Kif Navviċinaw lil Dak li ‘Jismaʼ t-​Talb’

“Int, li tismaʼ talbna. Quddiemek jersaq kull bniedem.”​—SALM 65:​3, 4a (65:​2, NW).

1. X’jagħmel lill-​bnedmin differenti mill-​ħlejjaq l-​oħra fuq l-​art, u dan x’possibbiltà jagħtina?

MILL-​ELUF taʼ ħlejjaq ħajjin fuq l-​art, il-​bnedmin biss għandhom l-​abbiltà li jqimu lill-​Ħallieq. Il-​bnedmin biss huma konxji li għandhom bżonn spiritwali u jħossu x-​xewqa li jissodisfawh. Dan jagħtina l-​possibbiltà meraviljuża li jkollna relazzjoni persunali maʼ Missierna tas-​sema.

2. Id-​dnub liema effett kuntrarju kellu fuq ir-​relazzjoni tal-​bnedmin mal-​Ħallieq tagħhom?

² Alla ħalaq lill-​bniedem bl-​abbiltà li javviċina lill-​Ħallieq tiegħu. Adam u Eva nħolqu bla dnub. B’hekk, setgħu javviċinaw lil Alla bil-​libertà kollha bħalma tifel żgħir javviċina lil missieru. Madankollu, dan il-​privileġġ grandjuż intilef minħabba d-​dnub. Adam u Eva m’obdewx lil Alla u tilfu r-​relazzjoni intima li kellhom miegħu. (Ġenesi 3:​8-13, 17-24) Ifisser dan li d-​dixxendenti imperfetti taʼ Adam m’għadhomx jistgħu jikkomunikaw m’Alla? Le, Ġeħova xorta għadu jħallihom javviċinawh, basta jilħqu xi ħtiġijiet. X’inhuma dawn il-​ħtiġijiet?

Ħtiġijiet biex Navviċinaw lil Alla

3. Bnedmin midinbin kif għandhom javviċinaw lil Alla, u liema eżempju jenfasizza dan?

³ Ġrajja li involviet tnejn mill-​ulied taʼ Adam tgħinna naraw dak li Alla jeħtieġ minn bniedem imperfett li jixtieq javviċinah. Kemm Kajjin u kemm Abel għamlu sforzi biex javviċinaw lil Alla billi offrewlu sagrifiċċji. L-​offerta t’Abel ġiet aċċettata, filwaqt li taʼ Kajjin ma ġietx aċċettata. (Ġenesi 4:​3-5) X’differenza kien hemm? Ebrej 11:4 jgħid: “Bil-​fidi Abel offra lil Alla sagrifiċċju aħjar minn taʼ Kajjin, u b’din il-​fidi ngħata xiehda li kien raġel sewwa.” Għalhekk, b’mod ċar naraw li jrid ikollna l-​fidi biex inkunu nistgħu navviċinaw lil Alla. Ħtieġa oħra nistgħu narawha mill-​kliem li Ġeħova qal lil Kajjin: “Jaqaw m’hux minnu dak li jekk tagħmel it-​tajjeb terfaʼ rasek?” Iva, il-​mod kif Kajjin avviċina lil Alla kien ikun aċċettabbli li kieku biddel triqtu biex jagħmel dak li hu tajjeb. Madankollu, Kajjin m’aċċettax il-​parir t’Alla, qatel lil Abel, u spiċċa biex ġie maqtugħ mis-​soċjetà. (Ġenesi 4:​7-12) B’hekk, kmieni fl-​istorja tal-​bniedem, ġiet enfasizzata l-​importanza li navviċinaw lil Alla bil-​fidi flimkien m’għemejjel tajbin.

4. X’għandna nirrikonoxxu dwar il-​mod kif navviċinaw lil Alla?

⁴ Jekk aħna rridu navviċinaw lil Alla, huwa essenzjali li nagħrfu l-​istat midneb tagħna. Il-​bnedmin kollha jidinbu, u d-​dnub huwa ostaklu li jistaʼ jfixkilna milli navviċinaw lil Alla. Il-​profeta Ġeremija kiteb hekk dwar Iżrael: “Aħna dnibna . . . Nstart fi sħaba, biex it-​talb ma jaqbiżhiex.” (Lamentazzjonijiet 3:​42, 44) Minkejja dan, matul l-​istorja tal-​bnedmin, Alla wera li kien lest li jaċċetta t-​talb taʼ dawk li javviċinawh bil-​fidi u b’attitudni xierqa tal-​qalb, billi jobdu l-​kmandamenti tiegħu. (Salm 119:145) Min kienu wħud minn dawn l-​individwi, u x’nistgħu nitgħallmu mit-​talb tagħhom?

5, 6. X’nistgħu nitgħallmu mill-​mod kif Abraham avviċina lil Alla?

⁵ Wieħed minn dawn l-​individwi kien Abraham. Il-​mod kif avviċina lil Alla kien aċċettabbli, għax Alla sejjaħ lil Abraham “ħabibi.” (Isaija 41:8) X’nistgħu nitgħallmu mill-​mod kif Abraham avviċina lil Alla? Dan il-​patrijarka leali staqsa lil Ġeħova dwar werriet, billi qal: “X’se tagħtini, għax se nibqaʼ bla tfal?” (Ġenesi 15:​2, 3; 17:18) F’okkażjoni oħra, hu esprima t-​tħassib tiegħu dwar min kien se jiġi salvat meta Alla ġab ġudizzju kontra l-​uħud mill-​agħar f’Sodoma u Gomorra. (Ġenesi 18:​23-33) Abraham talab ukoll għan-​nom t’oħrajn. (Ġenesi 20:​7, 17) U, bħal fil-​każ t’Abel, il-​mod kif Abraham avviċina lil Alla kultant kien jinvolvi li joffri sagrifiċċju lil Ġeħova.​—Ġenesi 22:​9-14.

⁶ F’dawn l-​okkażjonijiet kollha, Abraham ħassu komdu biex jitkellem maʼ Ġeħova. Madankollu, flimkien mal-​libertà tal-​kelma tiegħu kellu ħarsa umli lejn il-​pożizzjoni tiegħu quddiem il-​Ħallieq tiegħu. Innota l-​kliem kollu rispett tiegħu li nsibu f’Ġenesi 18:27: “Jien issugrajt nitkellem mal-​Mulej, għalkemm jien trab u rmied.” X’attitudni mill-​aqwa biex nimitawha!

7. Il-​patrijarki b’liema kwistjonijiet marru għand Ġeħova bit-​talb?

⁷ Il-​patrijarki kienu jitolbu dwar diversi kwistjonijiet, u dawn intlaqgħu tajjeb minn Ġeħova. Ġakobb lissen talba f’forma taʼ wegħda. Wara li talab għall-​appoġġ t’Alla, hu wiegħed b’mod solenni: “Minn kull ma tagħtini, nagħtik l-​għexur.” (Ġenesi 28:​20-22) Iktar tard, meta kien se jiltaqaʼ maʼ ħuh, Ġakobb talab lil Ġeħova għall-​protezzjoni, billi qal: “Eħlisni [“nitolbok,” NW] minn idejn Għesaw, għax qiegħed nibżaʼ minnu.” (Ġenesi 32:​10-13 [32:​9-12, NW]) Il-​patrijarka Ġob avviċina lil Ġeħova għan-​nom taʼ familtu, billi offra sagrifiċċji għalihom. Meta t-​tlett iħbieb dinbu bi kliemhom, Ġob talab għalihom, u “l-​Mulej ta wiċċ lil Ġob.” (Ġob 1:5; 42:​7-9) Dawn ir-​rakkonti jgħinuna nidentifikaw kwistjonijiet li bihom nistgħu mmorru għand Ġeħova bit-​talb. Naraw ukoll li Ġeħova hu lest li jaċċetta t-​talb taʼ dawk li javviċinawh b’mod xieraq.

Taħt il-​Patt tal-​Liġi

8. Taħt il-​patt tal-​Liġi, il-​kwistjonijiet kif kienu jittieħdu għand Ġeħova għan-​nom tal-​poplu tiegħu?

⁸ Wara li Ġeħova ħeles lill-​ġens taʼ Iżrael mill-​Eġittu, hu tahom patt tal-​Liġi. Il-​Liġi kien fiha dettalji dwar l-​arranġament biex Alla jiġi avviċinat permezz taʼ saċerdozju maħtur. Uħud mil-​Leviti ġew inkarigati biex jagħmluha taʼ qassisin għan-​nom tal-​poplu. Meta kienu jqumu kwistjonijiet li kienu taʼ importanza nazzjonali, rappreżentant tal-​poplu​—kultant sultan jew profeta​—kien imur għand Alla bil-​kwistjoni permezz tat-​talb. (1 Samwel 8:​21, 22; 14:​36-41; Ġeremija 42:​1-3) Per eżempju, fid-​dedikazzjoni tat-​tempju, is-​Sultan Salamun avviċina lil Ġeħova b’talba mill-​fond taʼ qalbu. Min-​naħa tiegħu, Ġeħova wera li aċċetta t-​talba taʼ Salamun billi mela t-​tempju bil-​glorja Tiegħu u qal: “Widnejja [se jkunu] attenti għat-​talb f’dan il-​post.”​—2 Kronaki 6:12–7:​3, 15.

9. X’kien meħtieġ biex Ġeħova jiġi avviċinat b’mod xieraq fis-​santwarju?

⁹ Fil-​liġi li ngħatat lil Iżrael, Ġeħova inkluda ħtieġa biex javviċinawh b’mod aċċettabbli fis-​santwarju. Din x’kienet? Kull fil-​għodu u kull fil-​għaxija, flimkien maʼ sagrifiċċji taʼ l-​annimali, il-​qassis il-​kbir kellu jaħraq inċens ifuħ quddiem Ġeħova. Iktar tard, sotto-qassisin ukoll ħadu sehem f’dan is-​servizz, ħlief fil-​Jum taʼ l-​Espjazzjoni. Kieku l-​qassisin ma tawx din il-​qima bir-​rispett, Ġeħova ma kienx se jkun ferħan bis-​servizz tagħhom.​—Eżodu 30:​7, 8; 2 Kronaki 13:11.

10, 11. X’evidenza għandna li Ġeħova kien jaċċetta t-​talb taʼ individwi?

¹⁰ F’Iżrael tal-​qedem, setaʼ Alla jiġi avviċinat biss permezz taʼ rappreżentanti maħturin? Le, l-​Iskrittura turi li Ġeħova kien ferħan jaċċetta t-​talb persunali taʼ individwi. Fit-​talba taʼ Salamun għad-​dedikazzjoni tat-​tempju, hu talab lil Ġeħova, billi qal: “Mqar jekk bniedem waħdu jonkella l-​poplu tiegħek kollu taʼ Iżrael, jitlob . . . u jiftaħ idejh lejn din id-​dar, ismaʼ int mis-​smewwiet.” (2 Kronaki 6:​29, 30) Ir-​rakkont taʼ Luqa jgħidilna li meta Żakkarija, missier Ġwanni l-​Għammied, kien qed joffri l-​inċens fis-​santwarju, kotra kbira taʼ qaddejja taʼ Ġeħova li ma kinux qassisin kienu qed ‘jitolbu barra.’ Milli jidher, kienet saret id-​drawwa li n-​nies jinġabru quddiem is-​santwarju biex jitolbu meta l-​inċens kien ikun qed jiġi preżentat lil Ġeħova fuq l-​artal tad-​deheb.​—Luqa 1:​8-10.

¹¹ B’hekk, meta Ġeħova kien jiġi avviċinat kif suppost, hu kien lest li jaċċetta l-​petizzjonijiet taʼ dawk li rrappreżentaw lill-​ġens bħala grupp u taʼ individwi li avviċinawh personalment. Illum, m’għadniex taħt il-​patt tal-​Liġi. Minkejja dan, nistgħu nitgħallmu lezzjonijiet vitali dwar it-​talb mill-​modi kif l-​Iżraelin tal-​qedem kienu javviċinaw lil Alla.

Taħt l-​Arranġament Kristjan

12. X’arranġament hemm għall-​Kristjani biex javviċinaw lil Ġeħova?

¹² Issa aħna ngħixu taħt l-​arranġament Kristjan. M’għadx hemm tempju fiżiku li fih qassisin jirrappreżentaw lill-​poplu kollu t’Alla jew li nistgħu nduru lejh meta nitolbu lil Alla. Minkejja dan, Ġeħova għad għandu arranġament għalina biex navviċinawh. Dan x’inhu? Fis-​sena 29 E.K., meta Kristu ġie midluk u maħtur bħala l-​Qassis il-​Kbir, it-​tempju spiritwali beda jiffunzjona.a Dan it-​tempju spiritwali kien l-​arranġament il-​ġdid biex navviċinaw lil Ġeħova fil-​qima fuq il-​bażi tas-​sagrifiċċju propizjatorju taʼ Ġesù Kristu.​—Ebrej 9:​11, 12.

13. B’konnessjoni mat-​talb, x’inhu xebh wieħed li hemm bejn it-​tempju li kien f’Ġerusalemm u t-​tempju spiritwali?

¹³ Ħafna fatturi tat-​tempju f’Ġerusalemm jagħtu stampa tajba tal-​provvedimenti tat-​tempju spiritwali, inkluż dawk konnessi mat-​talb. (Ebrej 9:​1-10) Per eżempju, x’kien jirrappreżenta l-​inċens li kien jiġi offrut, fil-​għodu u fil-​għaxija, fuq l-​artal taʼ l-​inċens fil-​kumpartiment Qaddis tat-​tempju? Skond il-​ktieb tar-​Rivelazzjoni, “l-​inċens ifisser it-​talb tal-​qaddisin.” (Rivelazzjoni 5:8; 8:​3, 4) David ġie ispirat biex jikteb: “Ikun it-​talb tiegħi bħal inċens quddiemek.” (Salm 141:2) B’hekk, fl-​arranġament Kristjan, l-​inċens ifuħ jirrappreżenta b’mod xieraq talb u tifħir aċċettabbli lil Ġeħova.​—1 Tessalonikin 3:10.

14, 15. X’nistgħu ngħidu dwar kif javviċinaw lil Ġeħova (a) il-Kristjani midlukin? (b) in-​“nagħaġ oħrajn”?

¹⁴ Min jistaʼ javviċina lil Alla f’dan it-​tempju spiritwali? Fit-​tempju fiżiku, il-​qassisin u l-​Leviti kienu privileġġati biex jaqdu fil-​bitħa taʼ ġewwa, imma l-​qassisin biss setgħu jidħlu fil-​Qaddis. Kristjani midlukin bit-​tama għas-​sema jgawdu kundizzjoni spiritwali unika ffigurata bil-​quddiem mill-​bitħa taʼ ġewwa u l-​Qaddis, li tippermettilhom joffru talb u jagħtu tifħir lil Alla.

¹⁵ Xi ngħidu dwar dawk bit-​tama għall-​art, in-​“nagħaġ oħrajn”? (Ġwanni 10:16) Il-​profeta Isaija indika li nies minn ħafna ġnus kienu se jiġu biex iqimu lil Ġeħova “fl-​aħħar jiem.” (Isaija 2:​2, 3) Hu kiteb ukoll li “l-​barranin” (Saydon) kienu se jintrabtu maʼ Ġeħova. Biex jindika li kien lest li jaċċetta l-​mod kif avviċinawh, Alla qal: “Inferraħhom f’dar it-​talb tiegħi.” (Isaija 56:​6, 7) Rivelazzjoni 7:​9-15 jagħtina iktar dettalji, billi jiddeskrivi “folla kbira” minn “kull ġens” li tinġabar biex tqim u titlob lil Alla “lejl u nhar” hekk kif toqgħod bil-​wieqfa fil-​bitħa taʼ barra tat-​tempju spiritwali. Xi ħsieb inkuraġġanti li l-​qaddejja kollha t’Alla llum jistgħu bil-​libertà javviċinaw lil Alla b’fiduċja sħiħa li hu jismagħhom!

Liema Talb Huwa Aċċettabbli?

16. X’nistgħu nitgħallmu dwar it-​talb mill-​Kristjani tal-​bidu?

¹⁶ Il-​Kristjani tal-​bidu kienu jitolbu. Dwar liema kwistjonijiet kienu jitolbu? Anzjani Kristjani talbu għall-​gwida biex jagħżlu rġiel għal responsabbiltajiet organizzazzjonali. (Atti 1:​24, 25; 6:​5, 6) Epafra talab għan-​nom taʼ sħabu fit-​twemmin. (Kolossin 4:12) Membri tal-​kongregazzjoni f’Ġerusalemm talbu għal Pietru meta ġie mitfugħ il-​ħabs. (Atti 12:5) Il-​Kristjani tal-​bidu staqsew lil Alla biex jagħtihom il-​kuraġġ meta kienu qed jiffaċċjaw l-​oppożizzjoni, billi qalu: “Ġeħova, agħti kas it-​theddid tagħhom, u agħmel li l-​ilsiera tiegħek jibqgħu jitkellmu l-​kelma tiegħek bil-​qlubija kollha.” (Atti 4:​23-30) Id-​dixxiplu Ġakbu ħeġġeġ lill-​Kristjani biex jitolbu lil Alla għall-​għerf meta jkunu għaddejjin mill-​provi. (Ġakbu 1:5) Int tinkludi dawn il-​kwistjonijiet fil-​petizzjonijiet tiegħek lil Ġeħova?

17. It-​talb taʼ min jaċċetta Ġeħova?

¹⁷ Alla ma jaċċettax it-​talb kollu. Għalhekk, kif nistgħu nitolbu bl-​assiguranza li t-​talb tagħna se jiġi aċċettat? Uħud leali li Ġeħova semagħhom fil-​passat avviċinawh bis-​sinċerità u bl-​attitudni xierqa tal-​qalb. Urew fidi u appoġġawha b’għemejjel mill-​aħjar. Aħna nistgħu nkunu ċerti li Ġeħova se jismaʼ lil dawk li javviċinawh bl-​istess mod illum.

18. Sabiex it-​talb tagħhom jinstemaʼ, liema ħtieġa jridu jilħqu l-​Kristjani?

¹⁸ Hemm ħtieġa oħra. L-​appostlu Pawlu spjega dan, billi qal: “Permezz tiegħu aħna . . . nistgħu nersqu lejn il-​Missier bi spirtu wieħed.” Għal min kien qed jirreferi Pawlu meta kiteb “permezz tiegħu”? Għal Ġesù Kristu. (Efesin 2:​13, 18) Iva, aħna nistgħu navviċinaw lill-​Missier bil-​libertà biss permezz taʼ Ġesù.​—Ġwanni 14:6; 15:16; 16:​23, 24.

19. (a) L-offerta taʼ l-​inċens f’Iżrael meta kienet issir bħal riħa tinten għal Ġeħova? (b) Kif nistgħu nkunu ċerti li t-​talb tagħna jkun bħal inċens ifuħ għal Ġeħova?

¹⁹ Kif diġà ssemma, l-​inċens li kienu joffru l-​qassisin Iżraelin kien jirrappreżenta t-​talb aċċettabbli tal-​qaddejja leali t’Alla. Madankollu, xi drabi, l-​offerti taʼ l-​inċens taʼ l-​Iżraelin kienu diżgustanti għal Ġeħova. Dan kien minnu meta l-​Iżraelin kienu qed jaħarqu l-​inċens fit-​tempju imma fl-​istess ħin kienu qed imilu quddiem l-​idoli. (Eżekjel 8:​10, 11) Bl-​istess mod illum, Ġeħova jistkerrah bħal riħa tinten it-​talb taʼ dawk li jistqarru li jaqduh imma li fl-​istess ħin jipprattikaw għemejjel li jmorru kontra l-​liġijiet tiegħu. (Proverbji 15:8) Għalhekk, ejja nkomplu nżommu l-​aspetti kollha taʼ ħajjitna nodfa sabiex it-​talb tagħna jkun bħal inċens ifuħ għal Alla. Ġeħova jitgħaxxaq bit-​talb taʼ dawk li jsegwu l-​mogħdijiet ġusti tiegħu. (Ġwanni 9:31) Madankollu, għad hemm xi mistoqsijiet xi nwieġbu. Kif għandna nitolbu? Għalxiex nistgħu nitolbu? U Alla kif iwieġeb it-​talb tagħna? L-​artiklu li jmiss se jwieġeb dawn il-​mistoqsijiet u oħrajn.

[Nota taʼ taħt]

Tistaʼ Tispjega?

• Bnedmin imperfetti kif jistgħu javviċinaw lil Alla b’mod aċċettabbli?

• Fit-​talb tagħna, kif nistgħu nimitaw lill-​patrijarki?

• X’nitgħallmu mit-​talb tal-​Kristjani tal-​bidu?

• It-​talb tagħna meta hu bħal inċens ifuħ għal Alla?

[Stampa f’paġna 23]

Alla għala aċċetta l-​offerta t’Abel imma mhux taʼ Kajjin?

[Stampa f’paġna 24]

“Jien trab u rmied”

[Stampa f’paġna 25]

“Nagħtik l-​għexur”

[Stampa f’paġna 26]

Huwa t-​talb tiegħek bħal inċens ifuħ għal Ġeħova?