L-​Għaxqa Tiegħu Kienet fil-​Liġi taʼ Ġeħova

ALBERT D. SCHROEDER, membru tal-​Ġemgħa li Tiggverna tax-​Xhieda taʼ Ġeħova, temm il-​ħajja tiegħu fuq l-​art nhar l-​Erbgħa, 8 taʼ Marzu, 2006. Hu kellu 94 sena u kien ilu fis-​servizz full-time għal iktar minn 73 sena.

Ħuna Schroeder twieled f’Saginaw, Michigan, l-​Istati Uniti, fl-​1911.a Bħala tfajjel, hu tgħallem ħafna dwar il-​Bibbja mingħand nanntu, min-​naħa t’ommu, li naqqxet fih ukoll imħabba biex jaqra l-​Kelma taʼ Ġeħova. Hu studja l-​Latin, il-​Ġermaniż, u l-​inġinerija elettrika fl-​Università taʼ Michigan. Madankollu, hekk kif l-​apprezzament għall-​Iskrittura kiber, hu waqaf mill-​istudju sekulari biex jidħol fix-​xogħol full-time taʼ l-​ippridkar tas-​Saltna. Fl-​1932, hu sar membru tal-​familja Betel fi Brooklyn, New York.

Fl-1937, fl-​età taʼ 26 sena, Ħuna Schroeder ġie maħtur biex jieħu ħsieb ix-​xogħol tax-​Xhieda taʼ Ġeħova fil-​Britannja. Iż-​żelu tiegħu fix-​xogħol taʼ l-​ippridkar inkuraġġixxa lil ħafna biex jidħlu fis-​servizz full-time. Wieħed raġel żagħżugħ imsieħeb miegħu fil-​Betel taʼ Londra kien John E. Barr. Iktar tard huma qdew flimkien għal ħafna snin fil-​Ġemgħa li Tiggverna.

Ix-xogħol taʼ Ħuna Schroeder għan-​nom tax-​Xhieda taʼ Ġeħova ġie notat matul is-​snin tal-​gwerra. F’Awissu taʼ l-​1942, hu ġie deportat mill-​Britannja. Wasal lura Brooklyn f’Settembru, wara vjaġġ twil u stressanti fejn qasam minn naħa għal oħra taʼ l-​Atlantiku fi żmien il-​gwerra.

F’dak iż-​żmien, il-​qaddejja taʼ Ġeħova kienu diġà qed jantiċipaw ix-​xogħol kbir li kellu jsir wara t-​tieni gwerra dinjija. Ħuna Schroeder kien sorpriż u ferħan meta rċieva l-​inkarigu li kien imiss​—biex jgħin fl-​iżvilupp tal-​kors taʼ l-​istudju għall-​Iskola taʼ Gilgħad (Watchtower Bible School of Gilead). Għal xi snin, hu qeda bħala struttur f’li jgħin u jħarreġ lill-​missjunarji. Studenti li hu għallem f’Gilgħad u iktar tard fl-​Iskola tal-​Ministeru tas-​Saltna għandhom memorji sbieħ ħafna tiegħu. L-​għaxqa tiegħu kienet li jnaqqax imħabba għal-​liġijiet t’Alla fl-​istudenti tiegħu u jenfasizza l-​importanza taʼ li ssir taf aħjar lil Ġeħova.

Fl-1956, Ħuna Schroeder iżżewweġ lil Charlotte Bowin, u fl-​1958 kellhom tifel li semmewh Judah Ben. Ħuna Schroeder kien raġel Kristjan miżżewweġ u missier mill-​aħjar. Fl-​1974, hu beda jaqdi fil-​Ġemgħa li Tiggverna, fejn id-​dehen tiegħu kien apprezzat ferm. Hu kien raġel qalbu tajba u umli li, fuq kollox, ried ifaħħar bil-​kbir l-​isem t’Alla. Aħna fiduċjużi li Ħuna Schroeder irċieva l-​premju tiegħu fis-​sema bħala Kristjan midluk li ‘l-​għaxqa tiegħu kienet fil-​liġi taʼ [Ġeħova].’—Salm 1:2.

[Nota taʼ taħt]