Kif Nużaw il-​Ktieb “Fl-​Imħabba t’Alla” Biex Nikkonduċu Studji tal-​Bibbja

1. X’inhu l-​iskop tal-​ktieb “Fl-​Imħabba t’Alla”?

¹ Kemm konna ferħanin meta fil-​Konvenzjoni Distrettwali “Gwidati mill-​Ispirtu t’Alla” rċivejna l-​ktieb il-​ġdid “Żommu Ruħkom fl-​Imħabba t’Alla”! Bħalma ġie mħabbar, din il-​pubblikazzjoni ġiet magħmula biex tgħinna nkunu nafu u nħobbu l-​livelli taʼ Ġeħova dwar il-​kondotta u mhux biex tgħallem duttrini bażiċi tal-​Bibbja. M’aħniex se noffru dan il-​ktieb minn bieb għal bieb.

2. Kif se tintuża din il-​pubblikazzjoni, u maʼ min?

² Dan il-​ktieb se jservi bħala t-​tieni pubblikazzjoni li għandha tiġi studjata maʼ l-​istudenti tal-​Bibbja wara li jlestu l-​ktieb Il-​Bibbja X’Tgħallem? Żomm f’moħħok li mhux kulħadd jieħu l-​istess ammont taʼ żmien biex jikber spiritwalment. Kull studju għandu jintgħamel b’pass komdu għall-​istudent. Agħmel żgur li l-​materjal kunsidrat jinftiehem b’mod ċar. F’ħafna każi, dan il-​ktieb m’għandux jintuża biex jinbdew studji tal-​Bibbja maʼ nies li forsi diġà studjaw diversi kotba fil-​passat imma li m’humiex qed jattendu l-​laqgħat tal-​kongregazzjoni u li b’mod ċar ma jridux iġibu ħajjithom fi qbil mal-​veritajiet tal-​Bibbja li ġew mgħallmin.

3. X’għandna nagħmlu jekk bħalissa qed nikkonduċu studju bil-​ktieb Qim lil Alla?

³ Jekk bħalissa qed tikkonduċi studju bil-​ktieb Qim lil Alla u qiegħed fl-​aħħar ftit kapitli, tistaʼ tiddeċiedi li tispiċċa din il-​pubblikazzjoni u tinkuraġġixxi lill-​istudent biex jaqra l-​ktieb “Fl-​Imħabba t’Alla” waħdu. Inkella, ikun l-​aħjar li taqleb għall-​ktieb il-​ġdid u tibdieh mill-​bidu. Bħalma hu l-​każ tal-​ktieb Il-​Bibbja X’Tgħallem?, mhux bilfors trid tiddiskuti s-​suġġetti fl-​appendiċi.

4. X’għandna nagħmlu jekk l-​istudent tagħna jitgħammed qabel ma jlesti l-​kotba Il-​Bibbja X’Tgħallem? u “Fl-​Imħabba t’Alla”?

⁴ Jekk student jitgħammed qabel ma jlesti ż-​żewġ kotba, allura l-​istudju għandu jitkompla sakemm jitlesta l-​ktieb “Fl-​Imħabba t’Alla.” Avolja l-​istudent ikun mgħammed, int tistaʼ tniżżel il-​ħin, iż-​żjara lura, u l-​istudju. Pubblikatur li jakkumpanjak u jipparteċipa fl-​istudju jistaʼ jniżżel il-​ħin ukoll.

5. Kif jistaʼ l-​ktieb “Fl-​Imħabba t’Alla” jintuża biex jgħin lill-​pubblikaturi li ilhom għal xi żmien ma jiħdux sehem fil-​ministeru?

⁵ Jekk ġejt inkarigat minn membru tal-​Kumitat tas-​Servizz tal-​Kongregazzjoni biex tikkonduċi studju tal-​Bibbja maʼ xi ħadd li sar inattiv fix-​xogħol taʼ l-​ippridkar, tistaʼ tiġi mitlub biex tikkunsidra kapitli speċifiċi mill-​ktieb “Fl-​Imħabba t’Alla.” Studji bħal dawn m’għandhomx bżonn jibqgħu għaddejjin għal perijodu twil taʼ żmien. Xi provvediment mill-​isbaħ għandna minn dan il-​ktieb il-​ġdid, li ntgħamel biex jgħinna nibqgħu “fl-​imħabba t’Alla”!—Ġuda 21.