Ingawdu l-​Istudju tal-​Ktieb Il-​Bibbja X’Tgħallem Verament?

¹ Il-​ħarġa tal-​ktieb Il-​Bibbja X’Tgħallem Verament? kienet parti eċċitanti tal-​Konvenzjonijiet Distrettwali “Ubbidjenza Lejn Alla.” Dalwaqt se nkunu qed nużawh b’mod estensiv fil-​ministeru taʼ l-​għalqa, speċjalment meta nikkonduċu studji tal-​Bibbja fid-​djar. Għalhekk, irridu nsiru familjari sew maʼ din il-​pubblikazzjoni ġdida. Dan se jkun possibbli għaliex se nistudjawha fl-​Istudju tal-​Ktieb tal-​Kongregazzjoni mill-​ġimgħa li tibda 17 t’April, 2006.

² L-​indokratur taʼ l-​Istudju tal-​Ktieb tal-​Kongregazzjoni se jiġbed l-​attenzjoni lejn il-​mistoqsijiet li jidhru fil-​bidu taʼ kull kapitlu. Imbagħad l-​istudju se jiġi kondott permezz tal-​mistoqsijiet fl-​aħħar taʼ kull paġna. L-​iskritturi prinċipali se jinqraw u jiġu diskussi, u l-​kaxxa “Dak li Tgħallem il-​Bibbja” fl-​aħħar taʼ kull kapitlu se tkun t’għajnuna biex tirrivedi l-​materjal peress li l-​kaxxa fiha t-​tweġibiet Skritturali tal-​mistoqsijiet fil-​bidu tal-​kapitlu. Se tieħu gost twieġeb minħabba li dan il-​ktieb ikopri s-​suġġetti b’mod ċar, sempliċi, u interessanti.

³ L-​appendiċi taʼ dan il-​ktieb tipprovdi dettalji dwar diversi suġġetti. Inkunu nistgħu nużaw dan il-​materjal meta l-​istudenti tal-​Bibbja jkollhom bżonn iktar informazzjoni fuq ċertu suġġett. Porzjonijiet mill-​appendiċi kultant se jiġu diskussi matul l-​Istudju tal-​Ktieb tal-​Kongregazzjoni. Il-​materjal kollu taʼ l-​appendiċi fuq xi suġġett se jinqara mill-​qarrejja, u l-​artikli itwal jistgħu jiġu diskussi f’sezzjonijiet. M’hemmx mistoqsijiet għall-​istudju fl-​appendiċi. Imma l-​indokratur jistaʼ jieħu kummenti minn dawk preżenti billi jistaqsi mistoqsijiet li joħorġu l-​punti ewlenin.

⁴ L-​istudji tal-​ktieb X’Tgħallem il-​Bibbja? se jimxu b’pass mgħaġġel fl-​Istudju tal-​Ktieb tal-​Kongregazzjoni. M’għandniex għalfejn nimxu bl-​istess pass meta nistudjaw din il-​pubblikazzjoni m’oħrajn, speċjalment jekk għandhom ftit jew xejn għarfien mill-​Bibbja. (Atti 26:​28, 29) Matul l-​istudji tal-​Bibbja fid-​djar, se jkollna bżonn niddiskutu l-​iskritturi iktar bir-​reqqa, nispjegaw it-​tixbihat, eċċ. Mela agħmilha l-​mira tiegħek li tattendi kull ġimgħa u tipparteċipa bis-​sħiħ fl-​istudju tagħna tal-​ktieb Il-​Bibbja X’Tgħallem Verament?