti tkellem fuq it-​tema “Żomm Għajnejk Miftuħin.” Hu enfasizza l-​punt li l-​għama spiritwali hu ħafna agħar mill-​għama fiżiku. Il-​kongregazzjoni taʼ Laodiċija fl-​ewwel seklu tilfet id-​dawl spiritwali. Il-​Kristjani f’dik il-​kongregazzjoni, li kienu għomja f’sens spiritwali, ġew offruti l-​għajnuna, iżda huwa dejjem aħjar li nilqgħu minn qabel dan it-​tip t’għama billi nżommu l-​għajnejn spiritwali tagħna miftuħin. (Rivelazzjoni 3:​14-​18) Il-​kelliemi qal: “Żommu għajnejkom miftuħin u ikkunsidraw lill-​irġiel responsabbli bħalma jikkunsidrahom Ġeħova.” Il-​gradwati m’għandhomx iħossuhom ansjużi żżejjed jekk ikun hemm xi problemi fil-​kongregazzjoni. Il-​Mulej Ġesù Kristu jaf b’dawn l-​affarijiet. Hu se jagħmel ċert li dawn il-​kwistjonijiet jiġu trattati f’waqthom.

Imbagħad, Samuel Herd tal-​Ġemgħa li Tiggverna, wieġeb il-​mistoqsija “Int Lest?” Bħalma vjaġġatur jieħu miegħu l-​ħwejjeġ li jkollu bżonn, hekk ukoll il-​gradwati dejjem iridu jilbsu l-​kwalitajiet tal-​personalità l-​ġdida. Huma jrid ikollhom il-​ħniena li kellu Ġesù. Meta wieħed imġiddem qallu: “Jekk trid, tistaʼ tnaddafni,” Ġesù qal: “Irrid. Indaf.” (Marku 1:​40-​41) Il-​kelliemi mbagħad qal: “Jekk verament trid tgħin lin-​nies, se ssib mezz kif tagħmel dan.” Filippin 2:3 jgħid lill-​Kristjani biex jikkunsidraw “lill-​oħrajn superjuri.” Ħuna Herd qal: “Li tkun umli f’qalbek huwa iżjed importanti milli jkollok l-​għarfien. Dawk li tiltaqaʼ magħhom fil-​ministeru u ħutek irġiel u nisa fil-​kongregazzjoni se jibbenefikaw mill-​għarfien tiegħek biss jekk tkun umli.” Hu kkonkluda billi qal li jekk il-​gradwati jkomplu jilbsu l-​imħabba Kristjana, huma se jkunu lesti biex jivvjaġġaw lejn l-​inkarigi tagħhom b’suċċess assigurat quddiemhom.​—Kolossin 3:​14.

Mark Noumair, wieħed mill-​għalliema taʼ Gilgħad, ħoloq sens taʼ stennija bit-​titlu tat-​taħdita tiegħu, “Int Se Żżommha?” “Iżżommha” qed tirreferi għall-​gratitudni lejn it-​tjieba taʼ Ġeħova. Salm 103:2 jiddikjara: “Bierek, ruħ tiegħi, il-​Mulej, u la tinsiex il-​ġid kollu li għamel miegħek.” L-​Iżraelin urew nuqqas taʼ gratitudni għall-​manna li żammithom ħajjin billi sejħulha “ikel ħafif.” (Numri 21:5) Maż-​żmien, il-​valur tal-​manna ma nbidilx, iżda l-​apprezzament tagħhom għaliha spiċċa fix-​xejn. L-​għalliem qal: “Jekk tinsa l-​għemejjel taʼ Ġeħova u tħalli s-​servizz tiegħek f’pajjiż barrani jsir xi ħaġa komuni, dan se jeffettwalek il-​mod taʼ kif tħares lejn ix-​xogħol li Ġeħova tak.” Salm 103:4 (NW) jiddikjara li Ġeħova “qed jinkurunak b’qalb tajba bl-​imħabba.” Il-​gradwati se jesperjenzaw il-​qalb tajba bl-​imħabba t’Alla fil-​kongregazzjonijiet il-​ġodda.

Lawrence Bowen, għalliem ieħor taʼ Gilgħad, tkellem fuq is-​suġġett “Se Jiġu Fuqek?” Hu nnota li l-​membri tal-​119​-il klassi taʼ Gilgħad stinkaw fit-​taħriġ tagħhom biex ikunu missjunarji li jirnexxu. Iżda issa huma jridu jżommu qrib taʼ Ġeħova u tax-​xogħol li inkarigahom biex jagħmlu. F’Rivelazzjoni 14:​1-4, il-​144,000 huma deskritti bħala “dawk li jibqgħu mexjin wara l-​Ħaruf kulfejn imur.” Dawk kollha f’dak il-​grupp iżommu qrib taʼ Ġeħova u taʼ Ibnu lealment u jilħqu l-​mira tagħhom minkejja l-​provi li jgħaddu minnhom. “Jiġri x’jiġri, aħna wkoll inżommu qrib taʼ Ġeħova u tax-​xogħol li inkarigana biex nagħmlu lealment,” qal il-​kelliemi. Billi jagħmlu hekk, il-​gradwati se jsibu li l-​barkiet taʼ Ġeħova se ‘jiġu fuqhom’ b’abbundanza.​—Dewteronomju 28:2.

Ipproduċew Frott fis-​Servizz Tagħhom

Kull tmiem il-​ġimgħa, waqt il-​kors, l-​istudenti ħadu sehem fis-​servizz taʼ l-​għalqa. Hekk kif Wallace Liverance, ir-​reġistratur taʼ l-​iskola, tkellem magħhom sar evidenti li huma kellhom suċċess. Huma ppridkaw l-​aħbar tajba minn taʼ l-​inqas b’għaxar lingwi u bdew numru taʼ studji tal-​Bibbja. Koppja waħda minn Gilgħad bdew jistudjaw il-​Bibbja maʼ raġel Ċiniż. Wara żewġ żjajjar, huma staqsewh kif kien iħossu dwar il-​fatt li qed isir jaf lil Ġeħova. Fetaħ il-​Bibbja u talab lilhom jaqraw Ġwanni 17:3. Hu ħass li kien miexi fit-​triq tal-​ħajja.

Anthony Morris tal-​Ġemgħa li Tiggverna mbagħad intervista tliet aħwa rġiel li jaqdu fil-​Kumitati tal-​Fergħa fil-​Côte d’Ivoire, fir-​Repubblika Dominikana, u fl-​Ekwador. Dawn l-​aħwa żguraw lill-​gradwati li l-​Kumitati tal-​Fergħa qegħdin iħarsu ’l quddiem għall-​wasla tagħhom u se jgħinuhom biex jaġġustaw ruħhom għall-​inkarigi tagħhom.

Imbagħad, Leonard Pearson tal-​familja Betel fl-​Istati Uniti, tkellem maʼ tliet membri tal-​Kumitat tal-​Fergħa mir-​Repubblika Demokratika tal-​Kongo, il-​Papwa-Ginea Ġdida, u l-​Uganda. Dawn l-​aħwa inkuraġġew lill-​gradwati biex jinvolvu ruħhom bis-​sħiħ fis-​servizz taʼ l-​għalqa. Koppja missjunarja li kienu qattgħu iktar minn 21 sena fil-​Kongo għenu 60 ruħ jaslu għad-​dedikazzjoni u l-​magħmudija. Din il-​koppja issa jikkonduċu 30 studju tal-​Bibbja, u 22 mill-​istudenti tagħhom jattendu l-​laqgħat tal-​kongregazzjoni. Bi ħsad spiritwali daqshekk kbir, issa hu żmien sabiħ biex taqdi bħala missjunarju.

Għoti taʼ Xiehda bi Spirtu t’Urġenza

Gerrit Lösch tal-​Ġemgħa li Tiggverna ppreżenta l-​aħħar taħdita. It-​tema tiegħu kienet “Nitkellmu dwar Alla u Nagħtu Xiehda dwar Ġesù f’Jum il-​Mulej.” Il-​kliem li jirreferi għall-​għoti taʼ xiehda jinstab dsatax-il darba fil-​ktieb tar-​Rivelazzjoni. Għalhekk, Ġeħova ma jħalli ebda dubju dwar ix-​xogħol li għandu għall-​poplu tiegħu. Meta se nagħtu din ix-​xiehda? “F’jum il-​Mulej.” (Rivelazzjoni 1:​9,10) Dan il-​jum beda fl-​1914, qed ikompli fi żmienna, u jestendi fil-​futur. Skond Rivelazzjoni 14:​6, 7, ix-​xogħol taʼ li nitkellmu dwar Alla għandu appoġġ anġeliku. Rivelazzjoni 22:17 juri li l-​fdal taʼ Kristjani midlukin huma fdati bir-​responsabbiltà li jidderieġu x-​xogħol taʼ l-​għoti taʼ xiehda dwar Ġesù. Iżda lkoll irridu nieħdu vantaġġ issa minn dan il-​privileġġ. Fil-​vers 20 hemm miktub li Ġesù qal: “Jien ġej malajr.” Ħuna Lösch ħeġġeġ lil dawk kollha preżenti: “Għajtu lin-​nies, ‘Ejjew, ħudu b’xejn l-​ilma tal-​ħajja.’ Ġesù ġej malajr. Aħna lesti?”

Fred Rusk, li hu nnifsu serva bħala għalliem taʼ l-​Iskola taʼ Gilgħad għal ħdax-il sena, għalaq il-​programm b’talba taʼ ringrazzjament lil Ġeħova li messet il-​qlub taʼ dawk kollha li attendew. Kien tmiem xieraq għal ġurnata li serviet t’okkażjoni għal ferħ kbir.

[Kaxxa f’paġna 13]

STATISTIKI TAL-​KLASSI

Numru taʼ pajjiżi rappreżentati: 10

Numru taʼ pajjiżi li ġew assenjati fihom: 25

Numru taʼ studenti: 56

Età medja: 32.5

Medja taʼ snin fil-​verità: 16.4

Medja taʼ snin fil-​ministeru full-time: 12.1

[Stampa f’paġna 15]

Il-​119-il Klassi li Ggradwat mill-​Iskola taʼ Gilgħad

Fil-​lista t’hawn taħt, ir-​ringieli huma nnumerati minn quddiem għal wara, u l-​ismijiet f’kull ringiela huma mniżżlin mix-​xellug għal-​lemin.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.