Mezz t’Għajnuna għall-​Pubbliku

Il-​Kristjani veri jieħdu sehem fil-​ministeru pubbliku billi jxerrdu l-​aħbar tajba. (Flp. 2:​17) Sabiex dan ikun jistaʼ jitwettaq, fuq l-​Internet tpoġġew xi browxers, fuljetti, u artikli bażiċi b’20 lingwa differenti fuq www.watchtower.org. Din il-​Web site m’hijiex disinjata biex tqassam il-​pubblikazzjonijiet kurrenti tax-​Xhieda taʼ Jehovah. L-​iskop tagħha huwa li tagħmel disponibbli informazzjoni eżatta għall-​pubbliku dwar x’jgħallmu x-​Xhieda taʼ Jehovah mill-​Bibbja.

Dan l-​aħħar, fil-​Web site uffiċjali tagħna żdiedet xi ħaġa sinifikanti. Din hija l-​browxer Alla X’Jirrikjedi Minna? b’iktar minn 220 lingwa, fosthom il-​Malti. Ukoll, mill-​ħarġiet taʼ l-​1 taʼ Jannar u tat-​8 taʼ Jannar, 2004, It-​Torri taʼ l-​Għassa u Stenbaħ! bdew juru l-​indirizz tal-​Web site fuq il-​paġna taʼ wara bil-​lingwi kollha.

Kif tistaʼ tuża din l-​għodda? Forsi tiltaqaʼ maʼ xi ħadd li jidher interessat imma jkun jifhem b’xi lingwa oħra biss. Jekk dan l-​individwu jkollu aċċess għall-​Internet, tistaʼ turih l-​indirizz tal-​Web site fuq il-​paġna taʼ wara tat-​Torri taʼ l-​Għassa jew taʼ Stenbaħ! B’hekk, hu se jkun jistaʼ jeżamina l-​browxer X’Jirrikjedi bil-​lingwa t’art twelidu. Tajjeb li niftakru li meta niltaqgħu maʼ nies bħal dawn, għandna ngħadduhom lill-​kongregazzjoni taʼ l-​Ingliż f’Malta.