Il-​Qarrejja Tagħna Jistaqsu

Għala x-​Xhieda taʼ Ġeħova Ma Jmorrux għall-​Gwerra?

Ix-​Xhieda taʼ Ġeħova, jgħixu fejn jgħixu, għandhom storja twila li turi li ma jiħdux sehem fi gwerer bejn nazzjonijiet jew fi ġlied fl-​istess nazzjon. “Ix-​Xhieda taʼ Ġeħova jżommu newtralità stretta fi żmien taʼ gwerra,” innotat l-​Australian Encyclopædia 50 sena ilu.

Raġuni ewlenija għala x-​Xhieda joqogħdu lura milli jieħdu sehem fil-​gwerer hi li l-​ġlied f’dawn il-​gwerer imur kontra l-​kuxjenza Kristjana tagħhom. Il-​kuxjenza tagħhom ġiet imħarrġa mill-​kmandamenti u mill-​eżempju tal-​Mulej Ġesù Kristu. Hu dderieġa lis-​segwaċi tiegħu biex iħobbu l-​proxxmu tagħhom. Hu kkmanda wkoll: “Komplu ħobbu lill-​għedewwa tagħkom, agħmlu l-​ġid lil dawk li jobogħdukom.” (Luqa 6:27; Mattew 22:39) Meta wieħed mid-​dixxipli tiegħu pprova jiddefendih b’sejf, Ġesù qallu: “Erġaʼ daħħal sejfek f’postu, għax kulmin jaqbad is-​sejf, bis-​sejf jinqered.” (Mattew 26:52) Għalhekk, bil-​kliem u bl-​eżempju, hu wera b’mod ċar li s-​segwaċi tiegħu m’għandhomx jużaw l-​armi għall-​gwerer.

Raġuni oħra għala x-​Xhieda taʼ Ġeħova ma jmorrux għall-​gwerra hi għaliex huma membri kredenti taʼ komunità globali. Il-​gwerra ġġelled ħu kontra ieħor, u dan ikun kontra dak li kkmandahom Ġesù biex ikollhom ‘imħabba bejniethom.’—Ġwanni 13:35.

Il-prinċipji msemmijin hawn fuq rigward l-​imħabba m’humiex biss xi ħaġa li x-​Xhieda taʼ Ġeħova jitkellmu fuqhom imma minflok huma jgħixu skond dawn il-​prinċipji. Bħala eżempju, ikkunsidra l-​pożizzjoni tagħhom matul it-​tieni gwerra dinjija, mill-​1939 sa l-​1945. Fl-​Istati Uniti, iktar minn 4,300 Xhud taʼ Ġeħova ġew mitfugħin f’ħabsijiet federali talli rrifjutaw li jiġġieldu fil-​gwerra. Fil-​Britannja, iktar minn 1,500, inkluż iktar minn 300 mara, ġew mitfugħin il-​ħabs talli rrifjutaw li jagħmlu xogħol konness mal-​gwerra. Fil-​Ġermanja Nazista, iktar minn 270 Xhud ngħataw il-​mewt bl-​ordni taʼ l-​Istat talli rrifjutaw li jiġġieldu. Taħt ir-​reġim Nazista, iktar minn 10,000 Xhud ġew mitfugħin f’ħabsijiet jew f’kampijiet tal-​konċentrament. Ix-​Xhieda fil-​Ġappun ukoll batew ħafna. Kull individwu li tilef il-​maħbubin tiegħu fil-​ġlied tat-​tieni gwerra dinjija—jew, jekk niġu f’dan, f’kull gwerra oħra li ġiet wara—jistaʼ jkun żgur li lanqas wieħed mix-​Xhieda taʼ Ġeħova ma kien responsabbli għal dawn l-​imwiet.

Il-ħarsa tax-​Xhieda taʼ Ġeħova lejn il-​gwerra hi espressa b’mod ċar fl-​aħħar kliem taʼ Wolfgang Kusserow. Fl-​1942, in-​Nazisti qatgħu ras dan ir-​raġel Ġermaniż t’20 sena għax irrifjuta li jmur għall-​gwerra. (Isaija 2:4) Hu qal quddiem it-​tribunal militari: “Jien trabbejt bħala wieħed mix-​Xhieda taʼ Ġeħova, fi qbil mal-​kelma t’Alla misjuba fl-​Iskrittura Mqaddsa. L-​akbar u l-​iktar liġi qaddisa li hu ta lill-​umanità hi: ‘Għandek tħobb lil Alla tiegħek iktar minn kollox u lill-​proxxmu tiegħek bħalek innifsek.’ Kmandamenti oħrajn jgħidu: ‘La toqtolx.’ Ġiegħel il-​Ħallieq tagħna li dan kollu jinkiteb għas-​siġar?”—Marku 12:29-31; Eżodu 20:13.

Ix-Xhieda taʼ Ġeħova jemmnu li Ġeħova biss, Dak Alla li Jistaʼ Kollox, se jġib paċi permanenti fuq l-​art. Huma jistennew lilu biex iwettaq il-​wegħda tiegħu li “jwaqqaf il-​gwerer sa tarf l-​art.”—Salm 46:9.