Għinhom Biex Jerġgħu Jaqdu
1 Billi għaraf x’setaʼ kien taʼ periklu spiritwali għal sħabu l-Kristjani, l-appostlu Pawlu kiteb: “Diġà saret is-siegħa għalikom biex tistenbħu mir-raqda, għax issa s-salvazzjoni tagħna hija iktar qrib minn dak iż-żmien meta sirna nemmnu.” (Rum. 13:11) Pawlu kien imħasseb dwar ħutu li kienu qegħdin jonogħsu spiritwalment; kien ħerqan li jerġaʼ jqanqalhom għal attività mill-ġdid.
2 Jistaʼ verament jingħad li l-lejl taʼ din id-dinja qadima daħal ġmielu u li s-sebħ tad-dinja l-ġdida dalwaqt magħna. (Rum. 13:12) Għandna kull raġun għalfejn inkunu mħassbin dwar ħutna li m’għadhomx imseħbin magħna bħala xandara taʼ l-aħbar tajba. Fis-sena taʼ servizz li għaddiet f’Malta kien hawn 10 pubblikaturi li reġgħu saru attivi. Kif nistgħu ngħinu wħud inattivi oħrajn biex jerġgħu jibdew jaqdu lil Jehovah mill-ġdid?
3 X’Jistgħu Jagħmlu L-Anzjani: Il-biċċa l-kbira taʼ dawk li huma inattivi m’abbandunawx il-verità; sempliċement waqfu jippridkaw minħabba skuraġġiment, problemi persunali, materjaliżmu, jew anzjetajiet oħrajn tal-ħajja. (Luqa 21:34-36) Jekk inhu possibbli, ikun ferm aħjar li ngħinuhom qabel ma jsiru inattivi. Is-segretarju tal-kongregazzjoni għandu javża lil dak li jikkonduċi l-Istudju tal-Ktieb tal-Kongregazzjoni meta xi pubblikatur isir irregulari f’li jirrapporta l-attività fis-servizz. Jistgħu jsiru arranġamenti għal żjara pastorali. Huma għandhom jipprovaw isibu x’inhi l-kawża fundamentali tal-problema u kif tistaʼ tingħata l-għajnuna.—Ara l-Watchtower tal-15 taʼ Settembru, 1993, paġni 20-3.
4 Kif Oħrajn Jistgħu Jgħinu: Il-biċċa l-kbira minna nafu lil xi ħadd li sar inattiv. Jistaʼ jkun xi ħadd li fil-passat kien qrib tagħna mhux ħażin. X’nistgħu nagħmlu biex ngħinuh? Għala ma tmurx tarah għal ftit ħin? Għidlu li tħoss in-nuqqas tal-kumpanija tiegħu. Kun ferrieħi u pożittiv. Esprimi t-tħassib tiegħek mingħajr ma tgħidlu li hu marid spiritwalment. Irrakkonta xi esperjenzi inkuraġġanti jew affarijiet tajbin oħrajn li l-kongregazzjoni qiegħda twettaq. Għidlu bil-ħrara dwar il-Konvenzjoni Distrettwali “Messaġġiera Tal-Paċi Divina,” u ħeġġu biex jattendi. Aktarx li xejn ma jistaʼ jgħinu iktar milli jerġaʼ jissieħeb mal-kongregazzjoni. Offrilu li tmur miegħu għal-laqgħat. Għarraf lill-anzjani bir-riżultat li ksibt.
5 Meta wieħed li jkun sar inattiv jerġaʼ lura għal-laqgħat, x’aktarx li se jħossu skomdu meta jiltaqaʼ m’oħrajn li kien jaf qabel. Tistaqsihx: “X’sar minnek?” Minflok, ġagħlu jħossu milqugħ. Inkludih fil-konversazzjoni. Introduċih maʼ dawk li ma jafx. Poġġi bil-qiegħda ħdejh matul il-laqgħa, u ara li għandu ktieb tal-kant u l-materjal li jkun qiegħed jiġi studjat. Ħeġġu biex jerġaʼ jiġi, u jekk hemm xi bżonn offri l-għajnuna tiegħek.
6 Peress li għandhom affezzjoni kordjali lejn dawk li qatgħu lura, Jehovah u Ġesù jifirħu meta wħud bħal dawn jirkupraw spiritwalment. (Mal. 3:7; Matt. 18:12-14) Nistgħu nesperjenzaw dak l-istess ferħ jekk jirnexxilna ngħinu lil oħrajn biex jerġgħu jaqdu lil Jehovah.