Uri l-Ispirtu taʼ Pijunier
1. Kif tiddeskrivih l-ispirtu taʼ pijunier?
1 Sew jekk fil-preżent jistgħu jaqdu bħala pijunieri u sew jekk le, il-pubblikaturi kollha tas-Saltna jistgħu juru l-ispirtu taʼ pijunier. Huma jridu verament jobdu l-kmand li jippridkaw u jagħmlu dixxipli. (Mt. 28:19, 20; Atti 18:5) Huma jimpurtahom min-nies u jagħmlu sagrifiċċji sabiex iwettqu l-ministeru tagħhom. (Mt. 9:36; Atti 20:24) Il-qaddejja taʼ Jehovah lesti jagħmlu kulma hemm bżonn biex jgħinu lil oħrajn jitgħallmu l-verità. (1 Kor. 9:19-23) Ejja nikkunsidraw l-eżempju taʼ wieħed li wera spirtu bħal dan, Filippu l-evanġelizzatur.
2. L-anzjani u l-qaddejja ministerjali kif jistgħu jimitaw iż-żelu li kellu Filippu għall-ministeru?
2 L-Ippridkar u t-Tagħlim: Filippu kellu responsabbiltajiet importanti fil-kongregazzjoni taʼ l-ewwel seklu. (Atti 6:1-6) Madankollu, hu kien primarjament predikatur żeluż taʼ l-aħbar tajba. (Atti 8:40) Filwaqt li jieħdu ħsieb l-inkarigi li għandhom, l-anzjani u l-qaddejja ministerjali jistgħu juru l-ispirtu taʼ pijunier billi jkunu minn taʼ quddiem u juru entużjażmu fil-ministeru. Kemm jissaħħaħ l-ispirtu tal-kongregazzjoni meta jagħmlu hekk!—Rum. 12:11.
3. Kif nistgħu nuru l-ispirtu taʼ pijunier meta niffaċċjaw il-provi?
3 Wara l-mewt taʼ Stiefnu, mewġa taʼ persekuzzjoni ġabet taqlib kbir fil-ħajja tad-dixxipli. Madankollu, Filippu kompla jippriedka, u hu kellu rwol importanti f’li jibda x-xogħol fost is-Samaritani. (Atti 8:1, 4-6, 12, 14-17) Aħna nistgħu nimitaw l-eżempju tiegħu billi nkomplu nxerrdu l-aħbar tajba meta ngħaddu minn provi u nippridkaw b’mod imparzjali lil kulmin niltaqgħu miegħu.—Ġw. 4:9.
4. Filippu x’eżempju ħalla bħala għalliem?
4 Nistgħu naraw l-abbiltà li kellu Filippu bħala għalliem tal-Kelma t’Alla mir-rakkont tal-konverżjoni taʼ l-ewnuku Etjopjan. (Atti 8:26-38) Mod ieħor kif nuru l-ispirtu taʼ pijunier huwa billi niżviluppaw l-abbiltà li nużaw il-Bibbja u nirraġunaw mill-Iskrittura. (Atti 17:2, 3) Bħal Filippu, aħna nipprovaw naqsmu l-aħbar tajba kulfejn insibu n-nies u f’kull okkażjoni xierqa.
5. X’jistaʼ jgħin lill-ġenituri Kristjani jikkultivaw f’uliedhom lispirtu taʼ pijunier?
5 Il-Familja u l-Kongregazzjoni: M’hemmx dubju li l-attitudni u l-eżempju taʼ Filippu kellhom effett pożittiv fuq uliedu l-bniet. (Atti 21:9) Bl-istess mod, il-ġenituri Kristjani li jiċċentraw ħajjithom fuq l-interessi tas-Saltna jinkuraġġixxu lil uliedhom biex jagħmlu l-istess. Għalkemm ikunu għajjenin wara ġimgħa xogħol, ġenituri li jippridkaw bil-ħeġġa lil oħrajn jistgħu jħallu impressjoni dejjiema fuq qalb uliedhom.—Prov. 22:6.
6. Kif nistgħu nuru apprezzament għall-pijunieri fil-kongregazzjoni tagħna?
6 Filippu wera l-ospitalità maʼ Pawlu u Luqa, Kristjani żelużi li kienu qed jaħdmu iebes fis-servizz taʼ Jehovah. (Atti 21:8, 10) Illum kif nistgħu nuru l-apprezzament tagħna għal uħud żelużi u nappoġġawhom? Forsi nistgħu noffru li naħdmu fil-għodu jew wara nofsinhar mal-pijunieri fi ġranet li ma tantx joħorġu aħwa fil-ministeru. (Flp. 2:4) Nistgħu wkoll nistidnuhom sad-dar tagħna għal ftit sħubija inkuraġġanti. Huma x’inhuma ċ-ċirkustanzi tagħna, jalla lkoll kemm aħna nistinkaw biex nuru l-ispirtu taʼ pijunier.