L-​Iskop t’Alla għall-​Art—Dalwaqt Se Jitwettaq

META Adam u Eva kienu għadhom fil-​Ġenna taʼ l-​art, huma rċivew dan il-​kmand mingħand Alla: “Nisslu u oktru, u imlew l-​art, u aħkmuha; u saltnu fuq il-​ħut tal-​baħar u t-​tajr taʼ l-​ajru u l-​ħlejjaq kollha li jitkaxkru fuq l-​art.”​—Ġenesi 1:​28.

Il-fatt li jaħkmu fuq l-​art ma kienx ifisser li sempliċement jikkultivaw jew jieħdu ħsieb parti żgħira biss taʼ l-​art. Adam u Eva u nisilhom kellhom jestendu l-​Ġenna taʼ l-​art sakemm din timla d-​dinja kollha. Madankollu, l-​ewwel koppja umana dinbu u tkeċċew mill-​ġnien taʼ l-​Għeden. (Ġenesi 3:​23, 24) Iżda dan ma kienx ifisser li l-​art qatt ma kellha tinħakem.

Minħabba li se jiġu mberkin minn Alla, bnedmin ubbidjenti se jkunu jistgħu jaħkmu fuq l-​art. Meta n-​nies taʼ Iżrael tal-​qedem kellhom l-​approvazzjoni t’Alla, ir-​rabaʼ tagħhom ipproduċa ħsad mill-​aqwa u l-​ġonna tagħhom taw frott bnin. Kundizzjonijiet simili se jkunu jeżistu hekk kif id-​dinja ssir ġenna taʼ l-​art bil-​mod il-​mod. Bħalma ġie mwiegħed fil-​Kelma mnebbħa t’Alla, il-​Bibbja, ‘l-​art tagħti l-​frott tagħha; iberikna Alla, Alla tagħna!’ (Salm 67:7 [67:​6, NW]) Fil-​fatt, il-​mergħat u l-​muntanji, is-​siġar u l-​fjuri, ix-​xmajjar u l-​ibħra taʼ l-​art se jifirħu. (Salm 96:​11-​13; 98:​7-9) Id-​dinja tagħna se tkun ħajja b’veġetazzjoni li tiffjorixxi, għasafar kollhom ilwien, annimali meraviljużi, u bnedmin taʼ qalb tajba.

Dinja Ġdida fil-​Qrib!

Bħalissa ninsabu fuq l-​għatba taʼ dinja ġdida mwiegħda minn Alla Ġeħova. “Hemm smewwiet ġodda u art ġdida li aħna qed nistennew skond il-​wegħda tiegħu,” kiteb l-​appostlu Pietru, “u f’dawn tgħammar il-​ġustizzja.” (2 Pietru 3:​13) Wara li jaqraw dan il-​kliem taʼ Pietru, xi wħud jistgħu jikkonkludu li din il-​pjaneta qatt ma se ssir ġenna taʼ l-​art. Forsi jaħsbu li xi ħaġa oħra se tieħu post is-​smewwiet u l-​art letterali. Jistaʼ jkun dan?

X’inhuma s-​“smewwiet ġodda”? Dawn m’humiex is-​smewwiet letterali li ġew maħluqin minn Alla. (Salm 19:​2, 3 [19:​1, 2, NW]) Pietru kien għadu kif irrefera għal “smewwiet” simboliċi​—gvernijiet umani li jiġu mgħollijin ’il fuq jew eżaltati fuq is-​sudditi tagħhom. (2 Pietru 3:​10-​12) Dawn is-​“smewwiet” ma rnexxilhomx jaħkmu fuq l-​umanità u se jintemmu. (Ġeremija 10:23; Danjel 2:​44) Is-​“smewwiet ġodda” li se jiħdulhom posthom huma s-​Saltna t’Alla magħmula mis-​Sultan Ġesù Kristu u l-​144,000 werrieta sħabu rxoxtati għall-​ħajja fis-​sema.​—Rumani 8:​16, 17; Rivelazzjoni 5:​9, 10; 14:​1, 3.

L-“art ġdida” li semma Pietru m’hijiex xi pjaneta ġdida. Ġeħova għamel l-​art perfetta sabiex il-​bnedmin jgħixu fiha għal dejjem. (Salm 104:5) Xi drabi l-​Bibbja tuża l-​kelma “art” biex tirreferi għan-​nies. (Ġenesi 11:1) L-​art li dalwaqt se tinqered tikkonsisti f’nies li għamlu lilhom infushom parti minn din id-​dinja mill-​agħar. B’mod simili, dinja taʼ nies bla devozzjoni lejn Alla sofriet qerda fid-​Dilluvju taʼ żmien Noè. (2 Pietru 3:​5-7) Allura x’inhi l-​“art ġdida”? Din hija soċjetà ġdida taʼ bnedmin​—l-​aduraturi veri t’Alla li huma “taʼ qalbhom safja.” (Salm 125:4; 1 Ġwanni 2:​17) Il-​liġijiet kollha għall-​“art ġdida” se jiġu mis-​“smewwiet ġodda.” Irġiel leali fuq l-​art se jaraw li dawn il-​liġijiet jiġu mitmuma.

Bidliet Ġodda u taʼ l-​Għaġeb!

Ċertament, Ġeħova tana post mill-​aqwa fejn ngħixu meta hu ħejja l-​art għall-​ħajja umana. Hu nnifsu qal li x-​xogħol tiegħu fit-​tħejjija taʼ l-​art kien “tajjeb ħafna.” (Ġenesi 1:​31) Satana x-​Xitan wassal lil Adam u Eva għar-​ribelljoni. (Ġenesi 3:​1-5; Rivelazzjoni 12:9) Madankollu, Alla dalwaqt se jieħu azzjoni sabiex l-​uħud retti jkollhom il-​“ħajja vera.” Din tfisser “ħajja taʼ dejjem” f’kundizzjonijiet perfetti fil-​Ġenna taʼ l-​art. (1 Timotju 6:​12, 19) Ejja issa nikkunsidraw xi ftit mill-​barkiet li se jgawdu l-​bnedmin f’dak iż-​żmien.

Matul ir-​Renju t’Elf Sena taʼ Kristu, Satana se jkun imrażżan u mhux se jkun jistaʼ jġib għawġ fuq l-​umanità. L-​appostlu Ġwanni jgħid: “Rajt anġlu [l-arkanġlu Mikiel, jew Ġesù Kristu] nieżel mis-​sema bil-​muftieħ taʼ l-​abbiss u b’katina kbira f’idu. U ħataf lid-​dragun, is-​serp oriġinali, li hu x-​Xitan u Satana, u rabtu għal elf sena. U xeħtu fl-​abbiss, li mbagħad għalqu fih u ssiġillah, biex ma jqarraqx iktar bil-​ġnus sakemm jintemmu l-​elf sena.” (Rivelazzjoni 20:​1-3; 12:12) Minbarra l-​ħelsien mill-​influwenza taʼ Satana waqt li qiegħed fl-​abbiss, l-​umanità se tgawdi ħafna iktar barkiet taħt il-​ħakma tas-​Saltna.

Il-ħażen, il-​vjolenza, u l-​gwerer se jkunu affarijiet tal-​passat. Il-​Bibbja twiegħed: “Ftit ieħor, u l-​ħażin ma jkunx aktar; għad tħares fejn kien u ma ssibux. Imma l-​ġwejdin għad jirtu l-​art, u bi sliem kotran jitgħaxxqu. Il-​ġusti jirtu l-​art, u jgħammru fiha għal dejjem.” (Salm 37:​10, 11, 29) Alla Ġeħova se “jwaqqaf il-​gwerer sa truf l-​art.” (Salm 46:10 [46:​9, NW]) X’assigurazzjoni mill-​aqwa taʼ sigurtà u paċi!

Abbundanza taʼ ikel sustanzjuż u bnin se jkun disponibbli. “Ikun kotran il-​qamħ fuq l-​art,” kanta s-​salmista. “Jogħla sal-​qċaċet taʼ l-​għoljiet.” (Salm 72:16) F’dak iż-​żmien, ħadd m’hu se jkollu jissaporti t-​tbatija kbira minħabba l-​ġuħ.

Ħadd m’hu se jsofri minn mard u pesti. Tassew, “ħadd minn min jgħammar hemm ma jgħid: ‘Jien marid.’” (Isaija 33:24; 35:​5, 6) Meta Ġesù Kristu kien fuq l-​art, hu fejjaq lill-​imġiddmin, lill-​magħtubin, u lill-​għomja. (Mattew 9:​35; Marku 1:​40-​42; Ġwanni 5:​5-9) Immaġina x’se jagħmel fid-​dinja l-​ġdida! Aħseb dwar kemm se jkun hemm ferħ meta l-​għomja, it-​torox, il-​magħtubin, u l-​imbikkmin se jiġu mfejqin.

Hekk kif il-​bnedmin ubbidjenti jersqu lejn il-​perfezzjoni umana, l-​effetti koroh tax-​xjuħija se jiġu mreġġgħin lura. Mhux se jkun hemm iktar bżonn taʼ nuċċalijiet, bsaten, krozzi, siġġijiet tar-​roti, sptarijiet, u mediċini. Immaġina x’bidliet se jkun hemm hekk kif is-​saħħa taż-​żgħożija tiġi restawrata! (Ġob 33:25) Kull fil-​għodu se nqumu minn raqda mistrieħa, rifreskati u mħejjijin biex nibdew ġurnata oħra t’attività ferriħija.

L-irxoxt taʼ wħud għeżież u t’oħrajn se jferraħ lil qlubna. (Ġwanni 5:​28, 29; Atti 24:15) Kemm se jkun eċċitanti li nilqgħu lil Abel, Noè, Abraham, Sara, Ġob, Mosè, Rut, David, Elija, Ester, u ħafna oħrajn! Miljuni taʼ nies oħra se jiġu rxoxtati wkoll. Ħafna minnhom qatt ma tgħallmu dwar Ġeħova iżda se jiġu milqugħin minn uħud xewqana li jgħallmuhom dwar Alla, l-​iskopijiet tiegħu, u dwar Ibnu, Ġesù Kristu. Hekk kif l-​uħud irxoxtati jsiru jafu lill-​Ħallieq tagħhom, l-​għarfien dwar Ġeħova verament se jiksi l-​art.

Fuq kollox, aħna se nkunu nistgħu nqimu lill-​uniku Alla veru għal dejjem. Se jkollna l-​privileġġ li ‘naqdu bil-​ferħ lill-​Mulej,’ u se naħdmu flimkien f’armonija hekk kif nibnu djar mill-​isbaħ, nagħżqu l-​ħamrija, u fl-​aħħar mill-​aħħar, naħkmu l-​art kollha. (Salm 100:​1-3; Isaija 65:​21-​24) X’għaxqa se tkun li ngħixu għal dejjem f’Ġenna taʼ l-​art produttiva, mimlija paċi u sabiħa, li ġġib unur lill-​isem qaddis taʼ Ġeħova!​—Salm 145:21; Ġwanni 17:3.

Test Finali għall-​Umanità

Matul ir-​Renju tiegħu t’Elf Sena, Ġesù se japplika l-​benefiċċji tas-​sagrifiċċju tal-​fidwa tiegħu lil kull bniedem ubbidjenti. Maż-​żmien, id-​dnub kollu se jitneħħa, u l-​umanità se tinġieb għall-​perfezzjoni. (1 Ġwanni 2:2; Rivelazzjoni 21:​1-4) Meta l-​effetti tad-​dnub taʼ Adam ikunu spiċċaw kompletament, bnedmin perfetti se jilħqu l-​livelli t’Alla fiżikament, mentalment, moralment, u spiritwalment. Għalhekk huma ‘jieħdu l-​ħajja’ bl-​iktar mod sħiħ meta jilħqu l-​perfezzjoni bla dnub. (Rivelazzjoni 20:5) Kemm se jigglorifika lil Ġeħova dan flimkien mal-​Ġenna taʼ l-​art!

Wara li r-​Renju t’Elf Sena taʼ Kristu jkun intemm, Satana x-​Xitan u d-​demonji tiegħu, jew l-​anġli ħżiena, se jinħelsu għal żmien qasir mill-​abbiss li fih ġew mitfugħin xi għaxar sekli qabel. (Rivelazzjoni 20:​1-3) Huma se jitħallew jagħmlu sforz aħħari biex ibiegħdu lin-​nies minn Alla. Għalkemm xi wħud se jċedu għal xewqat ħżiena, din ir-​ribelljoni se tfalli. Ġeħova se jeqred lil dawk li jirribellaw flimkien maʼ Satana u d-​demonji kollha tiegħu. Il-​ħażen qatt m’hu se jerġaʼ jfeġġ. Dawk kollha li jikkommettu l-​ħażen se jgħibu għal dejjem, u l-​ġusti se jirċievu ħajja taʼ dejjem.​—Rivelazzjoni 20:​7-​10.

Int Se Tkun Hemm?

Hemm eternità taʼ hena tistenna lil dawk li jħobbu lil Alla Ġeħova. M’hu se jkun hemm ebda ħaġa taʼ dwejjaq fil-​ħajja taʼ dejjem f’Ġenna taʼ l-​art. Fil-​fatt, mal-​medda taż-​żmien, il-​ħajja se ssir iktar interessanti, għax m’hemmx limitu għall-​għarfien t’Alla Ġeħova. (Rumani 11:33) Dejjem se jkollok xi ħaġa ġdida x’titgħallem u se jkollok bosta ħin biex tieħu l-​għarfien. Għala? Għax int se tgħix, mhux għal 70 jew 80 sena biss, iżda għal dejjem.​—Salm 22:27 (22:​26, NW); 90:10; Koħèlet 3:​11.

Jekk tħobb lil Alla, dejjem se tkun tassew hieni li tagħmel ir-​rieda tiegħu. L-​appostlu Ġwanni kiteb: “L-​imħabba t’Alla tfisser dan: li nosservaw il-​kmandamenti tiegħu; u madankollu l-​kmandamenti tiegħu m’humiex tqal.” (1 Ġwanni 5:3) Mela, billi tagħmel dak li hu ġust, tħalli xejn iwaqqfek milli togħġob lil Alla Ġeħova. Żomm f’moħħok it-​tama mill-​isbaħ li tagħtik il-​Kelma t’Alla, il-​Bibbja. Kun determinat li tagħmel ir-​rieda taʼ Ġeħova u qatt iddur lura minn din il-​korsa. Imbagħad int tkun preżenti meta jitwettaq l-​iskop t’Alla għall-​art u d-​dar globali tagħna tkun saret ġenna taʼ l-​art għall-​eternità.

[Stampa f’paġna 4]

Bil-​barka t’Alla, ir-​rabaʼ taʼ Iżrael kien produttiv ħafna

[Stampa f’paġna 7]

Liema barkiet tittama int li tgawdi fil-​Ġenna taʼ l-​art?