Tliet Suġġerimenti Biex Ittejjeb it-​Tagħlim Tiegħek

1. Għala għandna nipprovaw intejbu t-​tagħlim tagħna?

¹ Kull pubblikatur Kristjan hu għalliem. Sew jekk qed nagħmlu l-​ewwel żjara, żjara lura, jew nikkonduċu studju tal-​Bibbja, aħna nkunu qed ngħaddu informazzjoni. U l-​informazzjoni li ngħallmu hi informazzjoni speċjali. Aħna qed nitfgħu dawl fuq “il-​kitba qaddisa,” li tistaʼ tagħmel in-​nies ‘għorrief għas-​salvazzjoni.’ (2 Tim. 3:15) Xi privileġġ tal-​għaġeb għandna! Dawn li ġejjin huma tliet suġġerimenti biex intejbu t-​tagħlim tagħna.

2. Kif nistgħu ngħallmu bis-​sempliċità?

² Bis-​sempliċità: Meta nkunu familjari sew maʼ suġġett, jistaʼ jagħti l-​każ li ninsew kemm tistaʼ tidher komplikata l-​informazzjoni għal xi ħadd li mhuwiex familjari magħha. Għalhekk, meta nkunu qed nikkonduċu studju tal-​Bibbja, m’għandniex nimlew it-​tagħlim tagħna b’koċċ dettalji bla bżonn. Minflok, għandna nenfasizzaw il-​punti prinċipali. Ħafna paroli mhux neċessarjament ifisser tagħlim aħjar. (Prov. 10:19) Ħafna drabi, l-​aħjar ħaġa li tistaʼ tagħmel hi li taqra biss l-​iskritturi prinċipali. Wara li taqra skrittura, iffoka biss fuq il-​parti mill-​iskrittura li tkun qed titkellem fuq is-​suġġett li qed jiġi diskuss. Il-​Prietka taʼ fuq il-​Muntanja, imniżżla f’​Mattew kapitli 5 sa 7, fiha bosta veritajiet profondi. Minkejja dan, Ġesù għallem bis-​sempliċità u uża ftit kliem imma meqjus sew.

3. X’valur għandhom it-​tixbihat u l-​istampi, u liema tip ġeneralment ikunu l-​aħjar?

³ Bit-​tixbihat u bl-​istampi: It-​tixbihat iqanqlu individwu biex jaħseb, biex iħoss, u se jgħinuh biex jibqaʼ jiftakar. Tħossokx li għandek tkun xi wieħed li jibbrilla f’li jirrakkonta l-​istejjer biex tagħti tixbihat tajbin. Bosta drabi, Ġesù uża tixbihat qosra u sempliċi. (Mt. 7:3-​5; 18:2-​4) Stampi sempliċi mpinġijin fuq biċċa karta, jistgħu wkoll ikunu utli ħafna. Bi ftit preparazzjoni minn qabel, int tistaʼ ssib tixbihat effiċjenti.

4. Kif nistgħu nużaw il-​mistoqsijiet b’mod effettiv?

⁴ Bil-​mistoqsijiet: Il-​mistoqsijiet iġiegħlu lill-​istudent tiegħek jaħseb. Għalhekk, wara li tistaqsih mistoqsija, kun paċenzjuż. Jekk taqbad u malajr tagħti t-​tweġiba int stess, ma tkunx taf verament x’fehem l-​istudent tiegħek. Jekk l-​istudent tiegħek jagħti r-​risposta ħażina, minflok ma tikkoreġih, għandu mnejn ikun aħjar li tagħmillu mistoqsijiet oħrajn li se jwassluh għar-​risposta t-​tajba. (Mt. 17:24-​27) M’għandniex xi ngħidu, ħadd minna mhu għalliem perfett. Għalhekk, il-​Bibbja tinkuraġġina biex noqogħdu attenti l-​ħin kollu għat-​tagħlim tagħna. Jekk nagħmlu hekk, se jkollna barkiet dejjiema kemm aħna u kemm dawk li jisimgħuna.—1 Tim. 4:16.