‘Ismaʼ u Żid l-​Għerf Tiegħek’

¹ Il-​ktieb taʼ Proverbji jagħti stampa taʼ l-​għerf li qed isejjaħ: “Isimgħu, għax ħwejjeġ kbar se ngħidilkom, kliem is-​sewwa se joħroġ minn fommi; jiena għandi l-​fehma u l-​għaqal, . . . isimgħu lili: henjin dawk li jimxu fi triqati. Għax min isib lili jsib il-​ħajja, u jikseb l-​imħabba tal-​Mulej.” (Prov. 8:​6, 14, 32, 35) Dan il-​kliem jiddeskrivi sew l-​istruzzjoni li qed tistenniena fil-​Konvenzjoni Distrettwali “Għalliema tal-​Kelma t’Alla.”

² Il-​bżonnijiet tal-​fratellanza taʼ madwar id-​dinja ġew analizzati, u l-​programm tal-​konvenzjoni tħejja biex jieħu ħsieb dawk il-​bżonnijiet. L-​istruzzjoni spiritwali u s-​suġġerimenti prattiċi li se jingħataw jistgħu, jekk jiġu applikati, jgħinuna biex inkunu ferħanin, inżommu relazzjoni tajba maʼ Jehovah, u nibqgħu fit-​triq li twassal għall-​ħajja taʼ dejjem. Ċertament, għandna raġuni tajba biex ‘nisimgħu u nżidu l-​għerf tagħna.’​—Prov. 1:5.

³ Qabel il-​Programm: Biex nibbenefikaw bis-​sħiħ minn dak li se jiġi preżentat, hemm bżonn li nkunu f’postna u jkollna attitudni xierqa meta l-​programm jibda. Dan jirrikjedi li norganizzaw ruħna sew. Fattur importanti hu li nibdew kmieni. Mur orqod kmieni l-​lejl taʼ qabel. Qum kmieni biżżejjed sabiex kulmin hu fil-​grupp tiegħek ikollu ħin biex ilesti u jiekol xi ħaġa. Asal kmieni fil-​post tal-​konvenzjoni biex issib post fejn tpoġġi bil-​qiegħda u tieħu ħsieb dak li jkollok bżonn qabel ma jibda l-​programm. Il-​bibien jinfetħu fit-​8.00 taʼ fil-​għodu, u l-​programm jibda fid-​9.30 taʼ fil-​għodu kuljum.

⁴ Peress li l-​iskop ewlieni tal-​laqgħa huwa li nfaħħru lil Jehovah “fil-​ġemgħat,” kull sezzjoni għandha tinbeda b’tali mod li jfaħħar lil Jehovah bil-​kbir. (Salm 26:12) Għal dan l-​iskop, kulħadd huwa inkuraġġit li jkun f’postu qabel ma titħabbar l-​għanja tal-​ftuħ. Dan huwa fi qbil mat-​twissija Skritturali: “Ħa jsir kollox kif imur u bl-​ordni.” (1 Kor. 14:40) Dan xi jfisser għal kull wieħed u waħda minna? Meta tara liċ-​chairman bil-​qiegħda fuq il-​platform matul l-​introduzzjoni mużikali, sib postok mill-​ewwel. Dan se jippermettilek tieħu sehem b’qalb sħiħa fl-​għanja tal-​ftuħ taʼ kull sezzjoni, u b’hekk tkun qed tagħti tifħir kbir lil Jehovah.​—Salm 149:1.

⁵ Matul il-​Programm: Esdra “ħejja qalbu biex ifittex il-​liġi tal-​Mulej u jagħmilha.” (Esd. 7:​10, Saydon) Kif nistgħu nħejju qlubna biex nirċievu l-​istruzzjoni li jipprovdi Jehovah? Hekk kif tirrivedi t-​titli tad-​diversi partijiet imniżżlin fil-​programm stampat, staqsi lilek innifsek, ‘X’inhu jgħidli Jehovah permezz taʼ dan il-​programm? Kif nistaʼ nuża l-​informazzjoni biex jien u l-​familja tiegħi nibbenefikaw?’ (Is. 30:21; Efes. 5:​17) Kompli staqsi dawn il-​mistoqsijiet matul il-​konvenzjoni. Ħu nota tal-​punti li qed tippjana li tuża. Ħu l-​ħin biex tiddiskutihom fl-​aħħar taʼ kull sessjoni kuljum. Dan se jgħinek iżżomm l-​informazzjoni f’moħħok u tapplikaha.

⁶ Li tikkonċentra għal ammont taʼ sigħat f’daqqa jistaʼ jkun taʼ sfida. X’jistaʼ jgħinna biex negħlbu t-​tendenza li naljenaw rasna? Ħu vantaġġ mill-​qawwa li għandha l-​għajn. Ġeneralment, dak li niffokaw għajnejna fuqu jikkmanda l-​attenzjoni tagħna. (Mt. 6:​22) Għalhekk, egħleb it-​tentazzjoni li ddawwar rasek maʼ kull ħoss jew ċaqliqa li jkun hemm. Żomm għajnejk iffokati fuq il-​kelliemi. Segwi mill-​kopja tiegħek tal-​Bibbja meta tinqara skrittura, u żomm il-​Bibbja miftuħa meta l-​vers ikun qed jiġi diskuss.

⁷ L-​imħabba Kristjana se tqanqalna nevitaw li nfixklu lil oħrajn waqt li jkun għaddej il-​programm. (1 Kor. 13:5) Dan huwa “żmien li tiskot” u tismaʼ. (Koħ. 3:7) Għalhekk, evita kliem u ċaqliq bla bżonn. Ipprova naqqas id-​drabi li tmur it-​tojlit billi tmur qabel. Tikolx u tixrobx qabel ma jsir il-​ħin għal dan, sakemm ma jkunx hemm involuti problemi serji taʼ saħħa. Dawk li jġibu t-​telefons ċellulari, il-​pagers, il-​vidjo kamera, u l-​kamera tar-​ritratti m’għandhomx jużawhom b’tali mod li jtellfu lil oħrajn. Il-​ġenituri għandhom jirranġaw għall-​familja kollha tagħhom​—anki għall-​adolexxenti​—biex joqogħdu bil-​qiegħda ħdejn xulxin ħalli jkunu jistgħu jieħdu ħsieb t’uliedhom sew.​—Prov. 29:15.

⁸ Is-​sena l-​oħra anzjan li ilu jattendi l-​konvenzjonijiet għal għaxriet taʼ snin osserva: “Ħassejt li din il-​konvenzjoni kienet tispikka għal raġuni oħra. Kważi kulħadd fl-​udjenza kien qed jieħu n-​noti, anki t-​tfal żgħar. Kienet xi ħaġa verament pjaċevoli li taraha. Il-​Bibbji bdew jintużaw sew meta l-​kelliema bdew jgħidu biex jinfetħu f’xi siltiet.” Smigħ b’attenzjoni bħal dan huwa verament taʼ min ifaħħru. Dan mhux biss huwa taʼ benefiċċju għalina u għad-​delegati sħabna tal-​konvenzjoni imma fuq kollox jigglorifika lill-​Għalliem Grandjuż tagħna, Alla Jehovah.​—Is. 30:20.