Aġġustament fil-​Ħtiġijiet tas-​Sigħat għall-​Pijunieri

¹ Ilkoll kemm aħna napprezzaw li fil-​kongregazzjoni għandna pijunieri regulari u awżiljarji li jaħdmu iebes. Saħansitra fejn it-​territorju huwa limitat u maħdum bir-​reqqa fuq bażi regulari, il-​pijunieri taw eżempju mill-​aħjar bis-​servizz żeluż tas-​Saltna. Huma kienu u għadhom jinkuraġġixxu lill-​pubblikaturi kollha biex jibqgħu okkupati f’li jfittxu lil dawk “disposti sewwa.”​—Atti 13:​48, New World Translation.

² Is-​Soċjetà osservat li d-​diffikultajiet li jiffaċċjaw il-​pijunieri qed jiżdiedu, speċjalment meta jiġu biex isibu xogħol sekulari part-time li jippermettilhom jieħdu ħsieb adegwatament tal-​ħtiġijiet persunali tagħhom sabiex jibqgħu fis-​servizz full-time. Is-​sitwazzjoni ekonomika preżenti f’ħafna pajjiżi għamlitha wkoll iżjed u iżjed diffiċli għal oħrajn biex jidħlu fix-​xogħol taʼ pijunier, avolja dik tkun ix-​xewqa taʼ qalbhom. Matul dawn l-​aħħar xhur, ikkunsidrajna bir-​reqqa dawn il-​fatturi u oħrajn.

³ Għalhekk, meta s-​Soċjetà qieset l-​affarijiet t’hawn fuq, naqqset il-​ħtieġa tas-​sigħat kemm għall-​pijunieri regulari kif ukoll għall-​pijunieri awżiljarji. B’seħħ minn Jannar 1999, il-​ħtieġa taʼ sigħat għall-​pijunieri regulari se tkun taʼ 70 siegħa fix-​xahar, jew total taʼ 840 siegħa fis-​sena. Il-​ħtieġa taʼ kull xahar għall-​pijunieri awżiljarji se tkun taʼ 50 siegħa. Il-​ħtieġa taʼ sigħat għall-​pijunieri speċjali u għall-​missjunarji mhix se tinbidel, peress li s-​Soċjetà għamlet provvediment biex tgħinhom jieħdu ħsieb il-​bżonnijiet materjali bażiċi tagħhom. B’hekk, ikunu jistgħu jikkonċentraw iktar bis-​sħiħ fuq ix-​xogħol taʼ l-​ippridkar u taʼ li jagħmlu dixxipli.

⁴ Nisperaw li dan l-​aġġustament fil-​ħtiġijiet tas-​sigħat se jgħin lil iktar pijunieri biex jibqgħu f’dan il-​privileġġ prezzjuż taʼ servizz. Għandu wkoll jiftaħ it-​triq għal ħafna iktar pubblikaturi biex jibdew ix-​xogħol taʼ pijunier regulari u awżiljarju. X’barka għandha tkun din għall-​kongregazzjoni kollha!