Uri Interess Persunali​—Billi Tistaqsi Mistoqsijiet u Tagħti Widen

¹ Il-​maġġuranza tan-​nies jieħdu pjaċir jaqsmu l-​opinjonijiet tagħhom, imma jiddejqu meta xi ħadd jippridkalhom jew jinterrogahom. Għalhekk, bħala ministri Kristjani rridu nitgħallmu s-​sengħa taʼ li nużaw il-​mistoqsijiet biex ngħinu n-​nies jesprimu ruħhom.​—Prov. 20:5.

² Il-​mistoqsijiet tagħna għandhom iqanqlu, mhux jintimidaw. Meta jkun qed jippriedka minn dar għal dar, wieħed ħu jistaqsi: “Taħseb li qatt se jkun hawn żmien meta n-​nies jittrattaw lil xulxin bid-​dinjità u bir-​rispett?” Skond it-​tweġiba, hu jkompli billi jgħid, “X’taħseb li hemm bżonn biex inwettqu dan?” jew “Għala tħossok hekk?” Meta jkun qed jagħti xiehda informali u f’postijiet pubbliċi, ħu ieħor jistaqsi lil dawk li għandhom it-​tfal, “X’jogħġbok l-​iktar dwar li tkun ġenitur?” Imbagħad hu jistaqsi, “Fuqiex tinkwieta l-​iktar?” Innota li dawn il-​mistoqsijiet iħallu lin-​nies jesprimu l-​ħsibijiet tagħhom mingħajr ma ndaħħluhom f’sitwazzjoni imbarazzanti. Peress li ċ-​ċirkustanzi jvarjaw, forsi jkollna naġġustaw is-​suġġett u l-​istil tal-​mistoqsijiet tagħna biex jaqblu maʼ dawk fit-​territorju tagħna.

³ Ngħinu lin-​Nies Jesprimu Ruħhom: Jekk in-​nies huma lesti jaqsmu magħna l-​ħsibijiet tagħhom, ismaʼ bil-​paċenzja mingħajr ma twaqqafhom għal xejn b’xejn. (Ġak. 1:​19) B’qalb tajba irrikonoxxi l-​kummenti tagħhom. (Kol. 4:6) Tistaʼ sempliċement tgħid: “Interessanti. Grazzi talli qsamt il-​ħsibijiet tiegħek miegħi.” Faħħarhom jekk tistaʼ tagħmel dan b’mod sinċier. B’tattika staqsihom mistoqsijiet oħra biex issir taf x’jaħsbu u għala jħossuhom hekk. Fittex dak li għandkom komuni bejnietkom. Meta tkun trid tidderieġi l-​attenzjoni tagħhom lejn skrittura tistaʼ tgħid, “Qatt ikkunsidrajt dan bħala possibbiltà?” Evita li tkun dommatiku jew argumentattiv.​—2 Tim. 2:​24, 25.

⁴ Kif ħaddieħor iwieġeb għall-​mistoqsijiet tagħna jistaʼ jiddependi ħafna minn kemm aħna nisimgħu. In-​nies jindunaw jekk aħniex tassew nisimgħu bis-​sinċerità. Indokratur li jivvjaġġa osserva: “Meta turi li trid tismaʼ lin-​nies bil-​paċenzja, dan ikollu l-​effett taʼ l-​għaġeb li jappella u hu turija mill-​isbaħ taʼ interess persunali mill-​qalb.” Meta tismaʼ lil oħrajn tkun qed tagħtihom unur, u tistaʼ tqanqalhom jisimgħu l-​aħbar tajba li aħna nħabirku biex naqsmu.​—Rum. 12:10.