Filippu—Evanġelista Żeluż

FL-​ISKRITTURA hemm ħafna rakkonti taʼ rġiel u nisa li kellhom fidi taʼ min jimitaha. Ikkunsidra lil Filippu, missjunarju Kristjan li kien jgħix fl-​ewwel seklu. Hu ma kienx appostlu, u madankollu kien għodda qawwija fit-​tixrid tal-​messaġġ tas-​Saltna. Fil-​fatt, Filippu sar magħruf bħala “l-​evanġelista.” (Atti 21:8) Filippu għala kien magħruf b’dan il-​laqam? U x’nistgħu nitgħallmu minnu?

Filippu jissemma għall-​ewwel darba fil-​Bibbja ftit wara Pentekoste tas-​sena 33 E.K. Dak iż-​żmien, il-​Lhud li kienu jitkellmu bil-​Grieg bdew igergru kontra l-​Lhud li kienu jitkellmu bl-​Ebrajk, billi sostnew li r-​romol tagħhom kienu qed jinqabżu fit-​tqassim taʼ kuljum taʼ l-​ikel. Biex isolvu din il-​kwistjoni, l-​appostli ħatru ‘sebat irġiel li kellhom isem tajjeb.’ Filippu kien fost dawk magħżulin.—Atti 6:1-6.

Dawn is-​sebat irġiel kellhom “isem tajjeb.” In-​New World Translation tgħid li kienu “ċċertifikati.” Iva, meta nħatru kienu diġà magħrufin bħala rġiel spiritwali li kienu prattiċi fil-​mod taʼ ħsieb tagħhom. Huwa simili fil-​każ taʼ dawk li jaqdu bħala indokraturi Kristjani llum. Dawn l-​irġiel ma jinħatrux kif ġieb u laħaq. (1 Timotju 5:22) Irid ikollhom “isem tajjeb mal-​barranin,” u Kristjani sħabhom għandhom ikunu jafuhom bħala rġiel raġunevoli li għandhom moħħ f’loku.—1 Timotju 3:2, 3, 7; Filippin 4:5, NW.

L-evidenza turi li Filippu kien iwettqu tajjeb l-​inkarigu tiegħu f’Ġerusalemm. Madankollu, malajr faqqgħet mewġa taʼ persekuzzjoni ħarxa li xerrdet lis-​segwaċi taʼ Kristu. Filippu telaq mill-​belt, bħalma għamlu xi oħrajn, imma l-​ministeru tiegħu ma spiċċax hawn. F’qasir żmien, hu kien medhi jippriedka f’territorju ġdid​—is-​Samarija.—Atti 8:1-5.

Jiftaħ Territorji Ġodda

Ġesù kien bassar li d-​dixxipli tiegħu kellhom jippridkaw “f’Ġerusalemm, fil-​Lhudija kollha u s-​Samarija u sa truf l-​art.” (Atti 1:8) Billi ppriedka fis-​Samarija, Filippu kien qed ikollu sehem fit-​twettiq taʼ dan il-​kliem. Il-​Lhud ġeneralment ftit kellhom stima lejn is-​Samaritani. Imma Filippu ma ġġudikahomx minn qabel lil dawn in-​nies, u l-​imparzjalità tiegħu tbierket. Tabilħaqq, kien hemm ħafna Samaritani li tgħammdu, inkluż raġel li qabel kien jagħmel is-​sħarijiet u li kien jismu Xmun.—Atti 8:6-13.

Maż-żmien, l-​anġlu taʼ Jehovah dderieġa lil Filippu biex jgħaddi mit-​triq fid-​deżert li kienet tieħu minn Ġerusalemm għal Gaża. Hemmhekk Filippu lemaħ karru li kien qed iġorr uffiċjal Etjopjan li kien qed jaqra jgħajjat mill-​profeziji taʼ Isaija. Filippu beda jiġri maġenb il-​karru u qabad konversazzjoni. Għalkemm l-​Etjopjan kien proselita li kellu xi ftit għarfien dwar Alla u l-​Iskrittura, hu bl-​umiltà kollha ammetta li kellu bżonn l-​għajnuna biex jifhem dak li kien qed jaqra. Għalhekk, stieden lil Filippu biex jitlaʼ fuq il-​karru u joqgħod bil-​qegħda ħdejh. Wara li ngħata xiehda, waslu ħdejn medda taʼ ilma. “X’qiegħed iżommni li ma nitgħammidx?” staqsa l-​Etjopjan. Filippu għammdu dak il-​ħin stess, u l-​Etjopjan baqaʼ sejjer fi triqtu kollu ferħan. X’aktarx li dan id-​dixxiplu ġdid xerred l-​aħbar tajba lura f’art twelidu.—Atti 8:26-39.

X’nistgħu nitgħallmu mill-​ministeru taʼ Filippu li kien jinvolvi s-​Samaritani u l-​uffiċjal Etjopjan? Qatt m’għandna nassumu li individwi taʼ ċerta nazzjonalità, razza, jew stat soċjali m’humiex se jkunu interessati fl-​aħbar tajba. Minflok, għandna niddikjaraw il-​messaġġ tas-​Saltna lil “kulħadd.” (1 Korintin 9:19-23) Jekk nagħmlu lilna nfusna disponibbli billi nippridkaw lil kulħadd, Jehovah jistaʼ jużana fix-​xogħol taʼ li ‘nagħmlu dixxipli mill-​ġnus kollha’ qabel ma jasal it-​tmiem taʼ din is-​sistema ħażina.—Mattew 28:19, 20.

Privileġġi Oħrajn li Kellu Filippu

Wara li ppriedka lill-​uffiċjal Etjopjan, Filippu ta xiehda f’Ażotu, u “huwa u għaddej minn dawk l-​inħawi, kien ixandar l-​Evanġelju f’kull belt sakemm wasal Ċesarija.” (Atti 8:40) Fl-​ewwel seklu, dawn iż-​żewġt ibliet kellhom popolazzjonijiet Ġentili mdaqqsin. X’aktarx li meta kien fi triqtu lejn it-​tramuntana, hu u sejjer Ċesarija, Filippu ppriedka f’ċentri prominenti tal-​Lhud, bħal dawk taʼ Lidda u Ġaffa. Forsi din hija r-​raġuni għala iktar tard kien hemm xi dixxipli f’dawn l-​inħawi.—Atti 9:32-43.

L-aħħar darba li jissemma Filippu hija xi 20 sena wara. Fi tmiem it-​tielet vjaġġ missjunarju tiegħu, Pawlu żbarka fi Ptolemajs. ‘L-​għada tlaqna u morna Ċesarija, u dħalna fid-​dar taʼ Filippu l-​evanġelista,’ jgħid Luqa, li kien qed jivvjaġġa maʼ Pawlu. Sa dakinhar Filippu kien laħaq kellu “erbaʼ xebbiet, li kellhom id-​don tal-​profezija.”—Atti 21:8, 9.

Milli jidher, Filippu kien mar joqgħod f’Ċesarija. Imma ma kienx tilef l-​ispirtu taʼ missjunarju li kellu, għaliex Luqa jsejjaħlu “l-​evanġelista.” Din l-​espressjoni taʼ spiss tindika xi ħadd li jħalli daru biex jippriedka l-​aħbar tajba f’reġjuni mhux maħdumin. Il-​fatt li Filippu kellu erbaʼ xebbiet li kienu jipprofetizzaw jissuġġerixxi li huma segwew l-​eżempju żeluż taʼ missierhom.

Ġenituri Kristjani fi żmienna jridu jiftakru li wliedhom huma l-​iktar dixxipli importanti li jistgħu jħarrġu. Anki jekk xi ġenituri jkollhom iċedu ċerti privileġġi teokratiċi minħabba r-​responsabbiltajiet tal-​familja, bħal Filippu, huma jistgħu jibqgħu jkunu qaddejja li jaqdu lil Alla b’qalb sħiħa, u ġenituri eżemplari.—Efesin 6:4.

Iż-żjara taʼ Pawlu u sħabu offriet opportunità mill-​aħjar lill-​familjari taʼ Filippu biex juru ospitalità. Immaġina ftit kemm inkuraġġew lil xulxin! Forsi kien f’din l-​okkażjoni li Luqa ġabar id-​dettalji taʼ l-​attivitajiet taʼ Filippu, li mbagħad ġew inklużi f’Atti kapitli 6 u 8.

Alla Jehovah uża lil Filippu b’mod estensiv biex javanza l-​interessi tas-​Saltna. Iż-​żelu li kellu Filippu għenu jxerred l-​aħbar tajba f’territorji ġodda u jippromwovi atmosfera spiritwali u edifikanti ġewwa d-​dar tiegħu. Tixtieq tgawdi privileġġi u barkiet bħal dawn? Mela allura tagħmel tajjeb jekk timita l-​kwalitajiet murijin minn Filippu l-​evanġelista.