Preparat Int Għal Pranzu Spiritwali?

1. X’inhu involut biex jiġi preparat pranzu?

¹ Pranzu jeħtieġ ħafna preparamenti. Irid jinkiseb l-​ikel, jiġi mħejji b’mod delizzjuż, u mbagħad jiġi preżentat. Il-​mod kif jiġi servut l-​ikel irid ikun organizzat. Iktar minn hekk, irid jitlesta l-​post fejn se tittiekel l-​ikla. Il-​mistidnin iridu jippreparaw ukoll, speċjalment jekk se jkollhom triq twila biex jaslu fil-​post. Għalkemm hemm ħafna xogħol involut, huwa taʼ min jagħmlu minħabba li tkun se titgawda ikla nutrijenti u delizzjuża mal-​ħbieb u l-​familja. Dalwaqt, ix-​Xhieda taʼ Ġeħova madwar id-​dinja se jinġabru flimkien fi gruppi żgħar u kbar biex igawdu festa spiritwali antiċipata bil-​kbir—il-​Konvenzjoni Distrettwali “Ibqaʼ Għassa!” Diġà sar ħafna xogħol biex jiġi mħejji l-​programm u biex jitlestew l-​affarijiet. Aħna lkoll ġejna mistidnin. Sabiex inkunu fl-​attendenza u nieħdu l-​akbar benefiċċju, aħna wkoll irridu nippreparaw personalment.—Prov. 21:5.

2. X’hemm bżonn li nagħmlu sabiex inkunu preżenti għall-​pranzu spiritwali tagħna kollu kemm hu?

² Ikseb l-​Akbar Benefiċċju: Lestejt il-​pjanijiet tiegħek ħalli tkun preżenti għall-​pranzu kollu kemm hu? Jekk hemm bżonn, kellem lill-​imgħallem tiegħek biex tinformah li se tkun qed tattendi s-​sessjonijiet kollha tal-​konvenzjoni tiegħek, inkluż l-​ewwel ġurnata. Lestejt l-​arranġamenti għat-​trasport u fejn se toqgħod? L-​anzjani għandhom ikunu ċerti li jieħdu ħsieb lil dawk imdaħħlin fiż-​żmien u l-​morda kif ukoll oħrajn li forsi għandhom bżonn l-​għajnuna.—Ġer. 23:4; Gal. 6:10.

3. Għala m’għandniex nattendu konvenzjoni internazzjonali li ma ġejniex mistidnin għaliha?

³ Xi pajjiżi se jgawdu konvenzjonijiet internazzjonali. Żommu f’moħħkom li kongregazzjonijiet u delegati barranin speċifiċi ġew mistidnin għal dawn il-​ġrajjiet. Meta saru dawn l-​arranġamenti, l-​uffiċċju tal-​fergħa ikkalkula bir-​reqqa kemm se jistieden, billi kkunsidra l-​ammont taʼ siġġijiet u l-​kmamar tal-​lukandi disponibbli. Jistaʼ jkun hemm iffollar żejjed jekk il-​pubblikaturi jattendu konvenzjoni internazzjonali li ma ġewx mistidnin għaliha.

4. Liema tfakkiriet se jgħinuna nkunu lesti għall-​bidu tal-​programm kuljum?

⁴ Ipprepara li tasal għall-​konvenzjoni kmieni biżżejjed kuljum ħalli ssib post qabel ma jibda l-​programm. Uża ftit minuti qabel ma tibda s-​sessjoni ħalli tagħti daqqa t’għajn lill-​programm stampat. Dan se jgħinek tipprepara qalbek għall-​informazzjoni li tkun se tiġi preżentata. (Esd. 7:10) Meta ċ-​chairman tas-​sessjoni jintroduċi l-​intervall mużikali, ħu gost ismaʼ l-​mużika u mbagħad kun lest biex tieħu sehem fl-​għanja u t-​talba tal-​ftuħ.

5. Kif tistaʼ l-​familja tagħna tieħu l-​akbar benefiċċju mill-​programm?

⁵ Jekk membri taʼ familja jpoġġu flimkien matul il-​konvenzjoni, il-​ġenituri se jkunu ċerti li uliedhom qed jisimgħu b’attenzjoni għall-​programm. (Dt. 31:12) Ilkoll kemm aħna inkuraġġiti li nsegwu fil-​Bibbji tagħna hekk kif jinqraw l-​iskritturi. Jekk tieħu noti qosra tistaʼ tiġi megħjun toqgħod iktar attent. Iktar tard, in-​noti tiegħek se jgħinuk tiftakar il-​punti prinċipali tat-​taħditiet. Irreżisti t-​tentazzjoni li titkellem għalxejn matul is-​sessjoni jew li titlaq minn postok. Jekk għandek telefon ċellulari, tħallihx itellef lilek jew lil oħrajn matul il-​programm. Wara s-​sessjonijiet taʼ kull ġurnata, għala ma tiddiskutix m’oħrajn dak li laqtek mill-​programm?

6. Liema hu aspett li jispikka tal-​konvenzjonijiet tagħna, u kif nistgħu ngawduh bis-​sħiħ?

⁶ Fil-​konvenzjoni distrettwali, għandna l-​opportunità li ngawdu rabta unika maʼ ħutna li ma tiġix esperjenzata fid-​dinja. (Salm 133:1-3; Mk. 10:29, 30) Għala ma tagħmilhiex mira li tintroduċi lilek innifsek maʼ dawk li jkunu bil-​qiegħda ħdejk u tkellimhom matul il-​brejk taʼ wara nofsinhar? Dan hu wieħed mill-​vantaġġi li hemm meta ġġib xi ħaġa żgħira x’tiekol u toqgħod fil-​viċinanzi tal-​lukanda Dolmen jew tiekol f’wieħed mir-​restoranti tal-​lukanda minflok ma tmur tiekol f’restorant fuq barra. Kun ċert li ma titlifx opportunità bħal din biex ninkuraġġixxu lil xulxin.—Rum. 1:11, 12.

7. Liema tħejjijiet għandna nagħmlu rigward l-​ilbies li se nilbsu?

⁷ L-​Ilbies: Huwa taʼ min jinnota li Ġeħova kkmanda lill-​Israelin biex jagħmlu l-​freneż fit-​truf taʼ djul ilbieshom, b’lazz blu ’l fuq mill-​frenża. (Num. 15:37-41) Din kienet tfakkira viżibbli li huma kienu poplu mwarrab għall-​qima taʼ Ġeħova. Illum, l-​ilbies dinjituż u modest li jintlibes fil-​konvenzjonijiet jisseparana mid-​dinja. Dan iservi bħala xiehda qawwija lil min jarana anki meta noħorġu nieklu wara l-​programm. Għalhekk, aħseb b’attenzjoni minn qabel dwar l-​ilbies li se tilbes.

8. Kif nistgħu nagħtu xiehda lil oħrajn meta nkunu fil-​belt tal-​konvenzjoni?

⁸ Agħti Xiehda: Bi ftit ħsieb minn qabel, forsi nkunu nistgħu nagħtu xiehda lin-​nies waqt li nkunu fil-​belt tal-​konvenzjoni. Wieħed ħu li mar f’restorant maʼ martu wara l-​programm sempliċement ipponta lejn il-​badge tal-​konvenzjoni u staqsa lill-​wejter: “Rajt lil ħafna nies lebsin din il-​badge?” Il-​wejter qal li kien innotahom u ħaseb dwar xiex setgħu kienu. Dan wassal għal konversazzjoni, u l-​ħu stieden lill-​wejter biex jiġi l-​konvenzjoni.

9. Kif nistgħu nuru l-​apprezzament tagħna lil Ġeħova, il-​Wieħed li jistidinna?

⁹ Għalkemm huma ħutna li se jippreżentaw it-​taħditiet, l-​intervisti, u t-​turijiet kollha, huwa Missierna tas-​sema Ġeħova, il-​Wieħed li qed jipprovdi bi mħabba dan il-​pranzu spiritwali kull sena. (Is. 65:13, 14) Aħna nuru l-​apprezzament tagħna lill-​Wieħed li jistidinna billi nkunu preżenti kuljum u nduqu kull porzjon taʼ ikel spiritwali li jkun qed jiġi servut. Lestejt il-​preparamenti tiegħek ħalli tagħmel dan?

[Kaxxa f’paġna 6]

Tfakkiriet għall-​Konvenzjoni Distrettwali

◼ Ħinijiet tal-​Programm: Il-​programm se jibda fid-​9:20 a.m. fit-​tlett ijiem kollha. Il-​bibien se jinfetħu fit-​8:00 a.m. Meta titħabbar il-​mużika tal-​bidu, ilkoll kemm aħna għandna nsibu postna sabiex il-​programm ikun jistaʼ jibda bid-​dinjità. Il-​Ġimgħa u s-​Sibt il-​programm se jispiċċa fil-​4:55 p.m., u l-​Ħadd fl-​4:00 p.m. Għall-​konvenzjonijiet internazzjonali, il-​programm tal-​Ħamis se jibda fis-​1:20 p.m. u jikkonkludi fil-​4:55 p.m.

◼ Postijiet: Il-​postijiet jistgħu jintrefgħu biss għal dawk li jivvjaġġaw miegħek fl-​istess karozza jew jgħixu miegħek fl-​istess dar.

◼ Donazzjonijiet: Nistgħu nuru l-​apprezzament tagħna għall-​arranġamenti tal-​konvenzjoni billi nagħtu kontribuzzjonijiet volontarji għax-​xogħol taʼ madwar id-​dinja fis-​Sala tas-​Saltna tagħna jew fil-​konvenzjoni. Kwalunkwe ċekk li jingħata b’kontribuzzjoni fil-​konvenzjoni għandu jintgħamel pagabbli lil “IBSA (Malta).”

◼ Aċċidenti u Emerġenzi: Servizzi li jieħdu ħsieb l-​emerġenza jirċievu ħafna telefonati mit-​telefons ċellulari fuq affarijiet żgħar. Jekk tinqalaʼ xi emerġenza medika fil-​post tal-​konvenzjoni, jekk jogħġbok ikkuntattja lil attendant fil-​qrib, li se javża mill-​ewwel lid-​Dipartiment taʼ l-​Ewwel Għajnuna sabiex dawk fostna li huma kwalifikati biex jagħtu l-​ewwel għajnuna jkunu jistgħu jiddeċiedu kemm hi gravi s-​sitwazzjoni u jagħtu l-​assistenza tagħhom. Jekk ikun hemm bżonn, dawk li jagħtu l-​ewwel għajnuna se jċemplu 112.

◼ Żraben: Kull sena għadd taʼ inċidenti jseħħu li huma konnessi maż-​żraben. Ikun aħjar li nagħżlu żraben modesti li jiġuna sew u li jippermettulna nimxu bis-​sigurtà fit-​taraġ, fuq l-​ispralli tal-​ħadid, u affarijiet bħal dawn.

◼ Rikording: Apparat li jirrekordja m’għandux jitqabbad mas-​sistema taʼ l-​elettriku jew tas-​sawnd tal-​faċilità u jistaʼ jintuża biss b’tali mod li ma jtellifx lil oħrajn.

◼ Puxċers: Il-​puxċers m’għandhomx jinġiebu fil-​post tal-​konvenzjoni. Madankollu, jistgħu jinġiebu siġġijiet tat-​tfal li jipprovdu sigurtà (child-safety seats) u li għandhom jitpoġġew fis-​sod u b’attenzjoni fuq siġġu ħdejn il-​ġenituri.

◼ Fwejjaħ: Ħafna konvenzjonijiet qed isiru f’postijiet magħluqin fejn niddependu minn ventilazzjoni mekkanika. Għalhekk, inkunu qed nuru qalb tajba min-​naħa tagħna jekk nillimitaw l-​użu taʼ fwejjaħ qawwijin li jistgħu jikkaġunaw irritazzjoni lil dawk li jbatu bi problemi respiratorji jew problemi relatati.—1 Kor. 10:24.

◼ Formoli Follow-Up: Formola Please Follow Up (S-43) għandha tintuża biex tiġi provduta informazzjoni dwar kulmin juri interess minħabba li nagħtuh xiehda informali matul il-​konvenzjoni. Il-​pubblikaturi għandhom iġibu formola jew tnejn tal-​follow-up meta jmorru l-​konvenzjoni. Il-​formoli mimlijin jistgħu jingħataw lis-​segretarju tal-​kongregazzjoni tiegħek wara l-​konvenzjoni.—Ara l-​Ministeru tas-​Saltna taʼ Frar 2005, pġ. 6.

◼ Restoranti: Onora isem Ġeħova bl-​imġiba mill-​aqwa tiegħek fir-​restoranti. F’Malta normalment jitħallew tips taʼ 15 fil-​mija, jiddependi mis-​servizz.

◼ Lukandi: (1) Ara li ma joqogħdux iktar nies fil-​kamra miegħek minn kemm hu permess. (2) Jekk ikollok tikkanċella l-​kamra riservata, avża l-​lukanda immedjatament. (3) Itlob għal troli tal-​bagalji biss meta tkun lest li tużaha, u rritornaha immedjatament ħalli jkun jistaʼ jużaha ħaddieħor. (4) Issajjarx fi kmamar fejn mhux permess it-​tisjir. (5) Ħalli tipp kuljum għal min inaddaflek il-​kamra. (6) Tabbużax mill-​kolazzjon, il-​kafè, jew is-​silġ li jingħata b’mod komplimentari u li hu disponibbli għall-​viżitaturi waqt li jkunu fil-​lukanda. (7) Uri l-​frott taʼ l-​ispirtu l-​ħin kollu meta tittratta maʼ l-​istaff tal-​lukanda. (8) Jekk tiġi ċarġjat iżżejjed jew tingħata kontijiet għal affarijiet li ma tlabtx għalihom jew li m’użajtx, agħmel l-​ilment tiegħek fir-​reception tal-​lukanda u informa lid-​dipartiment li jieħu ħsieb l-​akkomodazzjoni fil-​konvenzjoni malajr kemm jistaʼ jkun. (9) Jekk tinqalaʼ problema bil-​kamra tiegħek fil-​lukanda, kun ċert li tinforma lid-​dipartiment li jieħu ħsieb l-​akkomodazzjoni waqt li tkun fil-​konvenzjoni.