In-​Nies Madwar id-​Dinja Qed Jingħaqdu—Kif?

KIEKU int kif tiddefinixxiha l-​kelma “għaqda”? Għal xi wħud, il-​kelma sempliċement tfisser in-​nuqqas taʼ ġlied jew tilwim. Per eżempju, jekk żewġ nazzjonijiet jew iktar jiffirmaw trattat u jaqblu dwar il-​paċi, jistaʼ jingħad li huma magħqudin. Imma huwa verament minnu dan? Mhux bilfors.

Ikkunsidra dan: Matul l-​istorja, saru eluf taʼ trattati taʼ paċi, iżda ma ġewx rispettati. Għala? Ħafna drabi dan jiġri minħabba li l-​mexxejja tad-​dinja huma iktar konċernati dwar is-​supremazija tagħhom infushom milli dwar il-​paċi u l-​għaqda. Ukoll, xi nazzjonijiet jibżgħu dwar x’jistaʼ jiġri kieku l-​qawwa militari tagħhom ma jirnexxilhiex tkun taʼ l-​istess livell taʼ nazzjonijiet oħrajn.

Għalhekk, il-​fatt li żewġ nazzjonijiet m’humiex qegħdin fi gwerra ma jfissirx li huma magħqudin fil-​paċi. Jistaʼ jkun li żewġt irġiel bl-​ixkubetta f’idejhom ippontata lejn xulxin qegħdin fil-​paċi sempliċement minħabba li ħadd minnhom ma spara? Tkun bluha kieku wieħed jaħseb hekk! Madankollu din hija sitwazzjoni li ħafna nazzjonijiet illum isibu ruħhom fiha. Minħabba li l-​fiduċja kulma jmur dejjem tonqos, żdied il-​biżaʼ li xi darba jew oħra se jintużaw l-​armi. X’sar sabiex jiġi evitat diżastru taʼ dan it-​tip?

Biżaʼ minn Armi Nukleari ​—Theddida għall-​Għaqda

Ħafna wħud jafdaw fit-​Trattat għall-​Kontroll taʼ l-​Armi Nukleari (Nuclear Non-Proliferation Treaty [NPT]). Dan it-​trattat li ġie approvat fl-​1968 jipprojbixxi l-​iżvilupp t’armi nukleari f’pajjiżi li m’għandhomx armi u jillimita t-​tqassim tagħhom f’pajjiżi li għandhom l-​armi. L-​iskop taʼ l-​NPT, li issa ġie approvat minn iktar minn 180 nazzjon, hu li eventwalment l-​armi jitneħħew għalkollox.

Għalkemm dan l-​iskop jidher nobbli, xi kritiċi jqisu lill-​NPT bħala xejn iktar milli attentat biex ma jħallux lil dawk il-​pajjiżi li m’għandhomx armi jiżviluppawhom. Għalhekk, hemm il-​biżaʼ li xi wħud li ffirmaw it-​trattat jistaʼ jerġaʼ jibdielhom. Tabilħaqq, xi nazzjonijiet iqisuha bħala xi ħaġa inġusta ferm li ma jitħallewx jiżviluppaw armi li fl-​opinjoni tagħhom ikunu jistgħu jgħinuhom biex jipproteġu lilhom infushom.

Dak li jagħmel is-​sitwazzjoni iktar komplikata​—u saħansitra jżid ir-​riskju tal-​periklu—huwa l-​fatt li l-​ebda nazzjon m’huwa projbit milli jiżviluppa enerġija nukleari. Dan ġiegħel lil xi wħud jibżgħu li nazzjonijiet li suppost qegħdin jużaw l-​enerġija nukleari għal skopijiet taʼ paċi jistgħu jkunu qed jiżviluppaw armi nukleari bil-​moħbi.

Saħansitra nazzjonijiet li diġà għandhom armi nukleari għandhom mnejn li jinjoraw l-​NPT. Il-​kritiċi jgħidu li tkun bluha li wieħed jippretendi li nazzjonijiet li għandhom ħażna ġmielha t’armi jeħilsu mill-​ħażna tagħhom jew għallinqas inaqqsuha. Skond sors wieħed, “sabiex dan jitwettaq . . . jinħtieġ ċertu livell taʼ ħbiberija u fiduċja bejn pajjiżi li bħalissa qed jopponu lil xulxin [li huwa diffiċli li temmen li] dan jistaʼ jiġri.”

L-isforzi tal-​bniedem biex ikun hawn l-​għaqda​—minkejja kemm ikunu sinċieri​—sfaw fix-​xejn. Dan m’huwiex sorprendenti għall-​istudenti tal-​Bibbja, għax il-​Kelma t’Alla tgħid: “Triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.” (Ġeremija 10:23) Bla tlaqliq, il-​Bibbja tgħid: “Hemm min jaħseb li triqtu dritta, mbagħad tmiemha jwasslu għall-​mewt.” (Proverbji 16:25) L-​isforzi tal-​gvernijiet umani sabiex iġibu l-​għaqda huma limitati. Xorta waħda aħna għandna tama.

Is-​Sors taʼ l-​Għaqda Vera

Il-​Bibbja tinkludi l-​wegħda t’Alla li d-​dinja se tkun magħquda imma mhux bl-​isforzi tal-​bniedem. Il-​Ħallieq, li l-​iskop tiegħu kien li l-​bnedmin tad-​dinja kollha jgħixu fil-​paċi, se jwettaq dak li l-​bniedem ma jistax iwettaq. Xi wħud isibuha diffiċli biex jemmnuh dan. Madankollu, mill-​bidunett, l-​iskop t’Alla għall-​bnedmin kien li jgħixu fil-​paċi u fl-​armonija.a Fil-​Bibbja ħafna skritturi jagħtu evidenza li l-​iskop t’Alla għadu li jġib ir-​razza umana f’għaqda. Ikkunsidra biss ftit eżempji:

• “Ejjew, araw x’għamel il-​Mulej, għemejjel taʼ l-​għaġeb fuq l-​art. Iwaqqaf il-​gwerer sa tarf l-​art; l-​ark jaqsam u l-​lanza jkisser, jaħraq it-​tarka bin-​nar.”​—SALM 46:​9, 10 (46:​8, 9, New World Translation).

• “Ma jagħmlux aktar deni u anqas ħsara fuq il-​muntanja qaddisa kollha tiegħi, għax mimlija hi l-​art bl-​għarfien tal-​Mulej bħalma l-​baħar hu miksi bl-​ilmijiet.”​—ISAIJA 11:9.

• “Jeqred il-​mewt għal dejjem, jixxotta Sidi l-​Mulej id-​dmugħ minn fuq kull wiċċ, u jħassar l-​għajb tal-​poplu tiegħu minn wiċċ l-​art kollha: għax il-​Mulej tkellem.”​—ISAIJA 25:8.

• “Hemm smewwiet ġodda u art ġdida li aħna qed nistennew skond il-​wegħda tiegħu, u f’dawn tgħammar il-​ġustizzja.”​—2 PIETRU 3:13.

• “[Alla] jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ. L-​affarijiet taʼ qabel ikunu spiċċaw.”​—RIVELAZZJONI 21:4.

Dawn il-​wegħdi huma taʼ min joqgħod fuqhom. Għala? Għaliex bħala l-​Ħallieq, Alla Ġeħova għandu l-​qawwa u l-​abbiltà biex iġib l-​għaqda fost l-​umanità. (Luqa 18:27) Ukoll, hu għandu x-​xewqa li jagħmel dan. Fil-​fatt, il-​Bibbja ssejjaħlu “l-​iskop li [Alla] għoġbu jfassal . . . [biex] jiġbor kollox flimkien fil-​Kristu, kulma hemm fis-​smewwiet u kulma hemm fuq l-​art.”—Efesin 1:​8-10.

Il-wegħda t’Alla t’“art ġdida” fejn se “tgħammar il-​ġustizzja” m’hijiex biss xewqa. (2 Pietru 3:13) Rigward dak li wiegħed, Alla Ġeħova jgħid: “Kelmti . . . ma terġax lura vojta, imma tagħmel dak li jogħġob lili, u ttemm dak li nkun bgħattha tagħmel.”​—Isaija 55:11.

Magħqudin Permezz tal-​Kelma t’Alla

Kif issemma fl-​artiklu taʼ qabel, spiss ir-​reliġjon firditha l-​umanità iktar milli għaqqditha. Dan jirrikjedi attenzjoni serja min-​naħa tagħna, għax jekk aħna naċċettaw li hemm Ħallieq, m’huwiex raġunevoli allura li nistennew li l-​aduraturi tiegħu jkunu fil-​paċi u fl-​għaqda bejniethom? Tabilħaqq!

Ir-reliġjon qed tifred lill-​umanità, iżda dan m’għandux jirrifletti fuq Alla Ġeħova u l-​Kelma tiegħu. Minflok, hija kundanna għar-​reliġjonijiet li jippromwovu skemi magħmulin mill-​bniedem biex iġibu l-​għaqda minflok ma jappoġġaw l-​iskop t’Alla. Ġesù sejjaħ lill-​mexxejja reliġjużi taʼ żmienu “ipokriti” u qalilhom: “Sewwa pprofetizza dwarkom Isaija, meta qal, ‘Dan il-​poplu jonorani b’xofftejh, iżda qalbu mbiegħda minni. Għalxejn jagħtuni qima, għax jgħallmu bħala duttrini l-​kmandi tal-​bnedmin.’”​—Mattew 15:​7-9.

B’kuntrast, il-​qima vera tgħaqqad lin-​nies. Il-​profeta Isaija bassar: “Għad jiġri fl-​aħħar jiem li l-​għolja tad-​dar tal-​Mulej togħla ’l fuq mill-​qċaċet tal-​muntanji, u tintrefa ’l fuq mill-​għoljiet, lejha għad jiġru l-​ġnus kollha. Il-​Mulej jagħmel il-​ħaqq bejn il-​ġnus, u jaqtaʼ s-​sentenza bejn ħafna popli; u huma jibdlu x-​xwabel tagħhom f’sikek tal-​moħriet, u l-​lanez tagħhom fi mnieġel. Ebda ġens ma jerfaʼ x-​xabla kontra ġens ieħor, u s-​sengħa tal-​gwerra ma jitgħallmuhiex iżjed.”​—Isaija 2:​2, 4.

Illum, f’iktar minn 230 pajjiż, ix-​Xhieda taʼ Ġeħova qed iwieġbu għall-​istruzzjonijiet provduti minn Alla Ġeħova dwar l-​għaqda. X’inhi l-​bażi taʼ l-​għaqda li hemm bejniethom? L-​appostlu Pawlu kiteb: “Ilbsu l-​imħabba, għax hi rabta perfetta li tgħaqqad.” (Kolossin 3:14) Il-​kelma Griega li Pawlu uża għal “rabta” tistaʼ tirreferi għal ligamenti tal-​ġisem tal-​bniedem. Ċerti ligamenti huma b’saħħithom daqs ħabel, u għandhom żewġ funzjonijiet importanti. Huma jżommu l-​organi tal-​ġisem f’posthom, u l-​għadam flimkien.

Dan huwa simili għall-​imħabba. Din hija iktar minn sempliċi kwalità li żżomm lin-​nies lura milli joqtlu lil xulxin. Imħabba bħal taʼ Kristu tippermetti li individwi taʼ sfondi differenti jgħammru flimkien fil-​paċi. Per eżempju, l-​imħabba tippermetti lin-​nies jgħixu fi qbil maʼ dik li hi magħrufa bħala r-​Regola tad-​Deheb. Kif inhu mniżżel f’Mattew 7:​12, Ġesù Kristu qal: “Għalhekk, kulma tridu li l-​bnedmin jagħmlulkom, intom tridu tagħmluh lilhom ukoll.” Dan il-​prinċipju għen lil ħafna wħud jegħlbu l-​preġudizzju.

“Imħabba Bejnietkom”

Ix-​Xhieda taʼ Ġeħova huma determinati li jagħtu prova tagħhom infushom li huma dixxipli taʼ Kristu billi josservaw dak li qal Ġesù: “B’dan ikun jaf kulħadd li intom dixxipli tiegħi, jekk ikollkom l-​imħabba bejnietkom.” (Ġwanni 13:35) Imħabba bħal din intweriet b’mod rimarkevoli fi żminijiet taʼ inkwiet razzjali u politiku. Per eżempju, matul il-​ġenoċidju fl-​Irwanda fl-​1994, ix-​Xhieda taʼ Ġeħova wrew l-​imħabba tagħhom lejn xulxin. Ix-​Xhieda mit-​tribù Ħutu rriskjaw ħajjithom stess sabiex jipproteġu lill-​aħwa Tutsi!

M’għandniex xi ngħidu, m’huwiex realistiku li tistenna li n-​nazzjonijiet tad-​dinja jiżviluppaw tant imħabba għall-​proxxmu li ġġib l-​għaqda fid-​dinja. Skond il-​Bibbja, dan se jwettqu Alla fiż-​żmien stabbilit tiegħu. Madankollu, saħansitra issa, in-​nies jistgħu jilbsu l-​imħabba u jġibu l-​għaqda.

Is-sena l-​oħra, ix-​Xhieda taʼ Ġeħova qattgħu iktar minn biljun siegħa jżuru lin-​nies u jitkellmu magħhom dwar il-​Bibbja u l-​valur li għandha fi żmienna. Għarfien eżatt tal-​Kelma t’Alla għaqqad lil miljuni taʼ nies, fosthom uħud li qabel kellhom mibegħda għal xulxin. Dan jinkludi lill-​Għarab u l-​Lhud, l-​Armeni u t-​Torok, il-​Ġermaniżi u r-​Russi, biex insemmu biss ftit.

Tixtieq titgħallem iktar dwar il-​benefiċċji taʼ l-​għaqda li ssemmi l-​Kelma t’Alla, il-​Bibbja? Jekk tixtieq, ikkuntattja lix-​Xhieda taʼ Ġeħova lokalment, jew ikteb fl-​indirizz adattat imniżżel f’paġna 2.

[Nota taʼ taħt]

[Kumment f’paġna 4]

Saru eluf taʼ trattati taʼ paċi, iżda ma ġewx rispettati

[Kumment f’paġna 7]

L-​applikar tal-​prinċipji tal-​Bibbja wettaq dak li l-​gvernijiet umani ma setgħux iwettqu

[Stampa f’paġna 5]

Il-​Kelma t’Alla tidderiġina lejn is-​Sors taʼ l-​għaqda vera

[Stampa f’paġna 7]

Ix-​Xhieda taʼ Ġeħova mit-​tribujiet Ħutu u Tutsi jibnu post għall-​qima flimkien