“Jeħtieġ li Aħna Nobdu lil Alla Bħala Ħakkiem Iktar Milli lill-​Bnedmin”

‘Ma Nistgħux Nieqfu Nitkellmu dwar Ġesù’

IS-​SENA hi 33 E.K., u l-​post huwa s-​sala tal-​qorti impressjonanti tat-​tribunal nazzjonali Lhudi f’Ġerusalemm. F’dan l-​ambjent, is-​Sinedriju dalwaqt se jgħaddi lit-​12-il segwaċi taʼ Ġesù Kristu minn proċess ġudizzjarju. Għala? Għaliex huma kienu qed jippridkaw dwar Ġesù. L-​appostli Pietru u Ġwanni jinsabu weqfin quddiem il-​qorti għat-​tieni darba. Dan hu l-​ewwel proċess għall-​appostli l-​oħra.

Il-qassis il-​kbir ikellem lit-​12-il appostlu dwar l-​ordni maħruġa mill-​qorti fl-​okkażjoni taʼ qabel. F’dak iż-​żmien, meta ġew ordnati jieqfu jippridkaw dwar Ġesù, l-​appostli Pietru u Ġwanni wieġbu: “Jekk hux sewwa f’għajnejn Alla li nisimgħu minnkom iktar milli minn Alla, iġġudikaw intom. Imma aħna ma nistgħux nieqfu nitkellmu dwar dak li rajna u smajna.” Wara li talbu għall-​kuraġġ, id-​dixxipli taʼ Ġesù komplew jipproklamaw l-​aħbar tajba.​—Atti 4:​18-​31.

Minħabba li kien jaf li t-​theddid taʼ qabel ma kellu ebda effett, f’din it-​tieni investigazzjoni l-​qassis il-​kbir jiddikjara: “Aħna ordnajnielkom bis-​sħiħ biex ma tibqgħux tgħallmu f’dan l-​isem, imma ara, imlejtu lil Ġerusalemm bit-​tagħlim tagħkom, u intom deċiżi li ġġibu fuqna d-​demm taʼ dan il-​bniedem.”​—Atti 5:​28.

Determinazzjoni Soda

Bil-​kuraġġ, Pietru u l-​appostli l-​oħrajn iwieġbu u jgħidu: “Jeħtieġ li aħna nobdu lil Alla bħala ħakkiem iktar milli lill-​bnedmin.” (Atti 5:​29) Tabilħaqq, minflok ma nobdu lil sempliċi bnedmin, aħna għandna nobdu lil Ġeħova meta dak li jitlob il-​bniedem imur kontra l-​ordnijiet Tiegħu.a

Il-kliem taʼ l-​appostli li ddikjaraw li huma jobdu ’l Alla għandu jikkonvinċi lill-​membri tas-​Sinedriju. Kieku xi ħadd kellu jistaqsihom dwar l-​ubbidjenza lejn Alla, dawn il-​mexxejja tas-​soċjetà Lhudija kellhom iwieġbu b’mod unanimu: “Obdi ’l Alla.” Wara kollox, ma jemmnux huma li Alla hu l-​Mulej Sovran taʼ l-​univers?

Milli jidher billi rrappreżenta lill-​appostli kollha, Pietru jgħid li fejn jidħol il-​ministeru tagħhom huma jobdu lil Alla minflok lill-​bniedem. Għalhekk, hu ġab fix-​xejn l-​akkużi dwar l-​allegazzjonijiet tagħhom li l-​appostli kienu diżubbidjenti. Mill-​istorja tal-​ġens tagħhom stess, il-​membri tas-​Sinedriju jafu li hemm drabi meta jidher ċar li huwa sewwa li għandhom jobdu lil Alla u mhux lill-​bniedem. Żewġ qwiebel fl-​Eġittu beżgħu minn Alla, mhux mill-​Fargħun, billi salvaw it-​trabi subien imweldin lil nisa Ebrej. (Eżodu 1:​15-​17) Is-​Sultan Ħeżekija obda lil Ġeħova, mhux lis-​Sultan Sanħerib, meta saritlu pressjoni biex iċedi. (2 Slaten 19:​14-​37) L-​Iskrittura Ebrajka, li l-​membri tas-​Sinedriju kienu familjari magħha, tenfasizza li Ġeħova jistenna li l-​poplu tiegħu jobdih.​—1 Samwel 15:​22, 23.

L-​Ubbidjenza Premjata

Mill-​inqas membru wieħed tal-​qorti jiġi effettwat mill-​kliem “jeħtieġ li aħna nobdu lil Alla bħala ħakkiem iktar milli lill-​bnedmin.” Gamaljel, imħallef stmat ħafna fis-​Sinedriju, jipperswadi lill-​membri tal-​qorti biex jisimgħu l-​parir għaqli tiegħu li jagħtihom fil-​privat. Billi jikkwotalhom eżempji tal-​passat, Gamaljel jurihom li m’huwiex għaqli li jindaħlu fix-​xogħol taʼ l-​appostli. Hu jikkonkludi billi jgħid: “Tindaħlulhomx lil dawn l-​irġiel, imma ħalluhom; . . . inkella għandkom mnejn tkunu fil-​fatt qed tiġġieldu kontra Alla.”​—Atti 5:​34-​39.

Il-kliem raġunevoli taʼ Gamaljel jikkonvinċi lill-​qorti superjuri biex teħles lill-​appostli. Għalkemm jiġu msawtin, l-​appostli bl-​ebda mod ma jħossuhom imbeżżgħin minħabba din l-​esperjenza. Minflok, ir-​rakkont tal-​Bibbja jgħid: “Kuljum fit-​tempju u minn dar għal dar baqgħu jgħallmu u jxandru bla heda l-​aħbar tajba dwar il-​Kristu, Ġesù.”​—Atti 5:​42.

Kemm ġew imberkin l-​appostli talli b’mod determinat urew li l-​awtorità t’Alla hi suprema! Il-​Kristjani veri llum għandhom l-​istess attitudni. Ix-​Xhieda taʼ Ġeħova jkomplu jħarsu lejn Ġeħova bħala l-​Ħakkiem Suprem tagħhom. Jekk jiġu ordnati jaġixxu kontra d-​direzzjonijiet t’Alla, huma jwieġbu bħalma għamlu l-​appostli: “Jeħtieġ li aħna nobdu lil Alla bħala ħakkiem iktar milli lill-​bnedmin.”

[Nota taʼ taħt]

[Kaxxa/Stampi f’paġna 9]

QATT ĦSIBT DWAR DAN?

Luqa, il-​kittieb tal-​Bibbja, kif kiseb l-​informazzjoni dwar dak li Gamaljel qal lis-​Sinedriju fil-​privat? Jistaʼ jkun li Luqa sar jaf bil-​kliem taʼ Gamaljel permezz taʼ ispirazzjoni divina. Jistaʼ jkun li Pawlu (li qabel kien wieħed mill-​istudenti taʼ Gamaljel) informa lil Luqa dwar dak li qal Gamaljel. Jew Luqa setaʼ kellem lil xi membru tal-​qorti superjuri li kien jaħsibha bħall-​appostli.