Agħti Xhieda bir-Reqqa
1. L-appostlu Pawlu liema eżempju mill-aħjar ħalla fil-ministeru?
1 “Wettaq bir-reqqa s-servizz tiegħek.” (2 Tim. 4:5, Byington) L-appostlu Pawlu żgur li kellu l-libertà tal-kelma meta ta din it-twissija lil Timotju. Infatti, bejn is-sena 47 u s-sena 56 E.K., Pawlu temm tliet vjaġġi missjunarji. Il-ktieb tal-Atti kemm-il darba jsemmi li Pawlu ta “xiehda bir-reqqa.” (Atti 23:11; 28:23) Aħna kif nistgħu nagħmlu dan fi żmienna?
2. Kif nistgħu nagħtu xhieda bir-reqqa meta nippritkaw minn dar għal dar?
2 Minn Dar Għal Dar: Biex nipprovaw nikkuntattjaw lill-inkwilini li qatt ma semgħu l-aħbar tajba, forsi jkollna nżuruhom f’ħinijiet differenti matul il-jum. Għandu mnejn ir-raġel ikun hemm filgħaxijiet jew fi tmiem il-ġimgħa. Għandna nagħmlu sforz biex inkellmu lil xi ħadd f’kull residenza billi nibqgħu mmorru meta ma nsibu lil ħadd id-dar. Xi ngħidu jekk minkejja l-isforzi tiegħek xorta ma jirnexxilekx? Ittra jew telefonata tistaʼ tħalli riżultati tajbin.
3. Liema opportunitajiet għandek int biex tagħti xhieda pubblikament u b’mod informali?
3 Pubblikament u b’Mod Informali: Il-qaddejja taʼ Ġeħova llum jagħmlu magħruf “l-għerf veru” maʼ dawk kollha li lesti li jagħtu widen. Xi kultant dan jagħmluh “fit-triq” jew “fil-pjazez.” (Prov. 1:20, 21) Meta nkunu għaddejjin bil-ħajja tagħna taʼ kuljum, konxji aħna li għandna nagħtu xhieda? Jistaʼ jingħad li aħna ‘okkupati bis-sħiħ bix-xandir tal-kelma’? (Atti 18:5) Jekk iva, allura qed inwettqu l-obbligu tagħna li “nagħtu xiehda bir-reqqa.”—Atti 10:42; 17:17; 20:20, 21, 24.
4. It-talb u l-meditazzjoni kif se jgħinuna biex nagħtu xhieda bir-reqqa?
4 Però, xi kultant minħabba xi dgħufija persunali jew minħabba l-mistħija, għandu mnejn inżommu lura milli nagħtu xhieda. Nistgħu nkunu żguri li Ġeħova jifhem il-limitazzjonijiet tagħna. (Salm 103:14) Minkejja dan, meta tiġina l-opportunità, nistgħu nitolbuh biex jagħtina l-kuraġġ nitkellmu. (Atti 4:29, 31) Ukoll, meta nagħmlu l-istudju persunali u nimmeditaw fuq il-Kelma t’Alla, nistgħu niffokaw fuq li nkabbru l-apprezzament tagħna għall-valur imprezzabbli tal-aħbar tajba. (Flp. 3:8) Dan se jqanqalna biex inxandruha biż-żelu!
5. Kif jistaʼ jkollna sehem fit-twettiq tal-profezija taʼ Ġoel?
5 Il-profezija taʼ Ġoel bassret li qabel ma jiġi l-jum il-kbir u tal-biżaʼ taʼ Ġeħova, in-nies t’Alla kienu se “jibqgħu sejrin” u ma jħallu assolutament xejn iżommhom lura milli jippritkaw. (Ġoel 2:2, 7-9) Jalla nkunu involuti bis-sħiħ fix-xogħol tal-ippritkar li qatt mhu se jerġaʼ jsir!