Skeda tal-​Familja—Servizz taʼ l-​Għalqa Bħala Familja

¹ Ġeħova jitgħaxxaq jara liż-​żgħażagħ ifaħħru lil ismu. (Salm 148:​12, 13) Fi żmien Ġesù anki ‘ċ-​ċkejknin u t-​trabi tal-​ħalib ipprovdew it-​tifħir’ lil Alla. (Mt. 21:​15, 16) L-​istess qed jiġri llum. Ġenituri, kif tistgħu tgħinu lil uliedkom biex isiru wħud żelużi li jfaħħru lil Ġeħova fil-​ministeru Kristjan? Għal darb’oħra, kif ġie enfasizzat fl-​artiklu t’hawn fuq dwar il-​laqgħat tal-​kongregazzjoni, fattur fundamentali hu l-​eżempju tagħkom. Wieħed missier tkellem għall-​ġenituri taʼ kullimkien meta qal: “It-​tfal ma jagħmlux dak li tgħid int; jagħmlu dak li tagħmel!”

² Oħt li trabbiet minn ġenituri li għandhom il-​biżaʼ t’Alla tiftakar: “Qatt ma konna nqumu s-​Sibt fil-​għodu u nistaqsu jekk hux se mmorru fil-​ministeru. Konna nafu li se mmorru.” Bl-​istess mod, tistaʼ tnaqqax f’uliedek l-​importanza tax-​xogħol taʼ l-​ippridkar billi tistabbilixxi rutina konsistenti kull ġimgħa biex tieħdu sehem fis-​servizz taʼ l-​għalqa bħala familja. Dan mhux biss se jħalli lil uliedek jaraw lilek u jitgħallmu minnek, imma wkoll se jippermettilek tosserva l-​attitudni, il-​manjieri, u l-​kapaċitajiet li qed jiżviluppaw huma.

³ Taħriġ Progressiv: Sabiex it-​tfal jieħdu pjaċir fil-​ministeru, iridu jkunu preparati sabiex jieħdu sehem b’mod effettiv. L-​oħt li kkwotajna qabel qalet ukoll: “Aħna qatt ma konna mmorru biex sempliċement nimxu wara l-​ġenituri u nakkumpanjawhom fix-​xogħol tagħhom. Konna nafu li se nieħdu sehem, anki jekk kien biss li ndoqqu l-​qanpiena u nħallu fuljett. Bi preparazzjoni bir-​reqqa qabel l-​attivitajiet taʼ kull tmiem il-​ġimgħa, konna nkunu nafu x’se ngħidu.” Tistaʼ tipprovdi taħriġ bħal dan għal uliedek billi tieħu ftit minuti kull ġimgħa matul l-​istudju tal-​familja jew f’xi ħin ieħor biex tippreparahom għall-​ministeru.

⁴ L-​ippridkar flimkien bħala familja jagħtikom opportunità oħra biex tnaqqxu l-​verità f’uliedkom. Missier Kristjan kien jieħu lit-​tifla miegħu meta kien jimxi għaxar kilometri kull naħa biex iqassam il-​fuljetti lin-​nies tar-​raħal f’wied li kien fil-​qrib. “Kien matul dawk il-​mixjiet,” tiftakar b’għożża t-​tifla, “li missieri naqqax il-​verità f’qalbi.” (Dt. 6:7) Jalla int ukoll tiġi mbierek talli tagħmel is-​servizz taʼ l-​għalqa tal-​familja tiegħek parti mill-​iskeda taʼ kull ġimgħa.