Oqgħod Attent għall-Orakli Sagri
1 Mhux kulma jgħid il-bniedem jixraqlu attenzjoni speċjali. Imma meta jitkellem Alla, hemm raġuni vitali għala għandna nagħtu widen. (Dt. 28:1, 2) Aħna grati li kittieba mnebbħin niżżlu bil-miktub “l-orakli taʼ Alla” għall-benefiċċju tagħna. (Rum. 3:2) Il-konvenzjoni distrettwali li ġejja se tipprovdi opportunitajiet prezzjużi biex nisimgħu dawn l-orakli hekk kif jinqraw u jiġu diskussi. Kif tistaʼ toqgħod attent ferm?
2 Ejja Kmieni Kull Fil-Għodu: Immaġina l-eċċitament li ħassew l-Iżraelin meta ntqalilhom biex jiltaqgħu maʼ Jehovah fuq il-Muntanja Sinaj u jisimgħu l-Liġi tiegħu! (Eżo. 19:10, 11, 16-19) Jekk int għandek attitudni simili dwar li tirċievi l-istruzzjoni mingħand Jehovah fil-konvenzjoni distrettwali, se tagħmel xi arranġamenti biex tiġi kmieni kuljum. Ma nistgħux nisimgħu l-programm kollu jekk niġu tard u nfixklu lil oħrajn billi noqogħdu nfittxu fejn se npoġġu bil-qegħda. Fil-post tal-konvenzjoni l-bibien se jinfetħu fit-8:00 a.m., u l-programm jibda fid-9:30 a.m. kuljum.
3 Xi wħud li jiġu kmieni xorta ma jkunux f’posthom meta tkun se tibda s-sessjoni. Għala? Huma joqogħdu jistennew sakemm iċ-chairman jintroduċi l-għanja tal-ftuħ qabel ma jieqfu jitkellmu mal-ħbieb u jmorru jsibu posthom. Irridu nżommu f’moħħna li ftit minuti qabel ma tkun se tibda l-għanja tal-ftuħ taʼ kull sessjoni, iċ-chairman ikun bil-qegħda fuq il-platform waqt li tindaqq il-mużika tas-Saltna li tintroduċi l-laqgħa. Dan ikun sinjal għalina li wasal il-ħin biex kulħadd joqgħod bil-qegħda! Imbagħad, meta tingħad x’inhi l-għanja tal-ftuħ, aħna nkunu lesti biex ningħaqdu f’li ngħannu tifħir lil Jehovah.
4 Agħti Widen Bħala Familja Magħquda: Meta nqraw l-orakli sagri lill-Iżraelin miġburin, il-familji, inkluż “it-tfal,” kienu hemm biex jisimgħu u jitgħallmu. (Dt. 31:12) Fil-konvenzjonijiet tagħna, it-tfal m’għandhomx jitħallew ‘mitluqin għal riħhom.’ (Prov. 29:15) Ġenituri, irranġaw biex il-familja tagħkom kollha toqgħod bil-qegħda ħdejn xulxin—inkluż l-adolexxenti. Xi ġenituri jistennew sakemm tibda l-għanja tal-ftuħ biex jieħdu lit-tfal tagħhom it-tojlit. Madankollu, dan ma tantx se jgħallem lit-tfal l-importanza kbira li għandhom l-għanjiet u t-talb fil-qima tagħna. Kemm ikun aħjar li kemm jistaʼ jkun dawn il-bżonnijiet nieħdu ħsiebhom qabel ma tibda kull sessjoni!
5 Jekk nistrieħu sew kull lejl u nevitaw ikliet tqal matul il-ġurnata nkunu nistgħu nisimgħu aħjar. Ikkonċentra fuq dak li jkun qed jgħid il-kelliemi. Tħallix lil moħħok joqgħod jaħseb fuq affarijiet oħrajn. Segwi fuq il-Bibbja tiegħek meta jinqraw l-iskritturi. Ħu xi noti qosra. Hekk kif tingħata kull taħdita, irrevedi f’moħħok x’qal il-kelliemi, u kkunsidra kif se tapplika l-materjal. Fi tmiem il-ġurnata, iddiskutu l-programm bħala familja. Liema punti laqtu lil kull wieħed u waħda minnkom? Kif tistaʼ l-familja tiegħek tpoġġi din l-informazzjoni fil-prattika?
6 Uri Rispett għall-Kelma t’Alla: Il-konvenzjonijiet jagħtuna opportunità mill-aħjar biex nitkellmu mal-ħbieb u ngawdu sħubija li tibni. Billi niġu kmieni, se jkollna l-ħin biex nitkellmu qabel ma jibda l-programm. Xi wħud, iżda, jaqbdu xi konversazzjoni waqt il-programm, billi b’mod żbaljat jaħsbu li dan se joħloq ftit li xejn tfixkil f’awditorju kbir. Anki meta l-laqgħat jinżammu f’xi post kbir, ikun il-waqt li toqgħod tismaʼ, sewwa sew bħal meta nattendu laqgħa fis-Sala tas-Saltna. L-użu tat-telefons ċellulari, pagers, kamkorders, u kameras tar-ritratti m’għandhomx joħolqu tfixkil matul il-programm.
7 Waqt li Mosè kien qed jirċievi l-Liġi mingħand Jehovah, baqaʼ “mingħajr ma kiel ħobż jew xorob ilma.” (Eżo. 34:28) B’mod simili, ma jkunx xieraq li nieklu jew nixorbu waqt is-sessjonijiet tal-konvenzjoni. Jekk ma jkunx hemm involuti xi fatturi serji tas-saħħa, stenna sakemm ikun “żmienu.”—Koħ. 3:1.
8 F’xi konvenzjonijiet, għad hemm problema dwar ħafna aħwa rġiel u nisa u saħansitra tfal żgħar iduru fil-kurituri matul is-sessjonijiet. L-attendants se jingħataw istruzzjonijiet biex jgħidu lil uħud bħal dawn imorru f’posthom fl-awditorju. Il-volontieri li jkunu qed jaħdmu f’diversi dipartimenti għandhom isibu posthom fl-udjenza eżatt kif ilestu minn xogħolhom. Sakemm il-volontiera ma jiġux inkarigati biex jagħmlu xi xogħol essenzjali matul is-sessjonijiet, huma jridu jkunu f’posthom, jisimgħu l-programm. M’għandhomx jaħlu ż-żmien fid-dipartimenti, billi joqogħdu jpaċpċu flimkien waqt li jkun għaddej il-programm.
9 Aħna qatt ma rridu nsiru ‘tqal biex nisimgħu’ meta nkunu qed nagħtu widen għall-Kelma t’Alla. (Lhud 5:11) Għalhekk, ejja nkunu deċiżi li nuru rispett xieraq billi nisimgħu b’attenzjoni hekk kif l-orakli sagri mingħand Jehovah jiġu diskussi fil-konvenzjoni distrettwali li ġejja.