Għajnuna li Hi Disponibbli

1. Wieħed kif jistaʼ jiddgħajjef spiritwalment?

¹ Anna, oħt miżżewġa raġel li ma jemminx u li xogħolha jiħdilha ħafna ħin, sabitha diffiċli tattendi l-​laqgħat Kristjani b’mod regulari, tipparteċipa fil-​ministeru, u tistudja l-​Kelma t’Alla. Għalkemm baqgħet tħobb lil Ġeħova, hi saret inattiva. B’ferħ irċiviet għajnuna spiritwali minn anzjani li kienu konċernati.

2. Il-​Kristjani kollha b’liema mod jistgħu juru li huma disposti biex jgħinu?

² Il-​fatt li naċċettaw l-​għajnuna spiritwali li toffrilna l-​kongregazzjoni Kristjana juri kemm nistrieħu fuq Ġeħova nnifsu. Billi jimitaw l-​għajnuna bi mħabba li wera Ġesù Kristu, l-​anzjani fil-​kongregazzjoni jfittxu opportunitajiet biex joffru inkuraġġiment u għajnuna prattika lil dawk li qegħdin jesperjenzaw diffikultajiet f’li jwettqu l-​attivitajiet spiritwali tagħhom. ( 1 Tess. 5:14) Ħafna drabi kelma taʼ inkuraġġiment ibbażata fuq Skritturi li jqawwu l-​qalb tkun eżatt dak li jkun hemm bżonn. Il-​Kristjani kollha, mhux biss l-​anzjani, għandhom jieħdu l-​inizjattiva biex jgħinu lil dawk li jinsabu temporanjament f’kundizzjoni dgħajfa. M’hemmx dubju li lkoll esperjenzajna l-​qawwa taʼ “kelma li tingħad f’waqtha.”​—Prov. 25:11; Is. 35:​3, 4.

3, 4. X’hemm involut f’li ngħinu lill-​oħrajn, u kif nistgħu nagħmlu dan?

³ Ħu l-​Inizjattiva: Li nuru interess bi mħabba f’dawk li għandhom bżonn l-​għajnuna jirrikjedi li nieħdu l-​inizjattiva aħna, inħossu għall-​oħrajn, u nuru ħeġġa. Meta Ġonatan sar jaf bis-​sitwazzjoni taʼ niket li kien fiha David, hu “qabad u mar ħdejn David f’Ħores u qawwielu qalbu f’Alla.” (1 Sam. 23:​15, 16) Għin lill-​oħrajn b’mod ħanin. Kliem motivat minn interess ġenwin jipproduċi l-​aħjar riżultati. Iktar minn hekk, Ġesù wera b’mod ċar li jirrikjedi sforz għaqli u bi skop biex nerġgħu nirbħu lil ħutna spiritwali. (Lq. 15:​4) Meta jkollna xewqa qawwija li ngħinu lil persuna oħra, se niġu motivati biex nipperseveraw f’li noffru l-​għajnuna anki jekk il-​progress ma jkunx jidher mill-​ewwel.

⁴ Kemm ikun taʼ inkuraġġiment meta nieħdu l-​inizjattiva biex nistiednu lill-​oħrajn, bħal dawk li huma fl-​istudju tal-​ktieb tagħna, biex jakkumpanjawna fil-​ministeru! Hekk kif nassistu lil xi qaddej seħibna taʼ Ġeħova biex jieħu sehem fil-​ministeru, nistgħu nużaw l-​opportunità biex ninkuraġġuh. Mumenti taʼ ferħ bħal dawn li nqattgħu flimkien fis-​servizz taʼ Ġeħova huma inkuraġġanti b’mod speċjali għal dawk li qegħdin jerġgħu jiksbu l-​bilanċ spiritwali tagħhom.

5. Liema għajnuna jistgħu joffru l-​anzjani f’xi ċirkustanzi?

⁵ Arranġament bi Mħabba: Dawk li ilhom ma jieħdu sehem fix-​xogħol taʼ l-​ippridkar jew ilhom ma jissieħbu mal-​kongregazzjoni għal xi żmien forsi jkollhom bżonn iżjed għajnuna biex jissaħħu fil-​fidi. Studju persunali tal-​Bibbja minn xi pubblikazzjoni bħalma hu l-​ktieb Qim lill-​Uniku Alla Veru, Ersaq Qrib Lejn Jehovah jew Il-​Bibbja X’Tgħallem Verament? jistaʼ jkun eżatt dak li hemm bżonn. Minħabba li l-​persuna tkun diġà mgħammda, ġeneralment ma jkunx hemm bżonn li l-​istudju jitkompla għal perijodu twil taʼ żmien. Il-​Kumitat tas-​Servizz tal-​Kongregazzjoni għandu joqgħod attent u jara min jistaʼ jibbenefika minn dan il-​provvediment.​—Ara l-​Kaxxa għall-​Mistoqsija fil-​Ministeru tas-​Saltna taʼ Novembru 1998 u Diċembru 2000.

6. Waħda oħt kif reġgħet kisbet is-​saħħa spiritwali?

⁶ Anna, li ssemmiet qabel, kienet grata għall-​fatt li l-​anzjani offrewlha li tmur oħt matura spiritwalment biex tistudja magħha. Erbaʼ sessjonijiet taʼ studju kienu dak li kellha bżonn biex tersaq qrib lejn Ġeħova mill-​ġdid. Hi reġgħet bdiet tattendi l-​laqgħat tal-​kongregazzjoni u għal darb’oħra tkebbset ix-​xewqa tagħha li tfaħħar lil Alla Ġeħova pubblikament. L-​oħt matura għenitha wkoll fil-​ministeru billi ħaditha magħha fuq studji tal-​Bibbja oħrajn sakemm kienet b’saħħitha biżżejjed biex tippriedka minn bieb għal bieb. Għajnuna mill-​qalb kienet kulma kellha bżonn biex terġaʼ tibda l-​attivitajiet spiritwali!

7. X’benefiċċji jkun hemm meta nsaħħu lill-​oħrajn spiritwalment?

⁷ Li nsaħħu lil dawk fil-​bżonn iġib barkiet fuq kulħadd. Il-​wieħed li jkun qed jiġi megħjun igawdi l-​hena li jiġi meta nersqu qrib lejn Ġeħova u ninvolvu ruħna fl-​attivitajiet taʼ l-​organizzazzjoni Tiegħu. L-​anzjani jifirħu meta jaraw progress spiritwali bħal dan. (Lq. 15:​5, 6) Il-​membri tal-​kongregazzjoni jingħaqdu flimkien f’unità u juru tħassib kollu mħabba għal xulxin. (Kol. 3:​12-14) Ċertament li għandna raġuni tajba biex nimitaw lil Ġeħova li hu dejjem lest biex jgħin!​—Efes. 5:1.