Uża b’Mod Effettiv il-​Ħin Tiegħek fil-​Ministeru

¹ Żgur li hemm ħafna x’jitwettaq fil-​ministeru tagħna, u ż-​żmien li fadal qsar. (Ġw. 4:35; 1 Kor. 7:29) Jekk nibqgħu organizzati tajjeb u nippjanaw bil-​quddiem, aħna nistgħu nużaw b’mod effettiv il-​ħin tagħna li warrabna fl-​iskeda għall-​ministeru.

² Kun Preparat: Qabel ma tmur il-​laqgħa għas-​servizz taʼ l-​għalqa, kun ċert li għandek il-​letteratura li se tuża u li taf il-​preżentazzjoni tiegħek. Wara li l-​laqgħa tispiċċa bit-​talba mur direttament lejn it-​territorju. Dan se jippermetti lilek u lil dawk li se jaħdmu miegħek biex twettqu dak kollu li tistgħu fil-​ħin disponibbli għas-​servizz taʼ l-​għalqa.

³ Jekk tkun inkarigat li tikkonduċi l-​laqgħa għas-​servizz taʼ l-​għalqa, ibda fil-​ħin. Żomm il-​laqgħa qasira—mhux iktar minn 10 minuti sa kwarta. Qabel ma tibgħat il-​grupp, kun ċert li kulħadd ikun jaf fejn u maʼ min se jaħdem.

⁴ Matul il-​Ministeru: Ladarba tispiċċa l-​laqgħa għas-​servizz taʼ l-​għalqa, titlifx żmien bla bżonn, imma lesti biex tmur direttament lejn it-​territorju. Jekk tkun taf li se titlaq kmieni mit-​territorju, forsi tistaʼ tirranġa li jkollok it-​trasport tiegħek stess ħalli l-​kumplament tal-​grupp ma jkollux għalfejn jitlaq kmieni. Meta tkun qed taħdem maʼ grupp, ikkunsidra lill-​oħrajn li forsi jkunu qed jistennewk biex ittemm xi diskussjoni. Għandu mnejn li jkollok tħalli bit-​tattika lil xi individwu li jrid jargumenta jew li tirranġa li żżur lura lil xi ħadd li jkun wera interess.—Mt. 10:11.

⁵ Meta tkun qed tagħmel iż-​żjajjar lura, tistaʼ tevita li tivvjaġġa bla bżonn billi żżur lil dawk li jkunu fl-​istess inħawi tiegħek qabel ma tmur f’post ieħor. Forsi tkun tistaʼ ċċempel lil xi wħud minn dawk li tixtieq iżżur biex tkun ċert li se jkunu d-​dar. (Prov. 21:5) Jekk taħseb li se ddum fuq iż-​żjara, dawk li jkunu fil-​grupp tiegħek jistgħu joqogħdu jippridkaw fil-​viċin jew jagħmlu żjara lura oħra.

⁶ Aħna qed ngħixu fi żmien taʼ ħsad spiritwali kbir. (Mt. 9:37, 38) Dalwaqt ix-​xogħol se jispiċċa. Għalhekk, ix-​xewqa tagħna għandha tkun li nużaw b’mod effettiv il-​ħin tagħna waqt li nkunu fil-​ministeru.