Kaxxa għall-Mistoqsija
◼ Liema hu l-aħjar mod biex jingħataw kontribuzzjonijiet għall-benefiċċju taʼ ħutna fil-bżonn f’pajjiżi oħra?
Minn żmien għal żmien, nisimgħu dwar ħutna f’xi pajjiż ieħor li huma fi bżonn materjali minħabba xi persekuzzjoni, diżastru, jew ċirkustanzi diffiċli oħra. Xi aħwa ħassew li għandhom jibagħtu xi flus direttament lill-uffiċċju tal-fergħa f’dawn il-pajjiżi, u wrew ix-xewqa tagħhom li l-flus jintużaw biex jgħinu lil ċertu individwu, xi kongregazzjoni partikulari, jew xi proġett tal-bini li jagħżlu huma.—2 Kor. 8:1-4.
Filwaqt li tħassib kollu mħabba bħal dan għal sħabna fit-twemmin hu taʼ min ifaħħru, spiss ikun hemm bżonnijiet li huma iktar urġenti minn dawk li jkollu f’moħħu dak li jkun qed jikkontribwixxi. F’xi każi, il-bżonn li għalih ikunu ntbagħtu l-flus ikun diġà twettaq. M’għandniex xi ngħidu, aħna nistgħu nkunu fiduċjużi li meta jintbagħtu xi kontribuzzjonijiet lill-uffiċċju tal-fergħa lokali għax-xogħol taʼ madwar id-dinja, għall-Fond għas-Swali tas-Saltna, jew għall-għajnuna f’każ taʼ diżastri, dawn id-donazzjonijiet se jintużaw skond kif ikun jixtieq dak li jkun bagħathom.
L-aħwa fil-fergħat kollha ġew imħarrġin sew biex iwieġbu malajr għal xi bżonnijiet li ma jkunux mistennijin. F’kull każ, il-fergħa żżomm il-Ġemgħa li Tiggverna informata rigward il-kwistjoni. Jekk ikun hemm bżonn taʼ iktar għajnuna, il-Ġemgħa li Tiggverna għandha mnejn tistieden lil xi fergħat fil-viċin biex jgħinu jew jistgħu jintbagħtu xi fondi direttament mill-kwartieri ġenerali.—2 Kor. 8:14, 15.
Għalhekk, il-kontribuzzjonijiet kollha għax-xogħol taʼ madwar id-dinja, għall-proġetti taʼ bini f’pajjiżi oħra, jew għall-għajnuna f’każ taʼ diżastri għandhom jintbagħtu lill-uffiċċju tal-fergħa fil-pajjiż taʼ fejn toqgħod, direttament jew permezz tal-kongregazzjoni. B’dan il-mod, “l-ilsir leali u għaqli,” permezz taʼ larranġamenti organizzazzjonali stabbiliti mill-Ġemgħa li Tiggverna, jieħu ħsieb il-bżonnijiet tal-fratellanza madwar id-dinja b’mod li jirrifletti l-ordni.—Mt. 24:45-47; 1 Kor. 14:33, 40.