Mistoqsijiet mill-​Qarrejja

Fil-​Liġi Mosajka, ċerti funzjonijiet sesswali naturali, għala kienu meqjusin bħala li jagħmlu lil individwu “mniġġes”?

Alla ħalaq is-​sess kemm għar-​riproduzzjoni tar-​razza umana kif ukoll għall-​pjaċir tal-​koppji miżżewġin. (Ġenesi 1:28; Proverbji 5:​15-18) Madankollu, f’kapitli 12 u 15 taʼ Levitiku nsibu liġijiet dettaljati dwar in-​nuqqas taʼ ndafa li għandhom x’jaqsmu mat-​tixrid taż-​żerriegħa tar-​raġel, il-​mestrwazzjoni tal-​mara, u t-​twelid tat-​tfal. (Levitiku 12:​1-6; 15:​16-24) Liġijiet bħal dawn, li ngħataw lil Iżrael tal-​qedem, kienu jinkuraġġixxu stil taʼ ħajja li jżommhom f’saħħithom, kienu jappoġġaw valuri morali għoljin, u kienu jenfasizzaw il-​qdusija tad-​demm u l-​bżonn tat-​tpattija għad-​dnubiet.

Fost affarijiet oħrajn, il-​ħtiġijiet tal-​Liġi Mosajka dwar il-​funzjonijiet sesswali tejbu s-​saħħa ġenerali tal-​komunità Iżraelija. Il-​ktieb The Bible and Modern Medicine jgħid: “Ir-​regola li tipprojbixxi r-​relazzjonijiet sesswali waqt iż-​żmien tal-​mestrwazzjoni tat prova li hija prevenzjoni effettiva kontra ċertu mard trasmess sesswalment . . . kif ukoll żgur li serviet taʼ protezzjoni kontra l-​formazzjoni u l-​iżvilupp taʼ kanċer fl-​għonq taʼ l-​utru.” Liġijiet bħal dawn ipproteġew lill-​poplu t’Alla minn mard li forsi ma kinux jafu bih jew saħansitra li ma kinux jindunaw bih. Indafa sesswali tajba żiedet il-​fertilità tal-​poplu li kien ġie mbierek minn Alla b’wegħda li kien se jkollu żjieda u prosperità. (Ġenesi 15:5; 22:17) Liġijiet bħal dawn kienu jipproteġu wkoll is-​saħħa emozzjonali tal-​poplu t’Alla. Minħabba li kienu jobdu dawn il-​liġijiet, l-​irġiel u n-​nisa miżżewġin tgħallmu jikkontrollaw il-​passjoni sesswali.

Il-kwistjoni primarja li kienet involuta fit-​tipi taʼ nuqqas taʼ ndafa li jirriżultaw minn affarijiet sesswali, madankollu, kienet it-​tnixxija jew it-​telf tad-​demm. Il-​liġijiet taʼ Ġeħova dwar id-​demm mhux biss daħħlu l-​qdusija tad-​demm fl-​imħuħ taʼ l-​Iżraelin, imma wkoll li d-​demm għandu post speċjali fil-​qima taʼ Ġeħova, jiġifieri, fis-​sagrifiċċji u t-​tpattija tad-​dnubiet.​—Levitiku 17:11; Dewteronomju 12:​23, 24, 27.

Il-ħtiġijiet dettaljati tal-​Liġi f’dan ir-​rigward, għalhekk, huma relatati mill-​qrib maʼ l-​imperfezzjoni tal-​bniedem. L-​Iżraelin kienu jafu li Adam u Eva​—wara li dinbu​—ma setgħux ikollhom tfal perfetti. Id-​dixxendenti kollha tagħhom kellhom isofru mill-​effetti tad-​dnub li wirtu​—l-​imperfezzjoni u l-​mewt. (Rumani 5:12) Għaldaqstant, il-​ġenituri jistgħu biss inisslu ħajja imperfetta u midinba, avolja l-​organi riproduttivi tal-​bniedem kienu oriġinalment disinjati biex inisslu ħajja perfetta permezz taʼ l-​arranġament taż-​żwieġ.

Il-ħtiġijiet tal-​purifikazzjoni tal-​Liġi kellhom ifakkru lill-​Iżraelin mhux biss fid-​dnub li wirtu, imma wkoll fil-​bżonn taʼ sagrifiċċju għall-​fidwa biex jgħatti d-​dnubiet u jirrestawra l-​perfezzjoni tal-​bniedem. Naturalment, is-​sagrifiċċji taʼ l-​annimali li offrew ma wettqux dan. (Ebrej 10:​3, 4) L-​iskop tal-​Liġi Mosajka kien li jwassalhom għal Kristu u jgħinhom jifhmu li kien biss permezz tas-​sagrifiċċju uman u perfett taʼ Ġesù li l-​maħfra vera kienet possibbli sabiex tiftaħ it-​triq għal ħajja taʼ dejjem lil uħud leali.​—Galatin 3:24; Ebrej 9:​13, 14.