Ibqaʼ Uri Sens t’Urġenza!
1 Ġesù kien jaf li ż-żmien li kellu fuq l-art biex iwettaq ix-xogħol taʼ Missieru kien limitat. (Ġw. 9:4) Għaldaqstant, hu wettaq il-ministeru tiegħu b’sens t’urġenza, u ħarreġ lid-dixxipli tiegħu biex jagħmlu bħalu. (Lq. 4:42-44; 8:1; 10:2-4) Għalih, il-kumditajiet materjali kienu jiġu t-tieni post. (Mt. 8:20) B’hekk, hu rnexxielu jtemm ix-xogħol li Ġeħova kien tah.—Ġw. 17:4.
2 Żmien Limitat: Iż-żmien biex tiġi pridkata l-aħbar tajba “fl-art abitata kollha” wkoll hu limitat. (Mt. 24:14) Il-profeziji tal-Bibbja juru li aħna qed ngħixu fl-aħħar taż-żmien tat-tmiem. Dalwaqt, “dawk li ma jafux lil Alla u dawk li ma jobdux l-aħbar tajba dwar il-Mulej tagħna Ġesù . . . [se] jieħdu l-kastig ġudizzjarju taʼ qerda għal dejjem.” (2 Tess. 1:6-9) Dan il-ġudizzju se jasal b’ħeffa taʼ l-għaġeb u għal għarrieda. (Lq. 21:34, 35; 1 Tess. 5:2, 3) In-nies iridu jiġu f’tagħhom u jindunaw f’liema sitwazzjoni perikoluża jinsabu. Aħna responsabbli li ngħinuhom jiksbu l-approvazzjoni taʼ Ġeħova sakemm għad baqaʼ ż-żmien.—Sof. 2:2, 3.
3 Nagħmlu Kulma Nistgħu: Peress li jagħrfu li “ż-żmien li fadal tqassar,” il-qaddejja t’Alla jagħtu prijorità lix-xogħol taʼ l-ippridkar. (1 Kor. 7:29-31; Mt. 6:33) Xi wħud warrbu minn jeddhom opportunitajiet ekonomiċi jew interessi persunali oħra sabiex iżidu s-sehem tagħhom fil-ministeru. (Mk. 10:29, 30) Oħrajn qed ikomplu jkollhom ‘ħafna x’jagħmlu fix-xogħol tal-Mulej’ minkejja l-provi li jgħaddu minnhom. (1 Kor. 15:58) Ħafna wħud ilhom ħafna snin jiddikjaraw fil-pubbliku l-aħbar tajba mingħajr ma jiddubitaw. (Ebr. 10:23) Ġeħova jqishom bħala taʼ valur kbir dawn is-sagrifiċċji kollha li jappoġġaw l-interessi tas-Saltna.—Ebr. 6:10.
4 Il-fatt li niċċentraw ħajjitna madwar il-qima tagħna lil Ġeħova, li tinkludi x-xogħol taʼ lippridkar, jgħinna nżommu ċar f’moħħna l-jum taʼ Ġeħova. Dan jipproteġina milli nħallu lilna nfusna niġu aljenati bid-dinja taʼ Satana u jsaħħilna d-determinazzjoni li nibqgħu nuru kondotta qaddisa. (2 Pt. 3:11-14) Tabilħaqq, jekk inwettqu l-ministeru tagħna b’sens t’urġenza nistgħu nsalvaw, kemm lilna nfusna u kemm lil dawk li jisimgħuna.—1 Tim. 4:16.