L-​Anġli—Kif Jeffettwawna

META ddeskriva l-​viżjoni li kellu li fiha ra l-​familja anġelika t’Alla, il-​profeta Danjel kiteb: “Eluf taʼ eluf kienu [l-anġli] jaqduh [lil Alla], u għaxart elef taʼ għaxriet taʼ eluf wieqfa quddiemu.” (Danjel 7:​10) Dan il-​vers jikxef x’kien l-​iskop t’Alla meta ħalaq l-​anġli. Huma qegħdin hemm biex jaqduh u joqogħdu quddiemu jistennew biex iwettqu l-​istruzzjonijiet tiegħu.

Alla juża lill-​anġli biex iwettqu ċerti affarijiet b’konnessjoni mal-​bnedmin. Se nikkunsidraw kif jużahom biex isaħħu u jipproteġu lill-​poplu tiegħu, biex iwasslu messaġġi lill-​bnedmin, u biex jesegwixxu l-​ġudizzju tiegħu fuq il-​ħżiena.

L-​Anġli Jsaħħu u Jipproteġu

Minn mindu l-​ħlejjaq spirti raw il-​ħolqien taʼ l-​art u l-​ewwel koppja umana, huma wrew interess kbir fl-​umanità. Meta tkellem bħala l-​għerf personifikat, Ġesù Kristu, fl-​eżistenza preumana tiegħu, qal: “[Kont] nitgħaxxaq b’ulied il-​bnedmin.” (Proverbji 8:31) U l-​Bibbja tinformana li l-​anġli “jixtiequ jkunu jafu” fatti dwar Kristu u l-​futur li ġie rivelat lill-​profeti t’Alla.​—1 Pietru 1:​11, 12.

Mal-medda taż-​żmien, l-​anġli osservaw li l-​maġġuranza mill-​familja umana ma kinitx qed taqdi lill-​Ħallieq tagħha kollu mħabba. Min jaf kemm dan il-​fatt kien taʼ wġigħ għall-​anġli leali! Mill-​banda l-​oħra, meta midneb wieħed jindem u jdur lejn Ġeħova, “ikun hemm ferħ fost l-​anġli t’Alla.” (Luqa 15:10) L-​anġli jinteressahom ħafna fil-​benesseri taʼ dawk li jaqdu lil Alla, u Ġeħova kemm-il darba użahom biex isaħħu u jipproteġu lill-​qaddejja leali tiegħu fuq l-​art. (Ebrej 1:14) Ikkunsidra ftit eżempji.

Żewġ anġli għenu lir-​raġel ġust Lot u lill-​bniet tiegħu biex isalvaw mill-​qerda tal-​bliet mill-​agħar taʼ Sodoma u Gomorra billi ħarġuhom mill-​belt.a (Ġenesi 19:​1, 15-26) Sekli wara, għalkemm il-​profeta Danjel ġie mitfugħ fil-​ħofra taʼ l-​iljuni, ma ġarrab ebda ħsara. Għala? Hu ddikjara: “Alla tiegħi bagħat l-​anġlu tiegħu jagħlaq ħalq [l-i]ljuni.” (Danjel 6:23 [6:​22, NW]) L-​anġli appoġġaw lil Ġesù fil-​bidu tal-​ministeru tiegħu fuq l-​art. (Marku 1:13) U ftit qabel il-​mewt taʼ Ġesù, deherlu anġlu ħalli “jqawwilu qalbu.” (Luqa 22:43) X’barka żgur li kien għal Ġesù l-​appoġġ li tah dan l-​anġlu f’dak iz-​żmien kruċjali taʼ ħajtu! Ukoll, anġlu ħeles lill-​appostlu Pietru mill-​ħabs.​—Atti 12:​6-11.

Jipproteġuna l-​anġli llum? Jekk naqdu lil Ġeħova fi qbil mal-​Kelma tiegħu, aħna assigurati li l-​anġli setgħana u inviżibbli tiegħu se jipproteġuna. Il-​Bibbja twiegħed: “L-​anġlu tal-​Mulej jgħasses madwar dawk li jibżgħu minnu, u jeħlishom.”​—Salm 34:8 (34:​7, NW).

Madankollu, irridu nirrikonoxxu li l-​anġli huma primarjament fis-​servizz t’Alla, mhux tal-​bnedmin. (Salm 103:​20, 21) Huma jwieġbu għad-​direzzjoni t’Alla, mhux għas-​sejħiet jew ir-​rikjesti tal-​bnedmin. Għalhekk, il-​wieħed li għandna nsejħu għall-​għajnuna huwa Alla Ġeħova, mhux lill-​anġli. (Mattew 26:53) M’għandniex xi ngħidu, ladarba ma narawx lill-​anġli, ma nistgħux niddeterminaw sa liema punt Alla jużahom biex jgħinu lin-​nies f’diversi kwistjonijiet. Imma nafu li Ġeħova “jsaħħaħ lil dawk li qalbhom marbuta fis-​sħiħ miegħu.” (2 Kronaki 16:9; Salm 91:11) U għandna l-​assiguranza li “kulma nitolbuh skond ir-​rieda tiegħu, hu [Alla] jismagħna.”​—1 Ġwanni 5:14.

L-Iskrittura tgħidilna wkoll li t-​talb u l-​qima tagħna għandhom jiġu indirizzati lil Alla biss. (Eżodu 20:​3-5; Salm 5:​2, 3 [5:​1, 2, NW]; Mattew 6:9) L-​anġli leali jinkuraġġuna nagħmlu dan. Per eżempju, meta l-​appostlu Ġwanni pprova jagħti qima lil wieħed anġlu, il-​ħliqa spirtu ċanfru u qallu: “Oqgħod attent! Tagħmilx hekk! . . . Qim lil Alla.”​—Rivelazzjoni 19:10.

L-​Anġli Jwasslu l-​Messaġġi t’Alla

Il-​kelma “anġlu” tfisser “messaġġier,” u dan huwa mod ieħor kif l-​anġli jaqdu lil Alla​—bħala l-​messaġġiera tiegħu bejnu u bejn il-​bnedmin. Per eżempju, “l-​anġlu Gabrijel intbagħat minn Alla f’belt tal-​Galilija jisimha Nazaret.” Għala? Biex javża lil waħda mara żagħżugħa jisimha Marija li għalkemm kienet verġni, kienet se tnissel f’ġufha u tiled iben li kellu jissemma Ġesù. (Luqa 1:​26-31) Kif ukoll, intbagħat anġlu lir-​rgħajja fl-​għelieqi biex jinformahom li “Kristu l-​Mulej” kien twieled. (Luqa 2:​8-11) B’mod simili, l-​anġli wasslu messaġġi mingħand Alla lil Abraham, Mosè, Ġesù, u lil oħrajn imsemmijin fil-​Bibbja.​—Ġenesi 18:​1-5, 10; Eżodu 3:​1, 2; Luqa 22:​39-43.

L-anġli kif jaqdu bħala l-​messaġġiera t’Alla llum? Ikkunsidra x-​xogħol li Ġesù bassar li s-​segwaċi tiegħu kienu se jagħmlu qabel it-​tmiem taʼ din is-​sistema dinjija. Hu qal: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.” (Mattew 24:​3, 14) Kull sena, ix-​Xhieda taʼ Ġeħova jqattgħu iktar minn biljun siegħa jippridkaw l-​aħbar tajba tas-​Saltna t’Alla. Imma kont taf li l-​anġli wkoll huma involuti f’dan ix-​xogħol? L-​appostlu Ġwanni rrefera għal viżjoni li kellu meta qal: “Rajt anġlu ieħor . . . , u kellu aħbar tajba taʼ dejjem biex ixandarha bħala bxara taʼ ferħ lil dawk li jgħammru fuq l-​art, u lil kull ġens u tribù u lsien u poplu.” (Rivelazzjoni 14:​6, 7) Din l-​iskrittura tenfasizza l-​iktar xogħol importanti li jagħmlu l-​anġli għall-​bnedmin illum.

Ix-Xhieda taʼ Ġeħova jaraw evidenza tad-​direzzjoni anġelika hekk kif iwettqu x-​xogħol taʼ l-​ippridkar tagħhom minn bieb għal bieb. Spiss jikkuntattjaw individwi li kienu għadhom kif talbu biex xi ħadd jgħinhom jifhmu l-​iskopijiet t’Alla. B’riżultat tal-​gwida anġelika u l-​inizjattiva tax-​Xhieda infushom, kull sena mijiet t’eluf isiru jafu lil Ġeħova. Jalla int tibbenefika minn dan ix-​xogħol li jsalva l-​ħajjiet u li qed isir taħt id-​direzzjoni taʼ l-​anġli.

L-​Anġli Jesegwixxu l-​Ġudizzju t’Alla

Għalkemm m’humiex awtorizzati biex jiġġudikaw lill-​bnedmin, l-​anġli m’humiex biss osservaturi. (Ġwanni 5:22; Ebrej 12:​22, 23) Huma qdew bħala esekuturi meta wettqu l-​ġudizzji t’Alla fil-​passat. Per eżempju, Alla uża lill-​anġli fil-​ġlieda tiegħu kontra l-​Eġizzjani tal-​qedem, li żammew lill-​Iżraelin fil-​jasar. (Salm 78:49) U kien f’lejl wieħed li “l-​anġlu tal-​Mulej” qered mija u ħamsa u tmenin elf suldat f’kamp taʼ l-​għadu tal-​poplu t’Alla.​—2 Slaten 19:35.

Fil-futur ukoll, l-​anġli se jesegwixxu l-​ġudizzju t’Alla kontra l-​ħżiena. Ġesù se jiġi “maʼ l-​anġli setgħana tiegħu f’nar iħeġġeġ, hekk kif iġib vendetta fuq dawk li ma jafux lil Alla u dawk li ma jobdux l-​aħbar tajba.” (2 Tessalonikin 1:​7, 8) Però, din il-​qerda se tinġieb biss fuq dawk li ma jwiġbux għall-​messaġġ li issa qed jiġi pridkat madwar id-​dinja bl-​appoġġ taʼ l-​anġli. Dawk li jfittxu lil Alla u jobdu t-​tagħlim Skritturali mhux se jġarrbu ħsara.​—Sofonija 2:3.

Kemm nistgħu nkunu grati għall-​anġli leali li dejjem iwettqu l-​istruzzjonijiet t’Alla! Ġeħova jużahom biex jgħinu u jipproteġu lill-​qaddejja leali tiegħu fuq l-​art. Dan hu taʼ faraġ partikolarment għalina minħabba li hemm ħlejjaq spirti perikolużi msejħin demonji li jixtiequ jagħmlulna l-​ħsara.

Id-​Demonji ​—Min Huma?

Matul il-​15-il seklu wara li Satana qarraq b’Eva fil-​ġnien t’Għeden, il-​familja t’anġli t’Alla osservat li Satana x-​Xitan irnexxielu jdawwar lill-​bnedmin kollha ħlief lil ftit uħud leali bħal Abel, Ħenok, u Noè milli jaqdu lil Alla. (Ġenesi 3:​1-7; Ebrej 11:​4, 5, 7) Xi wħud mill-​anġli wkoll ċedew għall-​influwenza taʼ Satana. Il-​Bibbja tirreferi għalihom bħala l-​ispirti li kienu diżubbidjenti “fi żmien Noè.” (1 Pietru 3:​19, 20) Id-​diżubbidjenza tagħhom kif saret evidenti?

Fi żmien Noè numru mhux speċifikat t’anġli ribellużi telqu l-​post tagħhom fil-​familja t’Alla fis-​smewwiet, niżlu fuq l-​art, u ħadu sura taʼ bnedmin. Għala? Kienu żviluppaw xewqa biex ikollhom relazzjonijiet sesswali man-​nisa. Dan wassal biex nisslu tfal li ġew imsejħin in-​Nefilim, li saru ġganti vjolenti. Iżjed minn hekk, “il-​ħażen tal-​bnedmin kien kiber fuq l-​art; u f’qalbu ma kienx għajr li jfassal il-​ħażen il-​jum kollu.” Però, Alla Ġeħova ma ħalliex li din il-​korruzzjoni taʼ l-​umanità tibqaʼ għaddejja. Hu ġab Dilluvju globali li kaxkar u qered lill-​ħżiena kollha flimkien man-​Nefilim. L-​uniċi bnedmin li baqgħu ħajjin kienu l-​qaddejja leali t’Alla.​—Ġenesi 6:​1-7, 17; 7:23.

L-anġli ribellużi skansaw il-​qerda fi żmien id-​Dilluvju. Huma abbandunaw l-​iġsma umani tagħhom u rritornaw lejn il-​qasam taʼ l-​ispirti bħala ħlejjaq spirti. Minn dakinhar ’il quddiem, huma ġew imsejħin demonji. Huma żammew man-​naħa taʼ Satana x-​Xitan, li hu msejjaħ “il-​ħakkiem tad-​demonji.” (Mattew 12:​24-27) Bħall-​ħakkiem tagħhom, id-​demonji jixxennqu għall-​qima tal-​bnedmin.

Id-demonji huma perikolużi, imma m’għandniex għalfejn nibżgħu minnhom. Il-​qawwa tagħhom hi limitata. Meta l-​anġli diżubbidjenti rritornaw fis-​smewwiet, huma ma tħallewx jerġgħu jsiru parti mill-​familja t’Alla t’anġli leali. Minflok, huma nqatgħu minn kwalunkwe tidwil spiritwali t’Alla, b’futur mudlam biss quddiemhom. Tabilħaqq, huma kienu mitfugħin fi dlam spiritwali msejjaħ Tartaru. (2 Pietru 2:4) Ġeħova żammhom “marbutin għal dejjem,” u għalhekk huma jinsabu fi dlam spiritwali. Barra minn hekk, issa ma jistgħux jieħdu sura taʼ bnedmin.​—Ġuda 6.

X’Għandek Tagħmel?

Għad għandhom influwenza d-​demonji fuq il-​bnedmin? Iva, huma jużaw “tnassis,” jew makakkeriji, bħal dak li juża l-​ħakkiem tagħhom, Satana x-​Xitan. (Efesin 6:​11, 12) Madankollu, jekk napplikaw il-​parir tal-​Kelma t’Alla nistgħu nieħdu waqfa soda kontra d-​demonji. Iktar minn hekk, dawk li jħobbu lil Alla jaqgħu taħt il-​protezzjoni taʼ l-​anġli setgħana.

Kemm hu vitali li titgħallem dak li jirrikjedi Alla skond l-​Iskrittura u taġixxi fuq dak li titgħallem! Int tistaʼ titgħallem iktar dwar it-​tagħlim tal-​Bibbja billi tikkuntattja lix-​Xhieda taʼ Ġeħova fl-​inħawi tiegħek jew billi tikteb lill-​pubblikaturi taʼ din ir-​rivista. Ix-​Xhieda taʼ Ġeħova se jkunu ferħanin jistudjaw il-​Bibbja miegħek mingħajr ħlas u f’ħin li hu konvenjenti għalik.

[Nota taʼ taħt]

[Kaxxa f’paġna 6]

L-​ANĠLI​—KIF INHUMA ORGANIZZATI

Ġeħova għandu l-​familja anġelika kbira tiegħu organizzata b’dan il-​mod:

L-anġlu li għandu l-​iktar qawwa u awtorità hu Mikiel l-​arkanġlu, jew Ġesù Kristu. (1 Tessalonikin 4:16; Ġuda 9) Is-​serafini, il-​kerubini, u l-​anġli l-​oħra huma taħtu.

Is-​serafini għandhom pożizzjoni għolja ħafna fl-​arranġament t’Alla. Huma jaqdu bħala ministri ħdejn it-​tron t’Alla. L-​inkarigu tagħhom jinkludi li jiddikjaraw il-​qdusija t’Alla u jżommu l-​poplu tiegħu nadif spiritwalment.​—Isaija 6:​1-3, 6, 7.

Il-​kerubini huma assoċjati mat-​tron t’Alla u jappoġġaw il-​maestà taʼ Ġeħova.​—Salm 80:2 (80:​1, NW); 99:1; Eżekjel 10:​1, 2.

L-anġli l-​oħra huma l-​aġenti taʼ Ġeħova, u jwettqu r-​rieda divina tiegħu.

[Stampa f’paġna 4]

L-​anġli ħadu lil Lot u lill-​bniet tiegħu fis-​sigurtà

[Stampa f’paġna 5]

Meta l-​appostlu Ġwanni pprova jqim lill-​anġlu, dan qallu: “Tagħmilx hekk!”

[Stampa f’paġna 6]

L-​anġli jesegwixxu l-​ġudizzju t’Alla

[Stampa f’paġna 7]

Qiegħed int tibbenefika mix-​xogħol taʼ l-​ippridkar li qed isir taħt id-​direzzjoni taʼ l-​anġli?