“Ħallu lil Alla Jkun Jaf X’Teħtieġu”

“F’kollox b’talb u b’suppliki flimkien maʼ radd il-​ħajr ħallu lil Alla jkun jaf x’teħtieġu.”—FILIPPIN 4:6.

1. Maʼ min għandna l-​privileġġ li nikkomunikaw, u din għala hi xi ħaġa taʼ l-​għaġeb?

LI KIEKU kellek tistaqsi biex ikollok laqgħa mal-​ħakkiem taʼ pajjiżek, x’risposta se tirċievi? Għandek mnejn tirċievi risposta edukata minn xi ħadd li jaħdem għalih, imma x’aktarx li m’intix se tingħata permess biex titkellem mal-​ħakkiem innifsu. Madankollu, maʼ l-​akbar Ħakkiem, Alla Ġeħova, is-​Sovran taʼ l-​univers, is-​sitwazzjoni hija differenti. Aħna nistgħu nkellmuh inkunu fejn inkunu u fi kwalunkwe ħin li rridu. Talb aċċettabbli dejjem se jasal għandu. (Proverbji 15:29) Din verament hija xi ħaġa taʼ l-​għaġeb! M’għandux l-​apprezzament tagħna għal dan iqanqalna biex nitolbu regolarment lill-​Wieħed li b’mod ġust jissejjaħ Semmiegħ it-​talb?​—Salm 65:3 (65:​2, NW).

2. X’hemm bżonn biex it-​talb ikun aċċettabbli għal Alla?

² Madankollu, xi ħadd forsi jistaqsi, ‘Liema talb hu aċċettabbli għal Alla?’ Il-​Bibbja tispjega xi ħaġa li hija neċessarja biex it-​talb ikun aċċettabbli meta tgħid: “Mingħajr fidi impossibbli li togħġbu sew, għax min jersaq lejn Alla jrid jemmen li hu jeżisti u li jippremja lil dawk li jfittxuh bil-​ħeġġa.” (Ebrej 11:6) Iva, bħalma ġie spjegat fl-​artiklu taʼ qabel, fattur fundamentali biex navviċinaw lil Alla hu l-​fidi. Alla lest li jaċċetta t-​talb taʼ dawk li javviċinawh, imma jridu jagħmlu dan bil-​fidi u b’għemejjel tajbin flimkien mas-​sinċerità u attitudni xierqa tal-​qalb.

3. (a) Bħalma nistgħu naraw mit-​talb taʼ qaddejja leali tal-​qedem, liema tip t’espressjonijiet jistgħu jkunu inklużi fit-​talb? (b) X’tipi differenti taʼ talb hemm?

³ L-​appostlu Pawlu ħeġġeġ lill-​Kristjani fi żmienu: “Tkunu ansjużi fuq xejn, imma f’kollox b’talb u b’suppliki flimkien maʼ radd il-​ħajr ħallu lil Alla jkun jaf x’teħtieġu.” (Filippin 4:​6, 7) Il-​Bibbja fiha ħafna eżempji taʼ dawk li kienu jmorru għand Alla bit-​talb b’dak li jkun qed jinkwetahom. Fost dawn l-​uħud kien hemm Anna, Elija, Ħeżekija, u Danjel. (1 Samwel 2:​1-10; 1 Slaten 18:​36, 37; 2 Slaten 19:​15-19; Danjel 9:​3-21) Aħna għandna nsegwu l-​eżempju tagħhom. Innota wkoll li l-​kliem taʼ Pawlu juri li hemm diversi tipi taʼ talb. Hu semma r-​radd il-​ħajr, jiġifieri, talb li fih nesprimu apprezzament għal dak li Alla jagħmel għalina. Dan jistaʼ jkun akkumpanjat bit-​tifħir. Is-​suppliki jirreferu għal talb umli u ħerqan. U nistgħu nesprimu x’neħtieġu, jew noffru rikjesti għal affarijiet speċifiċi. (Luqa 11:​2, 3) Missierna tas-​sema hu ferħan li jaċċetta kwalunkwe wieħed minn dawn it-​tipi taʼ talb.

4. Għalkemm Ġeħova jaf il-​bżonnijiet tagħna, għala xorta nuruh dak li għandna bżonn?

⁴ Xi wħud forsi jistaqsu, ‘Ġeħova mhux diġà jaf dak kollu li għandna bżonn?’ Iva, hu diġà jaf. (Mattew 6:​8, 32) Allura, għala xorta jridna navviċinawh bil-​petizzjonijiet tagħna? Ikkunsidra dan l-​eżempju: Sid taʼ ħanut forsi joffri rigal lil xi wħud mill-​konsumaturi tiegħu. Madankollu, biex jieħdu dan ir-​rigal, il-​konsumaturi jridu jmorru għand is-​sid u jitolbuhulu. Dawk li ma jridux jagħmlu l-​isforz juru li mhux veru japprezzaw l-​offerta. B’mod simili, li kieku ma nurux dak li għandna bżonn fit-​talb, inkunu qed nuru nuqqas t’apprezzament għal dak li jipprovdi Ġeħova. Ġesù qal: “Itolbu u taqilgħu.” (Ġwanni 16:24) B’dan il-​mod, aħna nuru li nistrieħu fuq Alla.

Kif Għandna Navviċinaw lil Alla?

5. Għala għandna nitolbu f’isem Ġesù?

⁵ Ġeħova ma jagħtinix ħafna regoli riġidi dwar kif għandna nitolbu. Minkejja dan, irridu nitgħallmu kif navviċinaw lil Alla b’mod xieraq, kif turina l-​Bibbja. Per eżempju, Ġesù għallem lis-​segwaċi tiegħu: “Jekk titolbu xi ħaġa lill-​Missier, jagħtihielkom f’ismi.” (Ġwanni 16:23) Għalhekk, aħna rridu nitolbu f’isem Ġesù, billi nagħrfu li Ġesù hu l-​uniku mezz li permezz tiegħu l-​umanità kollha tgawdi mill-​barkiet t’Alla.

6. Meta nitolbu, f’liema pożizzjoni għandna noqogħdu?

⁶ F’liema pożizzjoni għandna noqogħdu biex nitolbu? Il-​Bibbja ma tgħid xejn dwar xi pożizzjoni speċifika biex it-​talb tagħna jinstemaʼ. (1 Slaten 8:22; Neħemija 8:6; Marku 11:25; Luqa 22:41) L-​importanti hu li nitolbu lil Alla bis-​sinċerità u b’attitudni xierqa tal-​qalb.​—Ġoel 2:​12, 13.

7. (a) Xi tfisser il-​kelma “amen”? (b) Kif inhi użata b’mod xieraq fit-​talb?

⁷ Xi ngħidu dwar l-​użu tal-​kelma “amen”? L-​Iskrittura tindika li din ġeneralment hija konklużjoni xierqa għat-​talb tagħna, speċjalment meta nitolbu fil-​pubbliku. (Salm 72:19; 89:53 [89:​52, NW]) Il-​kelma Ebrajka amen bażikament tfisser “żgur.” Is-​Cyclopedia taʼ McClintock u Strong tispjega li t-​tifsira tal-​kelma “Amen” fi tmiem it-​talb hi “biex tikkonferma l-​kliem li tkun għedt, u biex titlob għat-​twettiq tagħhom.” B’hekk, billi jikkonkludi b’“Amen” sinċiera, dak li jkun qed jitlob juri s-​sentimenti qawwijin tiegħu dwar dak li jkun għadu kif qal. Meta Kristjan li jkun qed jirrappreżenta l-​kongregazzjoni bit-​talb jikkonkludi b’din l-​espressjoni, dawk li jkunu qed jisimgħu jistgħu wkoll jgħidu “Amen” f’qalbhom jew bil-​kliem biex jindikaw li jaqblu kompletament maʼ dak li jkun intqal.​—1 Korintin 14:16.

8. Xi ftit mit-​talb tagħna kif jistaʼ jixbah lit-​talb taʼ Ġakobb jew Abraham, u dan x’juri dwarna?

⁸ Hemm drabi meta Alla forsi jħallina nuru kemm verament jinteressawna l-​kwistjonijiet li nkunu qed nitolbu dwarhom. Forsi jkollna nsiru bħal Ġakobb tal-​qedem, li ssielet lejl sħiħ m’anġlu biex jaqlaʼ barka. (Ġenesi 32:​25-27 [32:​24-26, NW]) Jew xi ċirkustanzi forsi jirrikjedu li nsiru bħal Abraham, li darba wara l-​oħra appella lil Ġeħova għan-​nom taʼ Lot u kwalunkwe persuna ġusta oħra li forsi kienet f’Sodoma. (Ġenesi 18:​22-33) Bl-​istess mod, aħna nistgħu nitolbu lil Ġeħova dwar affarijiet li huma prezzjużi għalina, billi nappellaw fuq il-​bażi tal-​ġustizzja, il-​qalb tajba bl-​imħabba, u l-​ħniena tiegħu.

Għal Xiex Nistgħu Nistaqsu?

9. X’għandhom ikunu l-​interessi ewlenin tagħna meta nitolbu?

⁹ Ftakar li Pawlu qal: “F’kollox . . . ħallu lil Alla jkun jaf x’teħtieġu.” (Filippin 4:6) Għalhekk, it-​talb persunali jistaʼ jmiss kull aspett tal-​ħajja. Madankollu, l-​interess ewlieni tagħna fit-​talb għandu jkun f’Ġeħova. Danjel ħalla eżempju mill-​aqwa f’dan. Meta l-​ġens taʼ Iżrael kellu jbati l-​konsegwenzi tad-​dnub tiegħu, Danjel talab lil Ġeħova biex juri l-​ħniena, billi qal: “Iddumx ma tagħmel xi ħaġa għalina, Alla tiegħi, għall-​ġieħ tiegħek stess, . . . [għal] ismek.” (Danjel 9:​15-19) Juri t-​talb tagħna bl-​istess mod li t-​tqaddis taʼ l-​isem taʼ Ġeħova u t-​twettiq tar-​rieda tiegħu huwa l-​interess ewlieni tagħna?

10. Kif nafu li huwa xieraq li nitolbu dwar kwistjonijiet persunali?

¹⁰ Minkejja dan, huwa xieraq ukoll li nitolbu dwar kwistjonijiet persunali. Per eżempju, bħas-​salmista, aħna nistgħu nitolbu għal dehen spiritwali iktar profond. Hu talab: “Fehemni biex inħares il-​liġi tiegħek u nagħmilha b’qalbi kollha.” (Salm 119:​33, 34; Kolossin 1:​9, 10) Ġesù “talab bil-​ħerqa u wkoll offra petizzjonijiet lil Dak li setaʼ jsalvah mill-​mewt.” (Ebrej 5:7) Billi għamel hekk, hu wera li huwa xieraq li nitolbuh isaħħaħna meta niffaċċjaw perikli jew provi. Meta ta t-​talba mudell lid-​dixxipli tiegħu, Ġesù inkluda kwistjonijiet persunali, bħal per eżempju l-​maħfra tad-​dnubiet u l-​ikel taʼ kuljum.

11. It-​talb kif jistaʼ jgħinna ma naqgħux fit-​tentazzjoni?

¹¹ F’dik it-​talba mudell, Ġesù talab ukoll: “Iddaħħalniex fit-​tentazzjoni, imma eħlisna mill-​Ħażin.” (Mattew 6:​9-13) Hu iktar tard ta dan il-​parir: “Ibqgħu għassa u itolbu kontinwament, sabiex ma tidħlux fit-​tentazzjoni.” (Mattew 26:41) It-​talb hu essenzjali meta niffaċċjaw it-​tentazzjonijiet. Forsi niġu ttantati biex ninjoraw prinċipji Bibliċi fuq ix-​xogħol jew fl-​iskola. Uħud li m’humiex Xhieda għandhom mnejn jistidnuna biex ningħaqdu magħhom f’attivitajiet dubjużi. Forsi nintalbu nagħmlu xi ħaġa li tmur kontra prinċipji ġusti. Fi żminijiet bħal dawn, nagħmlu tajjeb jekk insegwu l-​parir taʼ Ġesù biex nitolbu​—kemm minn qabel u kif ukoll meta nkunu qed niffaċċjaw tentazzjoni​—u nistaqsu lil Alla biex jgħinna ħalli ma naqgħux fit-​tentazzjoni.

12. Liema affarijiet li jikkaġunaw l-​ansjetà jistgħu jqanqluna biex nitolbu, u x’nistgħu nistennew minn Ġeħova?

¹² Pressjonijiet u ansjetajiet differenti jqumu fil-​ħajjiet tal-​qaddejja t’Alla llum. Il-​mard u l-​istress emozzjonali huma sorsi kbar t’ansjetà għal ħafna. Kundizzjonijiet vjolenti madwarna jagħmlu l-​ħajja stressanti. Tbatijiet ekonomiċi jagħmluha diffiċli biex naqilgħu l-​għajxien. Kemm hu inkuraġġanti li nkunu nafu li Ġeħova jagħti widen lill-​qaddejja tiegħu li jmorru għandu b’dawn il-​kwistjonijiet! Salm 102:18 (102:​17, NW) jgħid hekk dwar Ġeħova: “Jismaʼ t-​talb tal-​mitluqin, ma jistmellx it-​talb tagħhom.”

13. (a) Liema kwistjonijiet persunali nistgħu nitolbu dwarhom? (b) Irrakkonta eżempju taʼ talba bħal din.

¹³ Fil-​fatt, kwalunkwe kwistjoni li teffettwa s-​servizz tagħna lil Ġeħova jew ir-​relazzjoni tagħna miegħu tistaʼ tkun suġġett xieraq għat-​talb. (1 Ġwanni 5:14) Jekk għandek deċiżjonijiet x’tieħu dwar iż-​żwieġ jew l-​impjieg jew dwar li żżid il-​ministeru tiegħek, iżżommx lura milli tmur għand Alla b’dawn l-​affarijiet, billi tistaqsih għall-​gwida tiegħu. Per eżempju, mara żagħżugħa fil-​Filippini riedet tieħu sehem fil-​ministeru full-time. Madankollu, hi ma kellhiex xogħol biex tappoġġa lilha nfisha. Hi tgħid: “Darba minnhom, is-​Sibt, tlabt lil Ġeħova speċifikament dwar ix-​xogħol taʼ pijunier. Iktar tard dik l-​istess ġurnata, meta kont fil-​ministeru, offrejt ktieb lil waħda żagħżugħa. Bla mistenni, it-​tfajla qaltli: ‘Imissek tmur l-​iskola tiegħi l-​ewwel ħaġa nhar it-​Tnejn fil-​għodu.’ Jien staqsejtha, ‘Għala?’ Hi spjegat li kienu qed ifittxu biex jimpjegaw lil xi ħadd malajr kemm jistaʼ jkun. Jien mort u ngħatajt ix-​xogħol minnufih. Kollox seħħ taʼ malajr.” Għadd taʼ Xhieda madwar id-​dinja kellhom esperjenzi simili. Għalhekk, iżżommx lura milli tmur għand Alla bit-​talb u minn qalbek tgħidlu x’teħtieġ!

Xi Ngħidu Jekk Inkunu Dnibna?

14, 15. (a) Individwu għala m’għandux iżomm lura milli jitlob anki jekk ikun dineb? (b) Flimkien mat-​talb persunali, x’hemm iktar li jistaʼ jgħin lill-​individwu jfiq spiritwalment mid-​dnub?

¹⁴ It-​talb kif jistaʼ jgħin jekk xi ħadd ikun dineb? Minħabba l-​mistħija, xi wħud li jkunu dinbu jżommu lura milli jitolbu. Madankollu, dan m’huwiex għaqli. Biex nagħtu tixbiha: Piloti taʼ l-​ajruplani jafu li jekk jintilfu, huma jistgħu jitolbu l-​għajnuna mingħand dawk li jikkontrollaw it-​traffiku taʼ l-​ajru. Però, xi ngħidu jekk pilota li jkun mitluf iżomm lura milli jikkuntattja lil dawk li jistgħu jgħinuh għaliex iħossu imbarazzat li ntilef? Dan jistaʼ jwassal għal diżastru! B’mod simili, l-​individwu li jkun dineb u hu imbarazzat biex jitlob lil Alla jistaʼ jsofri iktar ħsara. Il-​mistħija minħabba d-​dnub m’għandhiex iżżomm lil dak li jkun milli jitkellem maʼ Ġeħova. Fil-​fatt, Alla jistieden lil dawk li għamlu żbalji serji biex jitolbu lilu. Il-​profeta Isaija ħeġġeġ lill-​midinbin fi żmienu biex isejħu lil Ġeħova, “għax hu jaħfer ħafna.” (Isaija 55:​6, 7) M’għandniex xi ngħidu, dak li jkun forsi jkollu ‘jfittex l-​approvazzjoni taʼ Ġeħova’ billi l-​ewwel jumilja lilu nnifsu, idur mit-​triq midinba tiegħu, u jindem sinċerament.​—Salm 119:​58, NW; Danjel 9:13.

¹⁵ Fejn ikun hemm id-​dnub involut, it-​talb isir importanti saħansitra għal raġuni oħra. Id-​dixxiplu Ġakbu jgħid hekk dwar xi ħadd li jkollu bżonn għajnuna spiritwali: “Ħa jsejjaħ għandu lill-​anzjani tal-​kongregazzjoni, u ħa jitolbu għalih, . . . u Ġeħova jqajmu.” (Ġakbu 5:​14, 15) Iva, individwu għandu personalment jistqarr id-​dnub tiegħu lil Ġeħova bit-​talb, imma jistaʼ wkoll jistaqsi lill-​anzjani biex jitolbu għalih. Dan se jgħinu fil-​fejqan spiritwali tiegħu.

Tweġibiet għat-​Talb

16, 17. (a) Ġeħova kif iwieġeb it-​talb? (b) Liema esperjenzi juru li t-​talb u x-​xogħol taʼ l-​ippridkar huma konnessi mill-​qrib?

¹⁶ It-​talb kif jiġi mwieġeb? Xi ftit minnu jistaʼ jiġi mwieġeb malajr u b’mod ovvju. (2 Slaten 20:​1-6) Talb ieħor forsi jieħu l-​ħin, u t-​tweġibiet jistgħu jkunu naqra iktar diffiċli biex insibuhom. Bħalma naraw fit-​tixbiha taʼ Ġesù dwar l-​armla li baqgħet tmur lura għand l-​imħallef, forsi jkun hemm bżonn li nibqgħu nitolbu lil Alla. (Luqa 18:​1-8) Madankollu, aħna nistgħu nkunu ċerti li meta nitolbu fi qbil mar-​rieda t’Alla, Ġeħova qatt m’hu se jgħidilna: “Tibqax iddejjaqni.”​—Luqa 11:​5-9.

¹⁷ Il-​poplu taʼ Ġeħova spiss jara t-​tweġibiet għat-​talb tiegħu. Dan spiss jidher ċar fil-​ministeru pubbliku tagħna. Per eżempju, żewġ aħwa nisa Kristjani fil-​Filippini kienu qed iqassmu letteratura Biblika f’post fl-​imwarrab tal-​pajjiż. Meta taw fuljett lil waħda mara, għajnejha mtlew bid-​dmugħ. Hi qalet: “Il-​bieraħ fil-​għaxija tlabt lil Alla biex jibgħat lil xi ħadd ħalli jgħallimni dwar dak li tgħid il-​Bibbja, u naħseb li din hi t-​tweġiba għat-​talba tiegħi.” Ftit wara, il-​mara bdiet tattendi l-​laqgħat fis-​Sala tas-​Saltna. F’post ieħor fl-​Asja tax-​Xlokk, ħu Kristjan kien daqsxejn beżgħan biex jippriedka f’bini residenzjali li kellu sigurtà għolja. Madankollu, hu talab lil Ġeħova, għamel il-​kuraġġ, u daħal fil-​bini. Hu ħabbat il-​bieb t’appartament, u ħarġet mara żagħżugħa. Meta l-​ħu spjega r-​raġuni għaż-​żjara tiegħu, hi bdiet tibki. Hi qalet li kienet qed tfittex lix-​Xhieda taʼ Ġeħova u kienet talbet għall-​għajnuna biex issibhom. Il-​ħu kien ferħan li jgħinha tikkuntattja l-​kongregazzjoni lokali tax-​Xhieda taʼ Ġeħova.

18. (a) Meta t-​talb tagħna jiġi mwieġeb, kif għandna nirrispondu? (b) Minn xiex nistgħu nkunu żguri jekk nitolbu f’kull opportunità?

¹⁸ It-​talb verament hu provvediment meraviljuż. Ġeħova hu lest li jismaʼ u jwieġeb. (Isaija 30:​18, 19) Però, aħna rridu nkunu attenti għal kif Ġeħova jwieġeb it-​talb tagħna. Forsi mhux dejjem ikun bil-​mod li nistennew. Xorta waħda, meta nirċievu l-​gwida tiegħu, qatt m’għandna ninsew nirringrazzjawh u nfaħħruh. (1 Tessalonikin 5:18) Iżjed minn hekk, dejjem ftakar fit-​twissija taʼ l-​appostlu Pawlu: “F’kollox b’talb u b’suppliki flimkien maʼ radd il-​ħajr ħallu lil Alla jkun jaf x’teħtieġu.” Iva, ħu vantaġġ minn kull opportunità biex titkellem m’Alla. B’dan il-​mod, int se tkompli tesperjenza l-​verità taʼ dak li qal Pawlu rigward dawk li t-​talb tagħhom jiġi mwieġeb: “Il-​paċi t’Alla li tisboq kull ħsieb tgħasses lil qalbkom u l-​qawwa mentali tagħkom.”​—Filippin 4:​6, 7.

Taf Twieġeb?

• Liema tip taʼ talb nistgħu noffru?

• Kif għandna nitolbu?

• Liema suġġetti nistgħu ninkludu fit-​talb tagħna?

• X’inhu l-​irwol tat-​talb meta wieħed jidneb?

[Stampi f’paġna 29]

It-​talb mill-​qalb jgħinna biex ma naqgħux fit-​tentazzjonijiet

[Stampi f’paġna 31]

Permezz tat-​talb, aħna nesprimu l-​gratitudni, it-​tħassib, u l-​petizzjonijiet tagħna lil Alla