Il-​Verità—Nistennewha Biss minn Oħrajn?

“NOBGĦOD il-​gideb, u nobgħod meta ħaddieħor jigdibli!” qalet tfajla taʼ 16-il sena. Ħafna minna nħossuna bħalha. Aħna nieħdu gost naħsbu li l-​informazzjoni li ningħataw​—kemm jekk bil-​kliem u kemm jekk bil-​kitba​—tkun vera. Imma aħna ngħiduha l-​verità meta nagħtu l-​informazzjoni lil oħrajn?

Fi stħarriġ li sar il-​Ġermanja, il-​maġġuranza minn dawk li ħadu sehem fih ħassew li “l-​gideb dwar kwistjonijiet żgħar sabiex dak li jkun jipproteġi lilu nnifsu jew jipproteġi lil oħrajn mill-​ħsara hu tajjeb, iva, saħansitra neċessarju biex in-​nies jingwalawha bejniethom.” U waħda ġurnalista kitbet: “Huwa ideal nobbli li tgħid il-​verità u l-​verità biss, imma dan jagħmillek ħajtek monotona.”

Jistaʼ jkun li nippreferu li ħaddieħor jgħidilna l-​verità imma nħossu li kultant ikollna raġuni tajba biex ma ngħidux il-​verità aħna stess? Huwa importanti li ngħidu l-​verità? X’inhuma l-​konsegwenzi meta ma ngħidux il-​verità?

Il-​Ħsara li Ssir Minħabba l-​Gideb

Ikkunsidra l-​ħsara li jistaʼ jagħmel il-​gideb. Il-​gideb joħloq nuqqas taʼ fiduċja bejn il-​miżżewġin u bejn il-​membri tal-​familja. Seksik li jkun bla bażi jistaʼ jħassar ir-​reputazzjoni taʼ individwu. Il-​qerq tal-​ħaddiema jżid l-​ispejjeż tal-​kumpanija u jirriżulta fi prodotti li jiswew iktar. Dikjarazzjonijiet foloz dwar id-​dħul tat-​taxxi jisirqu d-​dħul li l-​gvernijiet għandhom bżonn biex jipprovdu servizzi pubbliċi. L-​informazzjoni qarrieqa tar-​riċerkaturi tħassar karrieri promettenti u ttebbaʼ r-​reputazzjoni taʼ istituzzjonijiet rispettati. Skemi li jwiegħdu l-​għana f’ħakka t’għajn jisirqu lil investituri li faċli tqarraq bihom mill-​flus li jkunu ġemmgħu tul ħajjithom jew saħansitra jħalluhom b’konsegwenzi agħar minn hekk. Mhux taʼ b’xejn li l-​Bibbja tgħidilna li fost l-​affarijiet li Alla Ġeħova jobgħod hemm “ilsien giddieb” u “fomm li jixhed bil-​qerq il-​gideb”!​—Proverbji 6:​16-​19.

Meta l-​gideb jinfirex jistaʼ jikkaġuna l-​ħsara kemm lill-​individwi u kemm lis-​soċjetà kollha kemm hi. Ħafna jaqblu maʼ dan il-​fatt. Allura, in-​nies għala jigdbu minn jeddhom? U dejjem tkun qed tgħid gidba meta ma tgħidx il-​verità kollha? Se nikkunsidraw it-​tweġibiet għal dawn il-​mistoqsijiet u oħrajn fl-​artiklu li jmiss.

[Stampa f’paġna 3]

Il-​gideb joħloq nuqqas taʼ fiduċja bejn il-​miżżewġin